1-3. San be sa meke Eyodiya anga Sentike kwali? San o yeepi u fu a sani ya á miti u? (Luku a fowtow na a bigin.)

U SABI taki a Beibel na a wowtu fu Gadu, neen meke wi e lesipeki en. A Beibel e soi u san u mu du fu ogii á miti u. Ai poti wi a pasi tu te u meke wan fowtu. Wi e wooko anga den sani di wi e leli? Pakisei a toli fu Eyodiya anga Sentike. Den tu uman ya, a be salufu Kelesten di be e libi aini a ten fu den apostel. Beibel e soi taki, den tu uman ya be kwali, ma a á taki saide den kwali. Meke u luku san be sa meke den kwali.

² Kande Eyodiya be kai wantu baala anga sisa kon nyan neen osu, neen a á kai Sentike. Di Sentike yee den taawan e taki fa den be piisii di den be go nyan a Eyodiya, neen en ati boon. Kande a be e pakisei taki: ’Mi á poi biibi taki Eyodiya á kai mi! Mi be denki taki a mi bun mati.’ Sentike be si enke Eyodiya á be lobi en. A be si enke a á be wani mumui en, bika a kai den taa sama, ma a á kai en. Kande a sani ya be tyai takitaki kon aini a kemeente tu. Beibel e soi taki, Pawlesi soi den tu sisa ya taki den á tyai denseefi bun. A gi den taanga-sikin  tu fu seeka a toli. Den aliki en, neen den dini Yehofa go doo anga piisii.​—Filipisama 4:2, 3.

³ A sa pasa aini a ten ya tu taki wi anga wan baala efuso wan sisa abi toobi aini a kemeente. Ma efu wi e du san Beibel e leli u, u sa losi a polobelema. U sa meke moiti tu fu takitaki á kon aini a kemeente. Te wi e du san Beibel taki, da wi e soi taki wi e lesipeki a Wowtu fu Gadu.​—Psalm 27:11.

4, 5. Fa Beibel e leli u fu dwengi useefi?

⁴ A ná ala yuu a makiliki fu dwengi iseefi. Son leisi sama e kosi i fu di yu e du sani taa fasi. Kande den e kosi i fu di yu a fu wan taa lo efuso fu di yu anga den nai gei. Te sama du den sani de anga i, ai hati i. Ma efu a sama di taigi den sani ya a wan baala efuso wan sisa, yu e moo fii en. Fa Beibel sa yeepi u te den sani ya e miti u?

⁵ Yehofa sabi fa sani e waka te libisama nai dwengi denseefi. Te wi ati boon, u sa du sani di o hati u bakaten. Yehofa e soi wi aini a Beibel taki u mu e dwengi useefi. A taki: „Yu ati á mu e boon gaw.” Te wi e du san sikiifi ya, te wi ati nai boon gaw, da a omen polobelema ná o miti u! (Leisi Peleikiman 7:9; Odo 16:32.) Beibel e leli u tu taki u mu e gi taawan paadon. Yesesi be taki, efu u nai gi taawan paadon, Yehofa ná o gi u paadon tu (Mateyesi 6:14, 15). I si enke i mu moo pasensi anga taawan efuso gi den paadon?

6. San sa pasa efu u nai dwengi useefi?

⁶ Efu u nai dwengi useefi, wi o holi taawan na ati. A sani de sa meke u bigin buuse den. Boiti dati, u sa meke taa baala anga sisa aini a kemeente buuse taawan tu. Winsi wi e du enke sani á pasa, taawan o si taki wan sani á bun anga u. A sani de sa meke den baala anga sisa nai wani kon taki anga u (Odo 26:24-26). Den owluman o meke moiti fu poti wi a pasi anga a Beibel. Den o yeepi u fu wi á holi taawan na ati, ma fu gi den paadon (Lefitikesi 19:17, 18; Romesama 3:11-18). Yu o wooko anga den sani di den owluman soi yu aini a Wowtu fu Gadu?

7, 8. (a) Fa Yehofa e tii a foluku fi en? (b) San a wantu fu den sani di Yehofa e leli wi aini Beibel? (c) Saide u mu du den sani di ai leli u?

⁷ Yehofa e tii den sama di de aini en olikanisâsi a goontapu ya. Ai leli den tu. Fa ai du a sani ya? A poti Kelestesi enke „a ede fu a kemeente”. Neen Kelestesi poti „a koni saafu di u sa fitoow”, fu tii a foluku fu Gadu (Efeisesama 5:23; Mateyesi 24:45-47). Leti enke fa den baala di be e tii a wooko a fositen be e lesipeki a Wowtu fu Gadu, a letiso a koni saafu di u sa fitoow, e lesipeki a Beibel aini a ten ya, bika den sabi taki na a Wowtu fu Gadu. (Leisi 1 Tesalonikasama 2:13.) San a wantu fu den sani di Beibel e leli u?

⁸ Beibel e soi u taki u mu e go a komakandaa ala yuu (Hebrewsama 10:24, 25). Ai gi u taanga-sikin fu wooko anga ala den leli fu Beibel (1 Korentesama 1:10). Ai taigi u tu taki „u mu tan poti a Kownukondee fu Gadu a fesi”(Mateyesi 6:33). Beibel e leli u taki u mu peleiki osu fu osu, a peesi pe tyaipi sama de, anga taa peesi pe wi e miti sama (Mateyesi 28:19, 20; Toli 5:42; 17:17; 20:20). Beibel e soi den owluman san den mu du fu yeepi den baala anga sisa aini a kemeente fu libi wan kiin libi (1 Korentesama 5:1-5, 13; 1 Timotiyesi 5:19-21). A Beibel e soi u  taki u mu e seeka u sikin bun. Wi á mu e pakisei efuso du sani di Yehofa á lobi tu.​—2 Korentesama 7:1.

9. Sama Yesesi gi a wooko fu yeepi u fu fusutan a Beibel?

⁹ Kande son sama e denki taki den ná abi sama fanowdu fu yeepi den fu fusutan a Beibel. Ma fanafu a yali 1919, Yesesi gi „a koni saafu di u sa fitoow”, a faantiwowtu fu yeepi a foluku fu Gadu fu fusutan den leli fu Beibel. Den mu yeepi den fu du san Beibel e taki tu. Te wi e du san Beibel taki, da wi e yeepi a kemeente fu tan kiin. Wi o yeepi den baala anga sisa fu den ná holi taawan na ati. Wi o yeepi den fu libi na a wan tu. Akisi iseefi a sani ya: ’Mi e aliki a koni saafu di Yesesi poti fu tii a wooko?’

10. San a Beibel buku Eseikiyeli e taki fu a olikanisâsi fu Yehofa?

¹⁰ Beibel e soi taki den engel di e dini Yehofa, e du sani enke fa a wani tu. Eseikiyeli be si wan wagi aini wan fisiyun. A Yehofa be e tyai a wagi. A wagi be e go gawgaw na a se pe Yehofa be wani a go (Eseikiyeli 1:4-28). A wagi ya na a olikanisâsi fu Gadu di de hemel. A nai daaidaai fu du san Yehofa taki. Ai yeepi a taa pisi fu a olikanisâsi fu Gadu di de a goontapu ya, fu du sani enke fa Yehofa wani. Pakisei fa sani kengi aini a olikanisâsi aini den tin yali di pasa. Ná feegete, a Yehofa seefi e tii a wooko. Dyonson Yesesi anga den engel o poli a ogii goontapu ya. Den sama di nai lesipeki a nen fu Yehofa anga den sama di nai lesipeki a fasi fa ai tii, ná o de moo.

11, 12. San a olikanisâsi fu Yehofa du aini den lasiti dei ya?

¹¹ Pakisei den sani di a olikanisâsi fu Yehofa du aini den lasiti dei ya. Bow wooko. A omen ondoo baala anga sisa e meke a edekantoo fu Yehofa Kotoigi a Warwick, New York aini Ameekankondee. Ná pikin wooko den sama ya e wooko. A omen ondoo baala anga sisa a hii goontapu, e meke kownukondee zaal anga beikantoo. A kantoo di e luku a bow-wooko a hii goontapu e soi den baala anga den sisa, fa den mu du a wooko ya. Wi e gi Gadu daa fu a wooko di den baala anga sisa e du! A foluku fu Yehofa a hii goontapu, e du san den poi fu yeepi meke den Kownukondee zaal anga den beikantoo. Yehofa e seigi a foluku fi en fu di den abi sakafasi. Ai seigi den tu fu di den e du sani enke fa a wani.​—Lukasi 21:1-4

¹² Ai leli den. Yehofa lobi leli a foluku fi en (Yesaya 2:2, 3). Pakisei ala den sikoo di a sete gi u. Den sikoo enke a Pionili Sikoo, a Kownukondee Peleikiman sikoo, a Gilead Sikoo, a sikoo gi den kelen-owluman anga den uman, a owluman sikoo, Kownukondee diniwooko-sikoo, sikoo gi Beikantoo komte anga den uman, anga sikoo gi den sama di e wooko a Betel. Boiti dati u sa fende a Beibel anga taa buku aini omen tongo a jw.org, a website fu u. A website ya abi sani di sa yeepi pikinengee anga osufamii. A abi wan pisi di e soi, fa sani e go anga den baala anga sisa fu u tu. Yu e wooko anga den sani di de na a website ya te yu e peleiki efuso te yu e holi a Osufamii Anbegi?

13. San a foluku fu Yehofa mu du?

¹³ U mu teke en fu bigi taki Yehofa meke u kon aini a olikanisâsi fi en. A soi  u fa u mu tyai useefi tu. U sabi san Yehofa lobi, neen meke u mu aliki en, da u du san bun. Winsi fa gaanse sama fu a goontapu ya lobi du ogii-ati sani, toku u mu „buuse ogii” enke fa Yehofa buuse ogii (Psalm 97:10). U wani Yehofa piisii neen meke winsi san e pasa, wi o du ala san u poi fu tyai useefi a wan kiin fasi (1 Korentesama 6:9-11). Den sani di Yehofa e leli u, a fu yeepi u fu sani go bun anga u. U lobi en, neen meke winsi u de a osu, aini a kemeente, a wooko, sikoo efuso wan taa peesi, wi o du san a taki (Odo 15:3). Teke ten pakisei wantu fasi fa u sa du san Gadu wani.

14. Fa mma anga dda sa soi taki den e du sani enke fa Yehofa wani?

¹⁴ A fasi fa wi e leli u pikin. Yehofa e koboloiki a Beibel fu soi mma anga dda fa den mu kiya den pikin fu den. Kelesten mu luku bun fu den á bigin denki enke fa a goontapu ya e denki (Efeisesama 2:2). Son dda e si enke na a mma mu leli den pikin, bika a so den gwenti a pe den kiya. Ma Beibel e soi den dda kiin taki, den mu leli den pikin fu den fu sabi Yehofa (Efeisesama 6:4). Mma anga dda di lobi Yehofa, wani den pikin fu den toon Yehofa mati yonkuuyonkuu enke fa Samuweli be toon Yehofa mati yonkuuyonkuu.​—1 Samuweli 3:19.

15. Fa u sa soi taki u lobi Yehofa te u de fu du wan sani?

¹⁵ Den sani di u wani du. Fosi u du wan sani, u mu luku fa Yehofa e si a toli, da wi o man du san a wani. A Beibel anga a olikanisâsi fu Yehofa sa yeepi u fu du sani enke fa Yehofa wani. Son mma anga dda  e go wooko a wan taa kondee, ma te den meke wan pikin, den e sende en gi den famii fu den a den kondee. Den e du a sani ya, fu di den wani wooko meke moni. A tuu taki sama á poi taigi den san den mu du, ma toku fosi wan Kelesten du a sani ya, a mu akisi enseefi taki: ’Fa Yehofa e si a sani ya?’ (Leisi Romesama 14:12.) Te wi e pakisei fu du wan sani gi wi osufamii efuso a wookope, a be o bun fu luku fosi san Beibel e taki fu a sani di u wani du. Wi abi Yehofa fanowdu fu yeepi u, bika useefi á poi taki pe u mu poti u futu.​—Yelemiya 10:23.

16. San wan mma be mu wegi go wegi kon di a meke a boi fi en? San yeepi en fu du sani enke fa Yehofa wani?

¹⁶ Baka di wan man anga en uman foloisi go a wan taa kondee fu go wooko, neen den meke wan boi. Den be seeka sani fu sende a pikin go neen gaanmma anga en gaandda. Ma fosi den sende en gwe, neen a uman bigin sutudeli Beibel anga wan Yehofa Kotoigi. A uman ya leli taki, neen abi a faantiwowtu fu leli a boi fi en fu sabi Yehofa (Psalm 127:3; Odo 22:6). A uman ya begi Yehofa enke fa a Beibel e leli u. A begi Yehofa fu a yeepi en fu du sani enke fa a wani (Psalm 62:7, 8). Boiti dati, a taigi a sisa di e sutudeli anga en, san neen nowtu. A taigi taa baala anga sisa aini a kemeente tu. Winsi fa den mati anga den taa famii fi en be e taigi en taki a mu sende a pikin go neen gaanmma anga en gaandda, tokuso a du sani enke fa Yehofa wani. A man fu a uman ya, si fa den baala anga sisa yeepi en anga a beibi. Di a si a sani ya, a foondoo te a bigin go a komakandaa anga en uman. Pakisei fa a uman ya poolo di a si fa Yehofa aliki den begi fi en!

17. San u mu du te wi e sutudeli Beibel anga wan sama?

¹⁷ Du san a olikanisâsi taki. Efu wi e aliki Yehofa, wi o du den sani di a olikanisâsi fi en leli u. A olikanisâsi soi u san u mu du te u bigin sutudeli a buku San Bijbel e leri wi trutru? anga wan sama. U be leli taki, baka a sutudi u mu teke wantu miti fu yeepi a sama fu kon sabi Yehofa anga en olikanisâsi moo bun. U sa soi en a felon di den e kai San e pasa aini wan Kownukondee zaal?, ma u sa yeepi en tu anga a bolosilo di den e kai Sama e du a wani fu Yehofa aini a ten ya? Te u kaba sutudeli a Bijbel leri-buku anga a sama, da u mu yeepi en fi en „biibi taanga”. Wi o man du a sani ya te u sutudeli a buku di den e kai „Meki Gado tan lobi yu”, anga a sama (Kolosesama 2:7). Yu e du den sani ya enke fa a olikanisâsi fu Yehofa soi u?

18, 19. Saide u mu gi Yehofa daa?

¹⁸ A omen sani Yehofa du gi u, neen meke u mu gi en daa! Wan fu den sani ya, a di „a meke u de a libi” (Toli 17:27, 28). A gi wi a Beibel tu. Leti enke den Kelesten fu Tesalonika, wi e lesipeki a kado ya, bika na a bosikopu fu Gadu de aini.​—1 Tesalonikasama 2:13.

¹⁹ Beibel yeepi u fu kon koosube a Gadu (Yakowbesi 4:8). Yehofa meke u de aini a olikanisâsi fi en. Ná pikin piisii wi e piisii anga a sani di a du gi u ya. Wi e fii enke fa a psalm sikiifiman be e fii. A taki: „Gi Yehofa daa, bika a bun. A bun-ati fi en a fu teego” (Psalm 136:1). A psalm sikiifiman taki aini ala den vers fu Psalm 136 taki, „a bun ati fi en, a fu teego”. Efu wi e du san a olikanisâsi fu Yehofa e soi u, Yehofa o gi u teego libi. A ná o gwe fika u!