1-2. (a) Enke fa Efeisesama 6:16 e soi, da saide „u biibi mu de enke wan gaan skelt”? (b) Sowtu akisi wi o luku aini a artikel ya?

A BIIBI fi i de enke „wan gaan skelt”? (Leisi Efeisesama 6:16.) Enke wan Kelesten i biibi taanga. Leti enke fa wan tuutuu skelt sa kibii i hii sikin, a so a biibi fu u sa kibii u gi den poli denki fu a goontapu ya. Ai kibii u gi ala sowtu denki anga fasi fu libi di nai kai anga a wani fu Gadu.

² Ma fu di wi e libi aini den „lasiti dei” meke ala yuu sani e pasa di sa meke u biibi swaki (2 Tim. 3:1). Fa i sa ondoosuku a biibi fi i fu sabi efu a taanga tuutuu? San i mu du fi i biibi á swaki? Wi o luku a piki fu den tu akisi ya aini a artikel ya.

3. San den suudati fu fosi be e du anga den skelt fu den? Saide den be e du a sani ya?

³ Gaanse fu den skelt fu den suudati fu fositen be e meke anga ayee, da den be e tapu en anga meti buba. Den suudati be e lobi oli na a skelt, fu a meti buba á be poli. A oli ya be e meke a ayee á fuusu tu. Solanga wan suudati be si taki wan sani be du a skelt fi en, a be e seeka en, bika a á be sabi on yuu feti be o bali. San a toli ya e leli u?

4. Saide u mu e keli a biibi fu u luku? Fa u sa du a sani ya?

⁴ Leti enke den suudati fu fosi, a so useefi mu e keli a biibi fu u luku. Efu wi e du a sani ya ala yuu, da te a de fu u feti, wi o de seekaseeka. Enke Kelesten u nai feti anga libisama, ma anga den ogii yeye wi e feti (Efe. 6:10-12).  A iseefi mu meke moiti fi i biibi taanga, sama á poi du a sani ya gi i. San o yeepi i fu a biibi fi i taanga sai fu pasa den tesi di o miti i? A fosi sani di i mu du, a begi i mu begi Yehofa fu a yeepi i. Baka dati, i mu sutudeli a Wowtu fu Gadu fu man si sani enke fa Gadu e si sani (Heb. 4:12). Beibel taki: „Fitoow Yehofa anga i hii ati. Ná fitoow iseefi” (Odo 3:5, 6). Efi i wani sabi efi yu e fitoow Yehofa, da pakisei san i du den ten di pasa di tesi miti i. Kande i be abi moni polobelema. Di i be e meke moiti fu losi a polobelema ya, i be holi a sani di Yehofa taki a Hebrewsama 13:5 a pakisei? Ai taki: „Mi ná o gwe fika i. Noiti mi o fika i wawan.” A sani di Yehofa paamisi aini a tekisi ya be yeepi i fu biibi en? Efu a so, da a sani ya e soi taki yu e meke moiti fi i biibi á swaki.

5. San i sa si te yu ondoosuku i biibi?

⁵ Kande te yu ondoosuku i biibi, yu o si sani di yu á be denki. Kande a biibi fi i kon swaki fu di i bigin poti pakisei a den lei di sama e paati fu a olikanisâsi, kande yu e fii booko-saka efuso kande yu e booko yu ede tumisi. Efi i si enke a sani ya e miti i, san i mu du fi i biibi á moo swaki?

6. Saide a á fowtu fu booko wi ede anga son sani?

⁶ A bun te wi e booko wi ede anga son sani. Wan fu den sani ya, na a wani di u wani Yehofa anga Yesesi piisii (1 Kor. 7:32). Te u meke wan gaan fowtu, wi e booko wi ede tu, bika u wani wi anga Yehofa toon mati baka (Ps. 38:18). Wi e booko wi ede anga u toowpaa anga den taa sama aini wi osufamii tu, bika u lobi den, u wani sani waka bun anga den.​—1 Kor. 7:33; 2 Kor. 11:28.

7. Enke fa Odo 29:25 e soi, da saide wi á mu feele libisama?

⁷ Ma efu wi e booko wi ede tumisi, a sani ya o swaki u biibi. Kande wi e booko wi ede ala yuu anga san wi o nyan efuso san wi o wei (Mat. 6:31, 32). Efu wi e booko wi ede tumisi anga den sani ya, wi o poti ala u pakisei na a meke di u mu meke moo moni fu man bai den sani ya. A sani ya sa meke u kon lobi moni. Efu u lobi moni, wi anga Yehofa o poli, bika u biibi o kon swaki (Malik. 4:19; 1 Tim. 6:10). Kande wi e booko wi ede tumisi anga san sama e denki fu u. Efu wi e feele sama di e soso u, efuso di sa du ogii anga u, wi o du sani di Yehofa á lobi. Neen meke u mu e begi Yehofa ala yuu fu a gi u deki-ati fu wi á feele libisama.​—Leisi Odo 29:25, Luk. 17:5.

8. San u mu te sama e paati lei fu a olikanisâsi?

⁸ Saatan, a „dda fu lei” e meke sama paati lei fu Yehofa anga den baala anga sisa fu u (Yoh. 8:44). Sama di daai baka gi a tuu biibi e paati lei toli fu Yehofa anga a olikanisâsi a internet, a tv, a kolanti, laadiyow efuso taa peesi. Den lei ya a wan fu den „ga” di de anga faya di Saatan e sutu kon a wi (Efe. 6:16). San u mu du te sama opo wan fu den lei toli ya anga u? Wi á mu aliki den! Saide? Bika wi e biibi Yehofa. Wi e fitoow den baala anga sisa fu u tu. Wi á mu taki anga nawan sama di daai baka gi a tuu biibi. Wi á mu hali taki anga den fu di u wani sabi fa den e denki.

9. San sa miti wi efu wi e fii booko-saka ala yuu?

⁹ Te wi e fii booko-saka, a sani ya sa swaki u biibi. Son leisi wi e fii booko-saka  fu di wi abi polobelema. Wi á poi du enke u nai si den polobelema fu u. Ma efu a den polobelema fu u wawan wi e pakisei, wi o feegete ala den bun sani di Yehofa paamisi u (Openb. 21:3, 4). Efu u nai poti pakisei moo a den sani di Yehofa paamisi u, wi o fii booko-saka te da u biibi kon swaki. A sani ya sa meke u gwe fika Yehofa (Odo 24:10). Ma a sani de ná abi fu miti u.

10. San u sa leli fu a biifi di wan sisa sende go na a edekantoo?

¹⁰ Wan sisa di e tan na Ameekankondee e solugu a man fi en di siki. Luku san e yeepi a sisa ya fi en biibi á swaki. Aini wan biifi di a sende go na a edekantoo a sikiifi taki: „A á makiliki gi u. Son yuu ai hebi te da wi e lasi-ati. Ma a howpu di wi abi e yeepi u fu go doo. Den moin leli di wi e fende ala yuu e taanga a biibi fu u tuutuu. Den e gi u taanga-sikin. Wi abi a taanga-sikin anga den leli ya fanowdu. Den e yeepi u fu holidoo fu man pasa den tesi di Saatan e tyai kon u pasi.” A toli fu a sisa ya e leli u taki winsi u lasi-ati, u sa kisi useefi baka. San o yeepi u fu kisi useefi baka? Holi a pakisei taki a Saatan e tesi i. Ná feegete tu taki Yehofa o toosutu i, a o gi i kaakiti. I mu teke en fu bigi taki ai gi i leli di e yeepi i fu holidoo.

11. San u mu akisi useefi fu sabi efu u biibi taanga?

¹¹ I si enke yu abi moo biibi fanowdu? Fa sani waka den mun di pasa? I be e booko yu ede pasa peesi anga son sani? I be poi wai pasi gi sama di komoto a biibi, di e paati lei toli fu a olikanisâsi? Efi i be e fii booko-saka, i kisi iseefi baka? Efi i du ala den sani ya, da a biibi fi i taanga tuutuu. Toku u mu luku bun, bika Saatan e koboloiki taa sani tu fu swaki u biibi. Wi o luku wan fu den sani ya.

12. San o pasa efu wi e feti a gudu baka?

¹² Efu wi e feti a gudu baka, a biibi fu wi o swaki. U ná o man du ala san u mu du  gi Yehofa moo. Apostel Pawlesi be taki: „Nawan suudati e booko en ede anga bisnis. Neen meke a sama di teke en enke suudati e piisii anga en” (2 Tim. 2:4). Den suudati fu Rome á be mu e du nawan taa wooko boiti a suudati wooko. San be o pasa efu wan suudati be e du taa wooko?

13. Saide suudati á be e daai bisnis?

¹³ Meke u taki wan kulu suudati kon makandaa fu leli fa den mu wooko anga den feti sani fu den, ma wan fu den suudati á de ape. A suudati de a foto e seli nyanyan a wowoyo. Te neti den taa suudati e keli den fetisani fu den luku. Den e fei den how fu den tu. Ma a suudati di e seli nyanyan de a osu e seeka den sani di a o seli a taa dei. Meke u taki feti bali a mamanten de. On du fu den suudati i denki o de seekaseeka fu feti? Efi i be de aini a feti, sowtu suudati i be o wani taampu ai se fu feti? A wan di seeka gi a feti, efuso a wan di be e seli sani a wowoyo?

14. San na a moo pelensipali sani gi wi enke suudati fu Kelestesi?

¹⁴ Leti enke wan suudati di e du en wooko bun, u nai meke nawan sani puu u pakisei na a moo pelensipali sani aini u libi. Dati na a du di u wani du sani di e meke Yehofa anga Yesesi piisii. A sani ya pelensipali gi u moo iniiwan sani di u be sa fende aini a goontapu fu Saatan ya. U nai meke taa sani teke ala a kaakiti anga a ten di wi abi fanowdu fu dini Yehofa. Wi e du ala san u poi tu fu u biibi á swaki.

15. Anga san apostel Pawlesi taki u mu luku bun? Saide u mu luku bun anga a sani ya?

¹⁵ Ala yuu u mu de na ain. Saide? Apostel Pawlesi be taki „den sama di wani gudu namonamo” o „komoto na a pasi fu a biibi” (1 Tim. 6:9, 10). Den wowtu „komoto na a pasi” e soi taki a saafisaafi u be o bigin si gudu enke a moo pelensipali sani. A sani ya be o meke u „go du ala sowtu sani di á bun”. Neen meke wi á mu bigin lobi moni aini wi ati, bika a wan  fu den fetisani di Saatan e koboloiki fu kisi u.

16. San u mu akisi useefi te u luku san sikiifi a Malikisi 10:17-22?

¹⁶ Meke u taki wi abi moni fu bai omen sani. A be o fowtu fu bai sani di u ná abi fanowdu tuutuu? A ná wan fowtu sani fu bai san i wani. Ma pakisei den sani ya: Winsi i poi bai wan sani, yu o abi ten anga kaakiti sai fu koboloiki a sani di i bai? Yu o abi a ten fu e seeka en fu a á booko? A sani di i bai o kon pelensipali gi i moo den sani di i mu du gi Yehofa? Yesesi be gi wan yonkuu guduman taanga-sikin fu du moo gi Gadu, ma a á be wani fu di a be lobi den gudu fi en. A lobi di u lobi a sani di u wani bai be o meke a miti wi enke a yonkuman ya? (Leisi Malikisi 10:17-22.) A moo bun fu wi á libi bigi, da u sa koboloiki u kaakiti anga u ten fu wooko gi Gadu.

17. San wi á mu feegete noiti?

¹⁷ Noiti u mu feegete taki u de aini wan feti. Ala dei u mu de seekaseeka fu feti (Openb. 12:17). U baala anga sisa á poi taanga u biibi gi u. A useefi mu meke moiti fu taanga u biibi.

18. Saide den suudati fu fositen be e holi den skelt taanga?

 ¹⁸ Te wan suudati fu fositen be soi taki a abi deki-ati, da den be e gi en gaandi. Ma a be gaan sen sani gi wan suudati fu daai kon a osu baka sondee a skelt fi en. Wan man fu Rome den e kai Takitus di e ondoosuku fa sani be de a fositen sikiifi: „Te wan suudati á be tyai en skelt go a osu baka wan feti, moo so sen sani á be de.” Neen meke wan suudati be e holi en skelt taanga fu á be komoto neen ana.

19. San o yeepi u fu u biibi á kon swaki?

¹⁹ Wan sani di o yeepi u fu u biibi á swaki, a te wi e go a komakandaa ala yuu anga te wi e meke sama kon sabi Yehofa anga a Kownukondee fi en (Heb. 10:23-25). Boiti dati, u mu e leisi a Wowtu fu Gadu ala dei da u wooko anga den sani di wi e leli (2 Tim. 3:16, 17). Te wi e du den sani ya, da winsi san Saatan o du, a ná o abi wini (Yes. 54:17). A taanga biibi fu u, o kibii wi. Wi o taampu gingin makandaa anga den baala anga sisa fu u. Wi o wini den feti di wi e feti ala dei fu u biibi á swaki. Ma a moo pelensipali sani, a taki wi o abi a gaandi fu si fa Yesesi o wini Saatan anga den bakaman fi en.​—Openb. 17:14; 20:10.