Son wan fu den polofeititoli di de aini a faki ya, e taki fu sani di pasa na aseefi yuu. Ala den polofeititoli ya e soi kiin taki aini „a ten fu a kaba” wi e libi nownow.​—Dan. 12:4.

• Beibeltekisi Openb. 11:7; 12:13, 17; 13:1-8, 12

  Polofeititoli A moo enke 3000 yali langa „a ogii meti” tii goontapu. Du fu seibin ede fu a meti o kisi mankei na a ten fu a kaba. Baka dati a o betee, da a ’hii goontapu’ o waka na a ogii meti baka. Saatan e meke a ogii meti „feti anga den pikin fu a uman di be fika ete”.

  Fa a kon tuu Baka a Fuudu, libisama tiimakiti di be de feyanti fu Yehofa bigin tii. Moo enke 3000 yali baka dati, Ingiisikondee be lai makiti, ma a lasi makiti na a ten fu a Fosi Goontapu Feti. Ma baka di Ameekankondee bigin wooko makandii anga en, a kon taanga baka. Na a pisiten fu a kaba, Saatan e meke den tiiman du moo ogii anga a foluku fu Gadu.

• Beibeltekisi Dan. 11:25-45

  Polofeititoli A kownu fu noord anga a kownu fu zuid e sitee anga denseefi.

  Fa a kon tuu Doisilikondee be feti anga Ingiisikondee anga Ameekankondee. Aini 1945, Soviyet Unie anga den kondee di be e holibaka gi en toon a kownu fu noord. Aini 1991, Soviyet Unie á be de moo. Bakaten Rosiyakondee anga den kondee di e holibaka gi en toon a kownu fu noord.

• Beibeltekisi Yes. 61:1; Male. 3:1; Luk. 4:18

  Polofeititoli Yehofa sende en „bosikopuman” fu seeka a pasi fosi a sete a Mesiyas Kownukondee fi en. A bosikopuman bigin „paati bun nyunsu gi den bun-ati sama”.

  Fa a kon tuu Fanafu a yali 1870 C. T. Russell anga den mati fi en bigin sutudeli Beibel fayafaya, fu kon sabi san Beibel e leli tuutuu. Aini a yali 1881 den kon fusutan taki den mu peleiki gi taawan. Neen meke den paati bosikopu taki den e suku sama fu du a wooko ya. A nen fu tu fu den bosikopu ya a be „Wi e suku 1000 peleikiman” anga „U salufu fu peleiki”.

• Beibeltekisi Mat. 13:24-30, 36-43

  Polofeititoli Wan feyanti paandi uwii aini wan alisi goon. A uwii e goo tapu a alisi. Di a yuu doo fu koti alisi, neen den paati den uwii anga den alisi.

  Fa a kon tuu Fanafu a yali 1870 sama be man si kiin sama a be den tuu Kelesten anga sama a be den falisi Kelesten. Na a ten fu a kaba den e paati den tuu Kelesten anga den falisi Kelesten, da den e tyai den tuu Kelesten kon makandaa aini a kemeente.

• Beibeltekisi Dan. 2:31-33, 41-43

  Polofeititoli Wan gaan bigi pobiki di paata-futu meke anga ayee anga tokotoko.

  Fa a kon tuu A tokotoko a den sama aini Ingiisikondee anga Ameekankondee di e sitee anga lanti. Den sama ya e meke a taanga gi lanti fu du san den wani.

• Beibeltekisi Mat. 13:30; 24:14, 45; 28:19, 20

  Polofeititoli Den o tyai a alisi go poti aini a „magisin”. Yesesi o poti „a koni saafu di u sa fitoow” fu luku den „futuboi” fi en. A „bun nyunsu fu a Kownukondee” o „paati na a hii goontapu”.

  Fa a kon tuu Aini a yali 1919 Yesesi poti a koni saafu di u sa fitoow fu tii a olikanisâsi fu Gadu. Fanafu a ten de neen den Beibel Ondoosukuman bigin peleiki anga moo faya. Nownow Yehofa Kotoigi e peleiki aini moo enke 200 kondee. Den e meke buku aini moo enke 1000 tongo tu.

• Beibeltekisi Dan. 12:11; Openb. 13:11, 14, 15

  Polofeititoli Wan ogii meti di abi tu tutu e gi den sama fu goontapu taanga-sikin fu „meke wan pobiki fu a ogii meti” di abi seibin ede. Baka dati a „boo libi gi a pobiki fu a ogii meti di den be meke”.

  Fa a kon tuu Ingiisikondee anga Ameekankondee sete a Volkenbond, neen taa kondee bigin holibaka gi a olikanisâsi ya. A kownu fu noord be de aini a Volkenbond tu, fu 1926 te anga 1933. Sama be e biibi taki na a Volkenbond be o tyai freide kon a goontapu, ma u sabi taki a Gadu Kownukondee wawan poi du a sani ya. Nownow den e biibi taki a den Verenigde Naties (VN) o tyai freide kon a goontapu.

• Beibeltekisi Dan. 8:23, 24

  Polofeititoli Wan ogii kownu „o du omen ogii”.

  Fa a kon tuu Ingiisikondee anga Ameekankondee kii tyaipi sama. Ná pikin sani den poli tu. Na a ten fu a Du Fu Tu Goontapu Feti, Ameekankondee towe tu atoom bom aini wan kondee di den anga en be e feti. Den bom ya poli sani moo iniiwan taa bom di sama be sutu.

• Beibeltekisi Dan. 11:31; Openb. 17:3, 7-11

  Polofeititoli Wan „lebi” ogii meti komoto aini wan peti di nai doo doti. Neen na du fu aitin kownu. A Beibel buku Daniyeli e kai a kownu ya „a fa ná fiti sani di e tyai ogii kon”.

  Fa a kon tuu A Volkenbond á be de moo na a ten fu a Du Fu Tu Goontapu Feti. Baka a feti ya, neen den sete a olikanisâsi di den e kai Verenigde Naties (VN). Leti enke a Volkenbond, a so sama e gi den Verenigde Naties (VN) a gaandi di Gadu Kownukondee mu fende. A Verenigde Naties o go feti anga den falisi keliki.

• Beibeltekisi 1 Tes. 5:3; Openb. 17:16

  Polofeititoli Den kondee o taki „freide de, ala sani e go bun”. Den „tin tutu” anga „a ogii meti” o go feti anga a „hulu-uman”, da den o puu en a pasi. Baka dati ala den kondee o booko.

  Fa a kon tuu Den kondee o taki freide de, ala sani e go bun a goontapu. A VN o poli den falisi keliki. Te a sani ya o pasa da a gaan banowtu o bigin. Te Yesesi o poli a goontapu fu Saatan na Alimakedon da a gaan banowtu o kaba.

• Beibeltekisi Eseik. 38:11, 14-17; Mat. 24:31

  Polofeititoli Gok e go feti anga a foluku fu Gadu. Baka dati den engel o tyai den sama di Gadu kai kon a wan.

  Fa a kon tuu A kownu fu noord anga den taa libisama tiimakiti o kon feti anga a foluku fu Gadu. Di a sani ya o pasa, da den salufu Kelesten di de a goontapu ete o go a hemel.

• Beibeltekisi Eseik. 38:18-23; Dan. 2:34, 35, 44, 45; Openb. 6:2; 16:14, 16; 17:14; 19:20

  Polofeititoli A sama di sidon a wan „weti asi” tapu o wini den feyanti fi en. A o poli Gok anga den sama di e holibaka gi en. Den fiingi „a ogii meti” „go aini a faya di e poli sani”. Wan siton booko a gaan pobiki pisipisi.

  Fa a kon tuu Yesesi, a Kownu fu Gadu Kownukondee, o kon fii a foluku fu Gadu. En anga den 144.000 sama di o tii makandaa anga en anga den engel o puu ala den sama di kon feti anga a foluku fu Gadu a pasi. A goontapu fu Saatan ná o de moo.