A OMEN baala anga sisa di be foloisi go a wan taa kondee fu suku wan moo bun libi, daai go a den kondee baka. Fu di den lobi Yehofa anga taa sama, meke den go yeepi a peesi pe moo peleikiman de fanowdu (Mat. 22:37-39). Sowtu sani den be mu fika fu man du a sani ya? Sowtu wini den fende? Fu man piki den akisi ya, wi o taki fu a kondee den e kai Kamerun. A kondee ya de na a west-se fu Afiikan.

Aini 1998 wan baala den e kai Onésime foloisi komoto a Kamerun. A 14 yali langa a tan a wan taa kondee. Wan leisi di a be de a komakandaa, a yee wan ageisitoli di e taki fu a peleikiwooko. A baala be taki: ‘Meke u taki tu mati go uku. Wan fu den e kisi tyaipi fisi, ma a taawan nai kisi bunbun fisi. San i si enke a mati di nai kisi fisi o du? We, a o iti a uku fi en go na a se pe en mati e uku, pe a sabi taki a o kisi fisi.’

A toli ya meke Onésime pakisei fu daai go a Kamerun baka, bika moo peleikiman be de fanowdu anda. Ma a be e booko en ede anga wantu sani. Fu di a be tan omen yali a wan taa kondee, meke a be e akisi enseefi efu a be o poi teke gwenti di a be o daai go neen kondee baka. Neen meke Onésime go tan a Kamerun 6 mun langa fu luku fa sani de anda. Baka dati, a foloisi go ape aini 2012.

Onésime taki: ‘Mi be mu gwenti a waan peesi baka anga a fasi fa sani de ya. Mi be gwenti den safu sutuu fu a taa kondee. Yaaso a langa bangi wi e sidon a komakandaa. Ma te mi e poti pakisei na a komakandaa, da mi e feegete taki a udu bangi mi sidon.’

Aini 2013, Onésime toow anga Géraldine. A sisa ya tan 9 yali a Faansikondee fosi a foloisi kon a Kamerun baka. Sowtu belesi a toowpaa ya fende di den poti a dini di den e dini Yehofa a fesi? Onésime taki: ‘U go na a Kownukondee Peleikiman Sikoo makandaa. U be fende a gaandi fu wooko a Betel tu. A yali di pasa a 20 Beibelsutudi fu u kemeente dopu. Nownow mi e fii enke mi e “kisi fisi” a wan bun peesi’ (Malik. 1:17, 18). Géraldine taki: ‘Yehofa belesi mi moo enke san mi be e denki.’

Judith be foloisi go na Ameekankondee, ma a be wani du moo aini a peleikiwooko. A taki: ‘Ala yuu te mi be go luku den famii fu mi a Kamerun mi be e fende Beibelsutudi. Te mi be mu go a osu baka, mi be e kee, bika mi be mu gwe fika den sutudi  ya.’ Ma a be taanga gi Judith fu foloisi go a Kamerun baka, bika a be abi wan bun wooko na Ameekankondee. Anga a moni ya a be e pai dataa gi en dda di be de sikisiki a Kamerun. Tokuso Judith fitoow Yehofa neen a foloisi go a Kamerun. A taki son yuu a be e angii fu son sani di a be abi na Ameekankondee. Ma a begi Yehofa fu a yeepi en fu a teke gwenti baka. A kelen owluman anga en uman gi en taanga-sikin tu.

Judith taki: ‘Aini dii yali mi yeepi fo sama fu kon dini Yehofa.’ Baka dati Judith toon wan spesuutu pionili. Nownow en anga en man, Sam-Castel, e du a kelen-wooko. Ma fa fu a dda fu Judith di be siki? Judith anga en famii fende wan ati-osu a wan taa kondee di be de kabakaba fu yeepi en dda sondee fu pai.

Wan baala den e kai Victor be foloisi go a Kanada. Baka di a leisi wan artikel aini A Wakititolen di e taki fu hei sikoo, a komoto na a universiteit di a be e go, neen a go a wan sikoo di á be o teke langa so. A taki: ‘A sikoo di mi go ya meke mi fende wooko moo gaw. Mi be poi du a sani di mi be e angii fu du senten tu, dati na a pioniliwooko.’ Baka wan pisiten Victor toow anga Caroline, neen den go a fakansi a Kamerun. Di den go luku a Betel fu Kamerun, wantu baala gi den taanga-sikin fu kon yeepi aini a kondee. Victor taki: ‘Sani á be de di be e tapu u fu go tan a Kamerun, bika wi á be e libi bigi.’ Winsi fa a gusontu fu Caroline á be bun so tokuso den foloisi go anda.

A omen sama be wani sabi moo, neen meke Victor anga Caroline bigin pionili. Biginbigin anga a moni di den be poti a wan se den be e solugu denseefi. Di a moni ya kaba, den go a Kanada wantu mun fu wooko. Baka dati den daai kon baka, neen den go doo anga a pioniliwooko. Sowtu wini den fende? Den fende a gaandi fu go na a Kownukondee Peleikiman Sikoo. Den du a spesuutu pioniliwooko wan pisiten tu. Nownow den e yeepi meke komakandaa peesi. Victor taki: ‘Di u gwe fika den sani di u be gwenti, u si fa Yehofa holibaka gi u.’

Aini 2002 Alain, di be e go na a universiteit fu Doisilikondee, leisi a talakitaati di den e kai ‘Yonguwan​—San unu o du nanga un libi?’ Den sani di a leisi gi en taanga-sikin fu luku baka san a wani du anga en libi, neen a poti taa maiki gi enseefi. Aini 2006 a go na a Dinali sikoo. Baka dati den sende en go neen kondee Kamerun fu di moo peleikiman be de fanowdu anda.

Di Alain go a Kamerun, a fende wan wooko pe a be e go wantu dei aini a wiki namo. Baka dati a fende wan wooko di be e pai moo bun, ma a be e si enke a wooko ya be o tapu en fu du moo aini a peleikiwooko. Ma di a fende a gaandi fu dini enke spesuutu pionili, a á daaidaai. Winsi fa en basi be wani gi en moo moni, Alain á kengi pakisei. Baka wan pisiten Alain toow anga Stéphanie, di be e tan a Faansikondee fosi. San miti en di a foloisi go a Kamerun baka?

Stéphanie taki: ‘Di mi daai kon a Kamerun baka, mi be e sikisiki. Ma di mi go a dataa, mi fende yeepi.’ A toowpaa ya fende belesi di den holidoo. Alain taki: ‘U be go  peleiki a wan kampu den e kai Katé. U fende omen sama de di be wani sutudeli Beibel, neen meke u sutudeli anga den anga telefon. Tu fu den sama ya dopu nownow. Bakaten wan pikin kulu opo na a pisi ya.’ Stéphanie seefi taki: ‘Ná pikin piisii yu e piisii te i yeepi wan sama fu kon dini Yehofa. Di u foloisi kon ya, a omen sama u fende a gaandi fu yeepi te enke den dopu.’ Nownow Alain anga Stephanie e du a kelen wooko.

Gisèle dopu aini Italiyakondee. A be go tan anda fu go a sikoo fu toon dataa. A pionili toowpaa di be e sutudeli anga en á be e libi bigi. A sani ya be naki en ati, neen meke Gisèle bigin pionili tu winsi fa a be e go a sikoo ete.

Gisèle be wani daai go a Kamerun baka fu du moo gi Yehofa, ma a be e booko en ede anga wantu sani. A taki: ‘Mi be o lasi a pampila di mi be fende fu tan a Italiya. Mi á be o poi go luku den mati anga famii fu mi anda enke fa mi be wani tu.’ Ma toku aini mei 2016 Gisèle foloisi go a Kamerun baka. Bakaten a toow anga Léonce. A beikantoo gi den taanga-sikin fu go yeepi a Ayos, pe moo peleikiman be de fanowdu.

Fa a libi be de aini Ayos? Gisèle taki: ‘Son leisi a omen wiki wi á be e abi faya, neen meke gaanse leisi den telefon fu wi á be e wooko. Mi be abi fu leli boli a udufaya tu. Anga koloiwagi anga adaaya u be e go kisi wataa a neti, te sama á be ipi a pe u be e go kisi wataa.’ San yeepi den fu teke gwenti? Gisèle taki: ‘Yehofa yeepi wi anga a yeye fi en. Mi anga mi man be e holibaka gi useefi tu. Mati anga famii be e gi u taanga-sikin. Son yuu den be e gi u moni tu. A den sani de yeepi u fu pasa den ten de.’

Fa Gisèle fii di a daai go neen kondee baka? A taki: ‘Ná pikin piisii mi e piisii! Na a bigin a be taanga bika sani be de taa fasi. Son leisi u be e fii booko-saka tu. Ma ná pikin piisii wi e piisii di u pinapina pasa den ten de. Mi anga mi man e fii enke u du san u be mu du. Wi e fitoow Yehofa, neen meke wi anga en toon moo bun mati.’ Léonce anga Gisèle go na a Kownukondee Peleikiman Sikoo. Nownow den e du a spesuutu pioniliwooko.

Leti enke fisiman di abi deki-ati fu du omen sani fu di den wani kisi fisi, a so den sama di e daai go a den kondee baka e fika son sani a baka fu fende sama di wani sabi moo fu a bun nyunsu di wi e paati. Yehofa ná o feegete fa den peleikiman ya soi taki den lobi en (Neh. 5:19; Heb. 6:10). Efu yu e tan aini wan taa kondee, i si enke i be o man foloisi go a yu kondee baka efu moo peleikiman de fanowdu ape? Efi i du a sani ya, ná pikin belesi Yehofa o belesi i.​—Odo 10:22.