A OMEN sama sabi taki fosi, anga wan sowtu gaasi den e kai papirus den Egeptesama be e meke pampila fu sikiifi sani. Den pampila fu den Giikisama anga den Romesama anga papirus den be e meke den tu. * Ma a omen sama á sabi taki den be e meke boto anga papirus.

Wan sani fu 2500 yali pasa, polofeiti Yesaya be sikiifi taki den sama di e tan na a pisi fu a Etiyopiya liba, be sende bosikopuman di be e de anga papirus-boto aini a se. Bakaten polofeiti Yelemiya be taki te den Midiyansama anga den Persiyasama be o teke a foto Babilon abaa, den be o boon den papirus-boto fu den Babilonsama, da den á be o poi lowe.​—Yes. 18:1, 2; Yel. 51:32.

A Gadu meke sama sikiifi Beibel. Neen meke den sama di e sutudeli Beibel nai foondoo te den yee taki den fositen sani di ondoosukuman fende e soi taki sama be e meke boto anga papirus aini Beibel ten (2 Tim. 3:16). San den sabiman ya fende? Den fende sani di e soi kiin taki sama be e meke papirus-boto aini Beibel ten a Egepte.

Wantu sani di be teken a den geebi fu den Egeptesama e soi fa den be e koti papirus anga fa den be e meke boto anga en. Den man be e koti den papirus tiki, tei den a bosu, da den be e tei den bosu ya miti. Den tiki fu a papirus-gaasi á lontu, neen meke te i tei den a bosu, a bosu e de gingin, den tiki nai diipi komoto a den peesi. Wan buku (A Companion to Ancient Egypt) di e taki fa sani be de a Egepte fosi, e soi taki son papirus-boto be e langa moo enke 17 meter. I be sa fasi 10 te anga 12 pali a wan se fu den boto ya.

Papirus-gaasi be lai aini Nijl-liba. A be makiliki fu meke boto anga en tu. Bakaten anga udu sama be e meke gaan boto, ma toku a gei enke den ontiman anga den fisiman be e meke pondo anga pikin boto anga papirus ete.

A wan hii pisiten sama be e meke boto anga papirus. Wan sikiifiman fu Giikikondee di be de aini a ten fu den apostel taki son sama aini a ten de be e meke boto anga papirus ete.