1-2. Fa u sa wooko anga a sani di sikiifi a Odo 4:25?

MEKE u luku wantu toli. Kande wan gaandi sisa e pakisei fa sani be de di a be moo yonkuu. Winsi fa a libi kon moo taanga gi en nownow, toku ai du ala san a man gi Yehofa ete (1 Kor. 15:58). Ala dei ai pakisei fa sani o de te en anga den sama fi en o de aini a nyun goontapu. Wan taa sisa e pakisei wan hati sani di wan sama aini a kemeente be du anga en, ma a ná holi a sama na ati (Kol. 3:13). Wan baala e pakisei den somen fowtu di a meke den ten di pasa, toku ai du ala san a man fu dini Yehofa anga en hii ati nownow.​—Ps. 51:10.

² San den dii Kelesten ya e du? We, te a langa den e pakisei son sani di be pasa aini den libi, ma den nai tan poti pakisei a den sani ya. Den e meke moiti fu ‘luku go’ a den sani di de a den fesi.​—Leisi Odo 4:25.

3. Saide u mu tan poti pakisei a den sani di de a u fesi?

³ Saide a pelensipali fu tan poti pakisei a den sani di de a u fesi? Wan sama di e daai luku baka ala yu te ai waka, nai poi poti pakisei a pe ai go. A letiso a de anga a dini di wi e dini Yehofa tu. Efu wi e tan poti pakisei a sani di be pasa, u ná o poi du ala san u mu du gi Yehofa.​—Luk. 9:62.

4. San wi o luku aini a artikel ya?

⁴ Aini a artikel ya, wi o luku dii sani di sa meke wi e tan poti pakisei a sani di pasa kaba. (1) Te wi e winsi taki sani be de enke fosi, (2) te wi e holi sama na ati, anga (3) te u kosensi e fon u naamo. Wi o luku fa Beibel sa yeepi u  fu wi á tan poti pakisei a den sani ya, anga san u mu du fu tan poti pakisei a den sani di de a u fesi.​—Filip. 3:13.

5. San a tekisi fu Peleikiman 7:10 taki wi á mu e du?

⁵ Leisi Peleikiman 7:10. A tekisi nai soi taki a wan ogii fu akisi useefi taki: ‘Saide sani be e go bun fosi?’ Bika a membee di u poi membee den bun ten di pasa, a wan kado di Yehofa gi u. Ma a tekisi e taki: ‘Yu á mu taki: “Fosi sani be e go bun moo a ten ya.”’ Dati wani taki wi á mu e maiki fa sani be de fosi anga fa a kon de now fu di wi e fii taki sani be e moo go bun fosi.

6. Saide a ná wan koni sani fu denki taki u libi be e go moo bun fosi?

⁶ Saide a ná wan koni sani fu e denki taki u libi be e moo waka bun fosi? We, gaanse leisi te wi e pakisei fa sani be de fosi, da a den bun pisi namo wi e membee. Wi e feegete den ogii di be e miti u. Na a sani ya be miti den Islayelisama di den komoto a Egepte. Baka wan pisiten a gei den be feegete a pina di den be e pina a Egepte. A den switi nyanyan di den be e fende anda namo den be e pakisei. Den be e taki: ‘Di u be de a Egepte, a fu soso u be e fende fisi e nyan. U be e fende komukomu, wataamun, ayun anga lai’ (Num. 11:5). Ma a tuu taki a ‘fu soso’ den be e fende den sani ya? Nono. A ná pikin pina den be e pina. Den a be saafu aini Egepte (Ek. 1:13, 14; 3:6-9). Tokuso bakaten den feegete a pina di den be e pina. A den bun sani namo den be e pakisei, neen meke den be wani daai go a Egepte baka. Den á be e si den somen sani di Yehofa be e du gi den, neen meke Yehofa ati be boon a den.​—Num. 11:10.

7. San yeepi wan sisa fu a á fii booko-saka te a be e pakisei den ten di pasa?

⁷ San o yeepi u fu u nai pakisei naamo fa sani be de fosi? Luku a toli fu wan sisa di bigin wooko na a edekantoo  a Brooklyn aini 1945. Wantu yali baka dati, a toow anga wan baala di be de a Betel tu. A omen yali den wooko makandaa a Betel. Ma aini 1976 a man fi en be kon siki. A taki di en man si taki a á be o libi langa moo a taigi en wantu sani fu gi en taanga-sikin. A taigi en taki: ‘A toowlibi fu u be bun. A omen sama á fende a switi libi di mi anga be abi.’ A taigi en tu taki: ‘Winsi i ná o feegete den bun ten di u be de makandaa, toku yu á mu tan poti pakisei a den sani de. O moo den yali e pasa, o moo yu o fii bun. Yu á mu kusumi te da i lasi-ati. Piisii anga den ten di u be e dini Yehofa makandaa. A membee di u poi membee sani a wan kado di Gadu gi u.’ A ná wan koni sani a baala ya taigi en uman noh?

8. Sowtu wini a sisa ya fende di a wooko anga den sani di en man taigi en?

⁸ A sisa ya meke moiti wooko anga den sani di en man taigi en. A tan dini Yehofa anga en hii ati te enke a dede di a be abi 92 yali. Wantu yali fosi a dede, a taki: ‘Te mi luku ala den 63 yali di mi du fuuten diniwooko, da mi sa taki mi be abi wan bun libi tuutuu.’ Saide a taki a sani ya? A taki: ‘Den sani di e meke u piisii tuutuu, a den baala anga sisa fu u, anga a howpu di wi abi fu libi fu teego aini wan paladeisi a goontapu pe wi o dini Yehofa makandaa.’ * U sa leli omen sani fu a sisa ya di be e tan poti pakisei a den sani di Yehofa paamisi u.

9. Enke fa Lefitikesi 19:18 e soi, da on ten a sa taanga gi u fu gi wan sama paadon?

⁹ Leisi Lefitikesi 19:18. Te wan baala, wan sisa, wan mati, efuso wan famii fu u du wan hati sani anga u, da son leisi ai taanga gi u fu gi den paadon. Wan leisi  wan sisa lei gi wan taa sisa taki a fufuu en moni. Bakaten a kon akisi a sisa paadon taki a lei gi en, ma a sisa di a lei gi á be poi feegete a sani di a du anga en. A sani ya miti i kaba? Winsi a ná aseefi sani di miti a sisa ya miti i, toku kande wan sama du wan hati sani anga i kaba. Kande u be e si enke noiti u be o poi gi a sama paadon.

10. San o yeepi u fu wi á holi taawan na ati?

¹⁰ San o yeepi u fu wi á holi taawan na ati? Holi a pakisei taki Yehofa e si ala sani. Ai si te taawan e libi ogii anga u tu (Heb. 4:13). Ai hati Yehofa te taawan e libi ogii anga u (Yes. 63:9). Neen meke a paamisi u taki a o puu ala den bakapisi fu den ogii di e miti u.​—Openb. 21:3, 4.

11. Sowtu wini wi e fende te u nai holi taawan na ati?

¹¹ U mu holi a pakisei tu taki wi e moo piisii te u nai holi sama na ati. Na a sani ya a sisa di den be lei gi kon fusutan. Neen meke a gi a taa sisa paadon, neen a fika a taki de. A be fusutan tu taki te wi e gi taawan paadon, da Yehofa seefi e gi u paadon te u meke wan fowtu (Mat. 6:14). A sisa be sabi taki a wan gaan sani a taa sisa be du anga en, ma toku a gi en paadon neen a fika a taki. Di a du a sani ya, a be e piisii baka. A be poi poti ala en pakisei na a dini di ai dini Yehofa baka.

12. San 1 Yohanisi 3:19, 20 e leli u?

¹² Leisi 1 Yohanisi 3:19, 20. Ala wi e abi kosensi fonfon son yuu. Kande u kosensi e fon u fu sani di u be du fosi u kon a waaleiti. Taawan kosensi e fon den fu di den meke fowtu baka di den dopu (Rom. 3:23). Winsi fa u wani du san bun, toku ‘wi e sondu omen leisi’ (Yak. 3:2; Rom. 7:21-23). U nai fii bun te u kosensi e fon u, ma son leisi a sani ya de fanowdu. Saide? Kosensi fonfon sa meke u tapu anga wan ogii di wi e du. Ai yeepi u tu fu wi á du en moo taa leisi.​—Heb. 12:12, 13.

13. Saide u mu luku bun fu u nai pakisei fowtu di u be meke den ten di pasa?

¹³ Ma son leisi u kosensi e fon u naamo fu wan sani di u be du, winsi Yehofa gi u paadon kaba. A sani ya sa tyai takuu bakapisi gi u (Ps. 31:10; 38:3, 4). Saide u taki a sani ya? Luku a toli fu wan sisa di kosensi be e fon mi en naamo fu sani di a be e du fosi. A taki: ‘Mi be e fii enke a fu soso mi o wooko taanga gi Yehofa, bika mi á denki mi o doo a nyun goontapu.’ Kande a omen fu wi e fii enke a sisa ya. Ma te Yehofa gi u paadon kaba, u mu tan meke moiti fu u nai pakisei den sondu de moo. Saatan be o poolo efu u gwe fika Yehofa fu di wi e fii enke wi á bun, winsi fa Yehofa lobi wi ete.​—Luku 2 Korentesama 2:5-7, 11 tu.

14. Fa u du sabi taki Yehofa o gi u paadon?

¹⁴ Kande yu e akisi iseefi taki: ‘Fa mi o du sabi taki Yehofa o gi mi paadon tuutuu?’ Efu yu e booko yu ede anga a sani ya, da dati e soi taki Yehofa poi gi i paadon. Wantu yali pasa A Wakititolen be taki: ‘Kande a omen leisi wi e meke aseefi fowtu baka di u bigin dini Yehofa. Kande ai taanga gi u fu fika son takuu gwenti di u be abi . . . Ma yu á mu gi abaa. Yu á mu fii enke i du wan sondu di Yehofa á poi gi i paadon fi en. Bika a dati Saatan wani i denki. A fon di i kosensi e fon i, e soi taki i poi kengi. Begi Yehofa ala yuu te i meke wan fowtu fu a gi i  paadon, anga fu a yeepi i fu abi wan kiin kosensi baka. Akisi en fu a yeepi i fi yu á meke a fowtu de moo. I mu e si Yehofa enke i Dda. Te wan pikinnengee meke wan fowtu, a nai luku taki a be akisi en dda kaba fu yeepi en, ma na ala yuu ai lon go neen dda. A letiso u mu e begi Yehofa fu a yeepi wi ala yuu.’

15-16. Fa son baala anga sisa fii di den fusutan taki Yehofa lobi den ete?

¹⁵ A omen sama fende taanga-sikin di den fusutan taki Yehofa e gi den paadon fu den sondu fu den. Wantu yali pasa, wan baala be fende taanga-sikin di a leisi wan ondoofenitoli aini wan Wakititolen. A be e taki fu wan sisa di be e fii enke Yehofa á be o poi lobi en noiti te a be luku fa en libi be de fosi. Omen yali baka di a dopu seefi a be e fii so ete. Ma di a teke ten pakisei san a dede fu Yesesi wani taki gi wi enke libisama, neen a kengi a fasi fa a be e denki. *

¹⁶ Fa a toli fu a sisa ya yeepi a baala? A taki: ‘Di mi be moo yonkuu mi be lobi luku sekisi felon. A be taanga gi mi fu tapu anga a takuu gwenti ya. Wantu ten pasa mi be luku sekisi felon baka. Mi go taki anga den owluman, neen mi meke moiti fu tapu anga a gwenti ya baka. Den owluman soi mi taki Yehofa lobi mi ete. Den soi mi tu taki a de kabakaba fu gi mi paadon. Toku son yuu mi e fii enke mi á bun. Mi e fii enke Yehofa a poi lobi mi. Di mi leisi a ondoofenitoli fu a sisa ya mi fende taanga-sikin. Mi kon fusutan taki te mi e denki taki Yehofa á poi gi mi paadon, da a leti enke mi e taigi en taki a buulu fi en Manpikin, á sai fu tapu den sondu fu mi. Mi koti a pisi fu a Wakititolen ya teke, da ala yuu te mi e fii enke mi á bun, mi e go leisi en baka.’

17. Saide apostel Pawlesi kosensi á be e fon mi en naamo fu den sani di á be du?

¹⁷ Den sowtu ondoofenitoli ya e meke u pakisei apostel Pawlesi. Fosi a toon  wan Kelesten a omen gaan ogii a be du. Pawlesi á be feegete den sani di á be du, toku a á be tan poti pakisei a den sani de (1 Tim. 1:12-15). A be e biibi taki a dede di Yehofa meke Yesesi kon dede gi u be poi tapu den sondu fi en. A be e si a sani ya enke wan kado di Yehofa be gi en (Gal. 2:20). Pawlesi á be tan poti pakisei a den fowtu di a be meke, ma a be e meke moiti fu du ala san a poi gi Yehofa.

18. San u leli aini a artikel ya?

¹⁸ San u leli aini a artikel ya? (1) U leli taki a membee di u poi membee den bun ten di pasa, a wan kado di Yehofa gi u. Tokuso u mu holi a pakisei taki a te wi o de aini a nyun goontapu fosi wi o abi a moo bun libi di wan sama sa abi. (2) Son leisi sama o du sani di hati u, ma te u gi den paadon, a sani de o yeepi u fu piisii baka. (3) Te u kosensi e fon u naamo, a sani de sa tapu u fu dini Yehofa anga u hii ati. Neen meke leti enke Pawlesi u mu biibi taki Yehofa poi gi u paadon tuutuu.

19. Fa u du sabi taki u ná o go e booko wi ede moo anga sani di pasa kaba te wi o de aini a nyun goontapu?

¹⁹ Wi abi a howpu fu libi fu teego. Di wi o de aini a nyun goontapu, u ná o go e pakisei sani moo di e hati u. Beibel taki: ‘Den sani de ná o kon a u pakisei moo’ (Yes. 65:17). Son wan fu u dini Yehofa te enke u gaandi, ma wi o yonkuu baka aini a nyun goontapu (Yopu 33:25). Neen meke yu á mu e poti pakisei a sani di pasa kaba, ma poti ala i pakisei a den sani di i mu du fi i sa doo aini a nyun goontapu.