1-2. San a wantu tesi di e miti son baala anga sisa?

APOSTEL Pawlesi be taigi Timotiyesi taki a mu e meke moiti ala yuu fu du a peleikiwooko bun. Na ala Kelesten mu e meke moiti fu du a sani di Pawlesi be taigi Timotiyesi ya (2 Tim. 4:5). Ma winsi fa wi e meke moiti fu du a peleikiwooko fayafaya, toku a ná ala yuu a makiliki. A omen baala anga sisa abi tuutuu deki-ati fanowdu fu man tan du a peleikiwooko (2 Tim. 4:2). Son baala anga sisa e tan aini kondee pe den á poi dini Yehofa enke fa den wani, efuso kondee pe lanti tapu a wooko. Den baala anga sisa ya e peleiki, winsi fa den sabi taki lanti o sooto den efu den kisi den.

² A omen sani e miti a foluku fu Yehofa di sa meke den lasi-ati. Omen baala anga sisa abi fu wooko taanga fu solugu den osufamii. Te sataa anga sonde doo, den e weli te den de fukufuku. A sani ya e meke a taanga gi den fu du a peleikiwooko enke fa den be sa wani. Son baala anga sisa abi wan siki di e meke den á poi du ala san den be sa wani du gi Yehofa. Taawan á poi du ala san den be gwenti du moo fu di den kon gaandi. Yu abi baala anga sisa tu di e fii enke den á bun sai fu dini Yehofa. A sani ya e meke den e fii booko-saka ala yuu. Wan sisa den e kai Mary * taki: ‘Na ala yuu mi abi fu e feti anga a fii taki mi á bun sai fu dini Yehofa. Son leisi a sani ya e meke mi weli te da mi ná a koso fu du taa sani. A sani ya e meke a taanga gi mi fu du a peleikiwooko fayafaya.’

3. San wi o luku aini a artikel ya?

³ Winsi san e miti u, toku Yehofa sa gi wi a kaakiti di wi abi fanowdu fu du ala san u poi gi en. Aini a artikel ya wi  o luku fa Yehofa e yeepi u fu du a sani ya. Ma wi o luku fosi fa a be yeepi Pawlesi anga Timotiyesi fu tan du a peleikiwooko, winsi fa tesi be e miti den.

4. San a wantu sani di be miti Pawlesi?

⁴ A omen tesi be e miti Pawlesi. Sama be fon mi en, den be naki en anga siton fu kii. A omen leisi den poti en a sitaafu-osu tu. A be abi taanga-sikin fanowdu fu pasa den tesi ya (2 Kor. 11:23-25). Sen á be e kisi Pawlesi fu taigi taawan taki a be e fii booko-saka son yuu. A taki son leisi a bunbun moiti a be abi fu meke fu feti anga den fii fi en di be sa meke a lasi-ati (Rom. 7:18, 19, 24). Boiti dati, Pawlesi be abi ‘wan maka aini en sikin’ di be e fooseli en. A omen leisi a be akisi Gadu fu puu a maka ya gi en.​—2 Kor. 12:7, 8.

5. San Pawlesi be poi du winsi fa tesi be e miti en?

⁵ Yehofa be gi Pawlesi a kaakiti di a be abi fanowdu fu tan du a peleikiwooko, winsi san be e miti en. San a wantu sani di Yehofa be yeepi Pawlesi fu du? Di den be poti Pawlesi aini wan osu a Rome enke sitaafuman, a peleiki fayafaya gi den fesiman fu den Dyu anga taa heiheiman (Toli 28:17; Filip. 4:21,22). A be e peleiki gi den suudati fu a Gaankownu di be e holi wakiti gi en tu, anga ala taa sama di be e kon luku en (Toli 28:30, 31; Filip. 1:13). Na a ten de Gadu be meke Pawlesi sikiifi wantu biifi gi den Kelesten. Den biifi di a sikiifi e gi u taanga-sikin aini a ten ya tu. A fasi fa Pawlesi holidoo be gi den Kelesten fu Rome taanga-sikin. Neen meke denseefi ‘á be e feele fu taki fu a Wowtu fu Gadu’ (Filip. 1:14). Winsi fa a ná ala yuu Pawlesi be e poi du ala san a be wani gi Yehofa, toku a be e du san a be poi. Den sani di be e miti Pawlesi be meke a bun nyunsu moo go a fesi.​—Filip. 1:12.

6. Enke fa 2 Korentesama 12:9, 10 e soi, da san be yeepi Pawlesi fu tan du a peleikiwooko?

⁶ Pawlesi be sabi taki a á be o poi du nawan fu den sani ya efu Yehofa á be e yeepi en. A be taki ‘te a swaki da a Yehofa be e gi en kaakiti’. (Leisi 2 Korentesama 12:9, 10.) Yehofa meke a santa yeye fi  en yeepi Pawlesi fu du a peleikiwooko, winsi fa omen sowtu sani be e miti en.

7. San be sa meke a taanga gi Timotiyesi fu du en wooko bun?

⁷ Timotiyesi di be e wooko makandaa anga Pawlesi be abi a santa yeye fu Gadu fanowdu tu fu du a wooko fi en bun. Son leisi Pawlesi be e sende en wawan go a son kemeente fu gi den taanga-sikin (1 Kor. 4:17). Kande son leisi Timotiyesi be e fii enke a ná o poi du a wooko ya bun. Neen meke Pawlesi be taigi en taki: ‘Ná meke nawan sama wisiwasi i fu di i yonkuu’ (1 Tim. 4:12). Boiti dati, Timotiyesi seefi be abi wan maka aini en sikin tu. Na ‘ala yuu a be e sikisiki’ (1 Tim. 5:23). Ma Timotiyesi be sabi taki a santa yeye fu Yehofa be o yeepi en fu tan du en wooko bun.​—2 Tim. 1:7.

8. Fa Yehofa e taanga a foluku fi en aini a ten ya?

⁸ Aini a ten ya, Yehofa e gi den sama di e dini en a ‘kaakiti fi en di bigi pasa maiki’ fu holidoo te tesi e miti den (2 Kor. 4:7). Wi o luku fo fu den sani di Yehofa gi u di o yeepi u fu tan dini en anga u hii ati. Den sani ya na: Begi, Beibel, mati di e dini Yehofa, anga a peleikiwooko.

9. Fa begi e yeepi u?

⁹ Fa begi e yeepi u? Pawlesi e taigi wi aini Efeisesama 6:18 taki na ala yuu u sa begi. Te wi e begi Gadu, a o taanga u. Jonnie, di e tan a Bolifiya taki a si fa begi yeepi en di tesi be miti en baka makandaa. En uman, en mma anga en dda be kon siki na a wan yuu. Jonnie meke moiti fu solugu ala den winsi fa a be taanga gi en. En mma dede bakaten. A omen ten a teke fosi en uman anga en dda betee. Jonnie taki: ‘Te sani be e moo mi, mi be e taigi Yehofa pilisisi fa mi be e fii. Na a sani ya yeepi mi fu pasa den ten ya.’ Wan owluman aini Bolifiya den e kai Ronald be kon yee taki en mma abi kanker. Wan mun baka dati, neen en mma dede. A taki: ‘Begi e yeepi mi fu puu a koko di de a mi ati. Mi sabi taki Yehofa e fusutan fa mi e fii. A sabi mi bun moo enke fa mi sabi miseefi.’ Kande son leisi i nai sabi san i mu taki te yu e begi. Ma a ná abi toobi. Yehofa taki i sa begi en winsi yu á sabi san i mu taki.​—Rom. 8:26, 27.

10. Enke fa Hebrewsama 4:12 e soi, da saide a pelensipali fu leisi a Beibel da u teke ten pakisei den sani di u leisi?

¹⁰ Fa Beibel e yeepi u? Leti enke fa Pawlesi be e meke a Wowtu fu Gadu toosutu en, a so useefi o fende kaakiti te wi e leisi Beibel (Rom. 15:4). Te wi e leisi a Wowtu fu Gadu, da u teke ten pakisei san u leisi, a yeye fu Yehofa o yeepi u fu si fa u sa wooko anga a sani di u leli. (Leisi Hebrewsama 4:12.) Ronald, di u be taki fi en kaba taki: ‘Mi e leisi Beibel ala neti. Mi e teke ten pakisei den manii fu Yehofa, anga a fasi fa a be e libi anga den sama di be e dini en a fositen. Na a sani ya e yeepi mi fu holidoo.’

11. Fa Beibel yeepi wan sisa di en man dede?

¹¹ Te wi e teke ten pakisei den sani di sikiifi aini Beibel, a sani ya o yeepi u fu denki enke fa Yehofa e denki. Luku fa a sani ya be yeepi wan sisa di man dede. Wan owluman be gi en taanga-sikin fu leisi a toli fu Yopu. Di a be e leisi den fosi pisi, a be e kuutu Yopu taki a á be e denki bun. Aini en ede a be e bali Yopu taki: ‘Yopu! Yu á mu denki so fu Yehofa.’ Ma bakaten a kon si taki na aseefi fasi  enseefi be e denki tu. A toli fu Yopu yeepi en fu kengi a fasi fa a be e denki, winsi fa a dede fu a man fi en be e du en ogii ete.

12. Fa Yehofa e meke baala anga sisa yeepi u?

¹² Fa den baala anga sisa e yeepi u? Yehofa e meke baala anga sisa yeepi u te sani e moo u. Pawlesi be taki a be e angii fu si den baala anga sisa, bika den be e gi denseefi taanga-sikin te den be de makandaa (Rom. 1:11, 12). Mary, di u be taki fi en kaba taki: ‘Yehofa be meke baala anga sisa di á be sabi seefi taki a so mi be e fii, gi mi taanga-sikin. Son wan fu den be e sende biifi gi mi, taawan be e kon taki anga mi. Di mi taki anga taa sisa di abi aseefi polobelema fu mi, mi fende kaakiti baka. Den owluman seefi e yeepi mi. Ala yuu den e meke mi fii taki mi pelensipali aini a kemeente.’

13. Fa u sa gi useefi taanga-sikin a den komakandaa?

¹³ Wan fu den moo bun peesi pe u sa gi taawan taanga-sikin, a den komakandaa. Ala leisi te i go a komakandaa, luku fa i sa gi wan sama taanga-sikin anga den sani di yu e taki. Luku den bun sani di den e du da i gafa den. Wan leisi, wan owluman den e kai Peter taigi wan sisa di man nai dini Yehofa taki: ‘Ná pikin taanga-sikin wi e fende te u luku a fasi fa yu e kon na ala den komakandaa. Anga ala yu e seeka den sigisi pikin fi i fu denseefi gi piki a den komakandaa.’ Di a sisa yee a sani ya, ala en ain fuu anga wataa. A taigi a baala taki: ‘Yu á sabi fa a sani di i taki ya bigin gi mi baa. Mi be abi en fanowdu tide.’

14. Fa a peleikiwooko e yeepi u?

¹⁴ Fa a peleikiwooko e yeepi u? Te wi e peleiki wi e piisii, winsi sama nai aliki u (Odo 11:25). Wan sisa den e kai Stacy si fa a peleikiwooko yeepi en fu piisii baka. Di den be puu wan famii fi en aini a kemeente, a sani ya be du en ogii te. A be e akisi enseefi efu a be du ala san a be poi fu yeepi en. Stacy taki wan hii pisiten a soso a sani ya a be e pakisei. San yeepi en fu kisi enseefi baka? Na a peleikiwooko. Te a be e peleiki, a be e poti ala en pakisei a den sama di a be e miti. A taki: ‘A pisiten de Yehofa gi mi wan Beibelsutudi di be e go a fesi gawgaw. A sani ya be gi mi taanga-sikin. Winsi san e pasa aini mi libi, a peleikiwooko e yeepi mi fu kisi miseefi baka.’

15. San den sani di Mary taki e leli u?

¹⁵ Son leisi sani e kengi aini u libi di e meke wi á poi du ala san u be sa wani aini a peleikiwooko. Efi yu e fii so, ná feegete taki Yehofa e si a moiti di yu e meke. Ai teke en fu bigi te yu e du ala san i poi gi en. Luku a toli fu Mary di u be taki fi en kaba. A sisa ya be foloisi go a wan kemeente pe sama e taki wan taa tongo. A sani ya be meke a á be poi peleiki enke fa a be gwenti. A taki: ‘Wan hii pisiten a soso Beibeltekisi mi be sa leisi gi sama efuso taki wan satu sani te mi be de aini a peleikiwooko.’ Te Mary be e luku fa den sama di e taki a tongo bun e peleiki, a be e fii enke a nai du en wooko bun. Ma a meke moiti kengi a fasi fa a be e denki. A be kon si taki winsi fa a á be e taki a tongo bun, toku Yehofa be e koboloiki en ete fu yeepi sama fu kon sabi a tuu. A taki: ‘Den moo pelensipali leli fu Beibel a ná taanga sani. Winsi yu á poi taki wan tongo bun toku i poi leli sama den sani ya. A den leli ya e kengi sama libi.’

16. San o yeepi den baala anga sisa di á poi komoto a den osu?

 ¹⁶ Son baala anga sisa á poi komoto a den osu fu di den siki efuso fu di den kon gaandi, toku den wani du a peleikiwooko fayafaya. Yehofa e si a moiti di den e meke fu paati a bun nyunsu anga taawan. Efu yu a wan fu den sama ya, Yehofa sa yeepi i fu peleiki gi den sesite anga taa sama di e kon a yu a osu. Efu wi e maiki den sani di u be poi du fosi anga san u poi du nownow, a sani de o meke u lasi-ati. Ma efu wi e tan poti pakisei a fa Yehofa e yeepi u, da winsi san e pasa wi o poi holidoo anga piisii.

17. Enke fa Peleikiman 11:6 e soi, da saide u mu tan peleiki winsi u si enke sama nai aliki u?

¹⁷ Te wi e peleiki, wi á sabi sowtu bakapisi a bosikopu di wi e paati o abi. (Leisi Peleikiman 11:6.) Luku a toli fu Barbara, wan sisa di pasa 80 yali kaba. A sisa ya gwenti peleiki anga telefon. Ai sikiifi biifi gi sama tu. Wan leisi a sikiifi wan biifi, neen a poti A Wakititolen fu 1 maart 2014 aini a biifi. A Wakititolen ya be e taki fu san Gadu du gi u. A sisa á be sabi taki den sama di be o leisi a biifi ya a be wan Kotoigi toowpaa di á be e dini Yehofa moo. A toowpaa ya leisi A Wakititolen omen leisi go kon. A man taki a gei enke a Yehofa seefi be e taki anga en. Bakaten a toowpaa ya daai kon dini Yehofa baka. A 27 yali langa den be gwe fika Yehofa. Ná pikin poolo Barbara musu poolo di a yee sowtu wini wan fu den biifi di a sikiifi be abi.

18. San u mu du efu u wani Gadu yeepi u?

¹⁸ A omen sani Yehofa gi u fu yeepi u fu holidoo. Te wi e begi, te wi e leisi Beibel, te wi e paa anga den baala anga sisa, anga te wi e peleiki fayafaya, da wi e si fa Yehofa e yeepi u. Te wi e du den sani ya, wi e soi tu taki wi e fitoow Yehofa. U sa fitoow u Dda di de a hemel bika na ala yuu ai ‘suku fasi fu koboloiki en kaakiti fu yeepi den sama di e dini en anga den hii ati’.​—2 Kolon. 16:9.