SUTUDI-ARTIKEL 19
Soi lobi, du sani a wan letifasi te sama du ogii anga pikinnengee
„Yu á lobi te sama e du ogii anga taawan. Wan sama di e du ogii á man tan anga yu.”—PS. 5:4.
SINGI 142 A howpu fu u e taanga u biibi
SAN WI O LELI *
1-3. (a) Enke fa Psalm 5:4-6 e soi, da fa Yehofa e si a du di sama e du ogii anga taawan? (b) Saide u sa taki a „weiti fu Kelestesi” e kuutu a tyai di sama e tyai umanfasi a pikinnengee?
YEHOFA GADU á lobi te sama e du ogii anga taawan. (Leisi Psalm 5:4-6.) Wan sani di ai buuse tuutuu, a te sama tyai umanfasi a pikinnengee. Wi enke Kotoigi fu Yehofa e buuse den sani di ai buuse, neen meke wi á lobi te sama e tyai umanfasi a pikinnengee.—Rom. 12:9; Heb. 12:15, 16.
2 A „weiti fu Kelestesi” e kuutu ala sowtu ogii di sama e du anga pikinnengee (Gal. 6:2). Saide u sa taki a sani de? Enke fa u be luku aini a artikel a fesi, da a weiti fu Kelestesi na ala den sani di Yesesi be leli den bakaman fi en. A weiti ya e gi u taanga-sikin fu soi lobi anga fu du sani a wan letifasi. Kelesten e wooko anga a weiti ya, neen meke a fasi fa den e libi anga pikinnengee e soi taki den lobi den tuutuu. Den e booko den ede anga den. Ma te sama e tyai umanfasi a wan pikinnengee ai soi taki neen seefi namo ai pakisei. A nai du sani a wan letifasi. A sani ya e meke a pikin fii enke sama nai booko den ede anga en. Ai meke a fii enke sama á lobi en.
3 A tyali taki a suku di gaansama e suku pikinnengee, de enke wan siki di paati a hii goontapu. A siki ya doo te aini a Kelesten kemeente tu. Fa a sani ya du doo aini a Kelesten kemeente? Beibel taki „ogiiman anga bidiigiman” de na ala se. Son wan fu den e puubei fu tyai den fasi ya kon aini a Kelesten kemeente (2 Tim. 3:13). Son sama di taki den e dini Yehofa tyai umanfasi a pikinnengee fu di den meke den sondu fii fu den basi den. Wi o luku saide a du di sama e du a ogii ya anga pikinnengee a wan gaan sondu. Baka dati wi o luku fa owluman sa yeepi a kemeente te wan sama tyai umanfasi a wan pikin efuso te a du wan taa gaan sondu. Wi o luku tu fa mma anga dda sa kibii den pikin fu den fu sama á du ogii anga den. *
A WAN GAAN SONDU
4-5. Saide te wan sama tyai umanfasi a wan pikin, a wan gaan ogii a du anga a pikin?
4 Te den du ogii anga wan pikin, a wan hii pisiten ai fii den bakapisi fu a sani di den du anga en. Den famii, mati anga den Kelesten baala anga sisa di sabi a pikin e fii a sani ya tu. A du di sama e du ogii anga pikinnengee a wan gaan sondu.
5 Te sama tyai umanfasi a wan pikin, a wan gaan ogii a du anga a pikin. A wan gaan sondu te wan sama e du ogii anga wan taawan, moomoo te a á poi yeepi enseefi. Wi o si aini a taa artikel taki na a ogii ya den sama di e tyai umanfasi a pikinnengee e du. A sama e du ogii anga wan pikin di e fitoow en, ai meke a pikin fii enke sama á lobi en. Neen meke u mu du ala san u man fu kibii den yonkuuwan. U mu toosutu den sama di taawan du ogii anga den tu.—1 Tes. 5:14.
6-7. Saide te wan sama tyai umanfasi a wan pikin, a wan gaan ogii a du anga a kemeente? Saide a wan gaan ogii a du anga lanti?
6 Te sama tyai umanfasi a wan pikin, a wan gaan ogii a du anga a kemeente. Te wan sama aini a Kelesten kemeente tyai umanfasi a wan pikin, a sani ya e gi a kemeente polinen (Mat. 5:16; 1 Peit. 2:12). A wan tyali sani taki miliyunmiliyun baala anga sisa e „du ala san den man” fu libi enke fa Yehofa wani, da wan sama namo e poli den nen (Yud. 3). Efu wan sama du wan gaan sondu di e poli a nen fu a kemeente neen a sondu di a du nai hati en, u nai holi en aini a kemeente.
7 Te sama tyai umanfasi a wan pikin, a wan gaan ogii a du anga lanti. Kelesten „mu saka denseefi a lanti ondoo” (Rom. 13:1). Wi e soi taki wi e saka useefi a lanti ondoo te wi e holi den weiti fu a kondee. Efu wan sama aini a kemeente tyai umanfasi a wan pikin a wan gaan ogii a du anga lanti, bika a pasa a weiti fu a kondee. (Luku Toli 25:8 tu.) Den owluman ná abi a leti fu sitaafu sama te den pasa den weiti fu lanti. Ma te wan sama tyai umanfasi a wan pikin, den owluman nai kibii en fu lanti a sooto en (Rom. 13:4). A san a sama paandi, a dati a o koti.—Gal. 6:7.
8. Fa Yehofa e si a du di sama e du ogii anga taawan?
8 Te sama tyai umanfasi a wan pikin, a wan gaan ogii a du anga Gadu (Ps. 51:4). Te wan sama du ogii anga wan taawan, a du ogii anga Yehofa tu. Saide u sa taki a sani ya? Pakisei a Weiti di Gadu be gi den Islayelisama. A Weiti be e soi taki efu wan man fufuu efuso bidiigi wan taawan, da a „sondu fu di a taangayesi Yehofa” (Lef. 6:2-4). Neen meke efu wan sama aini a kemeente tyai umanfasi a wan pikin, a poli a pikin libi. A wan sondu a du anga Gadu. Te wan sama du a sani ya ai poli Yehofa nen. A wan gaan sondu a du a Gadu fesi, neen meke u mu buuse a sani di a du.
9. Sowtu leli a olikanisâsi gi wi aini den ten di pasa? Saide den gi u den leli ya?
9 Den ten di pasa a omen leisi a olikanisâsi soi kiin aini den buku fu u san Beibel e taki fu a du di sama e du ogii anga pikinnengee. A omen artikel aini A Wakititolen anga Ontwaakt! e soi wantu sani di sa yeepi sama te taawan tyai umanfasi a den. Den e soi tu fa taawan sa yeepi den. Den e soi tu fa mma anga dda sa kibii den pikin fu a sani ya á miti den. A olikanisâsi soi den owluman san den mu du te wan sama tyai umanfasi a wan pikin. Den e luku ala yuu efu a de fanowdu fu kengi a fasi fa den e kuutu a toli ya. Saide? Den e du a sani ya fu di den wani yeepi owluman fu wooko anga a weiti fu Kelestesi te den e kuutu a toli ya.
SAN DEN OWLUMAN E DU TE WAN SAMA DU WAN GAAN SONDU?
10-12. (a) San owluman e holi a pakisei te den e kuutu wan toli fu wan sama di du wan gaan sondu? San den e meke moiti fu sabi fosi den kuutu a sama? (b) Enke fa Yakowbesi 5:14, 15 e soi, da san owluman e meke moiti fu du?
10 Te owluman e kuutu wan toli fu wan sama di du wan gaan sondu, den mu wooko anga a weiti fu Kelestesi. Dati wani taki den mu soi lobi, ma den mu du sani enke fa Yehofa wani tu. Neen meke te den sabi taki wan sama du wan gaan sondu, den mu holi omen sani a pakisei. A moo gaan faantiwowtu fu owluman a fu gi Yehofa gaandi. Den mu solugu tu taki sama á gi Yehofa polinen (Lef. 22:31, 32; Mat. 6:9). Den wani yeepi den baala anga sisa fu den anga Yehofa á poli. Den wani yeepi den sama di taawan du ogii anga den tu.
11 Efu a sama di du a sondu a wan Kotoigi, neen a soi taki a sondu di a du e hati en, da den owluman e meke moiti fu yeepi en fi en anga Yehofa toon mati baka. (Leisi Yakowbesi 5:14, 15.) Wan Kelesten di meke den sondu fii fi en basi en te da a du wan gaan sondu de enke wan sama di siki. Dati wani taki en anga Yehofa a ná mati moo. * Den owluman de enke dataa di e yeepi sama fu den anga Yehofa kon bun baka. Den e meke moiti fu yeepi „a sama di siki” [a sama di du a sondu] fu a betee baka. Efu a soi taki a sani di a du e hati en tuutuu, neen a wooko anga den sani di den owluman soi en aini Beibel, en anga Yehofa o toon mati baka.—Toli 3:19; 2 Kor. 2:5-10.
12 A wan gaan faantiwowtu owluman abi. Den e booko den ede anga den sikapu fu Gadu di a gi den fu luku (1 Peit. 5:1-3). Den wani den baala anga sisa fii taki Yehofa e kibii den, neen meke den nai daaidaai te den yee taki wan sama du wan gaan sondu. Den nai daaidaai tu te den yee taki wan sama tyai umanfasi a wan pikin. San den owluman e du te a sani ya pasa? Paragraaf 13, 15 anga 17 o taki fu a toli ya.
13-14. Aini son kondee efu wan sama tyai umanfasi a wan pikin, den mu tyai a toli go a sikowtu. Den owluman e wooko anga den weiti ya?
13 Aini son kondee efu wan sama tyai umanfasi a wan pikin, den mu tyai a toli go a sikowtu. Den owluman e wooko anga den weiti ya? Eeye. Efu a so a weiti fu a kondee taki, da den owluman e wooko anga san a weiti taki (Rom. 13:1). A weiti fu Gadu nai tapu den fu holi den weiti ya (Toli 5:28, 29). Neen meke te owluman yee taki wan sama tyai umanfasi a wan pikin, den e akisi a beikantoo fa den sa wooko anga den weiti fu a kondee.
14 Den owluman e soi a pikin, en mma anga en dda efuso taa sama di sabi a toli, taki den sa tyai a toli go a sikowtu. Efu a sama di du a ogii a wan Kotoigi neen a toli paati noh? A sama di go a sikowtu mu fii enke a poli Yehofa nen? Nono. Na a sama di du a ogii poli Yehofa nen.
15-16. (a) Enke fa 1 Timotiyesi 5:19 e soi, da saide a te tu sama piki taki wan sama du wan ogii fosi den owluman sa sete wan kuutu komte? (b) San den owluman e du te den yee taki wan sama fu a kemeente tyai umanfasi a wan pikin?
15 Aini a olikanisâsi fu Yehofa te den owluman yee taki wan sama du wan gaan sondu, da tu efuso moo sama di sabi a toli mu de fosi den o sete wan kuutu komte. Saide? Beibel e soi taki a disi na a moo bun fasi fu kuutu wan toli. Efu a sama taki a á du a sondu, da a te tu sama di sabi a toli piki fosi den owluman o man sete wan kuutu komte (Deit. 19:15; Mat. 18:16; leisi 1 Timotiyesi 5:19.) A sani ya wani taki a te tu sama piki taki wan sama tyai umanfasi a wan pikin fosi, den sa tyai a toli go a sikowtu? Nono. A á de fu tu sama piki fosi den owluman efuso taa sama sa tyai a toli ya go a sikowtu.
16 Te den owluman yee taki wan sama fu a kemeente tyai umanfasi a wan pikin, da den e tyai a toli go a sikowtu efu a so den weiti fu a kondee taki. Baka dati den e ondoosuku a toli enke fa Beibel e soi. Den owluman e akisi a sama efu a tyai umanfasi na a pikin tuu. Efu a taki a á du en, da den owluman e akisi taa sama di sabi san pasa. Efu tu efuso moo sama taki a du en tuu, da den owluman e sete wan kuutu komte. Winsi wan sama taki anga wan taa pikin a be si a sama du a sani ya, den e sete wan kuutu komte tu. * Efu a wan sama namo taki a du en tuu, dati á wani taki ai lei. Neen meke winsi a wan kodo sama tyai a toli ya go a den owluman, den e holi a pakisei taki a kan taki a sani pasa tuu. Efu a so, da a wan gaan ogii a sama du di hati a pikin anga den famii fi en. Den owluman o meke moiti fu toosutu den. Den o yeepi den anga taa sani tu. Boiti dati, den owluman e holi ain na a sama di nen kai aini a toli ya, fu di den wani kibii den taa pikin aini a kemeente.—Toli 20:28.
17-18. Saide den owluman e sete wan kuutu komte?
17 Saide den owluman e sete wan kuutu komte? Den wowtu „kuutu komte” á wani taki den owluman abi a leti fu taki efu wan sama mu sooto fu di a pasa lanti weiti. Te wan sama pasa lanti weiti a lanti seefi mu luku fa den o sitaafu en. A pisi de a ná fu den owluman (Rom. 13:2-4; Tit. 3:1). A faantiwowtu fu den owluman, a fu luku efu wan sama di du wan gaan sondu sa tan aini a kemeente.
18 A faantiwowtu fu den owluman aini wan kuutu komte, a fu yeepi sama fu den anga Yehofa kon bun baka. Den e wooko anga den leli fu Beibel te den e luku efu a sani di wan sama du e hati en tuutuu. Efu den si taki a nai hati a sama taki a du a sondu, da den e puu en aini a kemeente. Baka dati den e piki a kemeente taki a sama a ná wan Yehofa Kotoigi moo (1 Kor. 5:11-13). Efu a sama soi taki a sani di a du e hati en tuutuu, den ná o puu en aini a kemeente. Ma toku den owluman o piki en taki kande noiti moo a o man tyai faantiwowtu aini a kemeente. Den owluman e booko den ede anga den taa pikin aini a kemeente, neen meke den o piki den mma anga dda taki den mu luku bun anga a sama de anga den pikin fu den. Te den e taki anga den, den á mu meke sama sabi sama na a pikin di a sama du ogii anga en.
FA I SA KIBII DEN PIKIN FI I?
Wan mma anga wan dda e leli den pikin san den mu sabi fu sekisi, fu sama á tyai umanfasi a den. Den e koboloiki den buku fu Gadu olikanisâsi fu leli den. (Luku paragraaf 19-22)
19-22. Fa mma anga dda sa kibii den pikin fu sama á du ogii anga den? (Luku a fowtow a fesise fu A Wakititolen.)
19 Sama abi a faantiwowtu fu kibii wan pikin? Neen mma anga en dda. * Den pikin fi yu, a „wan gudu di Yehofa gi i” (Ps. 127:3). A yu abi a faantiwowtu fu kibii den. Fa i sa kibii i pikin fu sama á du ogii anga den?
20 Meke moiti fu sabi moo fu a toli ya. Meke moiti fu sabi sama e du den sowtu ogii ya anga pikinnengee, anga fa den e koli den pikin fu du a ogii ya anga den. Luku bun anga sama di i nai kaba fitoow (Odo 22:3; 24:3). Holi a pakisei taki gaanse fu den sama di e tyai umanfasi a pikinnengee, a sama di a pikin sabi efuso sama di ai fitoow.
21 I mu gwenti taki anga den pikin fi i (Deit. 6:6, 7). I mu e aliki bun te yu anga den e taki (Yak. 1:19). Holi a pakisei taki gaanse leisi a pikin e feele fu taigi sama taki den tyai umanfasi neen. Kande ai si enke sama ná o biibi en. Kande a sama di du a ogii anga en taigi en taki efu a taki a o du sani anga en. Efi i si enke wan sani pasa anga a pikin fi i, poti wantu akisi gi en fu sabi san du en. Ma i mu taki switi anga en, da yu aliki anga pasensi te ai taki.
22 Leli i pikin. Leli den sani di den mu sabi fu sekisi. Den sani di yu o leli den mu fiti a yali fu den. Leli den san den mu taki efuso du te wan sama wani holi den a wan peesi pe a á mu holi den. Wooko anga den sani di a olikanisâsi gi u fu sabi fa i mu kibii den pikin fi i.—Luku a faki „ Meke moiti fu sabi san yu anga i pikin mu du.”
23. Fa wi enke Yehofa Kotoigi e si a tyai di sama e tyai umanfasi a pikinnengee? Sowtu akisi wi o luku aini a taa artikel?
23 Wi enke Yehofa Kotoigi e si a tyai di sama e tyai umanfasi a pikinnengee enke wan gaan ogii. Wi e buuse a sani ya. Wi e wooko anga a weiti fu Kelestesi, neen meke u nai kibii sama fu den á fii a bakapisi fu wan ogii di den du. Ma fa u sa yeepi sama di taawan be tyai umanfasi a den? A taa artikel o piki a akisi ya.
SINGI 103 Yehofa gi u owluman
^ paragraaf 5 Aini a artikel ya wi o luku fa u sa kibii pikinnengee fu sama á tyai umanfasi a den. Wi o luku tu sowtu faantiwowtu owluman abi te den sowtu sani ya pasa, anga fa mma anga dda sa kibii den pikin fu den.
^ paragraaf 3 SAN DEN WOWTU YA WANI TAKI: Wan sama di e tyai umanfasi a wan pikin, e du a sani ya fu piisii den sekisi fii fi en. Son sama e didon anga a pikin efuso ai meke a pikin go anga mofu neen senpeesi, efuso ai go anga mofu na a senpeesi fu a pikin. Kande ai abi sekisi anga a pikin neen bakase. Kande ai pee anga en senpeesi, en bobi efuso ai du taa fa ná fiti sani anga en. A bun fu holi a pakisei taki te sama tyai umanfasi a wan pikin, a wan gaan ogii a du anga a pikin. A ná a pikin abi a fowtu. Gaanse fu den pikin di den e du a ogii ya anga den a umanpikin, ma den e du a ogii ya anga omen boi tu. Gaanse fu den sama di e du a ogii ya a mannengee, ma umanpikin de aini tu.
^ paragraaf 11 A ná fu di wan sama biibi swaki da Yehofa ná o kuutu en te a du wan sondu. Te wan sama sondu a abi fu tyai a faantiwowtu fu a sondu di a du.—Rom. 14:12.
^ paragraaf 16 Te den owluman e taki anga wan sama di nen kai aini wan toli, da noiti den owluman o akisi a pikin fu de na a takimakandaa. En mma anga en dda efuso wan taa sama di a pikin e fitoow sa taigi den owluman san a pikin taki.
^ paragraaf 19 Den sani di sikiifi ya e teli tu gi den sama di e kiya wan pikin di ná fu den.