1. Enke fa Mateyesi 7:13, 14 e soi, da saide u sa taki a wan pasi wi e waka?

ALA wi e meke taanga moiti fu dini Yehofa enke fa a wani, fu u sa go aini a nyun goontapu di a paamisi u. Ala dei wi e meke moiti fu du sani di e meke Yehofa piisii. Ma enke fa Yesesi be taki, da a pasi di e tyai sama go a teego libi sumaa, neen meke a á makiliki fu waka a pasi ya. (Leisi Mateyesi 7:13, 14.) Fu di wi a sondu libisama meke ai moo taanga gi u.​—Gal. 6:1.

2. San wi o luku aini a artikel ya? (Luku a faki ‘ Sakafasi o yeepi u fu kengi.’)

² Efu u wani tan na a sumaa pasi di o meke u fende a teego libi, u mu tan meke moiti fu kengi a fasi fa wi e denki, u manii, anga den sani di wi e du. Apostel Pawlesi be gi den Kelesten fu Korente taanga-sikin fu ‘meke moiti fu kengi den manii’ (2 Kor. 13:11). Useefi mu wooko anga a sani di Pawlesi be taki ya. Aini a artikel ya, wi o luku fa Beibel sa yeepi u fu kengi u manii, anga fa mati aini a olikanisâsi di abi ondoofeni sa yeepi u fu tan na a sumaa pasi. Boiti dati, wi o luku san sa meke a taanga gi u fu du den sani di a olikanisâsi fu Yehofa e leli u, anga fa sakafasi o yeepi u fu kengi u manii.

3. Fa a Wowtu fu Gadu sa yeepi u?

³ A á makiliki fu ondoosuku useefi, bika wi ati e koli u son yuu. Neen meke a ná ala yuu den sani di wi e fii fu du, a bun sani (Yel. 17:9). A makiliki u sa  koli useefi (Yak. 1:22). Neen meke u mu wooko anga a Wowtu fu Gadu te wi e ondoosuku wi ati fu sabi san a den sani di u lobi tuutuu (Heb. 4:12, 13). A Wowtu fu Gadu de enke wan masini di e si san de aini u sikin. Ma efu u ná abi sakafasi, u ná o poi wooko anga den sani di u leli aini Beibel, efuso den sani di den baala di e teke fesi e leli u.

4. San e soi taki Kownu Saul be kon abi heimembee?

⁴ Efu u ná abi sakafasi, na aseefi sani di be miti Kownu Saul o miti u tu. Saul be kon abi heimembee. A á be e si moo taki a fasi fa a be e denki, efuso du sani á be bun (Ps. 36:1, 2; Hab. 2:4). Wi e si a sani ya kiin te u luku san pasa baka di Yehofa taigi en pilisisi san a be mu du anga den Amaleksama. Saul á du san Yehofa taigi en. Di polofeiti Samuweli soi Saul taki a á tyai enseefi bun, Saul á be de na a sani de. A taigi Samuweli taki a sani di a du, á be bigi so. A suku fu gi taa sama a fowtu fu a sani di a du tu (1 Sam. 15:13-24). A ná fosi leisi di Saul be tyai enseefi so (1 Sam. 13:10-14). Saul be kon abi heimembee. A á be meke moiti fu kengi, neen meke Yehofa puu kaasi gi en. A á be wani en enke kownu moo.

5. San a toli fu Saul e leli u?

⁵ Wi á wani a sani di miti Saul, miti u, neen meke u mu akisi useefi taki: ‘Te mi leli wan sani aini Beibel, mi e meke moiti fu du san mi leli efuso mi e taigi miseefi taki a ná wan gaan sani? Mi e gi taa sama a fowtu fu den sani di mi e du?’ A fasi fa yu o piki den akisi ya o yeepi i fu si efi i mu kengi i manii. Efi yu e daaidaai fu du a sani ya, yu o kon abi heimembee te da Yehofa á wani yu enke en mati moo.​—Yak. 4:6.

6. Fa Kownu David soi taki a á be e denki enke Kownu Saul?

⁶ Kownu David á be de enke Kownu Saul. David be ‘lobi a weiti fu Yehofa’ (Ps. 1:1-3). David be sabi taki Yehofa e holibaka gi den sama di abi sakafasi, ma ai buuse den sama di abi heimembee (2 Sam. 22:28). Neen meke David meke a Wowtu fu Gadu yeepi en fu kengi. A taki: ‘Mi o gafa Yehofa, a Gadu di e poti mi a pasi. Te neti tapu, da den sani di mi e pakisei e poti mi a pasi.’​—Ps. 16:7.

7. San wi o du efu wi abi sakafasi?

⁷ Efu wi abi sakafasi, wi o meke a Wowtu fu Gadu yeepi u fu kengi a fasi fa wi e denki fosi u du wan sani di á bun. A o de enke wi e yee wan siten e taigi u taki: ‘A ya a pasi de. A ya i mu waka.’ A o wasikoi u te wi e koti komoto na a pasi di u mu waka (Yes. 30:21). A omen wini wi e fende te wi e aliki Yehofa (Yes. 48:17). Wan fu den wini di wi e fende, a taki sen ná o kisi u fu di taa sama abi fu poti wi a pasi ala yuu. Wi anga Yehofa o toon moo bun mati tu, fu di wi o si taki ai libi anga wi enke wan dda di lobi en pikin.​—Heb. 12:7.

8. Enke fa Yakowbesi 1:22-25 e soi, da fa a Wowtu fu Gadu de enke wan sipikii?

⁸ A Wowtu fu Gadu de enke wan sipikii gi u tu. (Leisi Yakowbesi1:22-25.) Gaanse fu wi e luku u fesi a sipikii ala mamanten fosi u komoto a osu. A sipikii e soi u san u mu seeka fosi taa sama si u. A letiso a de anga a Beibel tu. Te wi e leisi Beibel ala dei, wi o si sowtu manii u mu kengi. Gaanse sama e leisi a  deiwowtu fosi den komoto a osu. Den e meke den sani di den leisi yeepi den fu denki enke fa Yehofa e denki. Den e meke moiti tu fu wooko anga san den leli a hii dei. Kande yu o pakisei taki a sani ya á taanga fu du, toku disi a wan fu den moo pelensipali sani di o yeepi u fu wi á komoto na a sumaa pasi.

9. On ten wan mati abi fu poti yu a pasi?

⁹ I be bigin du wan sani wan leisi di be o poli yu anga Yehofa? (Ps. 73:2, 3) Kande wan mati di abi ondoofeni be teke deki-ati kon taki anga i. Efi i teke a taki fi en, da nownow a musu e bigi gi i taki i mati poti yu a pasi.​—Odo 1:5.

10. San i mu du te wan mati soi i taki yu e du wan sani di á bun?

¹⁰ Beibel taki: ‘Wan mati di lobi yu o du sani di e hati i, bika a bun fi yu ai feti’ (Odo 27:6). San a sani ya wani taki? We, meke u taki i taampu e wakiti fu abaa wan pasi pe tyaipi wagi e pasa, ma i pakisei de na a telefon di de aini yu ana. Yu e waka go na a pasi sondee fu luku pe yu e go, neen wan mati fi i gaapu yu a yu ana hali kon a sikinse. Kande a hali i taanga te neen ala yu ana e hati i, ma a wan wagi fesi a hali i puu. Winsi a omen dei langa yu ana be o hati i, yu ati be o boon taki a mati fi i hali i taanga tumisi? Noiti! A poolo yu o poolo taki a wagi á naki i. A letiso a de anga den mati di wi abi aini a olikanisâsi. Kande a o hati i te den o soi i taki yu e du wan sani di Yehofa á lobi. Ma a wan don sani i be o du efi i mandii fu di a poti yu a pasi (Peleik. 7:9). I mu teke en fu bigi taki a meke taanga-sikin kon taki anga i.

11. San sa meke wan sama á wani aliki te en mati e poti en a pasi?

¹¹ San sa meke wan sama á wani aliki te en mati e poti en a pasi? A heimembee. Den sama di abi heimembee lobi te taawan e taigi den ‘san den wani yee. Den nai wani yee a tuu’ (2 Tim. 4:3, 4). Den á lobi te taawan e poti den a pasi, bika den e fii enke den sabi sani moo ala sama. Apostel Pawlesi be taki u mu luku bun anga a sani ya. A be taki: ‘Efu wan sama e fii enseefi, winsi fa a á de wan sani, da a koli ai koli enseefi’ (Gal. 6:3). Kownu Salomo be taki: ‘Wan pooti pikin di koni, bun moo wan don gaandi kownu di nai teke taki.’​—Peleik. 4:13.

12. San a toli di sikiifi a Galasiyasama 2:11-14 e leli u fu Peitilisi?

¹² Luku san apostel Peitilisi du di apostel Pawlesi puu kaasi gi en a sama ini. (Leisi Galasiyasama 2:11-14.) Peitilisi be sa holi Pawlesi na ati. Ma Peitilisi du sani anga koni. A wooko anga san Pawlesi taigi en. Bakaten a be kai Pawlesi en baala di a lobi.​—2 Peit. 3:15.

13. San i mu holi a pakisei efi i wani poti wan mati fi yu a pasi?

¹³ San i mu holi a pakisei efi i wani poti wan mati fi yu a pasi? Fosi i go taki anga en akisi iseefi taki: ‘Ma mi nai suku fini tumisi noh?’ (Peleik. 7:16) Wan sama di e suku fini tumisi e fii enke a bun moo taawan. Ai kuutu sama te den e du sani di Beibel nai kuutu. Den sama ya e meke den eigi weiti. Den nai holi a fii fu taawan a pakisei tu. Efi i teke ten pakisei den sani ya, neen i si taki toku a de fanowdu fu poti i mati a pasi, da taigi en kiin san na a polobelema. Baka dati poti akisi gi en di o yeepi en fu si saide a sani  di a du á bun. Den sani di yu o taigi a mati fi i mu e kai anga san Beibel e taki. Holi a pakisei taki a ná kuutu i go fu kuutu a sama, ma a yeepi i wani yeepi en fi en anga Yehofa á poli (Rom. 14:10). Wooko anga a Wowtu fu Gadu te yu e yeepi a sama. I mu abi tyali-ati tu leti enke Yesesi (Odo 3:5; Mat. 12:20). Saide? Bika na a fasi fa wi e libi anga taawan, Yehofa o libi anga u tu.​—Yak. 2:13.

14. San a olikanisâsi fu Gadu e seeka gi u?

¹⁴ Yehofa e koboloiki a olikanisâsi fi en fu yeepi u fu tan na a pasi di o tyai u go a teego libi. A olikanisâsi ya e seeka komakandaa, den e meke felon, buku anga taa sani fu yeepi u fu du den sani di sikiifi aini Beibel. Aini Beibel den e puu ala den sani di den e leli u. Den baala di e tii a wooko a hii goontapu e meke a santa yeye tii den te den e luku san na a moo bun fasi fu paati a bun nyunsu. Ala yuu den e luku efu den mu kengi son sani fu meke a wooko go moo bun. Saide? Bika ‘sani e kengi aini a goontapu’, neen meke na ala yuu a olikanisâsi fu Gadu e luku fa den sa wooko anga den nyun sani ya.​—1 Kor. 7:31.

15. San be sa meke a taanga gi son peleikiman fu du san a olikanisâsi taki?

¹⁵ Te a olikanisâsi fu Gadu soi u saide den bigin fusutan wan leli fu Beibel taa fasi, efuso te den soi u fa wan Kelesten mu si man anga uman libi, da wi e wooko anga san den taki. Ma san yu e du te den akisi u fu kengi son sani di u be gwenti? Aini den ten di pasa sani kon moo dii, neen meke den baala di e tii a wooko a hii goontapu seeka sani fu moo enke wan kemeente koboloiki wan Kownukondee zaal. Son leisi den e meke tu kemeente toon wan, da den e seli son komakandaa peesi. Den e koboloiki a moni ya fu meke Kownukondee zaal a peesi pe a moo de fanowdu. Efu a sani ya pasa na a pisi pe yu e tan, kande ai taanga gi i fu teke gwenti. Kande a komakandaa peesi kon moo faawe gi son peleikiman. Son baala anga sisa di be yeepi meke, efuso seeka wan Kownukondee zaal e akisi denseefi saide den e  seli en. Kande den e fii enke a fu soso den be wooko taanga. Tokuso wi e poolo anga den baala anga sisa ya, bika den e wooko anga den nyun sani di a olikanisâsi seeka.

16. Fa a sani di sikiifi a Kolosesama 3:23, 24 o yeepi u fu piisii ala yuu?

¹⁶ Te wi e holi a pakisei taki a Yehofa wi e wooko gi, wi o tan du u wooko anga piisii. Wi á mu feegete taki neen e tii a olikanisâsi fi en tu. (Leisi Kolosesama 3:23, 24.) U sa waka a Kownu David baka te u luku san a be taki di a be e poti moni fu holibaka gi a tempel di en manpikin be o meke. A be taki: ‘Sama a mi, efuso a foluku fu mi fu kon gi i sani? A yu gi wi ala san wi abi. A den sani di yu e gi u, wi e daai gi i baka’ (1 Kolon. 29:14). Ala den sani di wi e gi Yehofa, a sani di a gi u. Tokuso ai teke en fu bigi te wi e gi u kaakiti, u ten anga u moni fu holibaka gi a wooko fi en.​—2 Kor. 9:7.

17. Saide yu á mu booko-saka efi i si taki i mu kengi son sani fu man tan na a sumaa pasi?

¹⁷ Efu u wani tan na a sumaa pasi, u mu waka a Yesesi baka (1 Peit. 2:21). Efi i si taki i mu kengi wan sani fu tan na a pasi ya, ná fii booko-saka. A sani ya e soi taki i kosensi e wooko bun. Yehofa sabi taki wi a sondu libisama, neen meke u ná o man du sani pilisisi enke Yesesi.

18. San u mu du fu man tan na a sumaa pasi?

¹⁸ Meke u tan poti pakisei a den sani di de a u fesi. Meke moiti ala yuu fu kengi i manii, a fasi fa yu e du sani, anga a fasi fa yu e denki (Odo 4:25; Luk. 9:62). U mu abi sakafasi. U mu de anga ‘piisii ala yuu, u mu de kabakaba fu kengi u manii tu’ (2 Kor. 13:11). Te wi e du den sani ya, da a piisii Gadu o de anga wi ala yuu. A ná o yeepi u namo fu doo aini a nyun goontapu, ma a o meke u piisii tu te u de na a pasi di o tyai u go na a nyun goontapu.