SUTUDI-ARTIKEL 20
SINGI 67 Go taigi den
Meke lobi yeepi i fu tan peleiki
‘A bun nyunsu fu a Kownukondee mu paati na ala se fosi. Bakadati a kaba o kon.’—MALIK. 13:10.
SAN WO LELI
Wo luku fa lobi o yeepi u fu tan du a peleikiwooko anga u hii ati.
1. Saw leli na a ala yali komakandaa fu 2023?
DI DEN baala holi a ala yali komakandaa fu 2023, a u yee wantu nyun sani di abi fu du anga den sani di we biibi, anga a peleikiwooko. U leli taki son sama sa fende a okasi ete fu kon na a se fu Yehofa, winsi a baka te a gaan Babilon kisi poli. U leli tu taki bigin fu november 2023 den peleikiman naabi fu sikiifi ala den sani di den du aini a peleikiwooko moo. Den kengi ya wani taki a peleikiwooko á pelensipali moo? Nono.
2. Saide a peleikiwooko e kon moo pelensipali dei fu dei? (Malikisi 13:10)
2 Ibii dei a peleikiwooko e kon moo pelensipali. Saide? Bika a ten di fika ná ipi moo. Pakisei a sani di Yesesi be taki fu a peleikiwooko aini den lasiti dei. (Leisi Malikisi 13:10.) Mateyesi sikiifi taki Yesesi be taki a bun nyunsu o paati na a hii goontapu fosi a ‘kaba’ doo (Mat. 24:14). A sani ya e soi taki aw tyai wan kaba kon na a ogii goontapu fu Saatan ya. Yehofa poti a ‘dei anga a yuu’ kaba di a sani ya o pasa. A naw langa moo tu (Mat. 24:36; 25:13; Toli 1:7). Ala dei a kaba e koosube namo (Rom. 13:11). Neen meke u mu tan peleiki te enke a kaba doo.
3. Sai yeepi u fu peleiki?
3 Ala u mu poti pakisei na a pelensipali akisi ya: Saide we peleiki a bun nyunsu? Lobi e yeepi u fu peleiki. Te we du a peleikiwooko, we soi taki u lobi a bun nyunsu anga taa sama. Ma a moo pelensipali sani a taki u lobi Yehofa anga a nen fi en. Meke u poti pakisei a den sani ya. Wo luku ibii wan fu den.
WE PELEIKI FU DI U LOBI A BUN NYUNSU
4. Fa ye fii tei yee bun nyunsu?
4 I sabi ete fai be fii dii be yee wan bun nyunsu? Kande wan sama aini i famii meke wan pikin efuso kande i fende wan wooko dii be abi taanga fanowdu. Kande i piisii te neen i taigi den famii anga den mati fii. Fai be fii dii yee a bun nyunsu fu Gadu kownukondee?
5. Fai be fii dii yee a Wowtu fu Gadu a fosi leisi? (Luku a fowtow tu.)
5 Pakisei fai be fii dii yee a Wowtu fu Gadu a fosi leisi. I leli taki i Dda di de a hemel lobi i. A wani i kon aini a osufamii fi en. A paamisi taki pen anga pina naw de moo. I sa biibi taki den sama fii di dede o kon a libi baka aini a nyun goontapu. A paamisi i omen taa sani ete (Malik. 10:29, 30; Yoh. 5:28, 29; Rom. 8:38, 39; Openb. 21:3, 4). Dii kon sabi den sani ya, den doo yu ati (Luk. 24:32). I lobi den sani dii leli, neen meke i wani paati sai leli anga taawan.—Luku Yelemiya 20:9 tu.
Di u yee a bun nyunsu, ná pikin piisii u piisii. Neen meke u be wani paati saw leli anga taa sama (Luku paragraaf 5)
6. San a toli fu Ernest anga Rose e leli i?
6 Luku a toli ya. Wan baala den e kai Ernest b dda dede di a be abi wan sani fu 10 yali. Ernest taki: ‘Mi be e akisi miseefi taki: “A hemel a go? A naw weki noiti moo noh?” Mi be e dyalusu anga den taa pikin di be abi den dda ete.’ Na ala yuu Ernest be e go sidon anga kini na a geebi fi en dda, da ai begi taki: ‘Gaantangi baa Gadu, mi wani sabi pe nda de.’ Baka 17 yali di en dda dede, neen a bigin sutudeli Beibel. A dyombo di a leli taki te wan sama dede a leti enke ai siibi wan dipi siibi. A leli tu taki Gadu o weki den sama fu u di dede baka (Ek. 9:5, 10; Toli 24:15). A no fosi a fende a piki fu a akisi di a be e booko en ede anga en senten. Den sani di Ernest leli aini Beibel doo en ati. En uman Rose bigin sutudeli Beibel tu. Ala den tu man be lobi den sani di den be e leli. Den dopu aini 1978. Den be de kabakaba fu peleiki gi den famii, den mati, anga iniiwan sama di be wani aliki. A moo enke 70 sama den yeepi fu kon dini Yehofa.
7. San wo du te u lobi den sani di we leli aini Beibel? (Lukasi 6:45)
7 Efu u lobi den sani di we leli aini Beibel, da wo paati saw leli anga taawan. (Leisi Lukasi 6:45.) We fii enke den disipel fu Yesesi di be taki: ‘Ma u dati á poi tan da wa taki fu den sani di u si anga den sani di u yee’ (Toli 4:20). Ná pikin lobi u lobi den sani di u leli aini Beibel. Neen meke u wani paati en gi ala sama di u poi.
WE PELEIKI FU DI U LOBI TAA SAMA
8. Sai yeepi u fu paati a bun nyunsu gi taa sama? (Luku a faki di den e kai ‘ Lobi o yeepi u fu leli sama’) (Luku a fowtow tu.)
8 Leti enke Yehofa anga en Manpikin, a so useefi lobi taa sama (Odo 8:31; Yoh. 3:16). Tyali e kisi u gi den sama di á ‘sabi Gadu’. Den naabi ‘howpu’ tu (Efe. 2:12). Fu di den abi omen polobelema meke den e fii enke den de aini wan dipi peti. Ma wi abi wan tetei di sa hali den puu aini a peti ya. A tetei ya na a bun nyunsu fu Gadu Kownukondee. Fu di u lobi den sama ya, meke we du ala saw man fu paati a bun nyunsu gi den. Te den yee a bun nyunsu, a sani ya e gi den howpu. A sani ya meke den e piisii nownow kaba. Ma den o fende a okasi tu fu piisii fu a ‘tuutuu libi’. Dati na a teego libi.—1 Tim. 6:19.
Fu di u lobi sama, meke we du ala saw man fu peleiki gi den (Luku paragraaf 8)
9. Fu san we wasikoi sama gi a ten di e kon? Saide we wasikoi den? (Eseikiyeli 33:7, 8)
9 A fu di u lobi sama meke we taigi den taki a kaba fu a ogii goontapu ya de koosube. (Leisi Eseikiyeli 33:7, 8.) U lobi den famii fu u di nai dini Yehofa. U lobi den biiti sama fu u tu. A omen sama e libi enke fa den wani, bika den á sabi saw pasa aini a ten di e kon. Dyonson wan ‘gaan banowtu o kon, di sama á be si ete senten di goontapu sete. A naw kon noiti moo tu’ (Mat. 24:21). U wani den sabi saw pasa na a ten de. A fosi sani di o pasa a di ala den falisi keliki o kisi poli. Bakadati, da a ogii goontapu ya o kisi poli na a feti fu Alimakedon (Openb. 16:14, 16; 17:16, 17; 19:11, 19, 20). We begi gi ala den sama di wani aliki u, fu den sa kon dini Yehofa makandaa anga u. Ma saw pasa anga den sama di á wani aliki u, moomoo den famii fu u?
10. Saide a pelensipali fu tan wasikoi den sama gi den sani di o pasa aini a ten di e kon?
10 Enke faw si aini a artikel di pasa, da a Yehofa seefi mu luku efu aw kibii den sama di wani kengi di den o si fa a Gaan Babilon kisi poli. Neen meke a nownow u mu taigi sama saw pasa aini a ten di e kon. Pakisei a sani ya: Kande a ten de den o membee den sani di we leli den nownow. (Luku Eseikiyeli 33:33 tu.) Den o membee den sani di u be e taigi den. Den sani ya o yeepi den fu den kon dini Yehofa makandaa anga u fosi a lati. Na a sani ya be pasa anga wan wakitiman aini a sitaafu-osu fu Filipi. A baka di ‘a doti seke’ fosi a man ya aliki a bun nyunsu. Leti enke a wakitiman ya, kande son sama di á wani aliki a bun nyunsu nownow, o kengi pakisei baka te a Gaan Babilon kisi poli.—Toli 16:25-34.
WE PELEIKI FU DI U LOBI YEHOFA ANGA A NEN FI EN
11. Fa we gi Yehofa gaandi, gafa anga kaakiti? (Openbaring 4:11)
11 A moo pelensipali sani fu saide we peleiki a fu di u lobi Yehofa anga a santa nen fi en. We si a peleikiwooko enke wan fasi fa we gafa a Gadu di u lobi. (Leisi Openbaring 4:11.) Anga u hii ati we piki makandaa anga ala den engel a hemel taki: ‘Yehofa u Gadu, a yu fiti fu fende gaandi anga gafa anga kaakiti.’ We gi en gaandi te we taigi sama taki neen na a Sama di ‘meke ala sani’ anga te we gafa en. Fa we gi Yehofa kaakiti? We, a Yehofa na a sama di meke ala sani. Neen meke wa poi gi en moo kaakiti. Wa poi meke a moo taanga tu. Ma u sa gi en u kaakiti, u ten anga den sani di wi abi fu du a peleikiwooko (Mat. 6:33; Luk. 13:24; Kol. 3:23). U lobi taigi sama sani fu a Gadu fu u, bika u lobi en. We taigi sama sowtu Gadu neen tu. Saide?
We gi Yehofa u kaakiti, u ten anga den sani di wi abi fu du a peleikiwooko (Luku paragraaf 11)
12. Fa we santa a nen fu Yehofa te we du a peleikiwooko?
12 Na a lobi di u lobi Yehofa meke u wani santa a nen fi en (Mat. 6:9). A sani ya wani taki wi abi fu taigi sama taki den lei di Saatan taki fu Yehofa a ná tuu (Gen. 3:1-5; Yopu 2:4; Yoh. 8:44). Te we peleiki, u de kabakaba fu taigi ala den sama di wani aliki u sama a Yehofa. We taigi den fa a de tuutuu. We taigi ala sama taki a moo pelensipali manii fu Yehofa a lobi. We taigi den taki ai tii a wan letifasi. Boiti dati, we taigi den taki dyonson di a Kownukondee fi en o tii, pina naw de moo. Den sama di o libi a goontapu o piisii, bika ala sama o libi na a wan (Ps. 37:10, 11, 29; 1 Yoh. 4:8). Te we taigi sama den sani ya aini a peleikiwooko, da we santa a nen fu Yehofa. We piisii tu, bika we du a sani di u mu du enke wan Yehofa Kotoigi. Saide u taki a sani ya?
13. Saide we piisii fu de enke wan Yehofa Kotoigi? (Yesaya 43:10-12)
13 Yehofa kai wi en ‘kotoigi’. (Leisi Yesaya 43:10-12.) Den baala di e tii a wooko be sikiifi wan biifi wantu yali pasa taki: ‘A moo gaan gaandi di u sa abi a fu de enke wan Yehofa Kotoigi.’ Saide? Pakisei a toli ya. Meke u taki den taki i du wan sani dii sabi taki ya du. Yo abi wan sama fanowdu fu taigi taa sama taki a sani di den taki fi ya ná tuu. Sama i be o akisi fu yeepi i? A wan sama dii sabi taki abi wan bun nen. Wan sama di ye fitoow. Yehofa teke wi enke en Kotoigi. A sani ya e soi taki a sabi u bun. Ai biibi tu taki wo taigi sama taki neen na a wan enkii tuu Gadu. We si en enke wan gaandi fu de wan Kotoigi fu Yehofa. Neen meke we du ala saw poi fu soi sama taki den sani di den taki fi en a ná tuu. Te we du a sani ya, we soi taki we du sani enke fa a nen fu we taki: Yehofa Kotoigi.—Ps. 83:18; Rom. 10:13-15.
WO TAN PELEIKI TE ENKE A KABA DOO
14. San a wantu simpan sani di o pasa aini a ten di e kon?
14 Wa poi wakiti fu si den sani di o pasa aini a ten di e kon. Fu di Yehofa e belesi a wooko di we du, meke we howpu taki moo sama sa kon aini a tuu biibi fosi a gaan banowtu bigin. We piisii tu taki na a ten fu a gaan banowtu, a moo taanga ten di o de a goontapu, kande moo sama o komoto aini a ogii goontapu fu Saatan ya. Den o kon dini Yehofa makandaa u.—Toli 13:48.
15-16. San wo tan du? Te anga on ten wo du a sani ya?
15 Wi abi wan pelensipali wooko fu du. Wan wooko di u naw du noiti moo aini a ten di e kon. Wi abi a gaandi fu peleiki a bun nyunsu fu Gadu Kownukondee a hii goontapu. Na aseefi yuu de u mu e wasikoi sama gi den sani di o pasa aini a ten di e kon. Ala sama mu sabi taki a kaba fu a ogii goontapu fu Saatan de koosube. Di a ten de o doo, ala den o sabi taki a bosikopu di we peleiki a Gadu a komoto.—Eseik. 38:23.
16 Saw de kabakaba fu du? U lobi a bun nyunsu anga taa sama. U lobi Yehofa anga a nen fi en tu. Neen meke wo tan du a peleikiwooko fayafaya te enke Yehofa taki: ‘A wooko kaba.’
SINGI 54 Na a pasi ya i mu waka
a A ala yali komakandaa be holi a 7 oktober 2023 a Newburgh Assembly Hall fu Yehofa Kotoigi aini New York, Ameekankondee. Bakaten pisi 1 fu a komakandaa ya be kon na a JW Broadcasting® fu 1 november 2023. Pisi 2 kon aini yanuari 2024.
b Luku a Saanantongo artikel di den e kai „Bijbel e kenki sma libi—Mi ben lobi den krin piki di Bijbel e gi” aini A Wakititolen fu 1 februari 2015.