1-2. Enke fa Psalm 40:5 e soi, da san a den kado di Yehofa gi u? Saide wi o taki fu den kado ya?

YEHOFA a wan Gadu di lobi gi sama sani. Wantu fu den sani di a gi u, na a goontapu, u masonson, anga en Wowtu Beibel. A di Yehofa gi u den sani ya meke wi abi wan peesi fu tan, u man denki, u man taki anga taawan. Boiti dati, u man fende a piki fu den pelensipali akisi fu a libi.​—Leisi Psalm 40:5.

² Aini a artikel ya wi o taki pikinso fu den dii sani ya. Te wi e teke ten pakisei den kado ya, wi o moo lobi Yehofa, a sama di gi u den. A sani ya o meke u wani du sani di o meke a piisii (Openb. 4:11). A artikel ya o yeepi u tu fu taki moo bun anga den sama di e biibi taki libisama a mongii paansu.

3. Saide u sa taki goontapu á de enke den taa palaneiti?

³ Te u luku a fasi fa Gadu meke goontapu, wi e si taki a koni tuutuu (Rom. 1:20; Heb. 3:4). A omen taa palaneiti e daai lontu a san. Ma fu ala den palaneiti ya, a goontapu wawan too sama poi tan.

4. Fa a fasi fa Gadu meke goontapu e soi taki a koni? Gi wan ageisitoli.

⁴ U sa ageisi a goontapu anga wan boto di de a wataa tapu. Ma a goontapu bun moo wan boto anga tyaipi sama aini. Pakisei a sani ya: On langa den sama aini a boto ya be o man tan a libi efu a denseefi be mu meke winta fu boo, nyanyan, anga diingiwataa? Fa den be o du  anga den sani di den be mu towe, efu den á be poi towe den a wataa? Den sama aini a boto ya be o dede. Ma a miliyunmiliyun sama anga meti e tan a goontapu. Toku den e fende winta fu boo, nyanyan, kiin wataa anga ala taa sani di den abi fanowdu fu tan a libi. Noiti den sani ya e kaba. Winsi fa wi á poi towe den tyobo fu wi a wan taa palaneiti, tokuso a goontapu moin ete. Fa a sani ya kan? Winta anga wataa ná o kaba noiti, bika a so Yehofa meke den sani ya. Meke u luku saide u taki a sani ya.

5. Saide a winta di libisama anga meti abi fanowdu fu tan a libi nai kaba? San a sani ya e soi?

⁵ Libisama anga meti abi winta (zuurstof) fanowdu fu tan a libi. Ondoosuku e soi taki a tyaipi fu a winta ya libisama anga meti e hali ala yali te den e boo. Te den hali a winta ya teke, da den e boo wan taa winta (koolzuurgas) puu. Tokuso a winta di wi abi fanowdu fu tan a libi nai kaba. Boiti dati, a winta di wi e boo puu nai ipi tumisi. Saide? Bika den bon di Yehofa meke e teke a winta di wi e boo puu, da den e meke a winta di libisama anga meti abi fanowdu fu tan a libi. Neen meke Beibel taki a Gadu ’e gi libisama libi anga winta fu boo’.​—Toli 17:24, 25.

6. Saide wataa nai kaba a goontapu? San a sani ya e soi? (Luku a faki „ Wataa a wan kado di Yehofa gi u.”)

⁶ Wataa de a goontapu fu di a goontapu de pilisisi a pe a mu de. A goontapu á de koosube tumisi fu a san. A á de faawe tumisi fu a san tu. Efu a goontapu be de pikinso moo koosube fu a san, a wataa be o waan te da ala be dee. Nawan sama efuso meti be o man tan a goontapu. Efu goontapu be de pikinso moo faawe fu a san, a goontapu be o koo te da ala a wataa be toon eisi. Ma Yehofa poti a goontapu pilisisi a pe a mu de, neen meke wataa de di e yeepi u fu tan a libi. Te a san e pii, da ai waan a wataa fu a se, den liba, anga taa peesi pe wataa de. A so afu fu a wataa ya e dampu, da ai toon woluku. Ala yali, a omen miliyun liti wataa e dampu. Ai tan a tapu wan sani fu 10 dei. Baka dati ai kai kon a goontapu baka enke alen efuso eisi. A so a wataa e daai go aini a se, den liba, anga den kiiki baka. Yehofa seeka a goontapu fu wataa de neen ala yuu. A sani ya e soi taki Yehofa koni. Ai soi a makiti di a abi tu.​—Yopu 36:27, 28; Peleik. 1:7.

7. San a wantu fasi fa u sa soi taki wi e teke a kado di sikiifi a Psalm 115:16 fu bigi?

⁷ Fa u sa soi taki ai bigi gi u taki Yehofa gi wi a goontapu anga ala den sani di de neen tapu? (Leisi Psalm 115:16.) Wan fasi fa u sa du a sani ya, a te wi e teke ten pakisei den sani di Yehofa meke. Te wi e du a sani ya wi o wani gi Yehofa daa fu den bun sani di ai gi wi ala dei. Te wi e seeka a pisi pe wi e tan, wi e soi taki ai bigi gi u taki Yehofa gi wi a goontapu.

8. Saide u sa taki a masonson fu u meke a wan foondoo fasi?

⁸ Yehofa meke a masonson fu wi a wan foondoo fasi. Di i be de aini i mma bee, a masonson fi i be e goo leti enke fa Gadu be wani. Ala miniti a dunsudunsu nyun cel i masonson be e  meke. Sabiman taki a masonson fu wan gaansama abi wan sani fu 100.000 miliyun cel. A masonson fu wi e wegi wan sani fu wan anga afu kilo. Meke u luku wantu sani di a masonson fu u poi du.

9. San e soi taki a taki di u poi taki a wan kado di Gadu gi u?

⁹ A taki di u poi taki a wan wonduu. Pakisei ala den sani di e pasa te yu e taki. Te u wani taki wan sani, da u masonson mu sende bosikopu go a 100 tetei fu u tongo, u golingo, u bubamofu, wi agba anga u boofu-ati. Efu wan fu den sani ya nai wooko bun, u ná o poi taki bun. Aini 2019 den du wan ondoosuku di e soi taki yonkuu beibi poi fusutan son wowtu. A sani ya e holibaka gi wan sani di omen koniman be e biibi kaba. Den be e biibi taki ala libisama poi leli taki moo enke wan tongo. A taki di u poi taki a wan kado di Gadu gi u tuutuu.​—Ek. 4:11.

10. Fa u sa soi taki wi e teke en fu bigi taki u poi taki?

¹⁰ Wan fasi fa u sa soi taki ai bigi gi u taki u poi taki, a te wi e soi sama di nai biibi taki wan Gadu de saide wi e biibi taki a Gadu meke ala sani (Ps. 9:1; 1 Peit. 3:15). Den sama di e paati a leli ya, wani u biibi taki a goontapu anga ala den sani di de neen tapu kon fu denseefi. U sa koboloiki a Beibel anga wantu fu den sani di u taki aini a artikel ya fu soi den sama di wani aliki saide wi e biibi taki a Yehofa meke hemel anga goontapu.​—Ps. 102:25; Yes. 40:25, 26.

11. San u masonson poi du?

¹¹ U poi holi sani a ede. Wan sikiifiman fu fositen be taki efu wan sama be o leisi 20 miliyun buku, a be o poi membee ala den sani di sikiifi aini den buku ya. Ma nownow koniman e biibi taki libisama poi holi moo enke dati a ede. San libisama poi du fu di den poi holi sani a ede?

12. San libisama poi du di meti á poi du?

¹² Fu ala den sani di de a goontapu, a libisama wawan poi leli wan sani, fu sani di be miti den aini den libi. Neen meke u poi kengi u manii fu toon moo bun sama (1 Kor. 6:9-11; Kol. 3:9, 10). A kosensi fu u sa yeepi u tu fu sabi san bun anga san á bun (Heb. 5:14). U poi fii gi taawan, neen meke u poi soi lobi anga tyali-ati gi den. U poi du sani a wan letifasi tu, leti enke Yehofa.

13. Enke fa Psalm 77:11, 12 e soi, da sowtu sani u mu holi a ede?

¹³ Wan fasi fa u sa soi taki wi e teke en fu bigi taki u poi holi sani a ede, a te u nai feegete fa Yehofa yeepi wi, anga fa a toosutu wi aini den ten di pasa. A sani ya o yeepi u fu biibi taki Yehofa o yeepi wi aini a ten di e kon tu. (Leisi Psalm 77:11, 12; 78:4, 7). Wan taa fasi fa u sa  soi taki a kado ya e bigi gi u, a te u nai feegete den bun di u baala anga sisa e du gi u. Sama di e ondoosuku sani kon si taki sama di e teke den sani di taawan du gi den fu bigi, e moo de koloku. Ma winsi fa u poi holi sani a ede, toku a bun fu u nai tan pakisei son sani. U sa waka a Yehofa baka aini a pisi toli ya, bika winsi fa a poi membee ala sani, tokuso a nai tan pakisei den fowtu di u meke. Ai gi u paadon anga en hii ati te u soi taki a sani di u du e hati u (Ps. 25:7; 130:3, 4). A so Yehofa wani u libi anga taawan tu. Wi á mu e tan pakisei den sani di den du, ma u mu gi den paadon te den du wan sani di hati u.​—Mat. 6:14; Luk. 17:3, 4.

14. Fa u sa soi taki ai bigi gi u taki Yehofa gi u wan masonson?

¹⁴ Wan taa fasi fa u sa soi taki ai bigi gi u taki wi abi wan masonson, a te wi e koboloiki en a wan fasi di e gi a Sama di meke en gaandi. Son sama e taki gi denseefi san bun anga san á bun. Ma a Yehofa meke u, neen meke neen na a moo bun Sama di sa soi u san u mu du fu u libi waka bun (Rom. 12:1, 2). Te wi e libi enke fa Yehofa wani, wi e piisii (Yes. 48:17, 18). Boiti dati, wi o du a moo bun sani di u be sa du anga u libi, dati na a gi di wi o gi a Sama di meke u gaandi. A sani ya o meke a piisii.​—Odo 27:11.

15. Fa a gi di Yehofa gi wi a Beibel e soi taki a lobi libisama?

¹⁵ A di Yehofa lobi u meke a gi wi a Beibel. U Dda di de a hemel meke sama sikiifi a Beibel gi den pikin fi en di de a goontapu. Aini Beibel wi e fende a piki fu den moo pelensipali akisi fu a libi. Akisi enke: Pe libisama komoto? Saide u de a libi? San o pasa aini a ten di e kon? Yehofa wani ala sama sabi a piki fu  den akisi ya, neen meke aini den ten di pasa, a meke sama poti a Beibel aini omen tongo. Nownow, a hii Beibel, efuso pisi fu a Beibel de aini moo enke 3000 tongo. Na a Beibel wawan de aini so ipi tongo. Neen na a buku di moo paati a goontapu tu. Gaanse sama poi leisi Beibel aini den mamabee tongo, winsi pe fu goontapu den e tan.​—Luku a faki „ Den poti a Beibel aini den tongo di den e taki na Afiikan”.

16. Enke fa Mateyesi 28:19, 20 e soi, da fa u sa soi taki ai bigi gi u taki Yehofa gi wi a Beibel?

¹⁶ Te wi e leisi a Beibel ala dei, te wi e teke ten pakisei den sani di wi e leli, anga te wi e du den sani ya, wi e soi taki wi e teke a kado ya fu bigi. Wan taa fasi fa u sa soi taki wi e teke a kado ya fu bigi, a te wi e du ala san u poi fu paati den sani di wi e leli anga taawan.​—Ps. 1:1-3; Mat. 24:14; leisi Mateyesi 28:19, 20.

17. San u luku aini artikel ya? San wi o luku aini a taa artikel?

¹⁷ Aini a artikel ya, u luku wantu fu den kado di Yehofa gi u. U taki fu a goontapu, u masonson anga a Beibel. Ma Yehofa gi u taa sani tu di wi á poi si anga wi ain. Wi o taki fu wantu fu den sani ya aini a taa artikel.