1. San Yehofa e gi wi a okasi fu du?

YEHOFA gi ala sama a okasi fu du san den wani anga den libi. Ma winsi fa Yehofa gi wi a gaandi ya, toku ai leli u fa u sa du sani anga koni. Te wi e du sani di a lobi, da ai yeepi u fu sani waka bun (Ps. 119:173). Te wi e wooko anga den leli fu Beibel, a sani ya e yeepi u fu du sani anga koni.​—Heb. 5:14.

2. San sa pasa baka te u poti a wi ede fu du wan sani?

² Winsi u poti a wi ede fu du wan bun sani, toku son leisi ai taanga gi u fu du a sani ya. Meke u luku wantu toli: Wan yonkuu baala poti neen ede taki a o leisi a hii Beibel. Kande a bigin leisi wantu wiki, ma te fu kaba a tapu baka. Wan sisa poti neen ede taki a o du a kowownu pioniliwooko, ma ai daaidaai fu bigin. Den owluman fu wan kemeente taki fiti taki den o meke moiti fu go luku den baala anga sisa fu a kemeente a osu fu gi den taanga-sikin, ma baka omen mun den á du san den be taki den o du. Den toli ya a ná aseefi, ma tokuso a wan seefi sowtu sani e pasa aini ala den. Den sama ya taki den o du wan sani, ma den á du san den be wani du. A sani ya be miti den fosi Kelesten aini a foto Korente tu. Meke u luku san u sa leli fu den.

3. Sowtu bosoloiti den Kelesten fu Korente be teke? San den du baka dati?

³ A pisiten fu a yali 55, den Kelesten a Korente be teke wan pelensipali bosoloiti. Den be yee taki den baala anga sisa a Yelusalem anga Yudeya be abi yeepi fanowdu fu di den be e pina. Den be yee tu taki den taa kemeente be e piki moni fu yeepi den baala anga sisa ya. Den Kelesten a Korente be abi switifasi. Den be lobi gi sama sani tu, neen meke denseefi be wani yeepi den baala anga sisa di be de a nowtu. A so den akisi Pawlesi fa den sa yeepi. Pawlesi soi den baala fa den sa yeepi, neen a poti Titesi fu yeepi piki  a moni (1 Kor. 16:1; 2 Kor. 8:6). Ma baka wantu mun, Pawlesi yee taki a kemeente a Korente á be du san den be taki den o du. A dei di den be poti fu tyai den sani di ala den kemeente be gi go a Yelusalem be koosube kaba. Efu den Kelesten fu Korente be daaidaai ete, den be o lati fu yeepi den baala anga sisa fu den di be de a nowtu.​—2 Kor. 9:4, 5.

4. Enke fa 2 Korentesama 8:7, 10, 11 e soi, da sowtu taanga-sikin Pawlesi be gi den Kelesten fu Korente?

⁴ A wan bun sani den baala anga sisa fu Korente be wani du. Neen meke Pawlesi gafa den fu di den soi taki den biibi taanga. A gafa den tu fu di den be wani yeepi taawan. Ma a be abi fu gi den taanga-sikin tu fu du san den be taki. (Leisi 2 Korentesama 8:7, 10, 11.) A toli ya e leli u taki a sa taanga gi tuu Kelesten di e dini Gadu anga den hii ati tu fu du san den taki, winsi a wan bun sani den wani du.

5. Sowtu akisi wi o luku?

⁵ Leti enke den Kelesten fu Korente, a so a sa taanga gi wi aini a ten ya tu fu du san u taki. Saide? We, wi a sondu libisama, neen meke son leisi wi e daaidaai fu du sani. Son leisi sani di wi á be denki e pasa tu, di meke wi á poi du san u be taki wi o du moo (Peleik. 9:11; Rom. 7:18). San o yeepi u fu sabi efu a de fanowdu fu kengi wan bosoloiti di u be teke den ten di pasa? San o yeepi u fu e holi useefi a san u be taki?

6. On ten a sa de fanowdu fu kengi wan bosoloiti di u be teke den ten di pasa?

⁶ Noiti u wani kengi son pelensipali bosoloiti di u teke aini a libi. Wan fu den bosoloiti ya, na a paamisi di u paamisi Yehofa taki wi o dini. Efi i toow, da i mu holi iseefi na a paamisi di i meke ai toowdei tu (Mat. 16:24; 19:6). Ma son leisi wi abi fu kengi son bosoloiti di u be teke den ten di pasa. Saide? Bika sani e kengi aini u libi. San o yeepi u fu du sani anga koni?

7. San u mu begi Yehofa? Saide u mu begi en a sani ya?

⁷ Begi Gadu fu a gi i koni. A santa yeye be meke Yohanisi sikiifi taki: „Efu iniiwan fu wi e mankei koni, da meke a tan begi Gadu. Bika Gadu e gi sama sani anga en hii ati” (Yak. 1:5). Ala wi e „mankei koni”, neen meke u mu begi Yehofa fu a gi u koni, fosi u teke wan bosoloiti, anga te u mu kengi wan bosoloiti di u be teke kaba. Te i begi Yehofa, a o yeepi i fu du sani anga koni.

8. San u mu du fosi u teke wan bosoloiti?

⁸ Ondoosuku sani finifini. Luku san Beibel e taki fu a toli. Leisi den buku fu a olikanisâsi. Taki anga sama di abi ondoofeni di sa yeepi i fu du sani anga koni (Odo 20:18). Kande i wani suku wan taa wooko, foloisi go tan a wan taa peesi, efuso kande i wani sabi sowtu sikoo i mu go fu man fende wan bun wooko bakaten. A pelensipali fu ondoosuku sani finifini fosi u du den sani ya.

9. Sowtu wini wi o fende te wi e du sani anga wan kiin ati?

⁹ Pakisei saide i wani du wan sani. Yehofa e luku saide wi e du son sani (Odo 16:2). A wani u du ala sani anga wan kiin ati. Neen meke te u wani du wan sani gi Yehofa, u mu akisi useefi saide u wani du en. Wi á mu koli taawan. Efu wi á du sani anga wan kiin ati, a o taanga gi u fu holi useefi na a bosoloiti di u teke. Kande wan yonkuu baala bigin anga a kowownu pioniliwooko. Ma bakaten, a si taki a nai doo  den yuu, a nai piisii anga a wooko ya tu. Kande a baala ya be si enke a fu di enseefi be wani du moo gi Yehofa meke a bigin anga a pioniliwooko. Ma kande a fi en mma anga en dda ede a bigin pionili. Kande a bigin pionili tu fu di a be wani wan sama di ai lesipeki piisii.

10. San o yeepi u fu fika son sani?

¹⁰ Meke u taki wan Beibel sutudi di be e somoko, taki o tapu anga a sani ya. Biginbigin ai taanga. Kande a tan wan wiki, tu wiki a á somoko, baka dati a á poi holi enseefi moo. Ma a nai gi abaa, ai tan meke moiti te enke a tapu anga a somoko di a be e somoko. Na a lobi di a lobi Yehofa, anga a du di a wani du sani enke fa Yehofa wani, yeepi en fu tapu anga a takuu gwenti ya.​—Kol. 1:10; 3:23.

11. Saide i mu poti maiki gi iseefi?

¹¹ Poti maiki gi iseefi. Efi i poti maiki gi iseefi, a o moo makiliki gi i fu du san i taki. Kande a omen leisi i taki yu o leisi a hii Beibel. Ma efi yu á meke wan sikeima, kande yu o bigin, ma i ná o kaba. * Meke u taki den owluman aini wan kemeente taki den o meke moo moiti fu go luku den baala anga sisa a osu fu gi den taanga-sikin, ma baka wantu ten, den á du san den be taki. Efu den owluman ya wani du san den taki, den mu akisi denseefi wantu sani: „U meke wan sikeima kaba fu den baala anga sisa di u mu go luku? U poti wan dei kaba di wi o go luku den?”

12. San wi o abi fu du son leisi? Saide wi o abi fu du a sani ya?

¹² Holi a pakisei taki yu á poi du ala sani. Nawan fu wi abi a ten, a moni efuso a kaakiti fu du ala den sani di u be sa wani du. Neen meke i mu luku san i poi du. Son leisi, kande i si taki yu á poi du wan sani di i be taki yu o du moo (Peleik. 3:6). Ma meke u taki yu ondoosuku sani finifini, i seeka san i si enke i be mu seeka, baka dati neen i teke wan bosoloiti. San o yeepi i fu du san i taki yu o du? Meke u luku feifi sani di o yeepi i.

13. San o yeepi i fu fende a kaakiti fu du san i taki?

¹³ Begi Gadu fu a gi yu a kaakiti fu du san i paamisi. Gadu sa gi yu a „kaakiti” fu du san i taki (Filip. 2:13). Neen meke i mu akisi Yehofa fu a gi yu en santa yeye fu yeepi i fu du san i taki. Efi i si enke Yehofa nai piki a begi fi i, yu á mu tapu fu begi. Yesesi be taki: „E akisi namo, da wi o fende [a santa yeye].”​—Luk. 11:9, 13.

14. Fa a sani di sikiifi a Odo 21:5 sa yeepi i te i wani du wan sani?

¹⁴ Seeka bun. (Leisi Odo 21:5.) Efi i wani kaba wan wooko, i mu seeka bun. I mu sabi a fesi san i wani du. I mu du sani enke fa i seeka tu. A so a de tu te i teke wan bosoloiti. I mu sikiifi san yu o du, fu man kaba a sani di yu abi a pakisei. Efu a wan gaan wooko i mu du, da paati en aini pikinpikin wooko. Te i kaba wan fu den wooko ya yu o man si san i mu du ete fu kaba a hii wooko. Na a sani ya Pawlesi be gi den Kelesten fu Korente taanga-sikin fu du. A be taigi den taki den mu poti wan pikin sani a wan se „ala fosi dei fu a wiki”. Den á be mu wakiti te enke a doo fosi da den bigin piki moni (1 Kor. 16:2). Efu wi e paati wan gaan wooko aini pikinpikin wooko, a wooko di u mu du ná o hebi gi u tumisi.

15. San o yeepi i fu du san i taki yu o du?

 ¹⁵ Te i poti a pampila san i wani du, a o moo makiliki gi i fu du san i taki (1 Kor. 14:40). Den baala gi owluman a taanga-sikin fu sikiifi ala san den taki den o du a pampila. Den mu sikiifi tu sama o du a wooko, anga on ten a mu kaba. Efu owluman e wooko anga a sani ya, a o moo makiliki gi den fu du san den taki den o du (1 Kor. 9:26). I sa du aseefi sani tu. Ala dei i sa sikiifi san i wani du a dei de. Sikiifi den moo pelensipali sani di i wani du fosi. A sani ya o yeepi i fu du san i taki yu o du. A o yeepi i fi yu á lasi ten tu.

16. Enke fa Romesama 12:11 e soi, da san a wan taa sani di o yeepi i fu du san i taki?

¹⁶ Du ala san i man fu du san i taki yu o du. Yu abi fu meke taanga moiti fu du san i taki. (Leisi Romesama 12:11.) Pawlesi be taigi Timotiyesi taki a be mu „tan” „meke moiti naamo” fu toon wan moo bun leliman. U sa wooko anga a sani di Pawlesi be taigi Timotiyesi ya tu, te u wani du wan sani gi Yehofa.​—1 Tim. 4:13, 16.

17. Fa den sani di sikiifi a Efeisesama 5:15, 16 sa yeepi u fu du san u taki?

¹⁷ Koboloiki i ten bun. (Leisi Efeisesama 5:15, 16.) Poti wan yuu gi a sani di i wani du, da i du en na a yuu di i poti. Yu á mu sidon wakiti wan bun dei fu du sani, efuso na ala yuu wan taa sani o tapu i fu du san i wani du (Peleik. 11:4). Ná meke sani di á pelensipali, teke ala i ten anga i kaakiti (Filip. 1:10). Meke moiti fu du sani a wan yuu di sama ná o puu i pakisei a san i mu du. Piki den sama fi i taki yu abi fu poti ala i pakisei na a sani di i mu du. Kande i sa kii i telefon. I sa luku den bosikopu di sama sende gi yu baka te i kaba du san i be mu du. *

18-19. San o yeepi i fu du san i taki yu o du, winsi a á makiliki?

¹⁸ Pakisei den wini di yu o fende fu a sani di yu o du. Te i du wan sani di i be wani du, da a leti enke i doo wan peesi pe i be wani go. Te i wani go a wan peesi, winsi a pasi tapu, yu e suku wan taa pasi fu doo pe i wani go. A letiso a de tu taki efu wi e pakisei den wini di wi o fende fu wan sani di u wani du, u ná o gi abaa makiliki te sani nai go enke fa u be sa wani.​—Gal. 6:9.

¹⁹ A ná ala yuu a makiliki fu teke wan bun bosoloiti. Te u teke wan bosoloiti kaba, a á makiliki fu du san u taki wi o du tu. Ma Yehofa sa yeepi i. A poi gi yu a koni anga a kaakiti fu du san i taki yu o du.