1. San Yehofa be leli Abalaham?

 NOITI Abalaham o feegete a takimakandaa ya. Gadu meke wan engel taigi Abalaham taki a be o kii ala den sama fu a foto Sodom anga Gomora. Abalaham dyombo di a yee a sani ya. A akisi Gadu taki: Yo kii den bun sama makandaa anga den ogii sama tuutuu? A sama di e koti kuutu a hii goontapu e du sani a wan letifasi, na so noh? Yehofa pasensi anga Abalaham. A leli a mati fi en wan pelensipali sani di o giw taanga-sikin. A leli en taki noiti Gadu o kii den sama di e libi enke fa a wani.​—Gen. 18:23-33.

2. Saide u sa biibi taki Yehofa e kuutu sani a wan letifasi ala yuu? Faw du sabi taki ai soi tyali-ati gi sama te ai kuutu den?

² Saide u sa biibi taki Yehofa e kuutu sani a wan letifasi ala yuu? Faw du sabi taki ai soi tyali-ati gi sama te ai kuutu den? Bika u sabi taki a ‘Yehofa e ondoosuku’ sama ati (1 Sam. 16:7). Beibel taki, ai si ‘ala sama ati’ (1 Kow. 8:39; 1 Kolon. 28:9). A sani ya a wan foondoo sani. Yehofa koni omen toon moo wi. Neen meke a ná ala yuu we fusutan saide ai du son sani. Apostel Pawlesi be taki: ‘Wa poi fusutan fa ai kuutu sani.’​—Rom. 11:33.

3-4. San a wantu sani di we akisi useefi son yuu? San wo luku aini a artikel ya? (Yohanisi 5:28, 29)

³ Winsi faw sabi taki Yehofa e du sani a wan letifasi ala yuu, tokuso we akisi useefi aseefi sani di Abalaham be akisi enseefi. Kande we akisi useefi taki: Howpu de gi den  sama fu Sodom anga Gomora di Yehofa be kii? A omen sama Yehofa be kii fu di den be e du ogii. Wantu fu den sama ya, a den sama fu Sodom anga Gomora. Beibel taki Gadu o weki sama di be libi a wan letifasi anga sama di á be libi a wan letifasi. Wantu sama fu Sodom anga Gomora o de aini a kulu ya?​—Toli 24:15.

⁴ Beibel e taki fu wantu sama ‘di o weki fu fende libi anga wantu sama di o weki fu fende kuutu’. U kon fusutan moo bun san a sani ya wani taki. a (Leisi Yohanisi 5:28, 29.) Fu di u kon fusutan a tekisi ya moo bun, meke wi abi fu kengi a fasi faw be e taki son sani. Wo luku a toli ya aini a artikel ya anga a taawan di e kon. Wo luku fosi faw du sabi taki Yehofa e kuutu sani a wan letifasi. Ma kow luku saw sabi fu a toli ya anga san wa sabi.

SAN WA SABI FU DEN TOLI YA

5. San den buku fu u be e taki fu den sama di Yehofa be kii a Sodom anga Gomora?

⁵ Aini a ten di pasa den buku fu u be taki saw pasa anga den sama fu Sodom anga Gomora fu di be e du ogii. U be taki howpu á de gi den sama ya moo. Gadu naw weki den baka. Baka di u begi fu a toli, wi ondoosuku en baka. A sani ya meke u kon fusutan taki wa poi taki howpu á de gi den moo. Saide u taki a sani ya?

6. Kai wantu sama di Yehofa be kii fu di den be e du ogii? San wa sabi fu den toli ya?

⁶ A omen toli de aini Beibel di e soi fa Yehofa be kii sama di be e du ogii. A omen sama dede aini a fuudu. A omen miliyun sama Yehofa meke den Islayelisama kii di den be teke a Paamisi Kondee abaa. Wa sabi pilisisi omen sama dede a den okasi ya. Boiti dati, wan engel be kii 185.000 suudati fu den Asiriyasama aini wan neti (Gen. 7:23; Deit. 7:1-3; Yes. 37:36, 37). Beibel e taigi u kiin taki a fu teego Yehofa kii ala den sama ya? A sikiifi aini Beibel taki a naw weki den baka? Nono. A sani ya á sikiifi a nawan peesi aini Beibel. Saide u sa taki a sani ya?

7. Te u luku den sama di be dede na a ten fu a fuudu anga den sama di be dede di den Islayelisama be teke a Paamisi Kondee abaa, da san wa sabi fu den toli ya? (Luku a fowtow a fesise fu A Wakititolen.)

⁷ Wa sabi fa Yehofa kuutu den sama di u be taki fu den a fesi. Wa sabi efu den be fende a okasi fu leli sabi Yehofa. Wa sabi efu den be fende a okasi fu tapu anga den ogii di den be e du tu. Beibel taki na a ten fu a fuudu, Nowa be e ‘peleiki gi sama taki den mu libi a wan letifasi’ (2 Peit. 2:5). Ma a wan gaan Ark Nowa be e meke. Beibel nai soi taki di a be e meke a ark a be e peleiki gi ala sama a goontapu. A so a be de anga den Kaana-an sama tu. Wa sabi efu den sama ya be fende a okasi fu leli sabi Yehofa. Wa sabi efu den be fende a okasi fu tapu anga den ogii di den be e du tu.

8. San wa sabi fu den sama fu Sodom anga Gomora?

⁸ Fa a de anga den sama fu Sodom anga Gomora? Lot be e tan a Sodom. Lot a be wan man di be e libi a wan letifasi. Ma u sabi efu Lot be e peleiki gi ala den sama ya? Nono. Den be e du ogii so na tuu. Ma ala den be sabi san bun anga san á bun? I sabi ete di den sama be kon na a osu fu Lot bgullu fu suwa anga den man di be kon neen? Beibel taki pikinnengee anga gaansama be de aini a kulu ya (Gen.  19:4; 2 Peit. 2:7). U sabi taki Yehofa a wan Gadu di abi tyali-ati. I si enke a fu teego a kii ala den sama ya? Yehofa be taigi Abalaham taki nawan sama di be e libi a wan letifasi be de aini a foto (Gen. 18:32). Neen meke Yehofa be abi leti di a sitaafu den fu den ogii di den be e du. Te Yehofa o ‘weki . . . den sama di á be libi a wan letifasi’, u sa taki nawan fu den sama ya naw weki baka? Nono, wa sabi.

9. San wa sabi fu Salomo?

⁹ Beibel abi toli fu son sama di be e libi a wan letifasi, ma bakaten den á be e libi a wan letifasi moo. Kownu Salomo a wan fu den sama ya. A be sabi sama a Yehofa. A be sabi fa a be mu dini en tu. Ná pikin belesi Yehofa be belesi en. Ma bakaten Salomo be bigin dini falisi gadu. A sani ya meke Yehofa ati be boon neen. A omen ondoo yali a foluku pina fu a sondu di a du. Di Salomo dede, Beibel taki a ‘go boo enke den afo fi en’. Wan fu den afo fi en a be Kownu David (1 Kow. 11:5-9, 43; 2 Kow. 23:13). Ma a sani ya wani taki Yehofa o meke Salomo kon a libi baka? Beibel nai taki fu a sani ya. Son sama e denki taki Salomo o kon a libi baka, bika Beibel taki ‘a sama di dede, pai fi en sondu kaba’ (Rom. 6:7). Ma a sani ya á wani taki ala den sama di dede o kon a libi baka. A ná te wan sama dede, da a sani ya wani taki a sa kon a libi baka. A weki di Yehofa o weki den sama di dede a wan kado di a giw. A den sama di a wani gi a okasi fu dini en fu teego aw gi a kado ya (Yopu 14:13, 14; Yoh. 6:44). Salomo o fende a kado ya? Wa sabi, ma Yehofa sabi. U sabi taki Yehofa o du sani a wan letifasi.

SAW SABI

10. Te Beibel e taki fu a kuutu di Yehofa e kuutu sama, da fa a sani ya e meke a fii? (Eseikiyeli 33:11) (Luku a fowtow tu.)

¹⁰ Leisi Eseikiyeli 33:11. Te Beibel e taki fu a fasi fa Yehofa e kuutu sama, ai taigi u kiin fa ai fii. Apostel Peitilisi be taki fu aseefi sani di Eseikiyeli be sikiifi. Peitilisi be taki: Yehofa ‘á wani nawan sama dede’ (2 Peit. 3:9). Den wowtu ya e toosutu u. U sabi taki Yehofa naw meke sama dede fu teego sondee fu a sabi saide. A abi tyai-ati. A de kabakaba fu soi tyali-ati tu.

11. Sama a den sama di naw kon a libi baka? Faw du sabi a sani ya?

¹¹ Saw sabi fu den sama di naw kon a libi baka? Beibel e taki fu wantu fu den toli ya. b Yesesi be soi kiin taki Yudasi Iskariot naw kon a libi baka. (Malik. 14:21; luku Yohanisi 17:12 tu.) Yudasi be sabi taki a sani di a be du e soi taki aa be e saka enseefi a Yehofa anga en Manpikin ondoo, ma toku a du en. (Luku Malikisi 3:29; w07 15/7 blz. 17-18 tu.) Yesesi be taki son wan fu den kelikifesiman di be de en feyanti naw kon a libi baka (Mat. 23:33). Pawlesi seefi be wasikoi den sama di be komoto a biibi taki den naw weki baka.​—Heb. 6:4-8; 10:29.

12. Saw sabi fu a tyali-ati fu Yehofa?

¹² Enke faw luku kaba, da Yehofa a wan Gadu di abi tyali-ati tuutuu. ‘Aa wani nawan sama dede.’ Fa a soi tyali-ati gi den sama di be meke wan gaan fowtu? Kownu David be meke omen gaan fowtu. A be teke sama uman. Boiti dati, a kii sama. Ma David be soi taki den sani  di a be du be hati en, neen meke Yehofa gi en paadon (2 Sam. 12:1-13). A soso ogii Kownu Manase be du a pisiten di a be de a libi. Ma winsi fa Manase be du omen ogii, toku Yehofa soi tyali-ati gi en. A gi Manase paadon, bika a be soi taki den sani di a du be e hati en (2 Kolon. 33:9-16). Ala den toli ya e soi taki Yehofa e soi tyali-ati gi sama te a si taki a de fanowdu. Aw meke ala den sama ya kon a libi baka, bika a si fa den soi taki den sani di den be du be e hati den tuutuu.

13. (a) Saide Yehofa soi tyali-ati gi den Ninifeisama? (b) San Yesesi taki bakaten fu den Ninifeisama?

¹³ Ala u sabi fa Yehofa soi tyali gi den Ninifeisama. Gadu be taigi Yona taki: ‘Taigi den sama taki mi si den ogii di den e du.’ Ma di den soi taki den sani di den be du be e hati den, Yehofa gi den paadon. A be abi tyali-ati moo Yona. Winsi fa Yona ati be boon, toku Yehofa soi en taki den Ninifeisama ‘á sabi san a bun anga ogii’ (Yona 1:1, 2; 3:10; 4:9-11). Bakaten Yesesi be koboloiki a toli fu den Ninifeisama fu soi fa Yehofa abi tyali-ati. Yesesi taki den Ninifeisama di be soi taki den sani di den be du be e hati den, o ‘kon a libi baka na a dei di Gadu o kuutu sama.’​—Mat. 12:41.

14. San a weki di sama ‘o weki baka fu fende kuutu’ wani taki gi den Ninifeisama?

¹⁴ Saide den Ninifeisama ‘o weki baka fu fende kuutu’? Yesesi be taki aini a ten di e kon sama ‘o weki baka fu fende kuutu’ (Yoh. 5:29). A be e taki fu a Dunsu Yali Tii fi en enke Kownu te ‘den sama di be libi a wan letifasi anga den sama di á be libi a wan letifasi’ o kon a libi baka (Toli 24:15). Den sama di á be libi a wan letifasi o ‘kon a libi baka fu fende kuutu’. A sani ya wani taki baka di den sama ya o kon a libi baka, Yehofa anga Yesesi o luku efu den e aliki en. Den o luku efu den e du den sani di den e leli tu. Efu wan Ninifeisama á wani aliki Yehofa, a naw meke a libi fu teego (Yes. 65:20). Ma ala den sama di o dini Yehofa anga den hii ati, o fende a okasi fu libi fu teego.​—Dan. 12:2.

15. (a) Saide wa mu taki den sama di dede a Sodom anga Gomora naw kon a libi baka? (b) San den sani di sikiifi a Yudasi 7 wani taki? (Luku a faki di den e kai ‘ San Yudasi be wani taki?’)

 ¹⁵ Di Yesesi be e taki fu a kuutu di Gadu o kuutu sama, a be taki ‘a dei di Gadu o kuutu sama’ o moo makiliki gi den sama fu Sodom anga Gomora moo den sama di á be wani aliki den sani di a be e leli den. (Mat. 10:14, 15; 11:23, 24; Luk. 10:12). San a be wani taki anga a sani ya? A wani a be wani soi taki den sama fu a ten fi en be ogii moo den sama fu Sodom anga Gomora? Holi a pakisei taki di Yesesi be taki den Ninifeisama be o ‘kon a libi baka na a dei di Gadu o kuutu sama’, a be wani soi fa sani o waka tuutuu. A kuutu dei di Yesesi be taki fi en aini a toli fu den sama fu Sodom anga Gomora na aseefi kuutu dei di a be taki fu den sama fu Ninifei. Leti enke fa den sama fu Ninifei be e du omen ogii, a letiso den sama fu Sodom anga Gomora be e du omen ogii tu. Ma den Ninifeisama be fende a okasi fu soi taki den sani di den be du be e hati den. Pakisei a sani di Yesesi be taki fu a weki di sama ‘o weki baka fu fende kuutu’. Den ‘sama di be du ogii’ o weki baka tu (Yoh. 5:29). Neen meke kande howpu de gi den sama fu Sodom anga Gomora ete. Kande son wan fu den sama ya sa kon a libi baka, da wo abi a okasi fu leli den sani fu Yehofa anga Yesesi Kelestesi.

16. San Yehofa e luku te aw weki wan sama baka? (Yelemiya 17:10)

¹⁶ Leisi Yelemiya 17:10. A vers ya e soi saw sabi fu a fasi fa Yehofa e kuutu sama. A Yehofa ‘e ondoosuku a ati. Neen e ondoosuku den moo dipi fii fu wan sama’. Te aw weki sama baka aini a ten di e kon, aw ‘pai ibii sama gi a fasi fa a be e libi’. Yehofa o sitaafu den sama di mu fende sitaafu, ma aw soi tyali-ati tu efu a de fanowdu. Neen meke wa mu taki wan sama naw kon a libi baka efu Beibel nai taki fu a sani de.

‘A SAMA DI E KOTI KUUTU A HII GOONTAPU E DU SANI A WAN LETIFASI’

17. Saw pasa anga den sama di dede?

¹⁷ Fanafu a dei di Adan anga Efa teke a se fu Saatan, a omen miliyun sama dede.  Bika den á be aliki Yehofa. Dede a wan ogii ‘feyanti’ (1 Kor. 15:26). Saw pasa anga ala den sama ya? Den 144.000 salufu Kelesten di dini Yehofa anga den hii ati o weki baka a hemel. Den sama ya naw dede noiti moo (Openb. 14:1). Wan gaan kulu man anga uman di e fitoow Yehofa, ‘o weki baka enke sama di be e libi a wan letifasi’. Den o tan a goontapu ya fu teego efu den tan aliki Kelestesi na ten fu a Dunsu yali tii anga baka te den pasa a lasiti tesi (Dan. 12:13; Heb. 12:1). Na a pisiten fu a dunsu yali tii ‘den sama di á be libi a wan letifasi’, den sama di á be fende a okasi fu kon sabi Yehofa, anga ‘den sama di be e du ogii’ o fende a okasi fu kengi den manii. Den o fende a okasi fu kon dini Yehofa tu (Luk. 23:42, 43). A omen sama á be wani saka denseefi a Yehofa ondoo. Neen meke noiti moo aw meke den sama ya kon a libi baka.​—Luk. 12:4, 5.

18-19. (a) Saide u sa biibi taki Yehofa o kuutu den sama di dede a wan letifasi? (Yesaya 55:8, 9) (b) San wo luku aini a taa artikel?

¹⁸ U sa biibi taki te Yehofa e kuutu sama, ai du sani a wan letifasi ala yuu? Eeye. Abalaham seefi be kon fusutan taki na ala yuu Yehofa e du san bun, a koni, aa abi tyali-ati. Neen na a ‘kuutuman fu hii goontapu’. A gi en Manpikin leli. Boiti dati, neen a gi a faantiwowtu fu kuutu sama (Yoh. 5:22). Yehofa anga en Manpikin sabi ala sama ati (Mat. 9:4). Neen meke te den o kuutu sama, den o du ‘sani a wan letifasi.’

¹⁹ U sa fitoow Yehofa anga ala den sani di ai du. Wa poi kuutu sama a wan letifasi, ma a Yehofa wawan poi du a sani ya. (Leisi Yesaya 55:8, 9.) Neen meke we biibi taki en anga en Manpikin o kuutu sama a wan letifasi. U sabi tu taki Yesesi, a Kownu fu wo du sani pilisisi enke en Dda. Aw soi tyali-ati gi sama (Yes. 11:3, 4). Ma saw sa taki fu a fasi fa Yehofa anga en Manpikin o kuutu sama na a ten fu a gaan banowtu? San wa sabi? Saw sabi? Wo piki den akisi ya aini a taa artikel.