1. Faw du sabi taki Yehofa wani wi anga en toon mati?

 YEHOFA wani u kon koosube neen (Yak. 4:8). A wani de u Gadu, u Dda, anga u Mati. Te we begi en, ai aliki u. Ai yeepi u tu te sani e miti u. Boiti dati, ai gi u leli anga yeepi fu a olikanisâsi fi en. Ma san u mu du efu u wani wi anga Yehofa toon moo bun mati?

2. San o yeepi i fi yu anga Yehofa toon moo bun mati?

² Te ye begi, te ye leisi Beibel, anga te ye teke ten pakisei sai leisi, yu anga Yehofa o toon moo bun mati. Den sani ya o yeepi i fu moo lobi Yehofa. Yo teke den sani di ai du gii fu bigi tu. Boiti dati, den o yeepi i fu du san ai taki, bika neen na a Sama di meke ala sani (Openb. 4:11). O moo ye kon leli sabi Yehofa, o moo yo fitoow en anga a olikanisâsi fi en.

3. San Saatan e du fu poli wi anga Yehofa? San o yeepi u fu wa gwe fika Yehofa? (Psalm 31:13, 14)

³ Saatan e meke moiti fu poli wi anga Yehofa, moomoo te sani e miti u. Fa ai du a sani ya? A pikinpikin ai du sani fu meke u nai fitoow Yehofa anga a olikanisâsi fi en moo. Ma u sa du sani fu meke Saatan á fende u koli. Efu u biibi taanga, neen we fitoow Yehofa anga a olikanisâsi fi en tuutuu, u naw gwe fika en.​—Leisi Psalm 31:13, 14.

4. San wo luku aini a artikel ya?

⁴ Aini a artikel ya, wo taki fu dii sani di sama di nai dini  Yehofa e du di sa meke u nai fitoow Yehofa anga a olikanisâsi fi en moo. Fa den sani ya sa poli wi anga Yehofa? Sai sa du fu Saatan á fende i koli?

5. Fa den sani di e miti u sa meke u nai fitoow Yehofa anga a olikanisâsi fi en moo?

⁵ A omen sani e miti u son yuu. Son yuu a den famii fuu e wani tapu u fu dini Yehofa. Efuso kande den puu yu a wooko. Fa den sowtu sani ya sa poli wi anga Yehofa? Efu wan tesi e miti i wan pisiten kaba, a sani ya sa meke i lasi-ati. Saatan wani u denki taki a di Yehofa á lobi u meke den sani ya e miti u. Son yuu ai wani u biibi taki a fu di we dini Yehofa, efuso fu di u de aini a olikanisâsi fi en meke sani e miti u. Na a sani ya be miti sowan fu den Islayelisama di be de a Egepte enke saafu. Den be e biibi taki a Yehofa be sende Mosesi anga Aron fu puu den a katibo (Ek. 4:29-31). Ma bakaten di Farao be meke a libi kon moo taanga gi den, den be gi Mosesi anga Aron a fowtu. Den taki: ‘U meke kownu anga den futuboi fi en kon e buuse u. A leti enke u gi den wan fetihow fu kii u’ (Ek. 5:19-21). A tyali taki den gi Mosesi anga Aron a fowtu, winsi fa den á be du nawan sani. Efi yu abi wan polobelema wan pisiten kaba, sai sa du fu tan fitoow Yehofa anga a olikanisâsi fi en?

6. San u sa leli fu Habakuk te sani e miti u? (Habakuk 3:17-19)

⁶ Taigi Yehofa san de a yu ati. Akisi en fa yeepi i. A omen sani be miti polofeiti Habakuk. A gei enke wan pisiten a be e si enke Yehofa á lobi en moo. Ma a begi Yehofa neen a taigi en fa a be e fii tuutuu. A taki: ‘Yehofa, on langa mi mu bali kai i fii yeepi mi? . . . Saide yu e luku fa sama e du ogii anga taawan?’ (Hab. 1:2, 3). Yehofa be piki a begi fu a futuboi fi en (Hab. 2:2, 3). Di Habakuk teke ten pakisei fa Yehofa be yeepi a foluku fi en a fosi, a sani ya be yeepi en fu bigin piisii baka. Boiti dati, a be e biibi taki Yehofa lobi en. A be e biibi tu taki Yehofa be o yeepi en fu holidoo, winsi sai miti en. (Leisi Habakuk 3:17-19.) San a toli ya e leli u? Efu sani e miti i, begi Yehofa da i taigi en fa ye fii tuutuu. Akisi en fa yeepi i. I sa biibi taki Yehofa o gii a kaakiti di yu abi fanowdu fu holidoo. Te ye si fa ai yeepi i, a sani ya o yeepi i fii biibi kon moo taanga.

7. San wan famii fu Shirley be wani a biibi? San yeepi en fu aa gwe fika Yehofa?

⁷ Tan du den sani di o yeepi i fi yu anga Yehofa toon moo bun mati. Na a sani ya be yeepi wan sisa den e kai Shirley di tesi be e miti en. A sisa ya e tan aini Papuwa Nyun Gineya. b A osufamii fi en be pooti. A ná ala yuu den be e abi nyanyan sai. Wan famii fi en be e taigi en sani fu meke aa fitoow Yehofa moo. A be e taigi en taki: ‘Ye taki a santa yeye fu Gadu e yeepi i, ma mi nai si a sani de. Te anga now yu anga den sama fii e pina ete. A sosokaali ye lasi i ten e peleiki.’ Shirley taki: ‘Mia mu lei, di a taki a sani ya, mi be akisi miseefi taki: “Gadu e booko en ede anga u?” Neen meke mi begi Yehofa wantenwanten.  Mi taigi en ala san be de a mi ati. Boiti dati, mia tapu fu leisi Beibel anga den buku fu a olikanisâsi fu u. Mi be e tan du a peleikiwooko tu. Ala yuu u be e go a den komakandaa.’ Den sani ya yeepi en fu si taki Yehofa be e solugu a osufamii fi en. Ala yuu den be e abi sani fu nyan. Boiti dati, den be e piisii. Shirley taki: ‘Mi be si taki Yehofa aliki den begi fu mi’ (1 Tim. 6:6-8). Efi ye tan du den sani di i mu du fi yu anga Yehofa toon moo bun mati, nawan sani o poi poli yu anga en.

8. San sa pasa anga den baala di abi faantiwowtu?

⁸ A omen lei sama e paati a internet fu den baala di abi faantiwowtu aini a olikanisâsi fu Yehofa (Ps. 31:13). Son yuu den e sooto sowan fu den baala ya, fu di den e si den enke ogiiman. Na aseefi sani ya be miti den Kelesten a fositen. Den be lei gi Pawlesi, neen den sooto en sosokaali. San den du di a sani ya pasa?

9. San son Kelesten du di den be sooto Pawlesi?

⁹ Di Pawlesi be de a sitaafu-osu a Rome, a omen Kelesten á be e holibaka gi en moo (2 Tim. 1:8, 15). Saide den á be e holibaka gi en moo? A sen be e kisi den fu di sama be e si Pawlesi enke ogiiman? (2 Tim. 2:8, 9). A denki den be e denki taki sama be o libi ogii anga den tu? Wa sabi saide den gwe fika Pawlesi. Ma pakisei fa Pawlesi be e fii a ten de, bika a omen sani be miti en fu den Kelesten ya ede. A be de kabakaba fu dede gi den, ma toku den be gwe fika en (Toli 20:18-21; 2 Kor. 1:8). Noiti wa mu de enke den Kelesten di be gwe fika Pawlesi di a be abi den fanowdu. San u mu holi a pakisei te sama e libi ogii anga den baala di abi faantiwowtu?

10. San wa mu feegete te sama e libi ogii anga den baala di abi faantiwowtu?

 ¹⁰ Wa mu feegete saide sama e libi ogii anga u. Wa mu feegete sama e meke den sani ya miti u tu. Tu Timotiyesi 3:12 e taki: ‘Sama o du ogii anga ala den sama di e meke moiti fu dini Gadu fayafaya enke bakaman fu Kelestesi Yesesi.’ Neen meke a nai foondoo u taki Saatan e meke sama libi ogii anga den baala di abi faantiwowtu. Ai du a sani ya fu meke u gwe fika Yehofa. A wani u feele tu.​—1 Peit. 5:8.

11. San a toli fu Oneisiforus e leli u? (2 Timotiyesi 1:16-18)

¹¹ Tan holibaka gi den baala di abi faantiwowtu. (Leisi 2 Timotiyesi 1:16-18.) Oneisiforus a wan Kelesten di be e libi na a ten fu Pawlesi. Aa be de enke den Kelesten di be gwe fika Pawlesi di den be sooto en. ‘Sen á be e kisi en fu go luku Pawlesi a sitaafu-osu.’ A be go suku Pawlesi fu te a doo neen. Di a miti en, a yeepi en anga den sani di a be abi fanowdu. A du a sani ya winsi fa den be sa kii en. San a toli ya e leli u? Te sama e libi ogii anga den baala fu u, u mu tan holibaka gi den winsi san sa miti u. Wa mu feele sama te, da wa yeepi den (Odo 17:17). Den abi u yeepi fanowdu.

12. San we leli fu den baala anga sisa a Rosiyakondee?

¹² Pakisei fa den baala anga sisa a Rosiyakondee e holibaka gi denseefi te lanti poti sowan fu den a sitaafu-osu. Te den baala anga sisa ya mu go a kuutu, den taawan e go holibaka gi den na a kuutu-osu. San a toli ya e leli u? Efu lanti poti wan baala di abi faantiwowtu a sitaafu-osu, efu den e libi ogii anga den, efuso lei gi den, a sani ya á mu meke u feele. U mu begi gi den. U sa yeepi a osufamii fu den anga den sani di den abi fanowdu tu. Boiti dati, u sa luku taa fasi faw sa holibaka gi den.​—Toli 12:5; 2 Kor. 1:10, 11.

13. Fa a soso di sama e soso u sa meke u gwe fika Yehofa anga a olikanisâsi fi en?

¹³ Kande den famii fii di nai dini Yehofa, den sama a wooko pe, efuso den pikin a sikoo e soso i fu di ye du a peleikiwooko, efuso fu di ye holi den weiti fu Yehofa (1 Peit. 4:4). Kande den e taigi i taki: ‘Fai de ya mi lobi i, ma den sani di den e leli na a keliki fii taanga tumisi. Den sani de a ná fu a ten fu u ya moo.’ Son wan fu den e fende tu taki u nai libi bun anga den sama di den puu aini a kemeente. Den e taki: ‘A so we soi taki u lobi sama?’ Efu wa luku bun, den sani ya sa meke we si enke den weiti fu Yehofa taanga tumisi. Kande wo bigin denki taki: ‘Yehofa nai suku fini tumisi noh? Den weiti fu a olikanisâsi fi en taanga tumisi.’ Sai sa du fi ya gwe fika Yehofa te den sowtu sani ya e miti i?

14. Sai mu du efu sama e soso i fu di ye holi den weiti fu Yehofa? (Psalm 119:50-52)

¹⁴ Meke moiti fu tan holi den weiti fu Yehofa. Yopu a wan man di be e holi den weiti fu Yehofa winsi fa sama be e soso en. Wan fu den mati fi en be wani a biibi taki Gadu nai luku efu ai holi den weiti fi en (Yopu 4:17, 18; 22:3). Ma Yopu á be e biibi den lei ya. A be sabi taki a Yehofa abi a leti fu soi u san bun anga san  á bun. Neen meke a be de kabakaba fu holi den weiti fi en. Boiti dati, aa meke sama koli en fu a gwe fika Yehofa (Yopu 27:5, 6). San a toli ya e leli u? Te sama e soso i, ya mu si enke den weiti fu Yehofa á bun. Pakisei fa sani waka aini i libi. I musu si taki sani e moo go bun aini i libi te ye holi den weiti fu Yehofa. Neen meke i mu tan holibaka gi a olikanisâsi fu Yehofa, tan holi den weiti fi en tu. Efi ye du a sani ya, i naw gwe fika Yehofa winsi sama e soso i.​—Leisi Psalm 119:50-52.

15. Saide sama be e libi ogii anga Brizit?

¹⁵ Luku a toli fu wan sisa di e tan aini Indiya den e kai Brizit. Den famii fi en be e soso en fu di ai dini Yehofa. A sisa ya dopu aini 1997. Aa langa fu di a dopu, neen en man lasi en wooko. Di a sani ya pasa, a man fi en taki den o go tan anga en mma anga en dda aini wan taa foto. Ma a omen sani miti Brizit di den foloisi go anda. Fu di en man be lasi en wooko, meke enseefi be mu wooko fu solugu a osufamii. Boiti dati, a moo koosube kemeente be de sowan 350 kilomeiti fu pe den be e tan. Den manbee fi en be e libi ogii anga en fu di ai dini Yehofa tu. Neen meke den be mu foloisi baka, bika sani be kon moo ogii. Bakaten a man fi en dede wanboowanboo. Baka dati, kanker kii wan fu den meisyo fi en di be abi 12 yali. Di ala den sani ya pasa, den famii fu Brizit taigi en taki efu aa be toon wan Yehofa Kotoigi, nawan fu den sani ya á be o miti en. Winsi fa den sani ya miti Brizit, toku aa gwe fika Yehofa.

16. San a den belesi di Brizit fende di aa gwe fika Yehofa?

¹⁶ Fu di Brizit be e tan faawe fu a kemeente, meke a kelen owluman be taigi en taki a sa peleiki na a pisi pe ai tan. Aa be makiliki gi en, ma a du san a baala be taigi en. A be e paati a bun nyunsu. A be e holi den komakandaa neen osu tu.  Boiti dati, a be e meke ten fu holi a osufamii anbegi anga den meisyo fi en. Sowtu wini a fende di a du den sani ya? Brizit be kon abi tyaipi Beibelsutudi. A omen fu den dopu tu. Aini 2005, a bigin du a pioniliwooko. A omen belesi a fende di aa gwe fika Yehofa anga a olikanisâsi fi en. Den meisyo fi en e dini Yehofa anga den hii ati. Nownow a tu kemeente de na a pisi pe ai tan. Brizit e biibi taki a Yehofa be gi en a kaakiti di a be abi fanowdu fu holidoo di tesi be e miti en. A yeepi en tu fu holidoo di den famii fi en be e soso en.

17. San u mu de kabakaba fu du?

¹⁷ Saatan wani u biibi taki te tesi e miti u, da Yehofa o gwe fika u. A wani u biibi tu taki a libi o kon moo taanga gi u te we holibaka gi a olikanisâsi fu Yehofa. Saatan wani u feele te sama e libi ogii anga den baala di abi faantiwowtu, efuso te lanti sooto den. Boiti dati, ai meke sama soso u fu u sa gwe fika Yehofa anga a olikanisâsi fi en. Ma u sabi san a abi a pakisei, neen meke aa poi koli u (2 Kor. 2:11). Noiti wa mu gwe fika Yehofa anga a olikanisâsi fi en. Wa mu biibi den lei fu Saatan tu. Holi a pakisei taki, noiti Yehofa o gwe fika u (Ps. 28:7). Neen meke ya mu meke nawan sani poli yu anga Yehofa.​—Rom. 8:35-39.

18. San wo luku aini a taa artikel?

¹⁸ Aini a artikel ya, u luku dii tesi di sa meke u gwe fika Yehofa. Ma sani sa miti wi aini a kemeente tu di sa meke u nai fitoow Yehofa anga a olikanisâsi fi en moo. Wo taki fu a toli ya aini a taa artikel.