1-2. (a) San e yeepi u fu pasa den tesi di e miti wi aini a ten ya? (b) San wi o luku aini a artikel ya?

„NOITI mi be o poi pasa a tesi ya anga mi eigi kaakiti.” I taki a sani ya wan leisi kaba? A omen fu wi e fii so son leisi. Kande i be taki a sani ya baka di i pasa wan gaan tesi di be miti i. Kande i be siki wan gaan siki efuso kande wan sama fi i be dede. Te i denki a ten de, da yu e si taki a di a santa yeye fu Yehofa be gi yu „a kaakiti di bigi pasa maiki” meke i be man holidoo.​—2 Kor. 4:7-9.

² Wi abi a santa yeye fanowdu fu yeepi u fu wi á teke den denki fu a ogii goontapu ya (1 Yoh. 5:19). Wi abi kaakiti fanowdu tu fu feti anga den „ogii yeye” (Efe. 6:12). Wi o luku tu fasi fa a santa yeye e yeepi u fu pasa den tesi ya. Baka dati wi o luku san u mu du efu u wani a santa yeye yeepi u.

3. San a wan fasi fa Yehofa e yeepi u fu holidoo te tesi e miti u?

³ A santa yeye fu Yehofa e gi u kaakiti fu du den sani di u mu du, winsi tesi e miti u. Apostel Pawlesi be taki a be man holidoo winsi san be e miti en, bika a be sabi taki a o fende „a kaakiti fu Kelestesi” (2 Kor. 12:9). Di Pawlesi be go peleiki enke zendeling du fu tu leisi, a ná a zendeling wooko wawan a be e du, ma a be e du wan taa wooko tu fu solugu enseefi. A be e tan anga Preskela anga Akwila aini Korente. A toowpaa ya be e meke tenti seli. Na a wooko ya Pawlesi be e du tu, neen meke a be e wooko makandaa anga den wantu dei aini a wiki (Toli 18:1-4). Na a santa yeye be e gi Pawlesi a kaakiti fu man du a peleikiwooko  anga fu wooko solugu enseefi.

4. Enke fa 2 Korentesama 12:7b-9 e soi, da san be e miti Pawlesi?

⁴ Leisi 2 Korentesama 12:7b-9. San Pawlesi be wani taki di a taki wan ’maka de aini en sikin’? Efu wan maka be de aini i sikin, ná pikin fooseli a be o fooseli i. Pawlesi taki wan tesi be e miti en di be de enke wan maka aini en sikin. A kai a tesi ya, „wan engel fu Saatan” di e ’naki en naamo’. Kande a ná Saatan efuso den ogii yeye seefi be e du sani anga Pawlesi. Ma di den takuu yeye ya fusutan a polobelema fu Pawlesi, kande den du sani fu meke sani kon moo ogii gi en. A leti enke den sutu a „maka” ya go moo dipi aini en sikin. San Pawlesi du?

5. Fa Yehofa aliki a begi fu Pawlesi?

⁵ Biginbigin Pawlesi be wani Yehofa puu a „maka” gi en. A taki: „A dii leisi mi begi Masaa [Yehofa] fu a puu a maka ya gi mi.” Ma winsi fa Pawlesi be begi, a maka á be komoto aini en sikin. Ma a sani ya wani taki Yehofa á be aliki a begi fu Pawlesi? Nono. A aliki a begi fi en. Yehofa á puu a polobelema, ma a gi Pawlesi kaakiti fu holidoo. Yehofa taigi en taki: „Te i swaki, ala sama o si taki a mi e gi i kaakiti” (2 Kor. 12:8, 9). Gadu be yeepi Pawlesi fu a be piisii winsi san be e miti en. A yeepi en tu fu a á booko en ede pasa peesi!​—Filip. 4:4-7.

6. (a) Fa Yehofa e piki den begi fu u? (b) Fa den tekisi di sikiifi aini a paragraaf ya e gi i taanga-sikin?

⁶ Kande i begi Yehofa enke Pawlesi fu puu wan polobelema gi i. Ma winsi fa i begi en omen leisi, kande a polobelema de ete. Kande a kon moo ogii seefi. Kande yu e fii enke Yehofa á lobi i. Efu a so yu e fii, pakisei Pawlesi. Leti enke fa Yehofa aliki Pawlesi, a so a o aliki a begi fi i tu. Kande Yehofa á puu a polobelema, ma a o gi yu en santa yeye fi i sa abi a kaakiti di de fanowdu fu man holidoo (Ps. 61:3, 4). Kande „ogii” e miti i, ma Yehofa ná o gwe fika i.​—2 Kor. 4:8, 9; Filip. 4:13.

7-8. (a) Saide u sa taki a santa yeye de enke winta? (b) Fa Peitilisi taki a santa yeye e wooko?

⁷ A santa yeye de enke winta. Winsi fa a se e seke, efu a winta e wai go na a bun se, a sa tyai wan sipi doo a pe a mu go. A letiso Yehofa paamisi u taki winsi sowtu tesi e miti u, a santa yeye fi en o yeepi u fu pasa den tesi ya te enke u doo a nyun goontapu di a paamisi u.

⁸ Peitilisi a be wan fisiman, neen meke a be sabi sani fu seiboto. Kande na a sani ya meke di a be e taki fa a santa yeye e wooko, a taki wan sani di e meke u pakisei den boto di be e abi wan gaan koosi a tapu. Anga a winta den boto ya be e waka. A be sikiifi taki: „Noiti libisama seefi taki polofeititoli, ma libisama be e taki san komoto a Gadu, leti enke fa a santa yeye be soi den.” A wowtu „soi” aini Giikitongo wani taki a santa yeye be e „tyai” efuso „tii” den man di be e sikiifi Beibel.​—2 Peit. 1:21.

9. San Peitilisi be abi a pakisei di a taki a santa yeye be e „tii” den man di sikiifi Beibel?

⁹ San Peitilisi be abi a pakisei di a taki a santa yeye be e „tii” den man di be sikiifi Beibel? Na aseefi Giiki wowtu Lukasi, a man di sikiifi a Beibel buku Toli fu den apostel be koboloiki, di a taki fu wan sipi di winta be e ’tyai go a pe a wani’  (Toli 27:15). Wan Beibel ondoosukuman taki di Peitilisi sikiifi taki a santa yeye be tii den man di be sikiifi Beibel, a koboloiki wan wowtu di be e meke sama pakisei a tyai di wan sama e tyai wan seiboto. Peitilisi be wani soi taki, leti enke fa a winta e tyai wan boto go a pe a mu go, a letiso a santa yeye be e gi den Beibel sikiifiman a kaakiti fu du a wooko fu den. A Beibel ondoosukuman ya taki: „A leti enke den man di be e sikiifi Beibel be opo den gaan koosi fu a boto.” Di den opo den koosi fu den neen Yehofa du fi en se, a gi den a santa yeye fi en enke „winta”. Baka dati, den Beibel sikiifiman du san den be mu du. Den meke a santa yeye tii den.

10-11. San a den tu sani di u mu du efu u wani a santa yeye tii wi? Gi wan ageisitoli.

¹⁰ Nownow, Yehofa nai gi sama a santa yeye fi en fu sikiifi Beibel moo. Ma toku Gadu e gi a foluku fi en a santa yeye ete. Te anga now Yehofa e holibaka gi u. Ma efu u wani a santa yeye fu Yehofa tii wi, u mu du wantu sani. San u mu du?

¹¹ Meke u luku wan ageisitoli. Efu wan sama di e tii wan seiboto wani a winta tyai en, a mu du tu sani. A fosi sani di a mu du, a fu solugu taki a boto de a pe a winta e wai. Efu a boto de teitei a lanpeesi, winsi fa a winta e wai a ná o go a fesi. Du fu tu sani di a mu du, a den gaan koosi fu a boto a mu opo. Bika winsi a winta e wai, ma den koosi ná opo, a boto ná o go a fesi. A letiso wi abi a santa yeye fu Yehofa fanowdu efu u wani tan dini en. Efu u wani a santa yeye yeepi u, u mu du tu sani. A fosi sani, a taki u mu du wooko di a santa yeye e yeepi sama fu du. Du fu tu sani, a taki te wi e du wan sani gi Yehofa, u mu du en anga u hii ati (Ps. 119:32). Efu wi e du den sani ya, a santa  yeye o gi wi a kaakiti fu pasa iniiwan tesi, te enke u doo a nyun goontapu.

12. San wi o luku now?

¹² Te anga now, u luku tu fasi fa a santa yeye e yeepi u. A santa yeye e gi u kaakiti fu man holidoo winsi sowtu tesi e miti u. A santa yeye e yeepi u tu fu du wooko di Yehofa wani u du. A sani ya e yeepi u fu tan dini Yehofa. Now wi o luku fo sani di u mu du efu u wani a santa yeye yeepi u.

13. Enke fa 2 Timotiyesi 3:16, 17 e soi, da fa Beibel sa yeepi u? San useefi mu du?

¹³ A fosi sani: Sutudeli a Wowtu fu Gadu. (Leisi 2 Timotiyesi 3:16, 17.) Gadu meke a santa yeye yeepi den Beibel sikiifiman fu sabi san den mu sikiifi. Te wi e leisi Beibel da u teke ten pakisei san wi e leisi, wi o kon sabi fa Gadu e denki. A sani ya e yeepi u fu kengi a fasi fa wi e du sani fu Gadu sa piisii anga u (Heb. 4:12). Ma efu u wani a santa yeye yeepi u tuutuu, u mu e sutudeli Gadu Wowtu ala yuu, da u teke ten pakisei san u leli. A so a Wowtu fu Gadu o yeepi u fu taki, anga fu du sani di e meke Yehofa piisii.

14. (a) Saide u sa taki a santa yeye de a den Kelesten komakandaa? (b) San u mu du efu u wani fende wini fu a santa yeye te u de a den komakandaa?

¹⁴ Du fu tu sani: Dini Gadu makandaa anga den baala anga sisa fu u (Ps. 22:22). A yeye fu Yehofa de a den komakandaa (Openb. 2:29). Saide u sa taki a sani ya? Bika te u kon makandaa anga u baala anga sisa, wi e begi Gadu fu a gi wi en santa yeye, wi e singi poku di Beibel e holibaka gi, wi e fende Beibel leli tu. Na a santa yeye poti den baala di e gi u den leli ya fu teke fesi. Na a santa yeye e yeepi den sisa tu fu seeka gi den komakandaa anga fu paati san den leli anga a kemeente. Ma efu u wani a santa yeye yeepi u moo bun, u mu seeka useefi fosi u kon a den komakandaa, u mu e gi piki tu. Te u seeka, da a leti enke wi opo a gaan koosi fu a boto fu teke winta.

15. Fa a santa yeye e yeepi u te u de aini a peleikiwooko?

¹⁵ Du fu dii sani: Du a peleikiwooko. Te wi e wooko anga a Beibel te wi e peleiki, efuso te u de a wan Beibelsutudi, wi e gi a santa yeye a okasi fu yeepi u (Rom. 15:18, 19). Efi i wani a santa yeye yeepi i moo bun, i mu e du a peleikiwooko ala yuu. I mu e wooko anga a Beibel na ala okasi di i fende tu. Wan sani di o yeepi i fu taki moo bun anga sama te i de aini a peleikiwooko, a te yu e wooko anga den sani di sikiifi aini A libi fu wi enke Kelesten anga a peleikiwooko komakandaa buku.

16. San na a moo makiliki fasi fa u sa fende a santa yeye?

¹⁶ Du fu fo sani: Begi Yehofa (Mat. 7:7-11; Luk. 11:13). A moo makiliki fasi fu fende santa yeye, a fu begi Yehofa. Nawan sani á poi tapu a begi fu u fu Yehofa á yee en. Sani á de di poi tapu a santa yeye fu a á doo wi tu. Winsi a sitaafu-osu u de, a santa yeye fu Yehofa poi yeepi u. Saatan á poi tapu Yehofa fu gi wi en santa yeye (Yak. 1:17). Fa u mu begi efu u wani a santa yeye yeepi u? Fu man fende a piki fu akisi ya, wi o luku wan ageisitoli aini a Beibel buku Lukasi di e soi fa u mu begi. *

17. San u sa leli fu a ageisitoli fu Yesesi di sikiifi a Lukasi 11:5-9, 13?

¹⁷ Leisi Lukasi 11:5-9, 13. A ageisitoli fu Yesesi e soi fa u mu begi Gadu fu a gi wi en santa yeye. A man aini a ageisitoli ya be fende san a be wani, fu di a „tan begi”. Winsi fa a be gaan neti, tokuso a man ya á be feele fu en mati fu yeepi en. Saide Yesesi be gi a ageisitoli ya? A taki: „E akisi namo, da wi o fende, e suku namo, da wi o fende, e koko a doo namo, da den o opo a doo gi u.” San a ageisitoli ya e leli u? Efu u wani Yehofa gi wi en santa yeye, u mu e begi en naamo.

18. Enke fa a ageisitoli fu Yesesi e soi, da saide u sa biibi taki Yehofa o gi wi en santa yeye?

¹⁸ A ageisitoli fu Yesesi e yeepi u fu si saide Yehofa o gi wi en santa yeye. A man aini a ageisitoli be wani soi switifasi gi a mati fi en di be kon luku en a gaan neti. A be e fusutan taki a be mu gi a mati fi en wan sani fu nyan. Yesesi taki a di a man akisi naamo, meke a mati fi en gi en beele. San a toli ya e leli u? Efu wan man di abi sondu be yeepi wan mati fi en fu di a begi en naamo, da u sa biibi taki u Dda di de a hemel o yeepi den sama di e begi en a santa yeye naamo. Neen meke u mu biibi taki efu u tan begi Yehofa en santa yeye, a o gi wi en.​—Ps. 10:17; 66:19.

19. Saide u sa biibi taki wi o man holidoo?

¹⁹ U sa biibi taki winsi fa Saatan e tan feti anga u, wi o man holidoo. Saide? Bika a santa yeye e yeepi u. Wan fasi fa ai yeepi u, na a kaakiti di ai gi u fu man pasa tesi. Boiti dati, ai yeepi u fu man dini Yehofa te enke u doo aini a nyun goontapu. Meke u du ala san u mu du fu fende a santa yeye fu Gadu.