AINI Beibel ten, son futuboi be abi a faantiwowtu fu luku den gudu efuso a osu fu wan taa sama.

Yowsefu, a manpikin fu a famii edeman Yakopu a be wan saafu aini Egepte. Bakaten a toon a futuboi di en masaa be ’poti fu luku a hii osu fi en’ (Gen. 39:2-6). Bakaten di Yowsefu toon wan makiti tiiman a Egepte, enseefi be poti wan futuboi fu luku ala den sani di a be abi.​—Gen. 44:4.

Aini a ten fu Yesesi, den sama di be abi goon á be e tan a pe den goon fu den be de. Aini den foto den be e tan. Neen meke den be e poti wan futuboi fu luku efu den wookoman be e du den wooko bun.

Sama den be e poti enke futuboi? Aini a ten fu den apostel, Columella, wan sikiifiman fu Rome be taki sowtu manii wan futuboi be mu abi. A be taki efu den be o poti wan saafu enke futuboi, da a saafu be „mu de wan sama di be e wooko taanga”. A be mu de wan sama di be o „solugu taki den wookoman du den wooko bun, ma a á be mu e du ogii anga den”. A be taki: „Wan futuboi á mu denki taki a sabi ala sani kaba. Ala yuu a mu e wani leli moo sani.”

Gadu Wowtu koboloiki a wooko di wan futuboi be e du fu soi fa son sani mu waka aini a Kelesten kemeente. Peitilisi be gi Kelesten a taanga-sikin taki den mu koboloiki a koni fu den „fu dini makandaa enke bun futuboi di Gadu soi bun-ati a omen sowtu fasi”.​—1 Peit. 4:10.

Yesesi koboloiki a toli fu wan futuboi aini a ageisitoli di sikiifi a Lukasi 16:1-8. Boiti dati, di Yesesi be e taki fu a ten di a o kon enke Kownu, a taigi den bakaman fi en taki a be o poti wan „saafu di u sa fitoow” efuso „futuboi di u sa fitoow”. A moo pelensipali wooko di a futuboi ya be o abi, a fu gi den bakaman fu Yesesi leli aini den lasiti dei (Mat. 24:45-47; Luk. 12:42). Ai bigi gi u tuutuu taki a futuboi ya di u sa fitoow e taanga u biibi anga den buku anga taa sani di den e paati a hii goontapu.