A sani di miti mi ya kengi mi hii libi, bika na a sani ya meke mi be wani kon sabi Gadu. Meke mi taigi u fosi wantu sani di be miti mi di mi be yonkuu di meke mi be wani kon sabi Gadu.

Mi meke a Guesnain wan foto aini Faansikondee aini 1937. A omen sama e wooko aini olo pe den e puu siton-koofaya aini a foto ya. Nda be e wooko aini den olo ya tu. A leli mi taki mi mu e wooko taanga. A leli mi tu taki mi á mu e libi ogii anga taawan. A á makiliki fu wooko aini den olo ya. Den á be e pai den wookoman bun tu. Neen meke nda go aini wantu olikanisâsi di be e feti gi a leti fu den wookoman. A á be lobi a fasi fa den pilisite be e libi anga den sama tu. Den be e abi ala san den abi fanowdu, ma toku den be e akisi den sama nyanyan anga moni, winsi fa den be sabi taki den sama ya a pootiman. Nda be e buuse a fasi fa den pilisite be e libi anga den sama, neen meke a á be e leli mi keliki sani. Noiti a be e gi toli fu Gadu.

 Di mi be yonkuu, a be e hati mi te mi be si fa sama e libi ogii anga taawan. A be e hati mi te mi be si fa den be e libi ogii anga den sama di foloisi kon tan a Faansikondee. Mi be lobi pee futubali anga den pikin fu den sama di be foloisi kon tan a Faansikondee. Mma seefi a ná be Faansiman, a Polen a meke. Mi be wani ala sama libi na a wan.

Lanti be kai mi fu go a suudati aini 1957. A so mi be doo a den mongo a Algeriya. A neti di mi be begi Gadu fu a yeepi mi, a ná sama be e kon, a wan buliki di e tan a busi. Di mi si taki a na sama, mi ati saka wanten. Ma toku a dyombo di mi dyombo, anga den sani di be e pasa a ten fu a feti, meke mi bigin akisi miseefi taki: Saide u de a libi? Gadu e booko en ede anga u? Wan ten o kon pe sama o libi na a wan?

Bakaten di mi go luku mma anga dda a osu, mi miti wan Yehofa Kotoigi. A gi mi wan Faansi Lomusu Beibel (La Sainte Bible). Di mi go a Algeriya baka, mi bigin leisi a Beibel ya. Mi foondoo di mi leisi Openbaring 21:3, 4. Ai taki: ‘A tenti fu Gadu kon de a pe libisama de . . . A o dee den wataa ain fu den. Da dede ná o de moo, nawan sama o tyali moo, sama ná o kee moo, pen seefi ná o de moo.’ * Mi be e denki taki: ‘Den sani ya o pasa tuutuu?’ A ten de mi á be sabi sani fu Gadu anga a Beibel.

Baka di mi komoto a suudati, aini 1959, mi miti wan Kotoigi den e kai François. Na a man ya leli mi omen sani fu Beibel. Neen soi mi aini a Beibel taki Gadu nen a Yehofa (Ps. 83:18). François soi mi taki Yehofa o meke sani go bun a goontapu. A o meke a goontapu toon wan paladeisi. A soi mi tu taki ala san sikiifi a Openbaring 21:3, 4 o pasa tuu.

A á be taanga gi mi fu biibi den sani di a be leli mi. Den be doo mi ati tuutuu. Mi á be e poi si den pilisite. Mi be wani tapu den fu den á leli sama falisi sani moo. A gei enke a nda mi teke. Mi á be poi wakiti fu Gadu seeka a sani ya. Mi be wani du sani nownow.

François anga wan taa Kotoigi di be toon mi mati yeepi mi fu holi miseefi. Den soi mi taki Gadu á sende u fu kuutu sama, a taki u mu paati a bun nyunsu fu a Kownukondee fi en gi den. A sani ya o yeepi sama fu abi howpu. Na a wooko ya Yesesi be e du di a be de a goontapu. Na a wooko ya a gi den bakaman fi en fu du tu (Mat. 24:14; Luk. 4:43). Den leli mi tu fa mi mu taigi sama san mi e biibi. Den taki winsi den de a wan taa keliki, mi mu taki switi anga den. Beibel taki: ‘Wan saafu fu Masaa á mu e suku toobi, ma a mu libi bun anga ala sama.’​—2 Tim. 2:24.

Mi meke moiti kengi mi libi, neen mi dopu enke wan Yehofa Kotoigi aini 1959 a wan kelen komakandaa. Mi si wan sisa den e kai Angèle na a komakandaa ya di mi be lobi. Mi bigin go a komakandaa na a kemeente pe a sisa be e go. U toow aini 1960.  A wan bun uman, ná pikin solugu ai solugu mi. A wan kado di Yehofa gi mi.​—Odo 19:14.

Den yali di pasa, mi leli omen sani fu den baala di be abi ondoofeni. Den leli mi taki: Winsi fa a wooko di u mu du taanga, u mu abi sakafasi, da u wooko anga san sikiifi a Odo 15:22. Ai taki: ‘Te omen sama e taki fu seeka wan toli, sani e waka bun.’ A sani ya a wan fu den moo pelensipali sani di den leli mi.

Aini 1964, mi si fa mi be sa wooko anga a sani ya. Aini a yali de mi bigin anga a kelen wooko. Mi be e go a omen kemeente fu gi den baala anga sisa taanga-sikin. Ma a ten de, a 27 yali mi be abi. Mi be e meke fowtu, bika mi á be abi ondoofeni. Ma ala yuu mi be e meke moiti fu leli wan sani fu den fowtu di mi be e meke. Den baala di be abi ondoofeni be e poti mi a pasi. A sani de yeepi mi tuutuu.

Mi sabi ete san wan baala be taigi mi di mi be bigin anga a kelen wooko. Di mi go a wan kemeente a Paris, wan baala di be abi ondoofeni kai mi go a wanse, neen a akisi mi efu a sa taki anga mi. Mi taigi en taki: ‘Eeye.’

A akisi mi taki: ‘Louis, sama wan dataa e go luku a osu?’

Neen mi taki: ‘A siki sama.’

A taki: ‘A so a de. Ma mi si taki anga a fesiman fu den owluman, anga taa baala anga sisa di e du en bun a waaleiti yu e moo paa. A omen baala anga sisa de aini a kemeente di e fii booko-saka, taawan á de langa a waaleiti ete, son wan fu den a tan pii sama. Efi i meke ten gi den tu, den o teke en fu bigi. Winsi a wan leisi i go nyan anga den.’

A wan pelensipali sani a baala taigi mi, mi be abi en fanowdu. A sani di a du ya be soi taki ai booko en ede anga den sikapu fu Yehofa. Winsi fa a á be makiliki, mi dwengi miseefi, neen mi bigin wooko anga san a taki wanten. Mi e gi Yehofa daa taki a gi mi baala di nai feele fu poti mi a pasi.

Den be poti mi fu teke fesi fu paati nyanyan a den gaan konkelesi di be holi aini  1969 anga 1973 a wan peesi den e kai Colombes, a Paris. A omen sama fu taa kondee be kon a den konkelesi ya. A wan sani fu 60 dunsu sama be kon na a wan di be holi aini 1973. A feifi dei langa u be mu seeka nyanyan gi den sama ya. Mi á be sabi fa u be o du a sani ya. Ma mi wooko anga san sikiifi a Odo 15:22, mi suku yeepi a taawan. Mi akisi wantu baala di be abi ondoofeni fu yeepi mi. Son wan fu den baala ya be e seli meti, taawan be e seli guluntu, taawan be e wooko a nyanyan osu, son wan fu den be e bai sani gi bodeleifi. Ala den baala ya yeepi mi fu du a wooko ya.

Aini 1973, neen den kai mi anga mi uman fu go na a Betel fu Faansikondee. A fosi wooko di den gi mi á be makiliki. Mi be mu suku fasi fu sende buku gi den baala anga sisa a Kamerun, bika lanti be tapu a wooko fu wi a Kamerun fu 1970 te anga 1993. Mi á be si enke mi be o poi du a wooko ya. A gei enke a baala di be e teke fesi na a kantoo di mi be e wooko be fusutan taki mi be e booko mi ede. Neen meke a taigi mi taki: ‘Den baala anga sisa a Kamerun abi den buku fanowdu, meke u du ala san u poi fu den fende den.’ A dati u du tu.

Mi go a omen kondee di de koosube fu Kamerun fu taki anga wantu owluman fu den kondee ya. Den baala ya be abi deki-ati, den be koni tu. Den yeepi mi fende fasi fu sende den buku gi den baala anga sisa aini Kamerun. Yehofa belesi a moiti di u meke. Fu den 20 yali di u sende buku gi den baala anga sisa, nawan mun á be pasa di den á be fende A Wakititolen anga a Kownukondee Diniwooko.

Fanafu di u be abi mofu fu toow, mi be man si kiin taki Angèle be lobi Yehofa  tuutuu. Baka di u toow, mi moo si a sani ya. Aseefi neti di u toow, a akisi mi efu mi sa begi Yehofa fu a sa yeepi u fu du a fuuten diniwooko. Yehofa piki a begi fu u.

Angèle yeepi mi fu moo fitoow Yehofa. Wan leisi, aini 1973 di den kai u fu go a Betel, mi á be wani bika mi be lobi a kelen wooko. Ma Angèle membee mi taki u paamisi Yehofa taki wi o du san a taki, neen meke u mu meke moiti fu du ala san a olikanisâsi fi en akisi u fu du (Heb. 13:17). A be abi leti. Neen meke u go a Betel. Mi uman lobi Yehofa tuutuu, a nai suku fini anga sani. Den bun manii fi en meke mi anga en toon bun mati. A sani de yeepi u fu du sani anga koni den somen yali di u toow.

Winsi fa u kon gaandi nownow, toku Angèle e holibaka gi mi ete. Gaanse fu den sikoo fu a olikanisâsi di u be mu go e holi aini Ingiisitongo, neen meke mi anga Angèle meke moiti fu sabi a Ingiisitongo moo bun. U foloisi go aini wan Ingiisitongo kemeente, winsi fa u be pasa 70 yali. Mi de aini a Komte fu a Beikantoo fu Faansikondee, neen meke a á makiliki gi mi fu leli wan taa tongo. Mi anga Angèle e yeepi useefi fu leli a tongo ya. Nownow u pasa 80 yali kaba, toku wi e seeka gi den komakandaa aini Ingiisitongo anga Faansitongo ete. Wi e du san u poi a den komakandaa, anga a peleikiwooko. Yehofa belesi a moiti di u meke fu leli Ingiisitongo.

U fende wan gaan belesi aini 2017. Mi anga Angèle fende a gaandi fu go na a sikoo di den baala e holi gi den baala fu a Beikantoo komte anga den uman fu den. A sikoo ya be holi na a Wakititolen Sikoo Centrum a Patterson, New York.

A Yehofa na a Sama di e leli u tuutuu (Yes. 30:20). Neen meke a foluku fi en e kisi a moo bun leli di de, yonkuuwan anga gaandiwan (Deit. 4:5-8). Mi si fa yonkuuwan di aliki Yehofa anga baala anga sisa di abi ondoofeni, du sani di tyai wini gi den di den toon gaansama. Den e dini Yehofa anga den hii ati ete. A leti enke san Odo 9:9 taki: ‘Leli wan sama di koni, da a o moo koni. Leli wan sama di e libi a wan letifasi, a o meke moiti fu sabi moo.’

Te a langa, mi e pakisei a dyombo di mi be dyombo 60 yali pasa di mi be de a den mongo a Algeriya. Mi á be denki taki a so mi libi be o waka. Ná pikin sani mi leli fu taawan. Yehofa belesi mi anga Angèle tuutuu. Neen meke wi o tan meke moiti fu teke den leli di u Dda di de a hemel e gi u. Wi o du ala san u poi tu fu wooko anga den sani di den baala anga sisa di lobi Yehofa e leli u.