Efii be go na a tabiki fu Indonesia di den e kai Sangir Besar wantu yali pasa, da kande i be o si den dii pionili sisa fu u na a lanpeesi. Den lobi peleiki gi sama na a tabiki ya, neen meke ala den sama fu a tabiki sabi den. Ma a leisi ya den be e du wan taa sowtu wooko.

Den be e suku wantu siton aini a wataa, da den be e diki den tyai kon a soo. Son wan fu den siton be bigi enke wan futubali. Bakadati da den be e go sidon booko den siton ya anga ambaa te enke den nyoni enke wan foo igi. Te den be kaba booko den siton den be e poti den aini boketi, da den be e subi wan taapu fu tyai den go ape den be e tan. Te den doo osu, da den be e poti den siton ya aini gaan saka, da wan toloki e tyai den go a pe den e meke pasi.

Wan fu den sisa ya a be Hulda. A be moo makiliki gi Hulda fu meke ten fu du a wooko ya. Anga a moni di a be e fende a be e solugu en osofamii. Ma now a be wani du wan taa sani anga a moni di a be e fende. A be wani wooko anga a JW Library^® app. Neen meke a be wani bai wan tablet. Hulda be sabi taki den felon anga den taa sani a JW Library^® be o yeepi en fu du a peleikiwooko. Den be o yeepi en fu fusutan a Beibel moo bun tu.

Hulda be e booko siton tu yuu langa anga afu ala mmanten fu lai wan pikin toloki. A du a sani ya wan mun anga afu. A so a fende a moni fu bai a tablet.

Hulda taki: ‘Ná pikin weli mi be e weli di mi be e du a wooko ya. Ala mi sikin be e du mi ogii. Ma aa langa seefi neen mi feegete ala a taanga wooko di mi be du, bika mi be man wooko anga a tablet di mi be bai. Mi be man du a peleikiwooko. Mi be man seeka miseefi gi den komakandaa tu.’ Hulda taki a tablet be yeepi en na a ten di a COVID-19 siki be paati a hii goontapu, bika a internet den komakandaa be e holi. Ala we piisii taki Hulda doo a maiki di a be poti.