1. Sai pasa anga u fu di we du a peleikiwooko? Saide aa de fu u feele?

 SAMA e libi ogii anga u fu di we du a peleikiwooko, ma a sani ya o kon moo ogii aini a ten di e kon (Dan. 11:44; 2 Tim. 3:12; Openb. 16:21). Ma aa de fu u feele, bika Yehofa o yeepi u. Saide u sa taki a sani ya? Yehofa be e yeepi den futuboi fi en a fosi fu du san a be akisi den, winsi aa be makiliki. Fu man fusutan a toli ya moo bun, wo luku wantu sani di be pasa aini a libi fu polofeiti Eseikiyeli di a be e peleiki gi den Dyu di be de a katibo a Babilon.

2. Fa Yehofa be e kai den sama di Eseikiyeli be e peleiki gi? San wo luku aini a artikel ya? (Eseikiyeli 2:3-6)

² Sama a den sama di Eseikiyeli be e peleiki gi? Yehofa be kai den ‘sama di á wani aliki en’, ‘pikin di naabi sen’, ‘anga pikin di nai teke taki’. A fasi fa den be e libi be ogii, neen meke Yehofa be maiki den anga maka anga doti-kwata. Na a sani ya meke Yehofa be e taigi Eseikiyeli ala yuu taki: ‘Ya mu feele den.’ (Leisi Eseikiyeli 2:3-6.) Eseikiyeli be poi du a wooko fi en bun, bika (1) a Yehofa be sende en, (2) a santa yeye be e gi en kaakiti, anga (3) a Wowtu fu Gadu be e taanga en biibi. Fa den dii sani ya be yeepi Eseikiyeli? Fa den sa yeepi wi aini a ten ya?

3. San be e gi Eseikiyeli taanga-sikin? Fa Yehofa be soi en taki aw yeepi en?

³ Yehofa be taigi Eseikiyeli taki: ‘A mi sende i’ (Eseik. 2:3, 4). A sani ya be musu gi Eseikiyeli taanga-sikin. Saide u sa taki a sani ya? Kande Eseikiyeli be sabi ete taki Yehofa be taigi Mosesi anga Yesaya aseefi sani ya di a be teke den enke polofeiti (Ek. 3:10; Yes. 6:8). Eseikiyeli be sabi tu fa Yehofa be yeepi den tu polofeiti ya fu du den wooko. Neen meke a be poi fitoow Yehofa di a taigi en tu leisi taki: ‘A mi sende i’. A omen leisi a sikiifi aini a buku Eseikiyeli tu taki: ‘Yehofa taki anga mi’ (Eseik. 3:16; 6:1). Eseikiyeli be e biibi taki a Yehofa be poti en a wooko. En dda a be wan pilisite, neen meke a be musu e leli Eseikiyeli taki Yehofa be e taigi den polofeiti fi en taki a be o yeepi den. Yehofa be taigi Isaki, Yakopu, anga Yelemiya taki: ‘Mi de anga i.’​—Gen. 26:24; 28:15; Yel. 1:8.

4. San be e gi Eseikiyeli taanga-sikin?

⁴ San gaanse sama aini Islayeli be o du di Eseikiyeli be o peleiki gi den? Yehofa be taki: ‘Den Islayelisama naw wani aliki i, bika den á wani aliki mi tu’ (Eseik. 3:7). Fu di den Islayelisama á be e aliki Eseikiyeli, meke den á be e aliki Yehofa tu, bika a Yehofa be sende en. A sani ya be e soi Eseikiyeli taki a ná fu di a nai du en wooko bun, meke den Islayelisama á be wani aliki en. Yehofa be taigi Eseikiyeli tu taki te den sama be o si taki den sani di a be taki pasa tuutuu, da ‘den be o sabi taki wan polofeiti be de a den mindii’ (Eseik. 2:5; 33:33). A sani ya be musu e gi Eseikiyeli taanga-sikin fu du a wooko fi en.

5. San Yesaya 44:8 taki o gi u taanga-sikin?

⁵ Useefi e fende taanga-sikin aini a ten ya te we du a peleikiwooko, bika a Yehofa sende u fu du a wooko ya. Yehofa taki wi neen ‘kotoigi’ (Yes. 43:10). A sani ya a wan gaan gaandi Yehofa gi u. Leti enke fa Yehofa be taigi Eseikiyeli taki aa mu feele, a letiso ai taigi u taki ‘wa mu feele tu.’ Saide aa de fu u feele den sama di wani du ogii anga u? Bika leti enke Eseikiyeli, a Yehofa sende u fu u du a peleikiwooko. Na ala yuu ai holibaka gi u.​—Leisi Yesaya 44:8.

6. (a) Fa Yehofa e yeepi u fu du a peleikiwooko? (b) San e gi u taanga-sikin?

⁶ Yehofa paamisi u taki aw yeepi u. Fosi Yehofa taki: ‘Wa mi kotoigi’, a be taki: ‘Efu u mu pasa aini wataa mi o de anga u. Efu u mu pasa aini liba mi o yeepi u fu wa sungu. Efu u mu pasa aini faya, u naw boon. Eeye, nawan faya o boon wi’ (Yes. 43:2). U sa maiki den sani di e miti u te we du a peleikiwooko anga wan liba. Boiti dati, u sa maiki den tesi di e miti u anga faya. Ma fu di Yehofa e yeepi u, meke we tan du a peleikiwooko (Yes. 41:13). Leti enke a ten fu Eseikiyeli, a so omen sama aini a ten ya nai wani aliki a bosikopu di we paati. Ma te den nai aliki u, a sani ya á wani taki u nai du a peleikiwooko bun, bika u sabi taki Yehofa e piisii te we tan du a peleikiwooko winsi sai miti u. Apostel Pawlesi be taki: ‘Ibiiwan sama o fende en paiman fu a wooko di a du’ (1 Kor. 3:8; 4:1, 2). Wan gaandi pionili sisa taki: ‘Mi e piisii fu du a peleikiwooko, bika mi sabi taki Yehofa e belesi u te we meke moiti fu du en.’

7. Fa Eseikiyeli be e fii te a be e pakisei a fisyun di a be si? (Luku a fowtow a fesise fu A Wakititolen.)

⁷ Eseikiyeli be si aini wan fisyun fa a santa yeye fu Yehofa taanga. Den sani di Eseikiyeli si aini a fisyun ya, yeepi en fu fusutan taki na a santa yeye be e yeepi den engel fu lei a hemel wagi (Eseik. 1:20, 21). San Eseikiyeli du di a si a fisyun ya? A be sikiifi taki: ‘Di mi si a sani ya, mi bendi mi ede go a doti.’ A sani di Eseikiyeli si meke a foondoo te, neen a kai a doti (Eseik. 1:28). Bakaten di Eseikiyeli be e pakisei a toli ya, a be musu e gi en taanga-sikin. A be musu yeepi en fu biibi tu taki a santa yeye fu Yehofa be o yeepi en fu du a wooko fi en.

8-9. (a) San pasa anga Eseikiyeli baka di Yehofa taigi en fu a opo taampu? (b) San yeepi Eseikiyeli fu du a wooko fi en?

⁸ Yehofa be taigi Eseikiyeli taki: ‘Manpikin fu libisama, opo taampu, bika mi wani taki anga i.’ A sani di Yehofa taigi en ya, be gi en kaakiti fu opo taampu, bika Eseikiyeli taki: ‘A yeye fi en kon a mi tapu. A meke mi opo taampu’ (Eseik. 2:1, 2). Bakaten a santa yeye be e yeepi Eseikiyeli te a be e du a wooko fi en (Eseik. 3:22; 8:1; 33:22; 37:1; 40:1). A be e gi en kaakiti tu fu peleiki gi den ‘taanga-yesi Islayelisama di á be e teke taki’ (Eseik. 3:7). Boiti dati, Yehofa be taigi Eseikiyeli taki: ‘Mi meke i fesi kon taanga enke du fu den. Mi meke i fesi ede kon taanga enke du fu den. Mi meke i fesi ede kon taanga enke dyamanti, mi meke a taanga moo a moo taanga siton. Ná feele den, i sikin á mu dansi tei si den fesi’ (Eseik. 3:8, 9). Di Yehofa taigi  Eseikiyeli den sani ya, a leti enke a be e taigi en taki: ‘Ná meke a taanga-yesi fu den meke i fii booko-saka. A mi o yeepi i.’

⁹ Bakaten a santa yeye tyai Eseikiyeli go na a pisi pe a be mu peleiki. Eseikiyeli sikiifi taki: ‘Yehofa be de anga mi.’ A wan hii wiki a polofeiti ya be teke fu leli a bosikopu di a be mu go paati gi den sama. A sani ya be o yeepi en fu peleiki anga en hii ati (Eseik. 3:14, 15). Bakaten Yehofa taigi en fu a go a wan saka peesi, neen ‘a yeye fi en kon neen tapu’ (Eseik. 3:23, 24). Ala den sani ya be yeepi Eseikiyeli fu bigin du a wooko fi en.

10. San o yeepi u fu tan du a peleikiwooko? Saide wi abi a sani ya fanowdu?

¹⁰ San o yeepi u fu tan du a peleikiwooko? Fu man piki a akisi ya, pakisei san be pasa anga Eseikiyeli. Fosi Eseikiyeli be bigin peleiki, a santa yeye be gi en kaakiti. Leti enke Eseikiyeli, useefi poi du a peleikiwooko fu di a santa yeye fu Yehofa e yeepi u. Saide u sa taki a sani ya? Bika Saatan wani u tapu anga a peleikiwooko (Openb. 12:17). Tei be o luku en a libisama fasi, da i be o si enke wa poi wini Saatan. Ma tei luku fa a peleikiwooko e du a hii goontapu, da we si kiin taki we wini en (Openb. 12:9-11). Fa we du a sani ya? Te we du a peleikiwooko, we soi taki u nai feele Saatan. Boiti dati, ala yuu te we du a peleikiwooko we gi Saatan sen. Winsi den feyanti fu u e du sani fu meke u tapu anga a peleikiwooko, toku we tan peleiki. San a sani ya e soi u? A sani ya e soi taki a santa yeye fu Yehofa e yeepi u te we du a peleikiwooko. Yehofa e piisii anga u tu.​—Mat. 5:10-12; 1 Peit. 4:14.

11. San a santa yeye fu Yehofa o du gi u? San u mu du efu u wani a santa yeye fu Yehofa tan yeepi u?

¹¹ San a wan taa sani di u sa leli te we luku a taanga-sikin di Yehofa be gi Eseikiyeli fu du a peleikiwooko? A santa yeye  fu Gadu e yeepi fu du a peleikiwooko winsi sai miti u (2 Kor. 4:7-9). Ma san u mu du efu u wani Yehofa tan gi wi a santa yeye fi en? U mu e begi en anga u hii ati. U mu e biibi tu taki aw aliki den begi fu u. Neen meke Yesesi be leli den disipel fi en taki: ‘E akisi namo, . . . e suku namo, . . . e koko a doo namo.’ Efu we du sani na a fasi ya, Yehofa o ‘gi den sama di e akisi en a santa yeye’ ​—Luk.11:9, 13; Toli 1:14; 2:4.

12. Enke Eseikiyeli 2:9–3:3 e soi, da pe a bukulolo be komoto? San be sikiifi aini a bukulolo ya?

¹² A santa yeye be e yeepi Eseikiyeli fu du a wooko fi en. Ma a ná a sani ya wawan be e yeepi en. A Wowtu fu Gadu be e taanga en biibi tu. Eseikiyeli be si wan bukulolo aini wan fisyun. (Leisi Eseikiyeli 2:9–3:3.) Pe a bukulolo ya be komoto? San be sikiifi aini? Fa a bukulolo ya be yeepi Eseikiyeli? Meke u piki den akisi ya. A bukulolo ya be komoto na a kownusutuu fu Gadu. Eseikiyeli be si fo engel aini a fisyun. A wan fu den engel ya Yehofa be sende fu gi Eseikiyeli a bukulolo (Eseik. 1:8; 10:7, 20). A bukulolo ya a be a Wowtu fu Gadu. Wan kuutu bosikopu be sikiifi aini gi den Islayelisama di ben de a katibo (Eseik. 2:7). A bosikopu ya be sikiifi na ala den tu se fu a bukulolo.

13. San Yehofa be taigi Eseikiyeli fu a du anga a bukulolo? Saide a bukulolo be switi?

¹³ Yehofa be taigi a polofeiti fi en taki a mu ‘nyan a bukulolo te enke en bee fuu.’ Eseikiyeli á daaidaai, a nyan ala a bukulolo. San a pisi fu a fisyun ya wani taki? Eseikiyeli be mu fusutan kiin san na a bosikopu di a be o paati. A be mu e biibi a bosikopu ya tu, bika na a sani ya be o yeepi en fu paati en. Baka dati, wan foondoo sani pasa. Eseikiyeli be taki a bukulolo ‘be switi enke oniki’ (Eseik. 3:3). Saide a taki a sani ya? Bika a be e si en enke wan gaandi fu taki fu Yehofa. A sani ya be e meke a piisii (Ps. 19:8-11). Boiti dati, a be e teke en fu bigi taki Yehofa be teke en enke en polofeiti.

14. San be yeepi Eseikiyeli fu de seekaseeka fu bigin du a wooko fi en?

¹⁴ Bakaten Yehofa taigi Eseikiyeli taki: ‘Aliki san mi o taigi i, kibii den sani di mi o taigi i aini yu ati’ (Eseik. 3:10). Anga den wowtu ya, Yehofa be wani meke Eseikiyeli pakisei den sani di be sikiifi na a bukulolo tapu. A be mu teke ten pakisei den sani ya tu. Di Eseikiyeli du a sani ya, en biibi kon moo taanga. Boiti dati, a be poi paati a kuutu bosikopu gi a foluku (Eseik. 3:11). Di Eseikiyeli fusutan a bosikopu di Gadu be gi en, a be de seekaseeka fu bigin anga a wooko fi en.​—Luku Psalm 19:14 tu.

15. San u mu du efu u wani holidoo?

¹⁵ Efu u wani tan du a peleikiwooko, u mu tan sutudeli a Wowtu fu Gadu. Leti enke Eseikiyeli, den sani di Yehofa e leli u mu ‘de aini wi ati’. Aini a ten ya, Yehofa e taki anga u anga yeepi fi en Wowtu Beibel. Ma san u mu du efu u wani a denki fu u, a fasi fa we fii, anga den sani di u wani du kai anga a Wowtu fu Gadu?

16. San u mu du anga Wowtu fu Gadu? San u mu du efu u wani a Wowtu fu Gadu doo wi ati?

¹⁶ Te we nyan, we kon moo gusontu. A so a de anga a sutudeli di we sutudeli  tu. Te we sutudeli a Wowtu fu Gadu, da u teke ten pakisei san u leisi, u biibi e kon moo taanga. U mu holi a sani di Yehofa be wani leli Eseikiyeli anga a bukulolo di a be si a pakisei. Leti enke Eseikiyeli, Yehofa wani u nyan a Wowtu fi en te enke u bee fuu. Dati wani taki u mu fusutan en bun. Te we begi, leisi Beibel, anga te we teke ten pakisei san u leisi, da a leti enke we nyan a Wowtu fu Gadu. A fosi sani di u mu du fosi u sutudeli, a taki u mu begi fu seeka wi ati. A sani ya o yeepi u fu fusutan san Yehofa wani leli u. Baka dati, da i leisi wan pisi fu Beibel. Tei leisi te wan pisi, i mu sitopu, da i pakisei sai leisi. San o pasa te ye du a sani ya? Efu we teke ten pakisei san u leisi, wo moo fusutan a Wowtu fu Gadu bun. A sani ya o taanga a biibi fu u.

17. Saide u mu teke ten pakisei den sani di u leisi aini Beibel?

¹⁷ Saide a de fanowdu fu leisi Beibel, da u teke ten pakisei san u leisi? Bika na a sani ya o yeepi u fu du a peleikiwooko aini a ten ya. Aw gi u deki-ati fu paati a kuutu bosikopu aini a ten di e kon tu. Boiti dati, te we teke ten pakisei den moin manii fu Yehofa, wi anga en e toon moo bun mati. A sani ya o yeepi u fu wa buuya, aw yeepi u fu piisii tu.​—Ps. 119:103.

18. San den sama di we peleiki gi o kon fusutan? Saide den o kon sabi a sani ya?

¹⁸ Wa ná polofeiti enke Eseikiyeli, ma toku we tan paati a bosikopu fu Yehofa di sikiifi aini a Wowtu fi en. Wo tan du a wooko ya te enke Yehofa seefi taki a sai. Te a kuutu dei fu Yehofa o doo, den sama di we peleiki gi naw poi taki Gadu á wasikoi den (Eseik. 3:19; 18:23). Ma den o kon fusutan taki a bosikopu di u be e paati, a Gadu a be komoto.

19. San o yeepi u fu tan du a peleikiwooko?

¹⁹ San o yeepi u fu tan du a peleikiwooko? A den dii sani di be yeepi Eseikiyeli o yeepi u. We tan du a peleikiwooko, bika u sabi taki a Yehofa sende u. A santa yeye fi en e gi u kaakiti tu. Boiti dati, a Wowtu fi en e taanga u. Fu di Yehofa e yeepi u, meke wo poi tan du a peleikiwooko ‘te na a kaba’.​—Mat. 24:13.