1-2. (a) Sowtu akisi wo luku? (b) Sai soi taki Yehofa wani yeepi u tuutuu?

 YEHOFA poi yeepi u te sani e miti u aini u libi. A poi yeepi u fu dini en anga piisii tu. Ma fa ai du a sani ya? Faw sa fende wini fu a fasi fa Yehofa e yeepi u? Wo piki den akisi ya aini a artikel ya. Ma fosi u piki den akisi ya, wo luku a akisi ya fosi: Yehofa wani yeepi u tuutuu?

² Aini a biifi di apostel Pawlesi be sikiifi gi den Hebrew Kelesten, a be sikiifi wan wowtu di o yeepi u fu fende a piki fu a akisi ya. A be sikiifi taki: ‘A Yehofa a mi yeepiman. Mi naw feele. San libisama o poi du anga mi?’ (Heb. 13:6). A wowtu ‘yeepiman’ di Pawlesi kai aini a tekisi ya, e soi go a wan sama di e lon go yeepi wan taawan di de a nowtu. Puubei fu si fa Yehofa e lon go yeepi wan sama di de a nowtu. A sani ya e soi u taki Yehofa e angii fu yeepi wa sani. Fu di Yehofa e yeepi u, meke u poi holidoo anga piisii winsi sai miti u.

3. San a dii fasi fa Yehofa e yeepi u fu holidoo anga piisii te tesi e miti u?

³ San a wantu fasi fa Yehofa e yeepi u fu holidoo anga piisii te tesi e miti u? Fu piki a akisi ya, wo leisi wan pisi fu a Beibel buku Yesaya. Saide wo du a sani ya? Bika gaanse fu den polofeititoli di Yesaya sikiifi, e teli gi a foluku fu Yehofa aini a ten ya tu. Boiti dati, a fasi fa Yesaya e taki fu Yehofa makiliki fu fusutan. Kow luku wan fu  den toli ya a Yesaya kapitel 30. Aini a kapitel ya, Yesaya e taki fu wantu moin ageisitoli fu soi fa Yehofa e yeepi a foluku fi en. A taki Yehofa e (1) aliki den begi fu u, ai piki den tu. (2) Ai soi u faw mu du sani. Boiti dati (3) ai belesi u nownow, ma aw belesi wi aini a ten di e kon tu. Wo taki fu den dii sani ya aini den paragraaf di e kon.

4. (a) San Yehofa be taki fu den Dyu fu a ten fu Yesaya? San a be meke pasa anga den? (b) San Yehofa be paamisi den sama di á be gwe fika en? (Yesaya 30:18, 19)

⁴ Na a bigin fu Yesaya kapitel 30, Yehofa e kai den Dyu ‘taanga-ede pikin di e sondu baka makandaa.’ Baka dati a taki: ‘A foluku ya abi taanga-yesi, . . . den á wani aliki den weiti fu Yehofa’ (Yes. 30:1, 9). Fu di a foluku ya á be wani aliki Yehofa, meke Yesaya be sikiifi taki ogii be o miti den (Yes. 30:5, 17; Yel. 25:8-11). A sani ya pasa di den Babilonsama tyai den go a Babilon enke katiboman. Ma toku a ná ala den Dyu be gwe fika Yehofa. Yesaya be abi wan bosikopu di be o gi den sama ya howpu. A be taigi den taki wan dei Yehofa o meke den daai go a Yelusalem baka. (Leisi Yesaya 30:18, 19.) A pilisisi so sani waka, bika Yehofa be fii den puu a katibo. Ma Yehofa á be fii den wantenwanten. Yesaya be taki: ‘Yehofa e wakiti anga pasensi fu du bun sani gi u.’ A sani ya be e soi taki wan pisiten be o pasa fosi Yehofa be o fii den sama di á be gwe fika en. A 70 yali langa den Islayelisama tan a Babilon fosi sowan fu den daai go a Yelusalem baka (Yes. 10:21; Yel. 29:10). Di den Islayelisama daai go a Yelusalem baka, den be e piisii. Den á be e tyali moo enke di den be de a Babilon a katibo.

5. Enke fa Yesaya 30:19 e soi, da san u sa biibi taki Yehofa o du te we bali kai en?

⁵ Aini a ten ya, den sani di Yesaya be taki e gi u taanga-sikin. A be taki: ‘Te a yee wan fu u bali kai en, aw yeepi a sama de’ (Yes. 30:19). Yesaya e soi u taki Yehofa e aliki u te we bali kai en. A nai daaidaai fu piki den begi fu u tu. A be taki: ‘Faisi aw bali, a so aw piki en.’ Den wowtu ya e toosutu u, bika den e soi u taki Yehofa de kabakaba fu aliki u te we begi en. A sani ya e yeepi u fu holidoo anga piisii.

6. Fa den wowtu di Yesaya taki e soi taki Yehofa e aliki den begi fu iniiwan fu u?

⁶ San a wan taa sani di a vers ya e leli u fu den begi fu u? Yehofa e aliki iniiwan fu den begi fu u. Saide u sa taki a sani ya? Aini a fosi pisi fu Yesaya kapitel 30, Yehofa e taki anga a foluku fi en enke wan kulu. Ma aini vers 19, ai taki anga iniiwan fu den. Yesaya sikiifi taki: ‘Te a yee wan fu u bali kai en, aw yeepi a sama de, aw piki en.’ Yehofa a wan dda di lobi u. Neen meke a nai taigi en manpikin efuso en umanpikin di e fii booko-saka taki: ‘I mu taanga enke den baala anga sisa fii.’ Ma Yehofa e aliki den begi fu iniiwan fu u, bika ai booko en ede anga u.​—Ps. 116:1; Yes. 57:15.

7. Fa Yesaya anga Yesesi soi taki a pelensipali fu tan begi?

⁷ Tei taki anga Yehofa fu wan sani di e gii booko-ede, kande a fosi sani di aw du, a taki aw gii kaakiti fu holidoo. Winsi Yehofa á puu a tesi fii wanten, toku i mu tan akisi en fu a gii kaakiti fu  holidoo. Neenseefi wani i du a sani ya. We si a sani ya te u luku a sani di Yesaya be taki. A be taki: ‘Wa mu gi Yehofa a okasi fu de pii’ (Yes. 62:7). San a sani ya wani taki? Te we begi Yehofa, u mu e begi en naamo, wa mu gi en boo. Den wowtu di Yesaya taki ya e meke u pakisei a ageisitoli di Yesesi be gi a Lukasi 11:8-10, 13. Na ape Yesesi e gi u taanga-sikin fu ‘tan begi’ anga fu ‘tan akisi’ Yehofa a santa yeye. Boiti dati, u sa begi en fu a yeepi u fu sabi faw mu du wan sani.

8. Fa den sani di sikiifi a Yesaya 30:20, 21 kon tuu aini a ten di pasa?

⁸ Leisi Yesaya 30:20, 21. A wan yali langa anga afu den Babilonsama be lontu Yelusalem. Den Islayelisama be pina a ten de te, neen den be kon gwenti en. Ma enke fa vers 20 anga 21 e soi, da Yehofa be paamisi den Dyu taki efu den be kengi a fasi fa den be e tyai denseefi, a be o yeepi den. Yesaya be kai Yehofa ‘Gaan Leliman’. A sani ya e soi taki a Yehofa seefi be o soi a foluku fi en fa a wani den dini en. Den sani di Yesaya taki ya kon tuu di den Dyu komoto a katibo. Yehofa be de enke wan Gaan Leliman gi den. Fu di a be e soi den fa den mu du sani, meke den be poi sete a tuu biibi baka. Ai bigi gi u taki wi abi Yehofa enke u Gaan Leliman.

9. San a wan fasi fa Yehofa e leli wi aini a ten ya?

⁹ Yesaya be taki ete wan ageisitoli di e soi taki u de enke pikin di Yehofa e leli. A tu sowtu fasi ai du a sani ya. We si a fosiwan te u luku san Yesaya be taki. A be taki: ‘Wo si a moo Gaan leliman fu wi anga wi ain.’ Aini a ageisitoli ya, a leliman taampu a den pikin fesi. Ai bigi gi u taki Yehofa e leli wi aini a ten ya. Fa ai du a sani ya? Ai du a sani ya anga den leli di a olikanisâsi fi en e gi u. Ná pikin bigi ai bigi gi u taki a olikanisâsi fu Yehofa e soi u faw mu du sani. Den leli di we fende a den komakandaa, kelen komakandaa, konkelesi, den buku fu a olikanisâsi fu u, anga den Broadcasting, e yeepi u fu holidoo anga piisii te tesi e miti u.

10. Fa we yee a siten fu Yehofa ‘aw baka’?

¹⁰ Yesaya be taki tu fu ete wan fasi fa Yehofa e gi u leli. A be taki: ‘U yesi o yee wan siten aw baka.’ Yesaya be wani soi  anga a ageisitoli ya taki Yehofa de enke wan leliman di e waka a den pikin fi en baka, fu soi den a pasi di den mu waka. A leti enke Yehofa de aw baka e taigi u taki: ‘Waka go ai leti-ana, koti go ai kukutu se ana.’ Aini a ten ya, we yee Yehofa siten aw baka. Saide u sa taki a sani ya? Bika na a tide den sani di de aini a Wowtu fu Gadu sikiifi. Den gaandi moo u. Neen meke te we leisi Beibel, a leti enke we yee Yehofa siten aw baka.​—Yes. 51:4.

11. San a den tu sani di u mu du efu u wani holidoo anga piisii? Saide u mu du den sani ya?

¹¹ Faw sa fende wini fu den sani di a olikanisâsi fu Yehofa e leli u? Faw sa fende wini fu den sani di we leli aini Beibel? Holi a pakisei taki Yesaya be taki tu sani. A fosi sani di a taki, a taki: ‘A ya a pasi de.’ Du fu tu: ‘A ya u mu waka’ (Yes. 30:21). A ná sabi u mu sabi ‘a pasi’ namo, ma u mu ‘waka’ neen tapu tu. A Wowtu fu Yehofa anga a olikanisâsi fi en, e soi u san a wani u du. Boiti dati, we leli faw sa wooko anga den sani di we leli. Efu u wani holidoo anga piisii te we dini Yehofa, u mu du ala den tu sani ya. Efu we wooko anga den sani di Yehofa e leli u, aw belesi u.

12. Enke fa Yesaya 30:23-26 e soi, da fa Yehofa be o belesi a foluku fi en?

¹² Leisi Yesaya 30:23-26. Fa a polofeititoli ya kon tuu di den Dyu komoto a Babilon a katibo? Ná pikin belesi Yehofa belesi den di den daai go a den kondee baka. A yeepi den fu tan a libi, bika a be e gi den den sani di den be abi fanowdu. Ma a moo pelensipali sani, a taki Yehofa be yeepi den fu dini en enke fa a wani. Noiti den be denki taki Yehofa be sa belesi den so. Vers 26 e soi taki Yehofa be o meke den moo beenki. Dati wani taki den be o fusutan a Wowtu fi en moo bun (Yes. 60:2). Den sani ya be yeepi a foluku fu Yehofa fu dini en anga den hii ati, bika den be e piisii aini den ‘ati’.​—Yes. 65:14.

13. Fa a polofeititoli di e soi fa a tuu biibi be o sete baka kon tuu?

¹³ Yesaya be taki wan polofeititoli di soi e fa a tuu biibi be o sete baka. A sani ya e teli gi wi aini a ten ya tu? Eeye. Fanafu a yali 1919, a omen miliyun sama komoto aini a Gaan Babilon. A Gaan Babilon na ala den falisi biibi di de aini a ten ya. Den sama di komoto aini a Gaan Babilon de a wan peesi di bun  moo a Paamisi Kondee. Den sama ya de aini a ageisi paladeisi (Yes. 51:3; 66:8). Ma san na a ageisi paladeisi?

14. San na a ageisi paladeisi? Sama a den sama di de aini a ageisi paladeisi ya? (Luku a pisi di e taki ‘San den wowtu ya wani taki’.)

¹⁴ Fanafu a yali 1919, neen den salufuwan e libi aini wan ageisi paladeisi. b Ma baka wan pisiten ‘den taa sikapu’, dati a den sama di abi a howpu fu libi fu teego a goontapu ya, kon aini a ageisi paladeisi tu. Ná pikin piisii den sama ya e piisii, bika Yehofa e belesi den.​—Yoh. 10:16; Yes. 25:6; 65:13.

15. Pe a ageisi paladeisi de?

¹⁵ Pe a ageisi paladeisi de? Na ala se fu goontapu den sama di e dini Yehofa de. Neen meke a ageisi paladeisi na ala se fu goontapu a de. Winsi on se fu goontapu ye tan, neen ye tan holibaka gi a tuu biibi, i de aini a ageisi paladeisi tu.

16. San u mu du efu u wani si a moin fu a ageisi paladeisi?

¹⁶ San u mu du efu u wani tan aini a ageisi paladeisi? A mu e bigi gi u taki wi abi baala anga sisa a hii goontapu. Neen meke wa mu e poti pakisei a den fowtu fu den baala anga sisa, ma u mu e poti pakisei a den bun manii fu den (Yoh. 17:20, 21). Saide u mu du a sani ya? I sa maiki a sani ya anga wan moin dyali di abi omen sowtu bon aini. A so a ageisi paladeisi moin tu, bika a omen baala anga sisa de aini. Den de enke moin bon aini wan dyali (Yes. 44:4; 61:3). Ya mu e poti pakisei na a fasi fa den bon meke, efuso den naw moin gii. Ma i mu e poti pakisei na a busi. A sani ya wani taki ya mu meke den swakifasi fu den baala anga sisa efuso den swakifasi fii, meke i nai si a moin fu a ageisi paladeisi moo.

17. San iniiwan fu u mu du efu u wani a kemeente libi na a wan?

¹⁷ Faw sa yeepi a kemeente fu libi na a wan? I mu meke moiti fu libi bun anga ala sama (Mat. 5:9; Rom. 12:18). Efu ala  yuu ye meke moiti fu du sani di o meke a kemeente libi na a wan, ye meke a ageisi paladeisi kon moo moin. Holi a pakisei taki ala den sama di de aini a ageisi paladeisi, a Yehofa seefi hali den kon aini a tuu biibi (Yoh. 6:44). Pakisei fa Yehofa e piisii, te ai si fa we meke moiti fu libi bun anga den sama di a lobi.​—Yes. 26:3; Hak. 2:7.

18. San a den sani di u mu e teke ten pakisei ala yuu? Saide u mu du a sani ya?

¹⁸ Na ala sowtu fasi Yehofa e belesi den sama di e dini en. San u mu du efu u wani fende wini fu den belesi ya? U mu e teke ten pakisei den sani di u sutudeli aini Beibel anga den buku fu a olikanisâsi fu u. Te we sutudeli, anga te we teke ten pakisei san u leisi, a sani ya o yeepi fu kon abi manii di o yeepi u fu lobi den baala anga sisa fu u. Aw yeepi u tu fu lobi den ‘enke fa baala lobi denseefi’ (Rom. 12:10). Efu we teke ten pakisei fa Yehofa e belesi u nownow, a sani ya o yeepi u fu wi anga en toon moo bun mati. Boiti dati, efu we teke ten pakisei den sani di Yehofa paamisi u aini a ten di e kon, wo tan dini en fu teego. Ala den sani ya o yeepi u fu tan dini Yehofa anga piisii.

19. (a) Enke fa Yesaya 30:18 e soi, da san u sa biibi? (b) San o yeepi u fu holidoo anga piisii?

¹⁹ Te Yehofa o poli a ogii goontapu ya, aw kibii a foluku fi en (Yes. 30:18). U sabi taki Yehofa ‘a wan Gadu di e kuutu sani a wan letifasi,’ neen meke u sa biibi taki a naw fika a ogii goontapu fu Saatan ya fu alaten (Yes. 25:9). Leti enke Yehofa, we wakiti anga pasensi fu a dei ya doo. Ma solanga a ten de á doo ete, u mu tan si en enke wan gaandi fu taki anga Yehofa. U mu e sutudeli a Wowtu fi en, da u wooko anga den sani di u leli. Boiti dati, u mu e teke ten pakisei fa ai belesi u. Efu we du ala den sani ya, Yehofa o yeepi u fu tan dini en anga piisii.