1-2. (a) Saide sama di toow nyunyun mu e fitoow Yehofa? (Psalm 37:3, 4) (b) San wi o luku aini a artikel ya?

KANDE a toow dei fi yu e koosube, efuso kande i toow taade ya. I musu e angii fu bigin wan nyun libi anga a sama di i toow anga en. Ma a ná ala yuu a toowlibi makiliki. Yu o abi fu e teke pelensipali bosoloiti. Efi yu e meke Yehofa yeepi i te yu abi polobelema aini a toowlibi, yu o go e du sani anga koni. A toowlibi fi yu o taanga, yu anga i toowpaa o go e piisii fu de makandaa. Ma efu u nai du sani enke fa Yehofa wani te wi abi polobelema, sani ná o waka bun aini a osulibi fu u. A libi ná o go e switi gi u tu.​—Leisi Psalm 37:3, 4.

² Aini a artikel ya, wi o moo poti pakisei a den sama di toow nyunyun, ma toku ala sama di toow sa wooko anga den sani di wi o leli. Wi o luku san u sa leli fu toowpaa fu fositen di be e poti Yehofa a fesi aini den toowlibi, anga fa u sa waka a den baka. Baka dati wi o taki fu wantu toowpaa aini a ten ya, anga fa u sa waka a den baka.

3-4. San a wantu sani di e miti sama di toow nyunyun?

³ Son leisi te sama toow nyunyun, da taawan e gi den taanga-sikin fu du sani enke ala taa sama. Kande  den mma anga dda, anga taa famii e taigi den taki den á mu daaidaai fu meke pikin. Son leisi den e gi den taanga-sikin fu bai wan osu anga omen taa sani fu den sa abi wan moo bun libi.

⁴ Efu toowpaa á luku bun, den o teke sama taki te, da den meke omen paiman. Te a paiman meke kaba, son leisi na ala den tu man abi fu wooko fu man pai a paiman. Son leisi den e wooko te da den nai abi ten moo fu sutudeli anga denseefi, fu holi a osufamii anbegi efuso fu go aini a peleikiwooko. Kande bakaten den e bigin misi komakandaa seefi fu meke moo moni. Te toowpaa e du sani na a fasi ya, a omen sani den nai poi du gi Yehofa.

5. San a toli fu Klaus anga Marisa e leli u?

⁵ A omen ondoofenitoli de di e soi taki den sama di e feti a gudu baka nai piisii tuutuu. Luku a toli fu Klaus anga Marisa. * Di den be toow nyunyun, na ala den tu man be e wooko a hii wiki, bika den be wani abi moni fu bai ala san den wani. Ma toku a sani ya á be e meke den piisii tuutuu. Klaus taki: ‘U be abi moni moo enke san u be abi fanowdu, ma wi á be e go a fesi a waaleiti. A omen booko-ede u be abi tu.’ Kande iseefi si taki te yu e feti a gudu baka, a sani ya nai meke i piisii. Neen meke wi o luku a libi fu wantu sama di o yeepi i fu si fa i sa du sani taa fasi. A fosi sama di wi o taki fi en, a Kownu Yowsafat.

6. Fa Kownu Yowsafat du san sikiifi a Odo 3:5, 6 di tesi miti en?

⁶ Efi yu a wan man di toow, son yuu yu e fii enke den faantiwowtu fi yu ipi tumisi fu tyai? Efu a so yu e fii, da a toli fu Kownu Yowsafat o yeepi i. A wan gaan faantiwowtu a kownu ya be abi. Neen be mu solugu taki sani waka bun anga a hii foluku. Fa a be e du a sani ya? A be meke sikotu lontu den foto fu Yuda fu feyanti á be poi kon aini makiliki. Boiti dati, a be abi 1.160.000 suudati di be de kabakaba fu feti (2 Kolon. 17:12-19). Ma bakaten wan gaan sani miti Yowsafat. Den Amonsama, den Moabsama anga den Amonimsama be bonduu kon a wan fu kon feti anga en. Ná pikin bigi a kulu suudati fu den be bigi (2 Kolon. 20:1, 2). San Yowsafat du? A go suku yeepi a Yehofa. Enke fa Odo 3:5, 6 e soi, da na a moo bun sani a du de. (Leisi en.) I sa leisi a begi fu Yowsafat aini 2 Koloniki 20:5-12. Den sani di a taki aini a begi fi en e soi taki a be  e fitoow en Dda di de a hemel. Yehofa aliki a begi fu Yowsafat?

7. Fa Yehofa piki a begi fu Yowsafat?

⁷ Yehofa sende Yahasiyel, wan Leifisama fu go taigi Yowsafat taki: ‘U mu go, da u taampu gingin, da wi o si fa Yehofa o yeepi u’ (2 Kolon. 20:13-17). A be gei enke a ná wan koni sani a be taigi en, bika sama nai go a feti fu taampu luku den feyanti. Ma Yowsafat be e fitoow en Gadu Yehofa, neen meke a du pilisisi san a taki. Di den go na a feti, a á poti den suudati fi en a fesi, ma a den singiman a poti fu waka a fesi, winsi fa den á be abi fetisani. Fa sani waka? Yehofa du san a paamisi Yowsafat. Enseefi feti gi a foluku fi en, neen a wini den feyanti.​—2 Kolon. 20:18-23.

8. Fa den man di toow sa waka a Yowsafat baka?

⁸ A omen sani den man di toow sa leli fu a fasi fa Yowsafat be e du sani. A yu abi a faantiwowtu fu solugu yu osufamii, neen meke yu e wooko taanga fu den sa fende den sani di den abi fanowdu. Kande te a osufamii abi son polobelema, yu e fii enke iseefi sa seeka en. Ma gaantangi, ná fitoow iseefi. Begi Yehofa fu a yeepi i fu du sani anga koni. I mu e meke ten fu begi makandaa anga yu uman tu. Suku sani aini den buku anga taa sani fu a olikanisâsi di o yeepi i fu du sani enke fa Yehofa wani. Kande son sama ná o fusutan saide yu e du sani na a fasi de. Kande den o taigi i taki a wan don sani yu e du, efuso taki a moo bun fasi fu solugu yu osufamii a te yu abi moni. Ma yu á mu feegete a toli fu Yowsafat. A di a be e fitoow en Gadu Yehofa meke sani be waka bun gi en. Efu a fasi fa yu e du sani e soi taki yu e fitoow Yehofa, noiti a o gwe fika i tu (Ps. 37:28; Heb. 13:5). San a wan taa sani di toowpaa mu du efu den wani abi wan bun toowlibi?

9. San a be a moo pelensipali sani gi polofeiti Yesaya anga en uman?

⁹ Na a wooko fu Yehofa a be a moo pelensipali sani gi polofeiti Yesaya anga en uman. Yesaya a be wan polofeiti, ma Beibel e kai a uman fi en wan uman polofeiti tu. Dati wani taki enseefi be abi en wooko di a be e du gi Yehofa (Yes. 8:1-4). A toowpaa ya be e poti ala den pakisei na a wooko di den be e du gi Yehofa. Toowpaa aini a ten ya sa waka a den baka.

10. Fa a sutudeli di toowpaa e sutudeli den polofeititoli fu Beibel o gi den taanga-sikin fu du moo gi Yehofa?

¹⁰ Toowpaa aini a ten ya e soi taki den e waka a Yesaya anga en uman baka, te den e du ala san den poi gi Yehofa. Te den e sutudeli den polofeititoli di kon tuu kaba, a sani ya o taanga a biibi fu den * (Tit. 1:2). Den mu e teke ten pakisei fa denseefi sa abi wan ana aini den polofeititoli di mu kon tuu ete, anga den wan di e kon tuu nownow kaba. Wan fu den polofeititoli di e kon tuu nownow, na a bun nyunsu di Yesesi be taki o paati a hii goontapu (Mat. 24:14). Te toowpaa e si fa den polofeititoli  fu Beibel e kon tuu, a sani de o moo gi den taanga-sikin fu du ala san den poi gi Yehofa.

11. San Akwila anga Preskela be poi du? Saide den be man du a sani ya?

¹¹ Toowpaa di á toow langa ete, sa leli omen sani fu Preskela anga Akwila. Di den yee a bun nyunsu fu Yesesi, den á daaidaai fu toon Kelesten. Den be abi wan bun libi a Rome, ma sani kengi di Klawdiyus, a Gaankownu fu a ten de, yaki ala den Dyu puu aini a kondee. A sani ya be musu hebi gi a toowpaa ya. Den be abi fu foloisi fika ala den sani di den be gwenti fu go bigin wan nyun libi aini wan taa kondee. A tenti a toowpaa ya be e meke e seli fu solugu denseefi. Now den be abi fu bigin a bisnis fu den a wan hii taa peesi. Ma den sani ya be tapu Akwila anga Preskela fu wooko taanga gi Yehofa? Nono. Di den doo Korente, den bigin wooko makandaa anga Pawlesi fu gi den baala anga sisa ape taanga-sikin. Bakaten den foloisi go a taa foto pe moo peleikiman be de fanowdu (Toli 18:18-21; Rom. 16:3-5). Ná pikin belesi Yehofa belesi a toowpaa ya fu a moiti di den be e meke.

12. Saide toowpaa mu sabi a fesi san den wani du gi Yehofa?

¹² Toowpaa aini a ten ya, e soi taki den e waka a Preskela anga Akwila baka te den e poti a Kownukondee fu Gadu a fesi. A moo bun ten gi tu sama fu luku san den wani du gi Yehofa, a te den e leli sabi denseefi. Te toowpaa poti maiki di den wani doo aini a olikanisâsi, ai moo makiliki gi den fu si fa Yehofa e yeepi den (Peleik. 4:9, 12). Luku a toli fu Russell anga Elizabeth. Russell taki: ‘A pisiten di u bigin leli sabi useefi, u be e taki kaba san u wani du gi Yehofa.’ Elizabeth taki: ‘U be taki fu den sani ya fosi u toow, bika u be sabi taki na a sani ya be o yeepi u fu du sani anga koni baka te u toow.’ Bakaten Russell anga  Elizabeth be poi foloisi go a Mikronesiya fu go yeepi a pe moo peleikiman be de fanowdu.

13. Enke fa Psalm 28:7 e soi, da sowtu wini wi e fende te wi e fitoow Yehofa?

¹³ Leti enke Russell anga Elizabeth, a omen toowpaa nai libi bigi fu di den wani du moo gi Yehofa. Te toowpaa e meke moiti fu wooko taanga gi Yehofa, a omen wini den e fende. Den o si fa Yehofa e solugu den, den o moo fitoow en, den o moo piisii tu.​—Leisi Psalm 28:7.

14. Fa apostel Peitilisi anga en uman soi taki den be e biibi a sani di sikiifi a Mateyesi 6:25, 31-34?

¹⁴ A omen sani toowpaa sa leli fu apostel Peitilisi anga en uman. Wan sani fu sigisi mun go miti wan yali baka di Peitilisi miti Yesesi, a be abi fu teke wan pelensipali bosoloiti. A fisiwooko Peitilisi be e du fu solugu en osufamii. Neen meke di Yesesi kai en fu kon waka neen baka, Peitilisi be musu pakisei en uman (Luk. 5:1-11). Toku a go waka a Yesesi baka. A wan koni sani a du. A uman fi en be e holibaka gi en. Beibel e soi taki baka di Yesesi weki baka, a wan hii pisiten a uman fu Peitilisi be e go anga en a den peesi pe a be mu go fu du a wooko di Yesesi be gi en (1 Kor. 9:5). Fu di a uman fu Peitilisi be e tyai enseefi enke fa Yehofa taki wan Kelesten uman mu tyai enseefi, meke Peitilisi be poi poti taa toowpaa a pasi (1 Peit. 3:1-7). A fasi fa Peitilisi anga en uman du sani, be soi kiin taki den be e biibi taki Yehofa be o solugu den efu den be poti a Kownukondee a fesi.​—Leisi Mateyesi 6:25, 31-34.

15. San a toli fu Tiago anga Esther e leli u?

¹⁵ Efi i toow wan pisiten kaba, san o yeepi i fu wani du moo gi Yehofa? Wan sani di sa yeepi u, a te wi e poti pakisei a den wini di taa toowpaa e fende te den e du moo gi Yehofa. I sa leisi den artikel di den e kai ‘Den ben de klariklari fu go’. Den artikel ya e taki fu sama di e du moo gi Yehofa anga sowtu wini den e fende. A den toli ya be yeepi Tiago anga Esther, wan toowpaa fu Balasilikondee fu go yeepi a pe moo peleikiman de fanowdu. Tiago taki: ‘O moo u be e leisi ondoofenitoli fu baala anga sisa di Yehofa be yeepi, o moo useefi be wani si a ana fu Yehofa aini u libi.’ Baka wan pisiten en anga en uman foloisi go a Paragwai. Aini 2014 den bigin peleiki gi den sama di e taki Potogisitongo aini a kondee ya. Esther taki: ‘U lobi a tekisi fu Efeisesama 3:20. A omen leisi u si fa Yehofa du a sani di a paamisi wi aini a tekisi ya.’ Aini a biifi di Pawlesi be sikiifi gi den Efeisesama, a be taki Yehofa o gi u moo enke san wi akisi en. A dati wi e si tu te wi e wooko taanga gi en aini a ten ya.

16. Sama sa yeepi toowpaa di á toow langa ete fu si fa den sa du moo gi Yehofa?

¹⁶ Toowpaa di á toow langa ete sa waka a den toowpaa di abi ondoofeni baka. A omen toowpaa de di e du a fuuten diniwooko omen yali kaba. U sa taki anga den toowpaa ya fu luku fa u sa du moo gi Yehofa. Dati a wan fasi  fa yu e soi taki yu e fitoow Yehofa (Odo 22:17, 19). Den owluman seefi sa yeepi den toowpaa ya fu luku fa den sa du moo gi Yehofa.

17. San a toli fu Klaus anga Marisa e leli u?

¹⁷ Ma son leisi te i wani du moo gi Yehofa, a ná ala yuu sani e waka enke fa i wani. Luku a toli fu Klaus anga Marisa. Dii yali baka di den toow, den foloisi fika a osu fu den fu go yeepi anga a bow-wooko na a beikantoo fu Fensikondee. Ma a sigisi mun namo den be sa tan anda. A be hati den taki den á be poi du a wooko ya moo langa. Ma a á langa baka dati, neen den kisi wan kai fu go leli taki Alabilitongo. Nownow den e yeepi aini wan kondee pe sama e taki Alabilitongo. Marisa taki: ‘A ná wan makiliki sani fu gwe fika ala san i sabi fu go tan a wan taa peesi, ma a sani ya yeepi mi fu moo fitoow Yehofa, bika a omen leisi mi si fa a yeepi wi a wan fasi di wi á be denki seefi.’ A toli ya e soi taki na ala yuu Yehofa o belesi u te wi e meke moiti fu du moo gi en, anga te wi e fitoow en.

18. Fa toowpaa sa soi taki den e fitoow Yehofa?

¹⁸ A toowlibi a wan kado di Yehofa gi u (Mat. 19:5, 6). A wani ala sama abi wan bun toowlibi (Odo 5:18). Efi yu a wan toowpaa di á toow langa ete, u sa sidon luku a libi fu u baka. U sa akisi useefi taki: ‘Na ala san u poi wi e du nownow fu soi Yehofa taki wi e teke den sani di a du gi u fu bigi?’ Begi Yehofa da i taki anga en. Leisi en Wowtu Beibel da i luku fa i sa wooko anga den sani di i leli. Baka dati, meke moiti du san i leli. Efi yu e du sani na a fasi ya, da a ná abi misi, yu o abi wan bun toowlibi di e meke yu anga i toowpaa piisii.