1. San wi e akisi useefi son yuu?

YU E booko yu ede son yuu te i pakisei a poli di Gadu o poli falisi keliki, a feti di Gok fu Magok o kon feti anga u, anga a feti fu Alimakedon? Kande yu e akisi iseefi taki: ‘Mi biibi o taanga sai fu pasa ala den sani ya?’ Efi yu e booko yu ede anga a sani de, da den sani di Yesesi be taki aini a tekisi di e holibaka gi a artikel ya, o yeepi i. A be taigi den disipel fi en taki: ‘Ná booko wi ede. U mu biibi Gadu. U mu biibi mi tu’ (Yoh. 14:1). Te u biibi taanga, a sani de o yeepi u fu wi á booko wi ede anga san o pasa aini a ten di e kon.

2. San o yeepi u fu taanga u biibi? San wi o luku aini a artikel ya?

² Te wi e poti pakisei a den sani di wi e du nownow te tesi miti u, wi o sabi san u mu du fu moo taanga a biibi fu u. Ala leisi te u pasa wan tesi, u biibi e moo taanga. Na a sani ya o yeepi u fu holidoo te moo gaan tesi o miti u. Aini a artikel ya, wi o luku fo sani di be e soi taki den bakaman fu Yesesi be abi moo biibi fanowdu. Baka dati wi o luku san u sa du aini a ten ya te denseefi sowtu sani ya e miti u, anga fa u sa seeka gi den tesi di o miti wi aini a ten di e kon.

3. Enke fa Mateyesi 6:30, 33 e soi, da san Yesesi be wani leli u fu biibi?

³ Enke osufamii edeman, a man e meke ala moiti fu solugu taki en uman anga den pikin fi en abi nyanyan, koosi, anga wan peesi fu tan. Ma a sani ya a ná wan makiliki sani fu du aini a ten ya. A omen baala anga sisa lasi den wooko. Son wan meke moiti te, ma toku den á poi fende wan taa wooko. Son leisi den be e fende wooko, ma den á  be poi teke den wooko ya, bika a wooko di be o tapu den fu dini Yehofa enke fa den mu dini en. Te den sowtu sani ya e miti u, u mu e biibi tuutuu taki Yehofa o gi wi ala san wi abi fanowdu fu solugu wi osufamii. Na a sani ya Yesesi be taigi wi aini a lezing di a be holi na a mongo. (Leisi Mateyesi 6:30, 33.) Te wi e biibi taki Yehofa o holibaka gi wi ala yuu, wi o poi poti a Kownukondee fi en a fesi aini u libi. Da te u si fa Yehofa e solugu u, u biibi o moo taanga.

4-5. San yeepi wan osufamii fu den á buuya di a libi be kon taanga gi den?

⁴ Luku fa wan famii aini Venezuwela si fa Yehofa yeepi den fu fende san den abi fanowdu. Famii Castro be abi wan goon fu den di den be e paandi. Den á be e mankei den sani di den be abi fanowdu. Ma wan dei ogiiman kon a den anga goni, neen den teke a goon fu den. Miguel, a dda fu a osufamii taki: ‘Nownow a wan pikin pisi doti fu wan sama u fende fu e paandi sani. Ala dei te mi opo, mi e akisi Yehofa fu a yeepi a osufamii fu u sa fende san wi abi fanowdu gi a dei de.’ A libi á makiliki gi a osufamii ya, ma toku den e biibi taki den Dda di de a hemel o solugu den, neen meke den e tan go a den komakandaa anga a peleikiwooko. Fu di den e poti a Kownukondee fu Gadu a fesi aini den libi, meke Yehofa e solugu taki den fende san den abi fanowdu.

⁵ Winsi san e miti a osufamii ya, toku Miguel anga en uman Yurai e tan poti pakisei a fa Yehofa e solugu den. Son yuu a taa baala anga sisa ai koboloiki fu gi den san den abi fanowdu. Ai yeepi Miguel tu fu e fende wooko di e yeepi den fu pasa den dei. Yehofa e koboloiki a beikantoo tu fu solugu a osufamii ya. Noiti Yehofa gwe fika den. A sani ya meke a biibi fu den kon moo taanga. Wan leisi di Yehofa yeepi den a wan fasi di den á be denki, a fosi umanpikin fu den, Yoselin taki: ‘Te yu e si fa Yehofa e yeepi i, a sani ya e moo taanga i biibi. Yehofa a mi mati. Mi e biibi taki ala yuu a o holibaka gi mi. Den sani di e miti wi e seeka u gi moo gaan tesi aini a ten di e kon.’

6. Fa i sa taanga a biibi fi i te i ná abi moni sai fu bai den sani di yu abi fanowdu?

⁶ Ai taanga gi i fu fende den sani di yu abi fanowdu fu tan a libi? U sabi taki a sani ya a ná wan makiliki sani, ma i sa koboloiki den sani di e miti i nownow fu moo taanga a biibi fi i. Begi Yehofa, da i leisi den sani di Yesesi be taki a Mateyesi 6:25-34. Baka dati, sidon pakisei fa i sa wooko anga den sani di a be taki ya. Luku ondoofenitoli di e soi fa Yehofa yeepi baala anga sisa aini a ten ya di be e tan poti a Kownukondee fi en a fesi (1 Kor. 15:58). Te yu e poti pakisei a den sowtu toli ya, yu o moo biibi taki u Dda di de a hemel o yeepi i tu. A sabi san yu  abi fanowdu, a o gi i den sani ya tu. O moo yu e si fa Yehofa e yeepi i, o moo i biibi o taanga. Na a sani ya o yeepi i fu pasa den moo gaan tesi di o miti yu aini a ten di e kon.​—Hab. 3:17, 18.

7. Enke fa Mateyesi 8:23-26 e soi, da san e soi taki a biibi fu den apostel á be taanga sai?

⁷ Wan leisi di Yesesi anga den disipel fi en be de aini wan boto, wan gaan winta bigin wai. Yesesi koboloiki a sani di pasa ya fu soi den taki den biibi be mu moo taanga. (Leisi Mateyesi 8:23-26.) A winta be e wai taanga te, da gaan koko balon be e wasi kon aini a boto. A pisiten de Yesesi be didon fi en e siibi. Di den apostel lon go weki en, a taigi den taki: ‘Saide wi e feele so? A biibi fu wi á taanga sai.’ Den disipel fu Yesesi be mu e biibi taki Yehofa poi kibii den anga Yesesi fu sani á du den. San a toli ya e leli u? Ai leli u taki te u biibi taanga, da winsi wan ‘gaan winta’ be o wai na pisi pe wi e tan, u ná o buuya. Te polobelema di de enke gaan winta seefi e miti u, wi o holidoo.

8-9. Sowtu tesi be miti Anel? San yeepi en?

⁸ Luku san be miti Anel, wan sisa di e tan a Porto Riko. Aini a yali 2017 di wan gaan winta be wai pasa aini a kondee ya, a osu fu a sisa ya booko. Boiti dati, a lasi en wooko. Anel taki: ‘Ná pikin booko mi be e booko mi ede den pisiten ya. Ma a sani ya yeepi mi fu moo fitoow Yehofa. Na ala yuu mi be e begi en. Mi á be meke den booko-ede fu mi tapu mi fu du san mi be mu du gi Yehofa.’

⁹ Anel taki wan taa sani di be yeepi en, na a wooko di a be e wooko anga san den baala di e teke fesi taki. A taki: ‘A du di mi be e du sani enke fa den baala ya e taki, yeepi mi fu mi á buuya. Mi be poi si kiin fa Yehofa e koboloiki a olikanisâsi fu gi u taanga-sikin. Boiti taki den baala anga sisa be e gi mi den sani di mi be abi fanowdu, den be e gi mi taanga-sikin tu. Yehofa gi mi moo enke san mi be akisi en seefi. A sani di miti mi ya meke mi biibi kon moo taanga.’

10. San i sa du te gaan tesi e miti i?

¹⁰ Wan gaan tesi e miti i nownow? Kande a gaan winta efuso gaan wataa pasa na a pisi pe yu e tan. Efuso kande a gusontu fi yu e go anga baka namo. Den sani ya sa meke i buuya. Kande yu e booko yu ede tu. Ma yu á mu meke den sani ya tapu i fu fitoow Yehofa. Begi en ala yuu. Te yu e sidon pakisei fa Yehofa yeepi i den ten di pasa, a sani ya o taanga a biibi fi i (Ps. 77:11, 12). I sa biibi taki noiti Yehofa o gwe fika i.

11. Saide u mu e wooko anga san den baala di e teke fesi taigi wi ala yuu?

¹¹ Sowtu taa sani sa yeepi i te tesi e miti i? Anel be taki fu a aliki di u mu e aliki  den baala di e teke fesi. I mu meke moiti fu fitoow den baala ya, bika a den Yehofa poti fu yeepi u. Son leisi kande den o taigi u fu du wan sani di wi á kaba fusutan. Ma i mu holi a pakisei taki Yehofa e belesi den sama di e aliki en. A omen toli de aini Beibel di e soi sowtu wini sama fende di den aliki den sama di Yehofa poti fu teke fesi. Baala anga sisa de aini a ten ya tu di fende wini fu a sani ya (Ek. 14:1-4; 2 Kolon. 20:17). Teke ten pakisei den sowtu toli ya. A sani ya o yeepi i fu biibi taki a soso wini wi e fende te wi e wooko anga den sani di a olikanisâsi e taigi u (Heb. 13:17). Te yu e fitoow den baala di Yehofa poti fu teke fesi, i ná o buuya te moo gaan tesi o miti i.​—Odo 3:25.

12. Enke fa Lukasi 18:1-8 e soi, da san biibi o yeepi u fu du te tesi e miti u?

¹² Yesesi be sabi taki te sama e libi ogii anga u, a sani ya sa swaki a biibi fu u. Neen meke a be gi den bakaman fi en wan ageisitoli di be o soi den san den mu du. A ageisitoli ya sikiifi aini a Beibel buku Lukasi. Yesesi be taki fu wan uman di man be dede kaba. A uman ya be go a wan kuutuman fu yeepi en kuutu wan toli fi en, ma a man ya á be e kuutu a toli fi en anga leti. Winsi fa a be e du a sani ya, toku a uman be e tan go neen anga a toli naamo, bika a be e biibi taki efu ai tan go neen a be o yeepi en te fu kaba. Bakaten a kuutuman ya aliki a uman, neen a yeepi en anga a toli fi en. San a toli ya e leli u? Yehofa á de enke a kuutuman ya, na ala yuu ai du sani anga leti. Neen meke Yesesi taki: ‘Da Gadu ná o du sani a wan letifasi gi den sama di e begi en dei anga neti noh? (Leisi Lukasi 18:1-8.) Baka dati Yesesi taki: ‘Ma di a Manpikin fu libisama o kon, a o fende sama a goontapu di biibi taanga so?’ Te sama e libi ogii anga u, u mu holidoo leti enke a uman ya. Efu u biibi taanga, ala yuu wi o holi a pakisei taki winsi on lati, Yehofa o langa wan ana gi u namo. Wi á mu e feegete fu begi tu. Son yuu te u begi, Yehofa e yeepi wi a wan fasi di wi á be denki seefi.

13. Fa begi be yeepi wan osufamii di sama be e libi ogii anga den?

¹³ Luku a toli fu wan sisa den e kai Vero, di e tan a Kongo-Kinshasa. A man fu a sisa ya a ná Kotoigi. A sisa ya anga en man, anga a meisyo fu den di be abi 15 yali be mu lowe komoto na a kampu pe den be e tan, bika suudati be e kii sama a den kampu. Di den de a pasi e gwe, den miti den suudati ya. Den taigi den taki den o kii den. Di Vero bigin kee, a meisyo fi en bigin begi taanga fu yeepi en mma fu kisi enseefi baka. A omen  leisi a kai Yehofa nen aini a begi fi en. Di a kaba begi, a suudati edeman akisi en taki: ‘Meisyo, sama leli i begi?’ A piki en taki: ‘A mma leli mi begi. Na a begi di sikiifi a Mateyesi 6:9-13 yeepi en fu sabi fa a mu begi.’ A suudati edeman taigi en taki: ‘Yu anga i mma anga i dda sa gwe. Meke a Gadu fu u Yehofa de anga u.’

14. San o yeepi u fu holidoo te a gei enke Yehofa nai piki den begi fu u?

¹⁴ Den sowtu ondoofenitoli ya e soi u taki begi pelensipali tuu. Ma a ná ala yuu Yehofa e piki den begi fu u na a sowtu fasi ya. San o yeepi i fu holidoo te Yehofa á piki a begi fi i gawgaw? Leti enke a uman aini a ageisitoli fu Yesesi, i mu tan begi. I mu e biibi taki noiti Yehofa o gwe fika i. Di a yuu o doo a o piki a begi fi i. I mu e akisi Yehofa ala yuu fu a gi yu a santa yeye fi en tu (Filip. 4:13). Holi a pakisei taki aini a ten di e kon, Yehofa o belesi i te da i feegete taki a so sani be miti i. Te yu e holidoo winsi sowtu tesi e miti i nownow, a sani ya o seeka i gi den sani di de a u fesi.​—1 Peit. 1:6, 7.

15. Enke fa Mateyesi 17:19, 20 e soi, da san be pasa anga den disipel fu Yesesi?

¹⁵ Yesesi be taigi den bakaman fi en taki biibi be o yeepi den fu holidoo winsi san e miti den. (Leisi Mateyesi 17:19, 20.) A omen leisi den apostel fu Yesesi be puu ogii yeye a sama tapu. Ma wan leisi den á be poi du a sani ya. Saide? Yesesi taigi den taki den á be e biibi sai. A taigi den tu taki efu a biibi fu den be moo taanga, den be o poi losi polobelema di be de enke gaan mongo. Son wan fu den tesi di e miti wi aini a ten ya, de enke gaan hei mongo.

16. Fa biibi yeepi Geydi fu holidoo di sama kii a man fi en?

¹⁶ Luku a toli fu Geydi, wan sisa fu Gwatemala. Wan leisi di en anga en man Edi komoto a komakandaa, neen sama kii a man fi en. San yeepi a sisa ya fu pasa a gaan tesi ya? A taki: ‘Begi yeepi mi fu puu ala den hebi fu mi fika gi Yehofa. Te mi be taigi Yehofa fa mi e fii, mi be e kisi miseefi baka. Mi be e si tu taki Yehofa lobi mi, te mi be luku a fasi fa den baala anga sisa aini a kemeente be e libi anga mi. A wooko di mi e wooko taanga aini a olikanisâsi, e yeepi mi fu mi á kusumi tumisi. Ai yeepi mi tu fu mi á booko mi ede anga san o pasa tamaa. A sani di miti mi ya soi mi taki, winsi sowtu tesi o miti mi aini a ten di e kon, mi ná abi fu feele, bika Yehofa, Yesesi, anga a olikanisâsi fi en o yeepi mi fu holidoo.’

17. San o yeepi u fu holidoo te wi abi polobelema di bigi enke gaan mongo?

¹⁷ Yu e kusumi fu di wan sama fi i dede? Efu a so, da meke ten fu leisi den toli aini  Beibel di e taki fu den sama di be weki baka. Den puu wan famii fi yu aini a kemeente? Efu a sani ya miti i, ondoosuku sani aini a Wowtu fu Gadu di o yeepi i fu biibi taki a fasi fa Yehofa e du sani na a moo bun wan. Winsi sowtu tesi e miti i, du ala san i poi fu taanga a biibi fi i. Taigi Yehofa san de a yu ati. Yu á mu e de i wawan, ma i mu e paa anga den baala anga sisa fi i (Odo 18:1). I mu e du sani di o yeepi i fu holidoo. Winsi anga wataa na ain yu e holidoo, a ná abi toobi (Ps. 126:5, 6). Yu á mu e misi komakandaa anga peleikiwooko. E leisi i Beibel ala dei. Tan poti pakisei a den sani di Yehofa paamisi wi aini a ten di e kon. Te yu e si fa Yehofa e yeepi i nownow kaba, i biibi o moo taanga.

18. San i mu du efi i si taki i biibi á taanga sai?

¹⁸ Efu wan tesi miti i, di soi i taki yu abi moo biibi fanowdu, yu á mu lasi-ati. Teke a okasi ya fu taanga i biibi. Leti enke den apostel fu Yesesi, i sa akisi Yehofa taki: ‘Meke a biibi fu mi kon moo taanga baa’ (Luk. 17:5). I sa go luku den ondoofenitoli di u taki fu den aini a artikel ya moo fini. Leti enke Miguel anga Yurai, i mu e holi a pakisei taki na ala yuu Yehofa e yeepi a foluku fi en. Leti enke Anel anga a meisyo fu Vero, i mu e begi Yehofa ala yuu winsi sowtu tesi e miti i. Leti enke Geydi, i mu holi a pakisei taki son yuu a den baala anga sisa aini a olikanisâsi Yehofa e koboloiki fu taanga u biibi. Efi yu e gi Yehofa a okasi fu yeepi i fu pasa den tesi di e miti yu aini a ten ya, i biibi o kon moo taanga. Te tesi o miti yu aini a ten di e kon, yu o poi pasa den tu.

19. San Yesesi be e biibi? San iseefi sa biibi tu?

¹⁹ Yesesi be soi den disipel fi en taki den be abi moo biibi fanowdu fu man du son sani. Ma a be sabi tu taki Yehofa be o yeepi den fu pasa den tesi di be o miti den aini a ten di e kon (Yoh. 14:1; 16:33). Yesesi be e biibi taki wan gaan kulu sama o pasa a gaan banowtu libilibi fu di den biibi taanga (Openb. 7:9, 14). Yu o de aini a gaan kulu ya? We, efi i du ala san i poi nownow fu taanga a biibi fi i, Yehofa o yeepi i fu de aini a kulu ya.​—Heb. 10:39.