1. Sowtu tu sani u sa biibi?

YEHOFA GADU lobi den sama di e dini en. A lobi den sama di be e dini en a fositen anga den sama di e dini en aini a ten ya. A lobi te sani e waka a wan letifasi (Ps. 33:5). Neen meke u sa biibi den tu sani ya: (1) Ai hati Yehofa te ai si fa sama e libi ogii anga en foluku. (2) A o meke sani waka bun anga en foluku. Aini a fosi artikel * u be si taki a Weiti fu Mosesi e soi taki Yehofa e du sani a wan letifasi. A Weiti ya be e soi tu taki Yehofa lobi u. A Weiti ya be e leli sama taki den mu libi bun anga ala sama, moomoo den sama di á be poi yeepi denseefi (Deit. 10:18). A Weiti ya be e soi tu taki Yehofa lobi den sama di e dini en tuutuu.

2. Sowtu akisi wi o luku aini a artikel ya?

² Di a Kelesten kemeente sete aini a yali 33, a Weiti fu Mosesi á be e teli moo. Ma den Kelesten be o de sondee wan weiti di be o yeepi den fu lobi denseefi anga fu libi bun anga taawan? Nono! Den be bigin wooko anga wan nyun weiti. Wi o luku san na a weiti ya. Baka dati wi o piki den akisi ya: Saide u sa taki a weiti ya e yeepi u fu lobi taawan? Saide u sa taki ai yeepi sama fu du sani a wan letifasi? Fa den sama di abi faantiwowtu mu libi anga taawan?

3. San na a „weiti fu Kelestesi” di kai a Galasiyasama 6:2?

³ Leisi Galasiyasama 6:2. Kelesten e wooko anga „a weiti fu Kelestesi”. Yesesi á be meke omen weiti gi den  bakaman fi en, ma a be taigi den san den mu du. A be e leli den fa den mu libi anga taawan anga fa den be mu tyai denseefi. A „weiti fu Kelestesi” na ala den sani di Yesesi leli den bakaman fi en. Wi o luku wantu sani di o yeepi u fu fusutan a weiti ya moo bun.

4-5. Fa Yesesi be e leli sama? On ten a be e leli sama?

⁴ Fa Yesesi be e leli sama? Yesesi be e leli sama te a be e taki anga den. Den sani di a be e taki be e yeepi sama fu sabi sama a Gadu. A be e yeepi den fu sabi saide u de a libi. A be e soi den tu taki na a Kownukondee fu Gadu wawan poi puu ogii a goontapu (Luk. 24:19). Wan taa fasi fa Yesesi be e leli sama, na a fasi fa a be e tyai enseefi. Te den bakaman fi en be luku fa a be e libi, den be sa waka neen baka.—Yoh. 13:15.

⁵ On ten Yesesi be e leli sama? A be e leli sama di a be e du a peleikiwooko a goontapu (Mat. 4:23). Baka di a weki baka, a be leli den bakaman fi en tu. A be kon makandaa anga wan sani fu moo enke 500 bakaman fi en, neen a taigi den taki den mu ’meke sama toon en bakaman’ (Mat. 28:19, 20; 1 Kor. 15:6). Yesesi, a edeman fu a Kelesten kemeente be e leli den bakaman fi en ete, baka di a go a hemel. A pisiten fu a yali 96 a meke apostel Yohanisi poti den salufu Kelesten a pasi. A meke a gi den taanga-sikin tu.—Kol. 1:18; Openb. 1:1.

6-7. (a) Pe u sa fende den sani di Yesesi be e leli sama? (b) Fa u sa soi taki wi e wooko anga a weiti fu Kelestesi?

⁶ Pe u sa fende den sani di Yesesi be e leli sama? Den Beibel buku Mateyesi, Malikisi, Lukasi anga Yohanisi e taki fu a libi fu Yesesi anga den sani di a be e leli sama di a be de a goontapu. Den sama di sikiifi den taa Giiki buku fu Beibel be „e denki enke fa Kelestesi e denki” tu. Na a santa yeye be e tii den. Den buku ya seefi e yeepi u fu fusutan moo bun fa Yesesi e denki.—1 Kor. 2:16.

⁷ San u leli: U sa wooko anga den leli fu Yesesi aini ala san wi e du. A weiti fu Kelestesi e soi u fa u mu tyai useefi aini  a kemeente, te u de a osu, a sikoo, efuso a wooko. Efu u wani sabi a weiti fu Kelestesi u mu e leisi den Giiki buku fu Beibel da u teke ten pakisei san u leisi. Te wi e wooko anga den sani di u leli, wi e soi taki wi e holi a weiti fu Kelestesi. Te wi e du san a weiti fu Kelestesi taki, da wi e aliki Yehofa, bika neen na a sama di leli Yesesi ala den sani di a be e leli sama.—Yoh. 8:28.

8. San na a fondamenti fu a weiti fu Kelestesi?

⁸ Te a fondamenti fu wan osu bun, den sama aini a osu nai feele taki a osu o booko kai a den tapu. A so a de anga wan bun weiti tu. Te a fondamenti fu wan weiti bun, sama nai feele fu wooko anga en bika den e si a wini fi en. A fondamenti fu a weiti fu Kelestesi a lobi, a moo bun fondamenti di de. Saide u sa taki a sani ya?

9-10. San e soi taki Yesesi be lobi sama? Fa u sa waka neen baka?

⁹ Winsi san Yesesi be e du a be e soi taki a lobi sama. Te u lobi wan sama, wi e soi taki wi e booko wi ede anga en. Yesesi be e booko en ede anga sama, neen meke a be e leli den, a be e deesi siki sama, a be e gi sama nyanyan. A be e weki dede sama tu (Mat. 14:14; 15:32-38; Malik. 6:34; Luk. 7:11-15). Den sani ya be e teke omen ten fu Yesesi. A be e weli tu. Ma tokuso a á be e denki enseefi namo. A moo gaan sani di Yesesi du fu soi taki a lobi taawan, a di a dede gi u.—Yoh. 15:13.

¹⁰ San u leli: Te u nai denki useefi namo, da wi e soi taki wi e waka a Yesesi baka. Wan taa fasi fa u sa waka neen baka, a te wi e soi taki wi e booko wi ede anga den sama di wi e miti aini a peleikiwooko. Te wi e du a peleikiwooko fu di wi e booko wi ede anga taawan, wi e soi taki wi e wooko anga a weiti fu Kelestesi.

11-12. (a) San e soi taki Yehofa e booko en ede anga u tuutuu? (b) Fa u sa soi taki u lobi taawan enke Yehofa?

¹¹ Yesesi be lobi sama enke en Dda. Di Yesesi be de a goontapu a be soi anga a fasi fa a be e libi taki Yehofa lobi den sama di e dini en tuutuu. A be e leli sama tu taki Yehofa lobi ala sama, ai booko en ede anga ibiiwan fu u (Mat. 10:31). Te wan sama di be gwe fika Yehofa soi taki den sondu di a be du e hati en, neen a daai kon baka, Yehofa de kabakaba fu teke en baka (Luk. 15:7, 10). Yehofa soi taki a lobi u di a sende en Manpikin kon dede gi u.—Yoh. 3:16.

¹² San u leli: Fa u sa soi taki u lobi taawan enke Yehofa? (Efe. 5:1, 2). U lobi ala den baala anga sisa fu u. Wi e booko wi ede anga den. Neen meke wi e poolo te ’wan sikapu di be lasi’ daai kon baka (Ps. 119:176). Wi e soi taki u lobi u baala anga sisa te wi e yeepi den te den de a nowtu (1 Yoh. 3:17). Te wi e libi bun anga taawan, wi e soi taki wi e wooko anga a weiti fu Kelestesi.

13-14. (a) Te i luku san sikiifi a Yohanisi 13:34, 35, da san Yesesi be taigi den bakaman fi en? Saide u sa taki a wan nyun weiti a gi den? (b) Fa u sa soi taki wi e wooko anga a nyun weiti ya?

¹³ Yesesi be taigi den bakaman fi en taki den mu lobi denseefi enke fa a be lobi den. (Leisi Yohanisi 13:34, 35.) A wan nyun weiti Yesesi be gi den bakaman fi en, bika a be sende den fu du wan sani di á be de aini a Weiti fu Mosesi. A taki u mu lobi u baala anga sisa enke fa a lobi u. A sani ya e soi taki u mu de kabakaba fu yeepi u baala anga sisa winsi ai taanga son leisi. U mu lobi u baala anga sisa moo enke fa u  lobi useefi. U mu de kabakaba fu dede gi den, leti enke fa Yesesi dede gi u.

¹⁴ San u leli: Fa u sa soi taki wi e wooko anga a weiti fu Kelestesi? Wi e soi taki wi e wooko anga a weiti ya, te wi e yeepi u baala anga sisa winsi ai taanga son leisi. A ná dede namo u de kabakaba fu dede gi den, ma wi e du taa pikinpikin sani gi den tu. Kande u mu fika son sani di u lobi du, fu di u wani u baala anga sisa piisii. Kande u sa teke wantu wooko dei fu go yeepi a peesi pe wan gaan ogii pasa. Te wi e du den sani ya, wi e soi taki wi e wooko anga a weiti fu Kelestesi. A sani ya e yeepi a kemeente tu fu libi na a wan.

15-17. (a) Fa den sani di Yesesi be e du, e soi taki a lobi te sani e waka a wan letifasi? (b) Fa u sa soi taki wi e waka a Yesesi baka?

¹⁵ A wowtu „leti-du” aini Beibel wani taki wan sama e du san Gadu taki ala yuu. Saide u sa taki a weiti fu Kelestesi e yeepi u fu du sani a wan letifasi?

¹⁶ Den sani di Yesesi be e du, e soi taki a lobi te sani e waka a wan letifasi. A ten di Yesesi be de a goontapu, den Dyu keliki fesiman be e buuse sama di á be de Dyu. Den á be lobi Dyu di be pooti tu. Boiti dati den á be e lesipeki umansama. Ma Yesesi á be e paati bee, a be lobi ala sama. A be e du bun gi taa kondee sama di be e biibi en (Mat. 8:5-10, 13). A be e peleiki gi ala sama, pootiman anga guduman (Mat. 11:5; Luk. 19:2, 9). A á be e libi ogii anga umansama, ma a be e lesipeki den winsi taa sama be e soso den.—Luk. 7:37-39, 44-50.

¹⁷ San u leli: Wan fasi fa u sa waka a Yesesi baka a te u nai paati bee. U mu peleiki gi ala sama di wani aliki winsi san den e biibi, wi á mu luku efu den gudu efuso pooti. Wan fasi fa Kelesten baala sa waka a Yesesi baka a te den e lesipeki umansama. Te wi e du den sani ya, wi e soi taki wi e wooko anga a weiti fu Kelestesi.

18-19. Fa Yesesi leli den bakaman fi en fu libi anga taawan? San a sani ya e leli u?

¹⁸ Den sani di Yesesi be e leli sama, e soi taki a lobi te sani e waka a wan letifasi. A be leli den bakaman fi en sani di be sa yeepi den fu libi bun anga taawan. A be leli den taki san den wani sama du gi den, a dati den mu du gi taawan (Mat. 7:12). Ala sama lobi te taawan e libi bun anga den, neen meke useefi mu libi bun anga taawan. Efu wi e libi bun anga taawan, kande den sa bigin libi bun anga u tu. Ma san u mu du te sama e libi ogii anga u? Yesesi be taigi den bakaman fi en taki den sa biibi taki ’Yehofa o du sani a wan letifasi gi den sama di e begi en dei anga neti’ (Luk. 18:6, 7). Yesesi paamisi wi anga den wowtu ya taki Yehofa e si den sani di e miti wi aini den lasiti dei fu a ogii goontapu ya. Di a yuu o doo a o meke sani waka bun anga u.—2 Tes. 1:6.

¹⁹ San u leli: Efu wi e wooko anga den sani di Yesesi leli u, wi o go e libi bun anga taawan, u ná o go e paati bee. Efu sama du ogii anga wi aini a goontapu fu Saatan ya, u sa biibi taki Yehofa o meke sani waka bun gi u.

20-21. (a) Fa den sama di abi faantiwowtu mu libi anga taawan? (b) Fa wan man sa soi taki a lobi en uman? Fa wan dda mu libi anga den pikin fi en?

²⁰ Fa den sama di abi faantiwowtu sa soi taki den e wooko anga a weiti fu Kelestesi?  A lobi na a moo pelensipali sani aini a weiti fu Kelestesi, neen meke den sama di abi faantiwowtu mu e booko den ede anga taawan. Den mu soi anga a fasi fa den e libi anga den, taki den lobi den. Den mu holi a pakisei taki Kelestesi wani u soi lobi aini ala san wi e du.

²¹ Aini a osufamii. Wan man mu lobi en uman „enke fa Kelestesi lobi a kemeente” (Efe. 5:25, 28, 29). Wan man e soi taki ai waka a Yesesi baka te ai holi en uman a pakisei ala yuu. A á mu e denki enseefi namo. Ai taanga gi son man fu du a sani ya. Kande den kiya aini wan osufamii pe taawan be e denki denseefi namo. A sani ya sa meke a taanga gi den fu fika a manii ya. Ma efu den wani wooko anga a weiti fu Kelestesi, den mu meke moiti fu du sani taa fasi. Te wan man e soi taki ai holi en uman a pakisei, ai moo makiliki gi a uman fu lesipeki en. Wan dda di lobi en pikin ná o taki efuso du sani fu hati den (Efe. 4:31). Ma ai soi anga den sani di ai du anga a fasi fa ai taki anga den taki a lobi den. A sani ya e meke den pikin fii bun. Den o lobi en. Den o lesipeki en tu.

22. Enke fa 1 Peitilisi 5:1-3 e soi, da sama abi den sikapu? Fa den owluman mu libi anga den?

²² Aini a kemeente. Owluman mu holi a pakisei taki a ná den abi den „sikapu” (Yoh. 10:16; leisi 1 Peitilisi 5:1-3.) Den wowtu „den sikapu fu Gadu di a gi i fu solugu”, e soi owluman kiin taki den sikapu a fu Yehofa. A wani owluman libi bun anga den sikapu fi en. Den mu soi lobi anga switifasi gi den (1 Tes. 2:7, 8). Yehofa e piisii anga den owluman di e libi bun anga den sikapu. Den baala anga sisa lobi den owluman ya. Den e lesipeki den tu.

23-24. (a) Fa owluman e kuutu wan toli te wan sama du wan gaan sondu? (b) San den owluman mu holi a pakisei te den e kuutu den toli ya?

 ²³ Sowtu faantiwowtu den owluman abi te den e kuutu wan toli fu wan sama di du wan sondu? Den ná abi denseefi faantiwowtu di den kuutubakaa anga den gaanwan fu Islayeli be abi. A Weiti fu Mosesi be e soi taki den man ya be mu yeepi a foluku fu dini Yehofa enke fa a wani. Boiti dati, te wan sama be suwa anga wan uman efuso kii wan taawan, a den man ya be e kuutu den sowtu toli de tu. Ma aini a weiti fu Kelestesi, den owluman ná abi ala den faantiwowtu ya. Den wooko a fu yeepi a foluku fu Yehofa fu dini en enke fa a wani. Den e fusutan taki a lanti Gadu gi a faantiwowtu fu kuutu toli pe sama suwa anga uman, kii sama efuso taa ogii. Neen meke lanti sa sooto wan sama efuso meke a pai butu te a du wan ogii.—Rom. 13:1-4.

²⁴ Fa owluman e kuutu wan toli te wan sama du wan gaan sondu? Na a Beibel den e koboloiki fu kuutu den toli ya. Den e holi a pakisei taki den mu soi lobi aini ala san den e du, bika a dati na a moo pelensipali sani aini a weiti fu Kelestesi. A lobi e yeepi den owluman fu luku fa den sa yeepi wan sama fu a kemeente te taawan du ogii anga en. Efu a sama di du a ogii a wan Kelesten, a lobi o yeepi den owluman fu kuutu sani a wan letifasi te den e luku efu a sani di a sama du e hati en. Den o meke moiti tu fu yeepi en fi en anga Yehofa toon mati baka.

25. San wi o luku aini a taa artikel?

²⁵ Ai bigi gi u taki wi e wooko anga a weiti fu Kelestesi. Te ala Kelesten e meke moiti fu du san a weiti ya e taki, ala sama aini a kemeente e fii taki Yehofa lobi den, ai kibii den. Ma wi e libi aini wan goontapu pe sama e ’moo ogii’ dei fu dei (2 Tim. 3:13). Neen meke u mu de na ain ala yuu. Fa a Kelesten kemeente sa soi taki den e du sani a wan letifasi enke Gadu te wan sama tyai umanfasi a pikinnengee? Wi o luku a toli ya aini a taa artikel.