1-2. Sowtu wini wi e fende te wi e soi bun-ati gi taawan?

SAIDE u mu e soi bun-ati gi taawan? Wantu tekisi aini a Beibel buku Odo e yeepi u fu fusutan saide a sani ya pelensipali. Wan fu den e taki: ‘Ala yuu i mu e soi bun-ati gi taawan, i mu e du san i paamisi. Da Gadu anga libisama o lobi i. Den o si yu enke wan sama di e du sani anga koni.’ Wan taawan e taki: ‘Wan man di e libi bun anga taawan e fende wini. A sama di e meke moiti fu du sani a wan letifasi, di e soi bun-ati gi taawan, o fende libi.’​—Odo 3:3, 4; 11:17; 21:21.

² Den tekisi ya e soi u saide a pelensipali fu soi bun-ati gi taawan. A fosiwan, te wi e soi bun-ati gi taawan da Gadu e piisii anga u. Du fu tu, useefi e fende wini te wi e soi bun-ati gi taawan. Wan fu den wini di wi e fende a mati di e kon de enke u famii. Du fu dii, te wi e soi bun-ati gi taawan wi o fende belesi aini a ten di e kon. Wan fu den belesi ya na a teego libi di Gadu paamisi u. Neen meke a bun fu e meke moiti fu ‘abi lobi anga tyali-ati gi taawan’.​—Sak. 7:9.

3. San wi o luku aini a artikel ya?

³ Wi o luku fo akisi aini a artikel ya. Sama u mu soi bun-ati gi? San a Beibel buku Rut e leli u fu a soi di u mu soi bun-ati? Fa u sa soi bun-ati aini a ten ya? Sowtu wini wi e fende te wi e soi bun-ati?

4. Fa u sa waka a Yehofa baka? (Malikisi 10:29, 30)

⁴ Enke fa u be luku aini a artikel di pasa, da a den sama di e dini Yehofa ai soi bun-ati gi (Dan. 9:4). Fu di  u de enke pikin di Gadu lobi ‘meke u mu e du sani enke fa u sabi taki Gadu seefi be o du sani’ (Efe. 5:1). Neen meke u mu e meke moiti fu soi bun-ati gi den baala anga sisa fu wi aini a kemeente.​—Leisi Malikisi 10:29, 30.

5-6. Gi wan toli di e soi fa libisama sa soi bun-ati gi taawan winsi den á sabi den.

⁵ Efu u wani soi bun-ati gi den baala anga sisa fu u, u mu fusutan fosi san a wani taki fu soi bun-ati gi taawan. Wi o poti pakisei a wan toli di o yeepi u fu fusutan a sani ya moo bun.

⁶ Wan leisi di a sipi di Pawlesi be de aini be sungu, en anga den taa sama di be de aini a sipi be suwen go a wan tabiki den e kai Malta. Den sama fu Malta á be sabi den, ma toku den yeepi den. Den gi den san den be abi fanowdu (Toli 28: 2, 7). Den sama fu Malta be soi bun-ati gi den, ma a ná fu di den be lobi den, bika den á be sabi den. Winsi a taa sama sipi be booko, toku den be o soi aseefi bun-ati gi den. Neen meke u sa taki a bun-ati di den sama ya be soi Pawlesi anga den taa sama di be de aini a sipi, na a bun-ati di libisama e soi denseefi.

7-8. (a) San e meke wan sama soi bun-ati gi taawan? (b) Saide wi o poti pakisei na a Beibel buku Rut?

⁷ A toli fu David anga Yonatan o yeepi u fu fusutan san a wani taki fu soi bun-ati gi wan sama di u lobi. Winsi fa Yonatan dda be e suku fu kii David, toku David be lobi Yonatan ete. Omen yali baka di Yonatan dede seefi, David tan soi bun-ati gi Mefibowset, a boi fu Yonatan. A di David be lobi Yonatan meke a be du a sani ya.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ A omen sani u sa leli fu a soi di u mu soi bun-ati te u luku a Beibel buku Rut. San u sa leli fu a fasi fa den sama di kai aini a buku ya tyai denseefi? Fa u sa soi bun-ati gi den baala anga sisa aini a kemeente leti enke den sama ya? *

9. Saide Naomi be e si enke a Yehofa be e meke ogii miti en?

⁹ Aini a Beibel buku Rut, wi e leisi a toli fu Naomi, en main Rut, anga Bowas. Bowas a be wan famii fu a man fu Naomi. A man ya be e du sani enke fa Gadu wani. A pisiten di angiiten be de a Islayeli, Naomi anga en man anga den tu boi fu den foloisi go tan a Moab. Na ape den be de di a man fu Naomi dede. Den tu boi fi en be toow anga tu uman fu Moab. Ma bakaten denseefi dede (Rut 1:3-5; 2:1). Den sani di miti Naomi be meke a kusumi te, neen a be e si enke a Yehofa e du ogii anga en. A be taki: ‘Yehofa daai baka gi mi.’ ‘A Moo Taanga Gadu meke a libi bita gi mi.’ A be taki tu: ‘A Yehofa seefi daai baka gi mi. Na a Moo Taanga Gadu seefi meke ala den sani ya miti mi.’​—Rut 1:13, 20, 21.

10. San Yehofa du baka di Naomi taki neen be e meke ogii e miti en?

¹⁰ San Yehofa du di Naomi taki den sani ya? Winsi fa Naomi be taki a Yehofa be e du ogii anga en, toku  Yehofa ati á boon neen. Yehofa e fusutan taki ‘te ogii e miti wan koni sama a sani ya sa meke a bigin du lawlaw sani’ (Peleik. 7:7). Naomi be abi taa sama fanowdu fu yeepi en fu si taki Yehofa á gwe fika en. Fa Gadu yeepi en? (1 Sam. 2:8) Yehofa opo Rut ati fu soi bun-ati gi Naomi. Fu di Rut be lobi Naomi, meke a yeepi en fu kisi enseefi baka. A fasi fa Rut libi anga Naomi be yeepi en fu fusutan taki Yehofa lobi en ete. San a toli fu Rut e leli u?

11. Saide baala anga sisa e meke moiti fu yeepi den wan di e kusumi efuso di lasi-ati?

¹¹ Te u lobi taawan tuutuu wi o wani yeepi den te u si taki den lasi-ati. Leti enke fa Rut á be gwe fika Naomi, a so omen baala anga sisa aini a ten ya e tan holibaka gi baala anga sisa di lasi-ati efuso di e kusumi. Fu di den lobi den baala anga sisa fu den meke den de kabakaba fu yeepi den (Odo 12:25; 24:10). Apostel Pawlesi be taki: ‘U mu taki a wan fasi di e toosutu den sama di booko-saka. Yeepi den sama di swaki. U mu pasensi anga ala sama.’​—1 Tes. 5:14.

12. San a wan fu den moo bun fasi fa u sa yeepi wan baala efuso sisa di lasi-ati?

¹² A moo bun fasi fa u sa yeepi wan sama di lasi-ati, a te wi e aliki en anga pasensi. U mu e soi en tu taki u lobi en. Yehofa e teke en fu bigi te yu e du ala san i poi fu yeepi den sama di e dini en (Ps. 41:1). Odo 19:17 e taki: ‘A sama di e du bun gi den pootiman e leni Yehofa sani. A o pai a sama de fu den bun di a du.’

13. Fa Rut be du sani taa fasi enke Orpa? Fa a fasi fa Rut du sani e soi taki a be lobi Naomi tuutuu? (Luku a fowtow a fesise fu A Wakititolen.)

¹³ Te u luku san pasa anga Naomi baka di en man anga den tu boi fi en dede, da wi o moo fusutan bun san a wani taki fu soi bun-ati gi den sama di u lobi. Di Naomi yee taki ‘Yehofa be poti pakisei na a foluku fi en’, a be seeka sani fu daai go a osu baka (Rut 1:6). Na ala den tu main fi en be teke pasi go anga en. Ma di den de a pasi, a dii leisi Naomi taigi den fu daai go a osu baka. San pasa baka dati? Beibel e taki: ‘Orpa bosi en main neen a daai go a osu baka. Ma Rut fika anga Naomi’ (Rut 1:7-14). A ná wan ogii Orpa du di a daai go a osu baka, bika a san Naomi be taigi en a du. Ma Rut du moo enke dati seefi. Enseefi be sa daai go a osu baka, ma fu di a be lobi Naomi meke a be wani yeepi en di a si taki a fuka (Rut 1:16, 17). A ná sama be musu Rut fu  fika anga Naomi, neenseefi be wani du a sani ya. A tuutuu bun-ati Rut soi Naomi fu di a be lobi en. San a toli ya e leli u?

14. (a) San omen baala anga sisa aini a ten ya e du? (b) Enke fa Hebrewsama 13:16 e soi, da san u mu du efu u wani Yehofa piisii anga u?

¹⁴ Te wi e soi bun-ati gi den sama di u lobi, da na ala san u poi wi e du fu yeepi den. A omen baala anga sisa aini a ten ya, anga den ten di pasa soi taki den lobi den baala anga sisa fu den, winsi a baala anga sisa di den á miti noiti. Te den yee taki wan gaan ogii pasa a wan peesi, a gawgaw den e suku fasi fu yeepi den baala anga sisa fu den. Te wan baala efuso sisa aini a kemeente fuka, den e luku fa den sa yeepi en anga den sani di a abi fanowdu. Leti enke den Kelesten fu Masedoniya, son leisi ‘den e du moo enke san den be man’ seefi fu yeepi den baala anga sisa fu den (2 Kor. 8:3). Ná pikin poolo Yehofa e poolo te a si fa wi e soi bun-ati gi taawan.​—Leisi Hebrewsama 13:16.

15-16. Fa Rut soi taki a be wani yeepi Naomi tuutuu?

¹⁵ A omen sani a toli fu Rut anga Naomi e leli u. Meke u poti pakisei a wantu fu den sani ya.

¹⁶ Tan meke moiti fu yeepi a sama. Den fosi leisi di Rut akisi Naomi fu go anga en a Yuda, Naomi á be wani. Ma Rut á gi abaa. San a be a bakapisi? Beibel e taki: ‘Di Naomi si taki Rut be de namonamo fu go anga en, a á tapu en moo.’​—Rut 1:15-18.

17. San o yeepi u fu tan meke moiti fu yeepi u baala anga sisa?

¹⁷ San a toli ya e leli u? Ai leli u taki u mu abi pasensi te u wani yeepi wan sama di abi toosutu fanowdu. Kande biginbigin wan sisa di booko-saka ná o wani i yeepi en. * Ma efi i lobi en tuutuu, yu o du ala san i poi fu holibaka gi en (Gal. 6:2). Kande bakaten a sa teke a yeepi di i wani gi en. Efi yu e meke moiti fu de wan bun mati gi en, a sani de sa yeepi en fu kisi enseefi baka.

18. San Naomi du di be musu hati Rut?

¹⁸ Yu á mu e mandii a sama. Di Naomi anga Rut doo Betelehem, Naomi miti wantu sama di a be sabi. A taigi den taki: ‘Di mi be e gwe mi be abi ala sani, ma Yehofa meke mi daai kon baka anga soso ana’ (Rut 1:21). Fa i denki Rut be e fii di a yee Naomi taki a sani ya? Rut be du ala san a be poi fu yeepi Naomi. A kee anga Naomi, a be toosutu en, a waka omen dei langa anga Naomi fu doo neen osu baka. Tokuso di den doo neen Naomi taki: ‘Yehofa meke mi daai kon a osu baka anga soso ana.’ Den sani di Naomi taki ya be e soi taki a á be e si a yeepi di Rut e yeepi en fu wan sani seefi, winsi fa Rut be taampu leti neen se. A sani ya be musu hati Rut, ma toku a á gwe fika Naomi.

19. San o yeepi u fu tan yeepi wan sama di lasi-ati?

¹⁹ San a toli ya e leli u? Kande wan sisa di lasi-ati sa taki sani di e hati i, winsi fa yu e meke moiti fu yeepi en. Ma gaantangi, ná luku a den sani di ai  taki. Meke moiti fu yeepi i sisa. Akisi Yehofa fu a soi i fa i sa toosutu en.​—Odo 17:17.

20. San be yeepi Rut fu tan du san a be mu du?

²⁰ Poti pakisei a den sama di abi taanga-sikin fanowdu. Rut be soi bun-ati gi Naomi, ma now Rut seefi be abi toosutu fanowdu. Yehofa meke Bowas gi en taanga-sikin. Bowas taigi Rut taki: ‘Yehofa mu pai i fu den sani di i du. Meke Yehofa, a Gadu fu Islayeli di i kon suku kibii, belesi i.’ Di Bowas taki den sani ya, neen Rut piki taki: ‘Mi masaa, ná pikin bun i du mi. I taki switi anga mi te ye’ (Rut 2:12, 13). Den sani di Bowas taigi Rut be gi en a taanga-sikin di a be abi fanowdu fu go doo.

21. Enke fa Yesaya 32:1, 2 e soi, da san owluman mu du?

²¹ San a toli ya e leli u? Den sama di lobi yeepi taawan seefi e abi toosutu fanowdu. Leti enke fa Bowas be soi Rut taki sama be e poti pakisei a den bun di a be e du, a letiso owluman aini a ten ya sa soi den baala anga sisa di e meke moiti fu yeepi taawan taki den e teke den sani di den e du fu bigi. A sani ya o gi den a taanga-sikin di den abi fanowdu fu tan du den bun wooko fu den.​—Leisi Yesaya 32:1, 2.

22-23. San be yeepi Naomi fu kisi enseefi baka? (Psalm 136:23, 26)

²² Baka wan pisiten Bowas gi Rut anga Naomi tyaipi nyanyan (Rut 2:14-18). San Naomi du di Bowas du a sani ya? A taigi Rut taki: ‘Meke Yehofa di e tan soi bun-ati gi den libiwan anga den dedewan, belesi en’ (Rut 2:20a). Naomi be kengi a hii fasi fa a be e denki.  Fosi a be taki a ‘Yehofa e du ogii anga en’, ma now a taki ‘na ala yuu Yehofa e soi bun-ati gi sama’. San yeepi Naomi fu kengi a fasi fa a be e denki?

²³ Baka wan pisiten Naomi be kon fusutan taki noiti Yehofa be gwe fika en. Yehofa be meke Rut holibaka gi Naomi di a be mu waka a langa pasi komoto a Moab go a Yuda baka (Rut 1:16). Naomi si tu fa Yehofa yeepi en di a meke Bowas, wan fu den ‘sama di be sa bai den baka’, gi en anga Rut sani fu nyan * (Rut 2:19, 20b). Kande now Naomi be e denki aini enseefi taki: ‘A now mi e si taki Yehofa á gwe fika mi noiti. Ala yuu a be e holibaka gi mi.’ (Leisi Psalm 136:23, 26.) A be musu e bigi gi Naomi taki Rut anga Bowas be tan meke moiti fu yeepi en. Rut anga Bowas seefi be musu poolo taki Naomi be e dini Yehofa anga piisii baka.

24. Saide u mu tan meke moiti fu soi bun-ati gi u baala anga sisa?

²⁴ San a toli fu Rut leli u? A soi u taki te u lobi taawan tuutuu, na ala yuu wi o soi bun-ati gi den. Winsi biginbigin den á wani u yeepi den, toku wi o tan meke moiti fu du san u poi gi den. A leli u tu taki u mu e du ala san u poi fu yeepi taawan, winsi a ná ala yuu den o go e teke den sani di wi e du gi den fu bigi. U si tu taki owluman mu e gi sama di e yeepi taawan taanga-sikin fu den sa tan du a bun wooko fu den. Te u si fa wan sama di be lasi-ati e dini Yehofa anga piisii baka, da a sani de e meke wi e fii bun (Toli 20:35). Ma a moo pelensipali sani di e meke wi e soi bun-ati gi taawan, a di u wani waka a u Dda Yehofa baka, bika neen na ‘a Gadu di e soi bun-ati ala yuu’.​—Ek. 34:6: Ps. 33:22.