Wan sisa den e kai Sara * taki: „Mi a wan sen sama. Ai taanga gi mi fu taigi taawan fa mi e fii, efuso fa mi e denki. Neen meke mi á lobi de aini sama di nai feele fu taki fa den e denki, efuso sama di ati e boon gaw. Ma mi e fii bun te mi de anga sama di abi safu-ati anga sakafasi. A á taanga gi mi fu taigi den sama ya fa mi e fii, anga sowtu polobelema mi abi. A den sowtu sama ya mi abi enke mati.”

A sani di Sara taki ya e soi taki efu wi abi safu-ati, sama o wani toon u mati. Yehofa lobi sama di abi safu-ati. A taigi wi aini en Wowtu taki ’safu-ati mu de enke wan koosi di u wei a u sikin’ (Kol. 3:12). On ten u sa taki wan sama abi safu-ati? Fa Yesesi soi taki a abi safu-ati? Saide wan sama e moo piisii te a abi a manii ya?

Wan sama di abi safu-ati, á lobi dyugudyugu. Ai libi switi anga taawan. Te wan sama du wan sani anga en, a nai ligei.

Son sama e si enke te wan sama abi safu-ati, da a swaki, ma a sani ya a ná tuu. A Giiki wowtu fu „safu-ati” di de aini Beibel, na aseefi wowtu di sama e koboloiki te den e taki fu a leli di sama e leli wan asi te enke a asi nai ligei moo. A asi ya e du san en masaa taki, ma dati á wani taki a swaki. A so a de tu taki wan sama di abi safu-ati, á swaki, ma a poi dwengi den swakifasi fi en. Neen meke a poi libi bun anga taawan.

Kande wi e denki taki: ’Mi ná abi safu-ati.’ Gaanse sama aini a goontapu ati e boon gaw, den ná abi boo anga taawan. A sani ya sa meke a taanga gi u fu abi safu-ati (Rom. 7:19). A moiti u mu meke efu u wani abi a manii ya. A santa yeye fu Yehofa sa yeepi u fu tan meke moiti fu abi safu-ati (Gal. 5:22, 23). Saide u mu meke moiti fu abi safu-ati?

Sama e wani toon i mati te yu abi safu-ati. Leti enke Sara, u lobi de makandaa anga sama di abi safu-ati. U sa waka a Yesesi baka, bika a be abi safu-ati anga switifasi (2 Kor. 10:1). Pikinnengee seefi á be e feele fu go a Yesesi, winsi den á be sabi en.​—Malik. 10:13-16.

Te wi abi safu-ati, ai tyai wini gi wi anga taawan. Efu wi abi safu-ati, wi ati ná o go e  boon gaw (Odo 16:32). U kosensi ná o fon u, bika u ná o du hati sani anga taawan, moomoo sama di u lobi. Te wi abi safu-ati, den sama di e paa anga wi e fende wini fi en tu, bika u ná o du efuso taigi den sani di o hati den.

Yesesi be abi omen faantiwowtu. A omen sani a be e du ala dei, tokuso a be e libi switi anga taawan. A libi be e taanga gi den sama fu a ten fi en, neen meke den be abi taanga-sikin fanowdu. Den be musu fii bun di Yesesi taigi den taki: „U kon a mi, . . . bika mi abi safu-ati, mi abi sakafasi.”​—Mat. 11:28, 29.

San o yeepi u fu abi safu-ati enke Yesesi? Te wi e sutudeli Gadu Wowtu, wi e si fa Yesesi be e libi anga sama, anga san a be e du te a be abi polobelema. Te wi abi polobelema, u meke moiti fu du sani enke Yesesi (1 Peit. 2:21). Meke u luku dii sani di be yeepi Yesesi fu abi safu-ati.

Yesesi be abi sakafasi. Yesesi be abi ’sakafasi anga safu-ati’ (Mat. 11:29). Te Beibel e taki fu safu-ati ai kai sakafasi tu, bika den tu manii ya e gei (Efe. 4:1-3). Saide u sa taki a sani ya?

Sakafasi o yeepi u fu wi ati nai boon gaw te sama du wan hati sani anga u. San Yesesi du di sama taki a „giili” anga di den taigi en taki en a wan „sopiman”? Yesesi a takitaki anga den, ma a fasi fa a be e libi be soi taki den sani di den sama taki a ná tuu. A be soi taki „a den bun sani di wan sama e du, e soi taki a koni”.​—Mat. 11:19.

Meke u taki wan sama taki wan sani di hati i. Kande a taki wan sani fu a nasi fi i, efuso fu a kondee pe i komoto. San i be o du? I mu meke moiti fi yu á taigi en wan hati sani baka. Peter, wan owluman aini Zuid-Afiikan taki: „Te wan sama taki wan sani di mi á kaba lobi, mi e akisi miseefi taki: ’San Yesesi be o du?’” A baala ya taki: „Mi leli taki mi ati á mu e boon gaw tumisi.”

Yesesi be sabi taki wi a sondu libisama. Den disipel fu Yesesi be e wani du bun sani, ma fu di den be abi sondu meke den be e meke fowtu. A neti fosi Yesesi dede, a be abi taanga-sikin fanowdu. Neen meke a be tyai Peitilisi, Yakowbesi, anga Yohanisi go anga en di a be go taki anga en Dda. Yesesi be taigi den taki den mu de na ain, ma ala den dii man siibi gwe fika en. Yesesi be sabi saide den be e siibi. A be fusutan taki „a ati wani, ma a sikin swaki” (Mat. 26:40, 41). Yesesi ati á boon a den, bika a be sabi taki den a sondu libisama.

Mandy a wan sisa di be lobi kuutu sama. Ma nownow ai meke moiti fu abi safu-ati enke Yesesi. A taki: „Mi e du ala san mi man fu mi á feegete taki ala wi e meke fowtu. Mi e meke moiti tu fu poti pakisei a den bun manii fu ala sama, leti enke Yehofa.” Yesesi be e holi a pakisei taki wi a sondu libisama, neen meke a á be e suku fini tumisi. I si enke i sa meke moo moiti fu pasensi anga taawan enke Yesesi?

Yesesi be e fitoow Gadu. Yesesi be holidoo di a be de a goontapu winsi fa den be e libi ogii anga en. Sama be e kuutu en sosokaali, den be e buuse en, den be fon en tu. Winsi fa den du omen sani anga en tokuso a be abi safu-ati. „A fika ala sani aini Gadu ana, bika a sabi taki neen e kuutu sani a wan leti fasi” (1 Peit. 2:23). Yesesi be sabi taki en Dda be o yeepi en fu holidoo. A be sabi tu taki Yehofa be o sitaafu den sama di du ogii anga en te a yuu doo.

Efu wi e du sani anga boon ati te sama e libi ogii anga u, a polobelema o moo bigi. Beibel taki: „Te wan sama ati boon, ai du sani di Gadu á fende bun” (Yak. 1:20). Winsi wi abi leti fu wi ati boon, tokuso u mu abi safu-ati, bika efu wi ati e boon tumisi u sa du sani di á bun.

Fosi, wan sisa di den e kai Cathy di e tan a Doisilikondee be e denki taki: ’Efi i nai taki gi iseefi, sama ná o taki gi i.’ Ma di a leli fu fitoow Yehofa a kengi a fasi fa a be e denki. A taki: „Mi kon fusutan taki a ná ala yuu mi mu taki te wan sani pasa. Mi nai ligei efuso feti taki te wan sani pasa moo tu, bika mi sabi taki  Yehofa o du sani a wan letifasi te a yuu doo.” Leti enke Yesesi, i mu fitoow Gadu te sama e libi ogii anga i, da a o yeepi i fu tan abi safu-ati.

Yesesi be taki efu u wani de koloku u mu abi safu-ati. A be taki: „Den sama di abi safu-ati o de koloku” (Mat. 5:5). Luku sowtu wini wi o fende te wi abi safu-ati.

Te wi abi safu-ati, u toowlibi o moo waka bun. Wan baala di den e kai Robert di e tan a Australiya taki: „A omen hati sani mi taigi mi uman, ma den sani ya á be doo mi ati. Ma te i taki wan sani kaba, yu á poi teke en baka. A du mi ogii te di mi si fa den sani di mi taigi en be hati en.”

Beibel taki „ala wi e sondu omen leisi” anga den sani di wi e taki. Te u taki sani sondee fu u denki, a sani ya sa tyai polobelema kon aini a toowlibi (Yak. 3:2). Efi i toowpaa taigi i wan sani di hati i, safu-ati o yeepi i fi yu á ligei efuso taigi en wan hati sani baka.​—Odo 17:27.

Robert meke moiti fi en ati nai boon gaw so moo. Sowtu wini a fende di a du a sani ya? A taki: „Nownow, te mi anga mi uman á kaba fusutan useefi, mi e meke moiti fu aliki en bun, anga fu taki switi anga en. Mi e meke moiti tu fu mi ati á boon gaw. Nownow a toowlibi fu mi anga mi uman e go moo bun.”

Safu-ati e yeepi u fu libi bun anga taawan. Den sama di ati e boon gaw nai abi mati. Ma safu-ati e yeepi u „fu libi na a wan” (Efe. 4:2, 3). Cathy, di u be taki fi en kaba taki: „Safu-ati yeepi mi fu libi bun anga taawan, winsi a á makiliki ala yuu.”

Safu-ati e meke i piisii. Beibel taki sama di abi safu-ati e soi taki den abi „a koni di e komoto a tapu” (Yak. 3:13, 17). Wan sama di abi safu-ati „nai buuya gaw” (Odo 14:30). Martin, di be e meke moiti fu abi safu-ati taki: „Nownow mi nai fooseli taawan fu du san mi taki namonamo. Mi ati nai boon gaw so moo tu. A sani ya e meke mi moo piisii.”

Efu u wani abi safu-ati u mu meke moiti. Wan baala taki: „Mi á mu lei, son yuu mi ati e boon te.” Ma Yehofa, a sama di e gi u taanga-sikin fu abi safu-ati o yeepi u fu abi a manii ya (Yes. 41:10; 1 Tim. 6:11). ’A o leli wi ala san u mu sabi’, ’a o meke u kon taanga’ (1 Peit. 5:10). Bakaten leti enke Apostel Pawlesi, wi o abi ’safu-ati anga switifasi leti enke Kelestesi’.​—2 Kor. 10:1.