1. San o gi u taanga-sikin te wi e fii enke a u wawan de? (Psalm 118:5-7)

SON leisi yu e fii enke a yu wawan de? Yu e fii enke nawan sama á de fu yeepi i te yu abi polobelema? A omen sama e fii so son leisi. Son fu den sama ya a sama di be e dini Yehofa anga den hii ati (1 Kow. 19:14). Efu a so yu e fii, da gaantangi ná feegete san Yehofa paamisi u. A taki: ‘Mi ná o gwe fika i. Noiti mi o fika i wawan.’ Neen meke ala u sa taki: ‘A Yehofa a mi yeepiman. Mi ná o feele’ (Heb. 13:5, 6). Aini a pisiten fu a yali 61 Pawlesi be sikiifi den wowtu ya gi den Kelesten fu Yudeya. Den wowtu ya e meke u pakisei a sani di sikiifi a Psalm 118:5-7.​—Leisi en.

2. San wi o luku aini a artikel ya? Saide a bun fu luku den toli ya?

² Leti enke a psalm sikiifiman, Pawlesi be sabi taki Yehofa be de anga en, bika a be si fa Yehofa be yeepi en kaba den ten di pasa. Wan sani fu tu yali fosi Pawlesi sikiifi a biifi gi den Hebrewsama, wan gaan seke wataa be meke a sungu anga sipi. Ma toku Pawlesi á be dede (Toli 27:4, 15, 20). Yehofa be yeepi Pawlesi di a sani ya miti en, leti enke fa a be yeepi en den yali a fesi. Wi o luku dii fasi fa Yehofa yeepi Pawlesi. Yehofa be meke Yesesi anga den engel, sama di abi hei posisi, anga taa Kelesten yeepi Pawlesi. Te wi o luku den toli ya, wi o moo fitoow Yehofa. Den o yeepi u fu biibi tu taki a o aliki u te wi e begi en fu a yeepi u.

3. San Pawlesi be sa e akisi enseefi? Saide a be o akisi enseefi a sani ya?

³ Pawlesi be abi yeepi fanowdu. Na a pisiten fu a yali 56, wan kulu sama hali en go a doose fu a tempel a Yelusalem fu di den be wani kii en. A taa dei di den tyai en go a kuutu, pikinmoo sama kii en na ape baka (Toli 21:30-32; 22:30; 23:6-10). Kande Pawlesi be e akisi enseefi taki: ‘On langa mi o man teke a pina ya?’

4. Fa Yehofa meke Yesesi yeepi Pawlesi?

⁴ Fa Yesesi yeepi Pawlesi? A neti baka di den kisi Pawlesi, ‘Masaa’ Yesesi kon neen, neen a taigi en taki: ‘I mu abi deki-ati! Leti enke fa i taigi den sama a Yelusalem finifini sama a mi, a so i mu peleiki gi den sama a Rome tu’ (Toli 23:11). Ná pikin taanga-sikin a sani ya be musu gi Pawlesi. Yesesi gafa en fu a fasi fa a peleiki aini Yelusalem. Baka dati a paamisi en taki a o doo Rome libilibi, bika a be mu peleiki gi den sama anda tu. Di Pawlesi yee den sani ya en ati be musu sidon, leti enke fa wan pikin e fii te en dda de neen se.

5. Fa Yehofa meke wan engel gi Pawlesi taanga-sikin? (Luku a fowtow a fesise fu A Wakititolen.)

⁵ San be miti Pawlesi moo? Wan sani fu tu yali baka di den sani ya miti Pawlesi a Yelusalem, a be de a pasi e go a Italiya anga boto. Di den de a pasi neen wan gaan winta bigin wai. A boto be e seke te neen den sama di be de aini be denki taki den be o dede. Ma Pawlesi á be e feele. Saide? A taigi den taa sama di be de aini a boto taki: ‘A neti di pasa, wan engel fu a Gadu di mi e dini kon a mi neen a taigi mi taki: “Pawlesi, ná feele. I mu doo na a Gaankownu, neen meke Gadu o holi ala sama di de aini a boto ya a libi fi yu ede.”’ Yehofa sende wan engel fu kon taigi Pawlesi a sani di a be meke Yesesi taigi en kaba. A taigi en taki a o doo Rome libilibi. A so sani waka tu.​—Toli 27:20-25; 28:16.

6. San Yesesi paamisi u? Saide a sani ya e taanga u?

⁶ Fa Yesesi e yeepi u? Yesesi e holibaka gi u leti enke fa a be holibaka gi Pawlesi. A paamisi ala den bakaman fi en taki: ‘Mi o de anga u te enke a kaba fu a goontapu doo’ (Mat. 28:20). Den sani di Yesesi taki ya e gi u taanga-sikin. Saide? Bika sani e miti u di e  meke u fii booko-saka. Te wan sama fu u dede a omen ten wi e tyai a pen ya a wi ati. A libi moo taanga gi son sama fu di den kon gaandi. Son baala anga sisa e booko den ede tumisi anga sani. A sani ya e meke den e fii booko-saka son yuu. Ma winsi sowtu wan fu den sani ya e miti u, u poi holidoo fu di u sabi taki Yesesi o ‘de anga wi ala yuu te enke a kaba doo’.​—Mat. 11:28-30.

7. Enke fa Openbaring 14:6 e soi, da fa Yehofa e yeepi wi aini a ten ya?

⁷ Beibel e soi u taki Yehofa e meke den engel fi en yeepi u tu (Heb. 1:7, 14). Wan fasi fa den engel e holibaka gi u, a te wi e du a peleikiwooko. Den e yeepi u te wi e ‘paati bun nyunsu gi sama fu ala nasi, lo anga tongo’.​—Mat. 24:13, 14; leisi Openbaring 14:6.

8. Fa Yehofa be meke wan suudati edeman yeepi Pawlesi?

⁸ Fa Yehofa be meke sama yeepi Pawlesi? Aini a yali 56 Yesesi be paamisi Pawlesi taki a be o doo Rome. Ma wantu Dyu aini Yelusalem be meke mofu fu kii Pawlesi. Di a suudati edeman Klawdiyus Lisiyas yee taki a so den Dyu be wani du, a du wan sani wantenwanten fu yeepi Pawlesi. A sende wan gaan kulu suudati fu tyai Pawlesi go a Sesareya. Den á be pasa koosube fu Yelusalem. A pasi di den be teke be de wan sani fu 105 kilomeiti fu Yelusalem. Di Pawlesi doo Sesareya, Gaanman Feliks meke den poti en ‘aini a osu fu Herodes’. Den sama di be wani kii en á be poi doo neen.​—Toli 23:12-35.

9. Fa Gaanman Festus yeepi Pawlesi?

⁹ Tu yali baka dati, Pawlesi be de a sitaafu ete aini Sesareya. Festus be toon Gaanman a Feliks peesi. Neen meke den Dyu go begi Festus fu a sende Pawlesi go a Yelusalem fu den kuutu en anda, ma Festus á be wani. Kande a be sabi taki den Dyu be seeka sani fu kii Pawlesi a pasi fosi a doo Yelusalem.​—Toli 24:27–25:5.

10. San Gaanman Festus du di Pawlesi akisi en fu meke a Gaankownu kuutu en?

¹⁰ Bakaten den tyai Pawlesi go a kuutu aini Sesareya. Festus be wani ‘den Dyu piisii’, neen meke a akisi Pawlesi taki: ‘I wani go a Yelusalem fu den kuutu yu anda? Miseefi o de ape te den e kuutu i.’ Ma Pawlesi be sabi taki efu a be go a Yelusalem, den Dyu be o kii en. A be sabi tu taki a mu go a Rome fu go doo anga a peleikiwooko, neen meke a taki: ‘Mi wani a Gaankownu kuutu mi!’ Baka di Festus taki anga den koniman fi en, a taigi Pawlesi taki: ‘We, efu na a Gaankownu i wani kuutu i, da wi o sende i go na a Gaankownu.’ A sani di Festus du ya, meke den feyanti fu Pawlesi á fende en kii. Den be o sende en go a Rome. Den Dyu di be e suku fu kii en á be o poi doo anda.​—Toli 25:6-12.

11. San be gi Pawlesi taanga-sikin?

¹¹ A pisiten di Pawlesi be e wakiti fu den tyai en go a Rome, kande a be pakisei a sani di santa yeye be meke Yesaya sikiifi fu den sama di e suku fu du ogii anga a foluku fu Gadu. Yesaya be taki: ‘Winsi sowtu ogii u wani du, u ná o poi du en. U sa taki san u wani, ma u ná o poi du nawan sani, bika Gadu de  anga u’ (Yes. 8:10). Pawlesi be sabi taki Gadu be o yeepi en. Na a sani ya be gi en taanga-sikin fu holidoo winsi fa a be sabi taki sani be o miti ete.

12. Fa Yuliyus kibii Pawlesi? San a sani ya soi Pawlesi?

¹² Aini a yali 58, Pawlesi be de a pasi e go a Italiya. A wan suudati edeman fu Rome den be e kai Yuliyus den be poti fu luku Pawlesi. A man ya be abi a makiti fu du san a wani anga Pawlesi. San a man ya be o du? Yuliyus libi bun anga Pawlesi. A taa dei di den doo Sidon, ‘a gi en pasi seefi fu a go a den mati fi en fu den yeepi en’. Di den taa suudati be wani kii ala den sitaafuman fu di den be si enke den o lowe, Yuliyus tapu den fu du a sani ya. Saide? Beibel taki a á be wani sani du Pawlesi. Pawlesi be musu si taki a Yehofa be meke a suudati edeman ya kibii en fu sani á pasa anga en.​—Toli 27:1-3, 42-44.

13. Fa Yehofa e meke sama di abi hei posisi du san a wani?

¹³ Fa Yehofa e yeepi u? Yehofa sa koboloiki en santa yeye fu meke den tiiman fu kondee anga sama di abi hei posisi du san a wani. Kownu Salomo be taki: ‘A ati fu wan kownu de enke wan liba aini Yehofa ana. Ai tyai en go a pe a wani’ (Odo 21:1). San a sani ya wani taki? We, leti enke fa libisama sa diki wan gotoo fu meke a wataa lon go a pe den wani, a so Yehofa sa meke a santa yeye fi en meke tiiman du sani di o meke san a abi a pakisei kon tuu. Den tiiman ya e fii fu yeepi a foluku fu Gadu.​—Luku Esra 7:21, 25, 26 tu.

14. Enke fa Toli fu den apostel 12:5 e soi, da sama u mu begi gi?

¹⁴ San u sa du? Yehofa taki u mu ‘begi gi den kownu anga ala den bigiman fu kondee’ fu den sa teke bosoloiti di o yeepi u fu dini Gadu enke fa a wani (1 Tim. 2:1, 2.; Neh. 1:11). Leti enke fa den fosi Kelesten be e begi gi denseefi, a so useefi mu e begi gi den baala anga sisa fu u di de a sitaafu-osu tu. (Leisi Toli fu den apostel 12:5; Heb. 13:3). U sa begi gi den sikowtu di e koti wakiti gi den tu fu Yehofa sa opo den ati fu den libi bun anga den baala anga sisa fu u leti enke fa Yuliyus be libi bun anga Pawlesi.​—Toli 27:3.

15-16. Fa Yehofa meke Aristarkus anga Lukasi yeepi Pawlesi?

¹⁵ Fa taa Kelesten yeepi Pawlesi? Di Pawlesi be de a pasi e go a Rome, a omen leisi Yehofa meke taa baala anga sisa yeepi en. Wi o luku wantu fasi fa den du a sani ya.

¹⁶ Tu mati fu Pawlesi den be e kai Aristarkus anga Lukasi go anga en a Rome. * U nai leisi aini Beibel taki Yesesi be paamisi den tu man ya taki den be o doo Rome libilibi. Toku den be de kabakaba fu yeepi Pawlesi winsi den be sa dede. A di den be de aini a boto fosi den yee taki den á be o dede. Di Aristarkus anga Lukasi go aini a boto di den be de a Sesareya, Pawlesi be musu gi Yehofa daa taki den man ya be de kabakaba fu holibaka gi en.​—Toli 27:1, 2, 20-25.

17. Fa Yehofa meke taa Kelesten yeepi Pawlesi?

¹⁷ A omen taa Kelesten yeepi Pawlesi di a be de a pasi. Di den doo Sidon, Yuliyus gi Pawlesi ‘pasi fu a go a den mati fi en fu den yeepi en’. Bakaten di den doo a foto Puteyoli aini Italiya Pawlesi anga den mati fi en miti taa Kelesten. Den baala ya begi den fu den tan seibin dei anga den. A pisiten di den de makandaa anga den baala ya, Pawlesi be musu gi den toli di be taanga a biibi fu den. (Luku Toli fu den apostel 15:2, 3 tu.) Di den komoto ape, Pawlesi anga den mati fi en fende kaakiti baka fu go doo pe den be e go.​—Toli 27:3; 28:13, 14.

18. Saide Pawlesi be gi Gadu daa?

¹⁸ Di Pawlesi be de a pasi e waka go a Rome, a be musu e pakisei a sani di a be sikiifi gi den Kelesten fu Rome dii yali pasa. A be taigi den taki: ‘A wantu  yali kaba mi wani kon luku u’ (Rom. 15:23). Di Pawlesi be e sikiifi a biifi ya, a á be denki taki a enke sitaafuman a be o kon a Rome. A be musu bigi gi en di a si omen baala fu Rome taampu a sikin pasi fu bali wadaa gi en. Beibel taki: ‘Di Pawlesi si den, a gi Gadu daa, bika a fende taanga-sikin’ (Toli 28:15). A tekisi taki a gi Gadu daa. Saide? We, Pawlesi be sabi taki a Yehofa be e yeepi en anga den baala di a sende kon fu gi en taanga-sikin.

19. Enke fa 1 Peitilisi 4:10 e soi, da fa u sa yeepi taawan te den fuka?

¹⁹ San u sa du? Baala anga sisa de aini i kemeente di siki efuso di abi taa polobelema? Kande wan sama fu den dede. Efi i sabi taki wan baala efuso sisa de a nowtu, begi Yehofa fu a yeepi i fu taki efuso du sani di o gi en taanga-sikin. Kande na a sani di yu o taki efuso du o gi en kaakiti baka fu go doo. (Leisi 1 Peitilisi 4:10.) * Te wi e yeepi u baala anga sisa na a fasi ya, a o yeepi den fu biibi taki ‘Yehofa nai gwe fika den noiti’. Efi i meke a moiti ya, yu o piisii te i si taki den fende taanga-sikin.

20. Saide u sa taki a Yehofa a u yeepiman?

²⁰ Leti enke Pawlesi anga den mati fi en, a omen sani e miti u di de enke gaan seke wataa. Ma u poi holidoo, bika u sabi taki Yehofa de anga u. Ai meke Yesesi anga den engel yeepi u. Yehofa sa meke den bigiman fu kondee yeepi u tu. Boiti dati, ai meke en santa yeye opo taa baala anga sisa ati fu den yeepi u. Neen meke, leti enke Pawlesi u sa taki: ‘A Yehofa a mi yeepiman. Mi ná o feele. San libisama o poi du anga mi?’​—Heb. 13:6.