Fosi mi go doo anga a toli, meke mi taigi fa mi du bigin anga a fuuten diniwooko.

Mi meke a Curaçao aini a yali 1942. A Saanan nda be e tan, ma a foloisi go tan a Curaçao fu wooko anda. Wantu yali fosi mi meke, a nda a be wan fu den fosi sama di be dopu a Curaçao enke wan Yehofa Kotoigi. a Na ala wiki a be e sutudeli Beibel anga u, winsi fa son yuu wa be e wani sutudeli. Di mi be abi 14 yali, u foloisi go tan a Saanan baka, bika nda be mu go solugu mi gaanmma di be kon gaandi.

Di u foloisi go a Saanan, mi bigin paa anga wantu yonkuuwan di be e dini Yehofa fayafaya. Den be bigi moo mi. Den be e pionili tu. Te den be e gi ondoofenitoli fu a peleikiwooko, mi be e si fa den e piisii. Baka komakandaa, mi anga den mati fu mi be lobi taki sani fu Beibel. Son leisi u be e sidon e luku den sitali da u be e gi Beibel toli. Den mati ya yeepi mi fu si san mi be wani du anga mi libi. Mi be wani wooko gi Yehofa. Neen meke di mi be abi 16 yali, mi dopu. Baka dati, mi bigin anga a pioniliwooko di mi be abi 18 yali.

A omen sani mi leli di mi be e pionili. Den sani ya yeepi mi fu du a fuuten diniwooko bakaten. Wan fu den pelensipali sani di mi leli, a taki a pelensipali fu leli taawan fa fu tyai faantiwowtu. Di mi bigin anga a pioniliwooko, ná pikin sani wan zendeling den e kai Willem van Seijl leli mi. b A leli mi fa fu du den wooko fu mi aini a kemeente. A ten de mia be sabi taki mi be o abi a sani ya taanga fanowdu. Wan yali baka dati, mi  toon wan spesuutu pionili. Mi be abi a gaandi fu go yeepi a den kulu di be de a den busikondee peesi fu Saanan. Ná pikin poolo mi poolo taki den baala enke Willem be leli mi omen sani fosi mi go anda. Mi be wani waka a den baka, neen meke fanafu a ten de mi bigin meke moiti fu leli taawan san den mu du fu man tyai faantiwowtu.

Du fu tu sani di mi leli a fu tifeedi anga den sani di mi abi. Mi leli tu taki mia mu e du sani fanyafanya. Ala bigin fu a mun, mi anga a baala di be e pionili makandaa be e sikiifi den sani di u be o abi fanowdu den wiki di e kon. Baka dati wan fu u be e go a foto fu bai den sani di u be abi fanowdu. Ma u be mu wooko anga den sani fu u anga koni fu den á be kaba fosi a mun tapu. Bika efu den sani fu u be kaba, sama á be o de fu yeepi u. Fu di mi be leli yonkuuyonkuu taki mi mu tifeedi anga den sani di mi abi, anga taki mia mu du sani fanyafanya, meke mi be poi tan poti pakisei na a wooko di mi e wooko gi Yehofa.

Du fu dii sani di mi leli a taki a moo bun te ye leli den sama aini den mamabee tongo. Di mi be e goo e kon, mi be e taki Bakaatongo, Ingiisitongo, Papiyamento, anga Saanantongo, wan fu den tongo di den e moo taki a Saanan. Ma den sama a busikondee be e moo aliki a bun nyunsu te u be e peleiki gi den aini den mamabee tongo. Ma a be e taanga gi mi fu taki sowan fu den tongo ya, moomoo a Saamakatongo. Ma winsi fa a be taanga, toku mi be poi yeepi moo sama fu yee a bun nyunsu, bika mi be e meke moiti fu taki a tongo fu den.

Son yuu sani be e miti mi tu. Wan leisi mi be wani akisi wan uman di mi be e sutudeli anga en fa ai go anga en aini Saamakatongo, bika a be e siki neen bee. Ma pe fu mi akisi en a sani de, a akisi mi akisi en efu anga bee a de. Sen be kisi en di mi akisi en a sani ya. Ma winsi fa mi be e meke den fowtu ya, toku ala yuu mi be e meke moiti fu taki anga den sama aini den mamabee tongo.

Aini 1970, mi toon kelen owluman. Aini a yali de mi be go luku den kulu a busikondee, fu soi den wan felon fu a edekantoo. Fu be man doo a den baala anga sisa ya, mi anga wantu baala be mu lei anga wan langa udu boto. A omen sani u be e tyai te u be e go luku den. U be e tyai sani enke masini fu daai faya, wan bali oli, alantei, anga den sani di u be abi fanowdu fu daai a felon. Te u be doo wan kulu, u be e sow ala den lai fu u go a pe u be o daai a felon. Wan sani di mi nai feegete, na a fasi fa den sama be lobi den felon di u be e daai gi den. A wooko á be makiliki, ma ná pikin piisii mi be e piisii taki mi be sa yeepi taawan fu kon sabi Yehofa anga a olikanisâsi fi en. Ná pikin belesi mi fende di mi du a sani ya.

Winsi fa mi be e si taki a be moo makiliki tei wawan e du a fuuten diniwooko, toku mi be wani toow. Neen meke mi be bigin begi Yehofa fu mi be sa fende wan uman di be o piisii fu du a fuuten diniwooko anga mi a busikondee, winsi fa aa be makiliki. Wan sani fu wan yali baka dati mi be kon abi mofu anga wan spesuutu pionili sisa den e kai Ethel. A sisa ya be de kabakaba fu wooko taanga gi Yehofa winsi aa be makiliki. Di Ethel be yonkuu a be lobi a fasi fa apostel Pawlesi be e wooko taanga gi Yehofa, neen meke a be wani du a peleikiwooko enke en. U toow aini september 1971, neen u bigin du a kelen wooko makandaa

Den sama fu Ethel á be gudu, neen meke aa kiya anga tyaipi sani. A sani ya be meke a makiliki gi en fu du a fuuten diniwooko a busikondee. Te u be e go a den kemeente di de a faawe, wa be e tyai tyaipi sani. U be e wasi u koosi anga ana. A liba u be e wasi tu. Boiti dati, a san den baala anga sisa gi u, u be e nyan. U be e nyan sani enke gwana, pilen, anga taa sani di den be kii te den be go a onti efuso te den be go towe seepi. Te beenki á be de, da aini baana uwii u be e nyan. Te wi á be abi supun, u be e nyan anga ana. Mi anga Ethel kon si taki a wooko di u be e wooko gi Yehofa, yeepi u fu kon de enke dii tetei di beei kon a wan (Peleik. 4:12). Den sani di wi ondoofeni aini a fuuten diniwooko, pelensipali gi u moo ala taa sani.

A den baala anga sisa a busikondee u be go luku, di den sani di mi taki na a bigin fu a toli ya pasa. Di u go aini a sula neen a boto-ede go a ondoo wataa, ma a kon gawgaw a tapu baka. Koloku u be wei u zwemvest. Koloku wa be kai komoto aini a  boto tu. Ma wataa be lai aini a boto. Neen meke u towe den nyanyan di be de aini den patu fu u, neen u bigin puu wataa aini a boto anga den.

Wa be abi nawan sani fu nyan moo, neen meke u bigin uku. Ma wa be e kisi nawan sani. Neen meke u begi Yehofa fu a be sa yeepi u fu fende wan sani fu nyan a dei de. Faisi u kaba begi, wan fu den baala iti wan uku neen a kisi wan gaan fisi. A fisi ya be sai ala den feifi sama di be de ape.

Baka feifi yali di mi anga Ethel du a kelen wooko, u fende wan belesi di wa be denki. U be o toon mma anga dda. Mi be poolo di mi yee a sani ya. Ma mi be e booko mi ede tu, bika mia be sabi faw libi be o waka. Mi anga Ethel be wani du a fuuten diniwooko ete. Aini 1976 u meke a fosi boi fu u di den e kai Ethniël. Baka tu yali anga afu neen u meke wan taa boi di den e kai Giovanni.

Fu di Saanan be abi yeepi fanowdu a ten de, meke a beikantoo be taki mi be sa tan du a kelen wooko ete. Na aseefi ten de u be e kiya den pikin fu u. Di den boi fu u be yonkuu, mia be abi tyaipi kemeente fu go moo. A so mi be e fende a okasi fu du a kelen wooko wantu wiki aini a mun, da den taa wiki u be e du a pioniliwooko na a kemeente di den baala be sende u go. Te mi be e go a den kemeente di be de koosube a pe u be e tan, mi be e tyai Ethel anga den boi. Ma te mi be e go a den kemeente di de a busikondee anga den gaan komakandaa di be e holi anda, a mi wawan be e go.

Mi be seeka sani a sowan fasi taki mi be poi tyai den faantiwowtu fu mi bun. Te mi be go a den kemeente a busikondee, Ethel be e holi a osufamii anbegi anga den boi. Ma u be e meke moiti fu du taa sani makandaa enke osufamii tu. U be lobi pee anga den boi fu u. U be e tyai den go koi tu. Son yuu mi be e de anga ain fu te gaan neti fu seeka gi den lezing, anga den taa sani di mi be mu du enke kelen owluman. Ethel de enke a uman di kai a Odo 31:15. A be e opo fuuku fu seeka sani fu u be sa nyan makandaa, anga fu u be luku a deiwowtu makandaa enke osufamii fosi den boi go a sikoo. Ai bigi gi mi te ye taki mi abi wan uman di e holibaka  gi mi ala yuu. Na a sani ya meke mi be poi tyai ala den faantiwowtu fu mi.

U be e du ala san u poi fu yeepi den pikin fu u fu lobi Yehofa anga a peleikiwooko. U be wani den boi fu u du a fuuten diniwooko tu. Ma wa be wani den du en fu di we sende den, a denseefi be mu luku san den wani du anga den libi. Ala yuu u be e taigi den taki a fuuten diniwooko o yeepi den fu piisii aini a libi. U be lobi taigi den tu fa Yehofa be e belesi a osufamii fu u, winsi a ná a ala yuu a wooko ya be e makiliki gi u. Boiti dati, u be e meke den boi fu u paa anga sama di be e poti Yehofa a fesi aini den libi.

Na ala yuu Yehofa be e solugu u, ma mi be e du ala san mi poi tu fu solugu mi osufamii. Di mi be e du a spesuutu pioniliwooko mi wawan a busikondee, mi be leli taki a bun fu poti moni a wan se fu bai den sani di yo abi fanowdu. Winsi faw be e meke a moiti ya, toku a ná ala yuu u be e abi den sani di u be abi fanowdu. Ma mi be e si taki Yehofa be e yeepi u. A so a yeepi u na a ten fu a feti di be feti aini Saanan fanafu 1986 te anga 1992. A pisiten de a be taanga fu fende den moo pelensipali sani di u be abi fanowdu. Ma Yehofa be e solugu u.—Mat. 6:32.

Na ala yuu Yehofa be e solugu u, ai solugu u ete. A yeepi u fu piisii aini a libi. A yeepi u fu tifeedi anga den sani di wi abi tu. Den pikin fuu e meke u piisii. Ai bigi gi u taki u be poi yeepi den fu dini Yehofa. Ná pikin piisii we piisii taki den e du a fuuten diniwooko tu. Ethniël anga Giovanni be fende a gaandi fu go a wantu sikoo fu a olikanisâsi. Nownow den anga den uman fu den e wooko na a Betel fu Saanan.

Mi anga Ethel kon moo gaandi nownow. Ma wa tapu fu wooko gi Yehofa, bika we du a spesuutu pioniliwooko ete. Wi abi tyaipi sani fu du, neen meke te anga now mia leli suwen ete. Ma te mi luku fa mi libi waka, a nai hati mi taki mi wooko gi Yehofa. Mi kon si taki a bigin di mi bigin du a fuuten wooko yonkuuyonkuu, na a moo bun sani di mi be sa du anga mi libi.