1-2. San wan sikiifiman be taki? San wi o luku aini a artikel ya?

AINI a ten ya, miliyunmiliyun sama e taki den e biibi aini Yesesi, toku den nai du san Yesesi taki (2 Tim. 4:3, 4). Wan sikiifiman be taki: ‘Efu aini a ten ya Yesesi be de, i si enke sama be o wani waka neen baka? Efuso den be o suku sani fu kuutu en, leti enke fa den sama fu fosi be du?’ Te i luku a fasi fa sama e tyai denseefi aini a ten ya, da u sa taki na aseefi fasi fa sama be libi anga Yesesi na a ten de, a so den be o libi anga en aini a ten ya tu.

² Di Yesesi be de a goontapu, a omen sama be e yee fa a be e gi leli. Den be e si den wonduu di a be e du. Tokuso omen fu den á be wani toon en bakaman. Saide? Aini a artikel di pasa, u be luku fo sani di be tapu son sama fu waka a Yesesi baka. Wi o luku ete fo sani aini a artikel ya. Wi o luku tu saide omen sama aini a ten ya á lobi den bakaman fu Yesesi, anga san u mu du efu wi á wani sani tapu u fu dini Yehofa.

3. San Yesesi be e du di be meke son sama á be wani waka neen baka?

³ Di Yesesi be de a goontapu, anga ala sowtu sama a be e paa. A be e nyan anga guduman, ma a be e nyan anga pootiman tu. A be e libi switi anga den sama di taawan be e si enke sondu sama. A omen sama á be e wani waka a Yesesi baka fu di a be e du a sani ya, bika den be e si enke den bun moo den sama ya. Wan leisi den akisi den disipel fu Yesesi taki: ‘Saide wi e nyan anga den sama di e piki lanti moni? Saide wi e diingi anga den gaan sondu sama ya.’ Ma Yesesi piki den taki: ‘Wan sama di gusontu ná abi dataa  fanowdu, ma a den sama di siki abi dataa fanowdu. Mi á kon a goontapu fu kai sama di e libi a wan letifasi. Ma mi kon fu yeepi den sama di sondu fu daai den libi.’​—Luk. 5:29-32.

4. Te i luku a polofeititoli fu Yesaya, da saide den Dyu aini a ten fu Yesesi á be mu foondoo taki omen sama á be wani waka na a Mesiyas baka?

⁴ San Beibel e taki? Fosi a Mesiyas be kon a goontapu, polofeiti Yesaya be taki sama á be o lobi en. A be sikiifi taki: ‘Sama be e soso en. Den á be e wani si en. A be de leti enke a tapu en fesi fu wi á si en. Den be e soso en. U be e si en fu wisiwasiman’ (Yes. 53:3). Beibel be taki sama á be o wani si a Mesiyas. Neen meke den Dyu aini a ten fu Yesesi á be mu foondoo taki omen sama á be wani waka neen baka.

5. Fa gaanse sama aini a ten ya e si den bakaman fu Yesesi?

⁵ Wi e si a sani ya aini a ten ya tu? Eeye. Omen keliki fesiman aini a ten ya e poolo te heiheiman, guduman, efuso taa sama di a goontapu e teli fu koniman e kon aini a keliki fu den. Winsi den sama ya nai tyai denseefi enke fa Beibel e taki, toku den keliki fesiman ya ná abi toobi. A denseefi keliki fesiman ya nai wani yee sani fu a foluku fu Yehofa di e meke moiti fu du sani enke fa Beibel e taki. Pawlesi be taki Gadu teke sama di taawan e si fu wisiwasiman fu kon dini en (1 Kor. 1:26-29). Yehofa nai luku fa sama e denki fu u. Ala u pelensipali gi en.

6. Fa u sa waka a Yesesi baka enke fa Mateyesi 11:25, 26 e soi?

⁶ San u mu du efu wi á wani sani tapu u fu dini Yehofa? (Leisi Mateyesi 11:25, 26.) Yu á mu meke a fasi fa a goontapu e si a foluku fu Yehofa tapu i fu dini en. Holi a pakisei taki a den sama di abi sakafasi Yehofa e hali kon na a olikanisâsi fi en (Ps. 138:6). Poti pakisei a den somen sani di den sama di e dini Yehofa e du, winsi fa gaanse fu den a sama di a goontapu nai teli fu koniman.

7. Saide Yesesi be kuutu den Faliseiman? Fa den fii di Yesesi kuutu den?

⁷ Yesesi á be e feele fu kuutu den keliki fesiman aini a ten fi en, bika den á be e yeepi a foluku fu dini Yehofa enke fa a wani. A be kuutu den Faliseiman di be e moo booko den ede anga a fasi fa sama e wasi den ana, pe fu den booko den ede anga den mma anga dda (Mat. 15:1-11). Den disipel fu Yesesi be foondoo di den yee san a taigi den Faliseiman. Den akisi en taki: ‘I sabi taki den Faliseiman ati boon di den yee san i taki?’ Ma a piki den taki: ‘Ala bon di Nda á paandi, a fu hali puu. U fika den. Den e soi taawan a pasi, ma denseefi beendi. Neen meke efu wan beendiman e tyai wan beendiman, a den tu man o kai go aini wan peti’ (Mat. 15:12-14). Winsi fa den keliki fesiman ati be boon a Yesesi, toku a sani ya á be tapu en fu taki a tuu.

8. Fa Yesesi soi taki a ná ala biibi Gadu e fende bun?

⁸ Yesesi be e soi sama kiin taki son wan fu den sani di den be e biibi a ná be tuu. Noiti Yesesi leli sama taki Gadu e fende ala keliki bun. A be taki a omen sama be o waka na a baala pasi di e tyai sama go dede. Ma a be soi tu taki a wantu sama namo o fende a sumaa pasi di e tyai sama go a teego libi (Mat. 7:13, 14). A be taki a be o gei enke son sama e dini Gadu, ma aini den ati den á be e dini Gadu tuutuu. A be taki: ‘Luku bun anga den falisi  polofeiti. Den e kon a wi enke sikapu, ma aini den ati den a ogii busidagu. A den sii di den e meke, o meke u sabi sama a den.’​—Mat. 7:15-20.

9. Fa Yesesi soi taki den sani di den keliki fesiman be e leli sama a ná be tuu?

⁹ San Beibel e taki? Den polofeititoli aini Beibel be e soi taki a Mesiyas be o lobi a osu fi en Dda (Ps. 69:9; Yoh. 2:14-17). Fu di Yesesi be lobi Yehofa meke a á be e feele fu soi den keliki fesiman taki omen fu den sani di den e leli sama a ná tuu. Den Faliseiman be e biibi taki te wan sama dede, wan sani fi en e libi go doo. Ma Yesesi be soi kiin taki te wan sama dede, a á sabi nawan sani moo. A leti enke a de aini wan dipi siibi (Yoh. 11:11). Den Saduseiman á be e biibi taki dedesama poi weki baka. Yesesi soi kiin taki a sani ya a ná tuu di a weki en mati Lasalesi di be dede fo dei kaba (Yoh. 11:43, 44; Toli 23:8). Den Faliseiman be e biibi taki te wan pikin meke, Gadu taki a fesi kaba fa en libi o waka. Ma Yesesi be e leli sama taki na ala sama sa luku gi denseefi san den o du anga den libi.​—Mat. 11:28.

10. Saide omen sama aini a ten ya á lobi den sani di wi e leli den?

¹⁰ Wi e si a sani ya aini a ten ya tu? Eeye. Gaanse sama á lobi u fu di wi e soi aini Beibel taki son wan fu den sani di den e biibi a ná tuu. A omen keliki fesiman e leli sama taki Gadu e boon ogii sama aini faya. Anga den sowtu falisi leli ya den e koli sama fu du san den wani. Ma wi enke a foluku fu Gadu e soi sama taki a Gadu di wi e dini, lobi sama. Noiti a o du sowan ogii-ati sani. Omen keliki e leli sama tu taki te wan sama dede, wan sani fi en e libi go doo. Ma Beibel e soi kiin taki a sani ya a ná tuu. Bika efu a sani ya a be tuu, da Gadu á be abi fu weki dedesama aini a ten di e kon. Son sama e biibi tu taki Gadu taki a fesi kaba fa u libi o waka. Ma wi e soi den aini Beibel taki Gadu gi ala sama a okasi fu luku san den wani du anga den libi. Fa den keliki fesiman e fii te wi e leli sama a tuu? Gaanse leisi den ati e boon.

11. Te i luku den sani di Yesesi taki a Yohanisi 8:45-47, da san Yehofa wani a foluku fi en du?

 ¹¹ San u mu du efu wi á wani sani meke u gwe fika Yehofa? Efu u lobi a waaleiti tuutuu, u mu e du san Gadu taki ala yuu. (Leisi Yohanisi 8:45-47.) Wi á wani de enke Saatan Didibii, neen meke u ná o du sani di nai kai anga san wi e leli aini Beibel (Yoh. 8:44). Yehofa wani ala den sama di e dini en buuse ogii. A wani wi e du bun ala yuu, leti enke Yesesi.​—Rom. 12:9; Heb. 1:9.

12. Saide a fasi fa Yesesi dede be meke omen Dyu dyakata?

¹² San a wan taa sani di meke omen Dyu aini a ten fu Yesesi á be wani waka neen baka? Pawlesi be taki: ‘Wi e peleiki fu Kelestesi di sama be sipikii a wan ponsu. A sani ya meke omen Dyu dyakata’ (1 Kor. 1:23). Saide a fasi fa Yesesi dede be meke omen Dyu dyakata? Den Dyu ya be fende taki a ogiiman den be e kii na a sowtu fasi ya. Neen meke den á be wani biibi taki a Yesesi na a Mesiyas.​—Deit. 21:22, 23.

13. San den sama di á be wani si Yesesi enke a Mesiyas á be e poti pakisei?

¹³ Yesesi á be du nawan ogii, neen meke den Dyu á be mu gwe fika en fu di sama kii en a wan ponsu. Efu den be poti pakisei, den be o si taki a lei sama lei gi Yesesi. Den be o si tu taki di den tyai Yesesi go a kuutu, sani á waka enke fa a be mu waka a wan kuutu (Luk. 22:54; Yoh. 18:24). Den sama di kuutu Yesesi á du sani a wan letifasi. Pe fu den kuutu en enke fa den be e kuutu taa sama, den ‘suku sama fu lei gi Yesesi fu den be sa fende wan fasi fu kii en’. Di den á fende nawan sani fu kii Yesesi na a fasi ya, neen a gaan pilisite bigin poti akisi gi Yesesi fu a be sa taki wan sani di be o meke den kii en (Mat. 26:59; Malik. 14:55-64). Di Yehofa weki Yesesi, denseefi kuutubakaa ya pai den suudati fu Rome tyaipi moni fu lei taki a fufuu sama kon fufuu a dedesikin fu Yesesi.​—Mat. 28:11-15.

14. San den polofeititoli be taki fu a dede fu a Mesiyas?

 ¹⁴ San Beibel e taki? A omen Dyu aini a ten fu Yesesi á be kaba fusutan taki a Mesiyas be mu dede, ma toku Beibel be taki a sani ya a fesi. Wan polofeititoli be taki: ‘A dede fu sama ede. Den kii en enke wan ogiiman. A tyai den sondu fu tyaipi sama. A toon a sama di e taki gi den sondu sama’ (Yes. 53:12). Beibel be soi kiin taki den be o kii a Mesiyas enke wan ogiiman. Neen meke a fasi fa sama kii Yesesi á be mu tapu den Dyu fu waka neen baka.

15. Sowtu lei di sama e paati fu Yehofa Kotoigi e tapu son sama fu kon dini Gadu?

¹⁵ Wi e si a sani ya aini a ten ya tu? Eeye. Leti enke fa sama be kii Yesesi sosokaali, a so den e du ogii anga a foluku fu Gadu winsi fa den á du ogii. Meke u luku wantu fu den toli ya. Aini den yali 1930 te anga 1950, a omen leisi sama tyai Yehofa Kotoigi go a kuutu na Ameekankondee fu di den e dini Yehofa. Somen fu den kuutubakaa á be e kuutu den toli fu wi anga leti. Aini Kibek di de a Kanada, keliki be e miti ede anga lanti fu suku fasi fu tapu a wooko fu u. Den be sooto omen peleikiman fu di den be e taki anga den biitisama fu a Kownukondee fu Gadu. A pisiten di den Nazi be e tii Doisilikondee, a omen yonkuu baala den kii fu di den be e dini Yehofa. Aini den yali di pasa, den lanti fu Rosiyakondee sooto omen fu den baala fu u fu di den be e taki fu Beibel. Den fende taki a wooko ya e meke sama á saka denseefi a lanti ondoo. Efu den fende a Nyun Grontapu vertaling aini Rosiyatongo a yu osu den sa sooto i, bika den fende taki a Beibel ya nai kai anga den weiti fu a kondee fu di Yehofa nen sikiifi aini.

16. Enke fa 1 Yohanisi 4:1 e soi, da saide wi á mu biibi den lei di sama e paati fu a foluku fu Gadu?

¹⁶ San i mu du efi yu á wani sani tapu i fu dini Yehofa? Meke moiti fu sabi fa sani de tuutuu. Na a lezing di Yesesi be holi na a mongo, a be taigi den bakaman fi en taki sama be o taki omen sowtu ‘lei fu den bakaman fi en’ (Mat. 5:11). A Saatan na a sama di e bigin anga den lei ya. Ai meke den feyanti fu u paati lei fu a foluku fu Gadu (Openb. 12:9, 10). Wi á mu meke den lei ya tapu u fu dini Yehofa.​—Leisi 1 Yohanisi 4:1.

17. Saide den sani di pasa fosi sama kii Yesesi be sa meke son sama á wani toon en bakaman?

¹⁷ Fosi sama kii Yesesi, wan fu den twalufu apostel fi en konkuu en. Wan fu den taa apostel fi en sitee dii leisi taki a á sabi Yesesi. Boiti dati, ala den apostel fu Yesesi lon gwe fika en di sama kon kisi en fu tyai go kii (Mat. 26:14-16, 47, 56, 75). A sani ya á be foondoo Yesesi. A be taigi den taki a so sani be o waka (Yoh. 6:64; 13:21, 26, 38; 16:32). Toku son sama be sa gwe fika Yesesi fu a sani ya ede. Kande den be o denki taki: ‘Efu a so den apostel fu Yesesi e tyai denseefi, da mi á wani paa anga den sowtu sama de.’

18. Sowtu polofeititoli kon tuu fosi Yesesi dede?

¹⁸ San Beibel e taki? Omen ondoo yali fosi Yesesi be kon a goontapu, Yehofa be meke sama sikiifi aini en Wowtu taki sama be o konkuu a Mesiyas gi diitenti pisi solufu moni (Sak. 11:12, 13). A sama di be o konkuu en be o de wan fu den koosube mati fi en (Ps. 41:9). Polofeiti Sakaliya be sikiifi taki: ‘Kii a sikapuman, da ala den sikapu o lon go na ala se’ (Sak. 13:7). Efu den sama aini a ten fu Yesesi be holi a  polofeititoli ya a pakisei, den á be o foondoo taki sama be konkuu Yesesi. Den á be o meke a sani ya tapu den fu waka neen baka tu.

19. San den sama di lobi Yehofa tuutuu e holi a pakisei?

¹⁹ A sani ya e pasa aini a ten ya tu? Eeye. Aini a ten ya, wantu Kotoigi di komoto a waaleiti bigin paati lei fu a olikanisâsi fu di den wani taa sama waka a den baka. Den e paati den lei ya a internet. Son sama e go taki anga nyunsuman di wani paati den lei fu u. Ma den sama di lobi Yehofa tuutuu, nai meke sama koli den anga lei. Den e holi a pakisei taki Beibel be taki a fesi kaba taki ala den sani ya be o pasa.​—Mat. 24:24; 2 Peit. 2:18-22.

20. San u mu du efu wi á wani sama di gwe fika a olikanisâsi koli u fu gwe fika Yehofa? (2 Timotiyesi 4:4, 5)

²⁰ San u mu du efu wi á wani sama fende u koli? U biibi mu taanga. Efu u wani u biibi taanga, u mu e sutudeli ala yuu, u mu e begi, u mu e du ala san u man aini a peleikiwooko tu. (Leisi 2 Timotiyesi 4:4, 5.) Te u biibi taanga, u ná o buuya te sama e paati lei fu a olikanisâsi (Yes. 28:16). Efu u lobi Yehofa, a Wowtu fi en, anga den baala anga sisa fu u, u ná o go e poti pakisei a den sani di den sama ya taki.

21. Winsi fa omen sama aini a ten ya nai wani aliki a bosikopu di wi e paati, toku san u sa biibi?

²¹ Aini a ten fu Yesesi, a omen sama meke sani tapu den fu toon en bakaman. Ma winsi fa son sama á be wani waka a Yesesi baka, toku a omen sama be e si en enke a Mesiyas. Beibel e taki fu wan fesiman fu den Dyu di be bigin waka neen baka. A omen pilisite be toon en bakaman tu (Toli 6:7; Mat. 27:57-60; Malik. 15:43). Aini a ten ya, a omen miliyun sama á meke sani tapu den fu waka a Yesesi baka. San yeepi den? Den sama ya meke moiti fu kon sabi den tuu leli fu Beibel. Den lobi den sani di den leli aini Beibel tu. Gadu Wowtu e taki: ‘Den sama di lobi a weiti fi yu e piisii gaan piisii. Nawan sani o meke den dyakata.’​—Ps. 119:165.