1. On ten u sa taki wan sama nai ‘lasi enseefi’? (2 Timotiyesi 4:5)

 TE WAN hati sani miti u, a sa taanga gi u fu tan a Yehofa se. Ma san u mu du? Wa mu lasi useefi, ma u mu de na ain. U mu ‘meke moiti fu taanga u biibi’. (Leisi 2 Timotiyesi 4:5.) Wan sama di nai lasi enseefi nai buuya te tesi e miti en. A poi denki kiin, ai du sani tu enke fa Yehofa wani winsi san e miti en. Sowan sama nai wooko anga den fii fi en te ai du sani.

2. San wo luku aini a artikel ya?

² Aini a artikel di pasa, u be taki fu dii sani di sama di nai dini Yehofa e du di e meke a taanga gi u fu tan dini Yehofa. Aini a artikel ya, wo taki fu dii sani di e pasa aini a kemeente di sa meke a taanga gi u fu tan a Yehofa se. Dati a (1) te wan baala efuso sisa du wan hati sani anga u, (2) te Yehofa puu kaasi gi u, efuso (3) te ai taanga gi u fu wooko anga den sani di kengi aini a olikanisâsi. Faw sa soi taki u nai lasi useefi te den sani ya e pasa? Faw sa soi taki we tan a Yehofa se?

3. San sa pasa efu wan baala efuso wan sisa du wan sani di hati u?

³ Wan baala efuso wan sisa du wan hati sani anga i kaba? Kande a sama di du a sani anga i a wan sama di abi  faantiwowtu. Kande a ná fu seefi a du en (Rom. 3:23; Yak. 3:2). Ma winsi fa, toku a sani hati i. Kande i nai poi siibi te ye pakisei a toli. Kande ye akisi iseefi taki: ‘A olikanisâsi ya a Gadu e tii en tuutuu? Bika wan baala á poi du a sani de.’ A so Saatan wani u denki (2 Kor. 2:11). Bika a sabi taki a sani ya sa meke u gwe fika Yehofa anga a olikanisâsi fi en. Ma san u mu du fu wa lasi useefi fu denki enke fa Saatan wani te wan baala efuso sisa du wan sani di hati u?

4. Fa Yowsefu soi taki aa lasi enseefi di sama libi ogii anga en? San a toli ya e leli u? (Genesesi 50:19-21)

⁴ Ya mu holi sama na ati. Di Yowsefu be yonkuu, den baala fi en be libi ogii anga en. Den be e buuse en. Son wan fu den be wani kii en tu (Gen. 37:4, 18-22). Bakaten den seli enke saafu gi taa sama. A sani ya meke wantu gaan tesi miti Yowsefu wan sani fu 13 yali langa. Yowsefu be sa denki taki Yehofa á lobi en moo. A be sa si enke Yehofa gwe fika en di a be abi en fanowdu. Ma Yowsefu á be holi nawan sama na ati. Aa be lasi enseefi. Di a be fende a okasi fu pai den baala fi en fu a ogii di den be du anga en, aa du a sani de. A soi den taki a lobi a den. A be gi den paadon tu (Gen. 45:4, 5). A fu di Yowsefu be e denki bun, meke a be poi du a sani ya. Aa be e pakisei den sani di be e miti en namo, ma a be e pakisei san Yehofa wani tu. (Leisi Genesesi 50:19-21.) San a toli ya e leli u? Efu wan sama libi ogii anga i, yu ati á mu boon a Yehofa. Ya mu si enke a gwe fika i tu. Ma i mu teke ten pakisei fa ai yeepi i fu holidoo. Boiti dati, te wan sama libi ogii anga i, ná poti pakisei a den fowtu fu a sama namo, ma puubei fu soi en taki i lobi en.—1 Peit. 4:8.

5. Fa Miqueas soi taki aa lasi enseefi di wantu baala libi ogii anga en?

⁵ Luku a toli fu wan baala di e tan a Zuid-Ameekan den e kai Miqueas. b A baala ya taki wantu baala di be abi faantiwowtu be libi ogii anga en. A taki: ‘A fosi toon aini mi libi mi be booko mi ede so. Mi be e feele. Mia be e poi siibi a neti. Mi be e kee tu, bika mi be e fii enke mia poi du nawan sani.’ Ma Miqueas á lasi enseefi. A be e meke moiti fu dwengi den fii fi en tu. Na ala yuu a be e begi Yehofa en santa yeye fu yeepi en fu a holidoo. Boiti dati, a be e suku sani aini den buku fu u di be sa yeepi en. San a toli ya e leli u? Efu wan baala efuso wan sisa du wan hati sani anga i, ya mu buuya. Ma i mu meke moiti fu dwengi den fii fii. Kande ya sabi saide a sama taki efuso du sani na a fasi de. Neen meke i mu akisi Yehofa fu a yeepi i fu si sani enke fa ai si sani. A sani ya o yeepi i fu holi a pakisei taki kande a ná fu seefi a sama du a sani de anga i. Aw yeepi i fu gi en paadon tu (Odo 19:11). Holi a pakisei taki Yehofa e si sai miti i. Aw gii kaakiti fu holidoo.—2 Kolon. 16:9; Peleik. 5:8.

6. Saide a pelensipali fu holi a pakisei taki Yehofa e puu kaasi gi den sama di a lobi? (Hebrewsama 12:5, 6, 11)

⁶ Te Yehofa e puu kaasi gi u, a sani ya sa meke u fii booko-saka. Ma efu we poti pakisei na a fasi fa we fii namo, u sa  bigin si enke a sosokaali Yehofa sitaafu u. U sa si enke a sitaafu di a gi u hebi tumisi tu. A sani ya sa meke u feegete wan pelensipali sani. U sa feegete taki a den sama di Yehofa lobi ai sitaafu. (Leisi Hebrewsama 12:5, 6, 11.) Boiti dati, efu u nai dwengi den fii ya, we gi Saatan a okasi fu tesi u. Aa wani wi aliki Yehofa te ai puu kaasi gi u. Ma san moo ogii, a taki a wani u gwe fika Yehofa anga a olikanisâsi fi en. Faw sa soi taki u nai lasi useefi te Yehofa puu kaasi gi u?

7. (a) Enke fa a fowtow e soi, da san Yehofa du di Peitilisi aliki Yesesi di a puu kaasi gi en? (b) San a toli fu Peitilisi e leli u?

⁷ Teke a sitaafu di Yehofa gii, da i meke moiti fu kengi. A omen leisi Yesesi puu kaasi gi Peitilisi a den taa apostel fesi (Malik. 8:33; Luk. 22:31-34). Sen be musu kisi Peitilisi. Ma toku noiti á gwe fika Yesesi. A aliki di Yesesi puu kaasi gi en, neen a du sani taa fasi. Yehofa be teke en fu bigi taki Peitilisi á gwe fika en. Neen meke a be gi en moo faantiwowtu (Yoh. 21:15-17; Toli 10:24-33; 1 Peit. 1:1). San a toli fu Peitilisi e leli u? Te u nai poti pakisei na a fasi fa we fii namo te Yehofa puu kaasi gi u, we fende wini fu a sani ya. We fende wini tu te wi aliki anga te we du sani taa fasi te Yehofa puu kaasi gi u. Te we du a sani ya, Yehofa o poi gi u moo faantiwowtu.

8-9. Fa Bernardo fii di Yehofa puu kaasi gi en? San yeepi en fu kengi a fasi fa a be e denki?

⁸ Luku a toli fu wan baala di e tan a Mosambik den e kai Bernardo. A baala ya be lasi en gaandi enke owluman. Fa a be e fii di a sani ya pasa? A taki: ‘Mi ati be e boon. Mia be lobi a fasi fa Yehofa be puu kaasi gi mi.’ Bernardo be e booko en ede anga fa taawan aini a kemeente be o go e si en. A taki: ‘A baka omen mun fosi mi be kon si taki a wan bun sani di Yehofa puu kaasi gi mi. Mi be bigin fitoow Yehofa anga a olikanisâsi fi en baka.’ San be yeepi Bernardo fu si sani taa fasi?

⁹ Bernardo kengi a fasi fa a be e denki. A taki: ‘Di mi be de wan owluman, mi be lobi leisi Hebrewsama 12:7 gi sama te Yehofa  be puu kaasi gi den. Mi be e du a sani ya fu yeepi den fu si sani enke Yehofa. Ma now mi be e akisi miseefi taki: “Sama mu wooko anga a tekisi ya?” Na ala sama di e dini Yehofa mu wooko anga a tekisi ya. Dati wani taki miseefi tu.’ Bakaten Bernardo du wantu sani di yeepi en fu bigin fitoow Yehofa anga a olikanisâsi fi en baka. A be e moo leisi Beibel. A be e moo teke ten fu pakisei den sani di a be e leisi tu. Winsi fa a be e booko ede anga fa den baala anga sisa be e si en, tokuso a be e wooko makandaa anga den aini a peleikiwooko. Boiti dati, a be e gi piki te a be go a komakandaa. Baka wan pisiten Bernardo toon wan owluman baka. Efu Yehofa puu kaasi gii leti enke Bernardo, ná poti pakisei na a fasi ye fii namo. Ma teke a sitaafu di Yehofa gii, da i meke moiti fu kengi (Odo 8:33; 22:4). c Efi ye du sani na a fasi ya, i sa biibi taki Yehofa o belesi i fu di ya gwe fika en.

10. San be sa meke a taanga gi son Islayeliman fu tan a Yehofa se?

¹⁰ Son yuu te sani kengi aini a olikanisâsi, ai taanga gi u fu tan dini Yehofa. Efu wa luku bun, a sani ya sa meke u gwe fika en. Pakisei a toli fu den Islayelisama. Sani be kengi gi den di Yehofa be gi den a Weiti fu Mosesi. Fosi den be abi a weiti ya, a den osufamii edeman be de enke pilisite gi den osufamii. A den be e meke altari gi den. A den be e tyai ofaandi gi den tu (Gen. 8:20, 21; 12:7; 26:25; 35:1, 6, 7; Yopu 1:5). Ma a nyun weiti di Yehofa be gi den be e soi taki a den pilisite be o du ala den sani ya. A den bakapikin fu Aron Yehofa be teke fu du a pilisite wooko. Efu wan osufamii edeman a ná be wan bakapikin fu Aron, neen a be go tyai ofaandi, a be sa kisi dede sitaafu (Lef. 17:3-6, 8, 9). d Kande na a sani ya meke Korak, Datan, Abiram, anga den taa 250 edeman á be wani saka denseefi a Mosesi anga Aron ondoo (Num. 16:1-3). Beibel nai taki finifini fu a toli ya. Ma toku u sabi taki Korak anga den sama di be e holibaka gi en á tan a Yehofa se. Sai sa du efu ai taanga gii fu wooko anga den sani di kengi aini a olikanisâsi?

11. San a toli fu den Keihatsama e leli u?

¹¹ Meke moiti fu wooko anga den sani di kengi aini a olikanisâsi. Di den Islayelisama be de aini a sabana, den bakapikin fu Keihat be abi wan spesuutu gaandi. Ala yuu te den Islayelisama be e foloisi, a den be e waka anga a ark fu a kuudei na a foluku fesi (Num. 3:29, 31; 10:33; Yow. 3:2-4). A sani ya a be wan gaandi. Ma sani kengi di den Islayelisama doo aini a Paamisi Kondee. Aa be de fu den e tyai a ark moo. Neen meke a ten di Salomo be e tii enke kownu, a be gi den Keihatsama taa wooko. A be poti son wan fu wooko enke singiman na a tempel. Son wan fu den a be wakitiman,  taawan be e luku den magisin (1 Kolon. 6:31-33; 26:1, 24). Den Keihatsama be abi wan moo gaan faantiwowtu fosi, ma Beibel nai taki den be e kuutu di Salomo gi den taa wooko. San a sani ya e leli u? Te wan sani kengi aini a olikanisâsi fu Yehofa, meke moiti fu wooko anga a kengi ya, winsi a faantiwowtu fi yo kengi. I mu e piisii anga iniiwan faantiwowtu di i fende. Holi a pakisei taki a ná den faantiwowtu di yu abi pelensipali gi Yehofa. Ma a moo pelensipali sani gi en, na a aliki di i mu aliki en.—1 Sam. 15:22.

12. Fa Zaina be e fii di den baala gi en wan taa faantiwowtu?

¹² Luku a toli fu wan sisa di e tan a Midden-Oosten den e kai Zaina. Baka wan sani fu 23 yali langa, den be puu a sisa ya a Betel neen den gi en wan taa faantiwowtu. A taki: ‘Mi be dyombo di a sani ya pasa. Mi be e fii enke mia bun sai. Neen meke mi be e akisi miseefi taki: “San mi du?”’ Ma san be e moo hati en, a taki son baala anga sisa aini a kemeente be e taigi en taki: ‘Efii be e du i wooko bun, den baala á be o puu yu a Betel.’ A sani ya be e du Zaina ogii te, da a be e kee a neti. Ma a taki: ‘Noiti mia be e si enke Yehofa efuso den baala á lobi mi.’ San yeepi Zaina fa a lasi enseefi?

13. San yeepi Zaina fa a be e fii booko-saka moo?

¹³ Baka wan pisiten Zaina á be e fii booko-saka moo. San yeepi en? A be e leisi artikel di be e taki fu a polobelema fi en. A artikel di den e kai ‘Yu Kan Kakafutu te wan Sani E Meki Yu Lasi-ati!’ di de aini a Saanantongo Wakititolen fu 1 februari 2001, be yeepi en tuutuu. A artikel ya e taki fu a toli fu Malikisi. Kande enseefi be e fii booko-saka di a be fende wan taa faantiwowtu. Zaina taki: ‘A toli fu Malikisi a be a deesi di be yeepi mi fu mia fii booko-saka moo.’ Zaina á be e de en wawan ala yuu, ma a be e meke moiti fu de anga den mati fi en. Aa be e sidon e kusumi tu. A be kon si taki na a santa yeye fu Yehofa e soi den baala di e teke fesi fa den mu du sani. A be kon si tu taki den baala ya lobi en. Boiti dati, a be kon fusutan taki  a moo pelensipali sani, a taki na a wooko fu Yehofa mu go a fesi.

14. San yeepi Vlado di sani be kengi aini a kemeente fi en?

¹⁴ Vlado a wan owluman di abi 73 yali. A baala ya e tan aini Slofeinia. Di den mokisa a kemeente pe a be de anga wan taa kemeente, den be tapu a Kownukondee zaal pe den be e go a komakandaa. Vlado taki: ‘Mia be sabi fu saide den be tapu so wan moin Kownukondee zaal. A sani ya be hati mi, bika aa langa fu di u be seeka a Kownukondee zaal ya. Mia wan tembeeman. A mi be meke omen fu den bangi anga taa sani aini a Kownukondee zaal. Boiti dati, son sani be kengi di den mokisa den tu kemeente. A sani ya á be makiliki gi den gaandi baala anga sisa.’ San yeepi Vlado fu wooko anga den sani di kengi? A taki: ‘Te ye holibaka gi a olikanisâsi winsi sani kengi, Yehofa e belesi i. Den pikinpikin kengi ya, e seeka i tu gi moo gaan kengi aini a ten di e kon.’ Ai taanga gii fu di sani kengi aini a kemeente fii, efuso fu di i fende taa faantiwowtu? I sa biibi taki Yehofa e fusutan fa ye fii. Yehofa o belesi i efi ye tan holibaka gi a olikanisâsi winsi sani kengi.—Ps. 18:25.

15. San o yeepi u fu wa lasi useefi te tesi e miti u aini a kemeente?

¹⁵ O moo a kaba e koosube, o moo sani o pasa aini a kemeente di sa meke a taanga gi u fu tan a Yehofa se. Neen meke wa mu lasi useefi. Efi ye si enke wan baala efuso wan sisa du wan hati sani anga i, ya mu holi en na ati. Te Yehofa puu kaasi gii, ná poti pakisei a fa ye fii namo, ma teke a sitaafu di a gii, da i meke moiti fu kengi. Boiti dati, efu sani kengi aini a olikanisâsi fu Yehofa di meke a faantiwowtu fii kengi, puubei fu wooko anga den kengi ya.

16. San o yeepi i fu tan fitoow Yehofa anga a olikanisâsi fi en?

¹⁶ I poi tan a Yehofa se te tesi e miti i aini a kemeente. Ma fu man du a sani ya, wa mu lasi useefi. Dati wani taki wo go e si sani enke fa Yehofa e si sani, u naw buuya. Wo poi denki kiin tu. I mu e sutudeli toli fu sama aini Beibel di be abi denseefi polobelema ya. Teke ten pakisei sai sa leli fu den. Begi Yehofa, da i akisi en fu a yeepi i. Ya mu e sidon e kusumi tu, ma i mu e paa anga den baala anga sisa. Efu we du sani na a fasi ya, da winsi sai pasa, Saatan naw poi poli wi anga Yehofa.—Yak. 4:7.