A TOLI DI SIKIIFI A FESISE | SAMA E TAN A HEMEL?
Den sani di sama wani sabi fu hemel
Yu akisi iseefi kaba fa hemel tan? A omen sama e akisi denseefi a sani ya. A omen ten kaba sama abi omen sowtu denki fu a toli ya. Son wan e biibi taki, den gaansama fu u de a yeye kondee. Den e biibi taki u mu dini den. Taawan e denki taki hemel a wan moin peesi pe ala sani e go bun. Den e biibi taki a engel anga den sama di dede e tan anda. Sama e biibi tu taki, hemel a wan peesi pe miliyunmiliyun gadu e tan.
A omen sama e taki, wi á poi sabi sani fu hemel, bika sama á si hemel ete. Ma a sani de a ná tuu. Yesesi Kelestesi be e tan a hemel fosi a kon a goontapu. A be taigi den Dyu keliki fesiman taki: „Mi á kon a goontapu fu du san mi wani, ma a fu du san a sama di sende mi kon, wani.” A be taigi den bakaman fi en tu taki: „A omen tanpeesi de aini a osu fu Nda.”—Yohanisi 6:38; 14:2.
Yesesi Dda a Gadu, en nen a Yehofa. Yehofa e tan a hemel (Psalm 83:18). A Yehofa anga Yesesi wawan poi taigi u pilisisi fa hemel tan. Den meke wantu sama di biibi be taanga, si wantu fisyun di e yeepi u fu sabi fa hemel tan.
A taa artikel o taki fu wantu fu den fisyun ya. Te yu e leisi den sani di den sama ya be si aini den fisyun, da i mu holi a pakisei taki hemel, a ná wan peesi di i sa holi anga ana efuso wan peesi di i poi si anga ain. Ma Yehofa á taki anga wi a wan fasi di taanga fu fusutan, ma a taigi u den sani ya a wan makiliki fasi di a sabi taki libisama poi fusutan. Den fisyun ya o yeepi u fu sabi moo fu hemel.
