Mi meke aini a yali 1948, aini wan kampu a Nigeliya. A ten de, mi omu Moustapha, wan pikin baala fu nda dopu enke wan Yehofa Kotoigi. Bakadati, mi gaan baala dopu tu. Di mi be abi neigin yali, nda dede. Ná pikin tyali kisi mi di a dede. Ma Wahabi taigi mi taki wo si u dda baka, te Gadu o weki den sama di dede. A sani ya gi mi taanga-sikin fu bigin sutudeli Beibel. Neen meke mi dopu aini a yali 1963. Den taa dii baala fu mi dopu tu.

Aini 1965, mi go tan anga mi gaan baala Wilson a Lagos. A so mi miti anga omen pionili aini a Igbobi kemeente. Di mi si fa den be e piisii anga fa den be e peleiki fayafaya, a sani ya meke mi bigin pionili tu aini yanuari 1968.

Albert Olugbebi, wan baala di e wooko a Betel be holi wan komakandaa gi wi enke yonkuuwan fu soi u taki pionili de fanowdu na a noordse fu Nigeliya. Mi man membee ete fa baala Olugbebi be giw deki-ati a dei de. A be taki: ‘I yonkuu, i lai ten anga kaakiti, koboloiki en fu wooko gi Yehofa. Wooko lai.’ Leti enke a polofeiti Yesaya, mi be wani go winsi pe Yehofa be sende mi go. Neen meke  mi poti mi nen fu du a spesuutu-pionili wooko.​—Yes. 6:8.

Aini mei 1968, den be sende mi fu go du a spesuutu-pionili wooko aini a foto Kano, a noordse fu Nigeliya. Na aseefi yuu de, a Biafra Feti be e feti (A feti ya be bigin fu 1967 te anga 1970.) A feti ya tyai buuya kon aini a kondee. A be simpan te, ná pikin sama dede. Dei fu dei a be e bigi namo. Wan baala á be wani ogii miti mi, neen meke a be gi mi taanga-sikin fu mia go na a noordse fu a kondee, bika a feti be simpan anda. Ma mi taigi en taki: ‘Gaantangi fii ye taki ye booko yu ede anga mi. Ma efu Yehofa wani mi du wan sani, da mi e biibi taki aw kibii mi.’

Ná pikin sani be pasa a Kano. Den sama di be e feti be booko ala a gaan foto ya te a doti. Te mi be de aini a peleikiwooko, da son yuu mi be e si den dedesikin fu den sama di den kii aini a feti. Winsi fa omen kemeente be de aini Kano, toku a omen baala anga sisa be lowe komoto aini a foto. A 15 peleikiman namo be fika aini a foto. Den be e feele. Den be e fii booko-saka tu. Ná pikin poolo den baala anga sisa poolo di sigisi spesuutu-pionili be go luku den. U gi den taanga-sikin. A sani ya be yeepi den fu den á feele moo. U be yeepi den seeka sani fu holi komakandaa anga a peleikiwooko baka. U be yeepi den fu sende den yuu di den wooko anga den buku di den paati go na a beikantoo. U seeka sani gi den fu sende teke buku anga taa sani tu.

Wi enke spesuutu-pionili be e leli taki Hausatongo. A omen sama aliki u di den yee a Kownukondee bosikopu aini den mamabee tongo. Ma wantu sama fu wan taa keliki á be lobi te den be e si we peleiki. Neen meke u be mu luku bun anga den. Wan leisi wan man lon aw baka anga wan nefi. Koloku meke a man á be gaw, neen u lon gwe fika en. Winsi fa den sani ya be e miti u, toku ala yuu Yehofa be e kibii u. A sani ya meke omen sama bigin du a peleikiwooko (Ps. 4:8). Nownow a moo enke 500 peleikiman de aini den 11 kemeente a Kano.

Baka wan pisiten aini augustus 1968, di mi be de a Kano wantu mun, mi anga wantu taa pionili be mu go a Niamey, a mamafoto fu Republiek Niger. U be kon fusutan taki ná pikin waan a peesi e waan aini a foto ya. U be mu leli fu peleiki aini a gaan ati san. U be mu leli taki Faansitongo tu, bika na a tongo ya den sama e taki. Winsi fa ala den sani ya be e miti u, toku u be e poti ala u fitoow a Yehofa. Wi anga wantu taa peleikiman di be e tan ape be bigin peleiki aini a mamafoto. Aa langa seefi neen gaanse sama di be sabi leisi be fende wan fu a buku (De waarheid die tot eeuwig leven leidt) di u be e sutudeli anga sama. Son yuu a den sama seefi e kon suku a buku ya a wi.

Baka wan pisiten u kon fusutan taki lanti á be lobi Kotoigi. Aini 1969, u be holi a fosi kelen-komakandaa aini a kondee ya. A wan sani fu 20 sama be kon na a komakandaa. Tu peleikiman be o dopu a dei de. Ná pikin poolo u be e poolo. Ma a fosi dei fu a komakandaa, neen den sikowtu kon tapu u. Den tyai ala den spesuutu-pionili anga den kelen-owluman gwe. Baka di den akisi u wantu sani, neen den taigi u taki u mu kon baka a taa dei. U be kon fusutan taki lanti be o tapu a wooko fu u. Neen meke u holi a dopu-lezing a wan sama osu, neen u dopu den tu peleikiman a wan liba. Nawan sama á be sabi taki u du a sani ya.

Baka wantu wiki neen lanti yaki mi anga feifi taa spesuutu-pionili puu aini a kondee. Den be taigi u taki aini tu dei u mu komoto aini a kondee. A useefi be mu pai fu komoto aini a kondee. Wi aliki den, neen u go na a beikantoo fu Nigeliya. Di u go ape neen den baala giw taa wooko fu du.

Den be sende mi go a Orisunbare, wan pisi kondee fu Nigeliya. Mi be e piisii fu peleiki makandaa anga a pikin kulu peleikiman di be de anda. U be e fende Beibelsutudi tu. Ma baka sigisi mun, a beikantoo sende mi wawan go a Niger baka. Mi be foondoo di den sende mi go anda baka. Mi be e senuwe tu. Ma toku mi be e angii fu miti den baala anga sisa fu Niger baka.

Mi daai go baka a Niamey. Wan dei baka di mi doo de, wan bisnisman fu Niger si taki mi a wan Yehofa Kotoigi, neen a bigin akisi mi wantu sani. Mi sutudeli anga en. Baka wan pisiten, neen a tapu anga somoko. Aa be e diingi duungu moo tu. Bakadati neen a dopu. Ná pikin piisii mi be e piisii fu peleiki makandaa anga den baala anga sisa fu Niger. Mi be e piisii tu fu si fa den sama be e kon dini Yehofa pikinpikin. Di mi doo a Niger a fosi leisi, a 31 Kotoigi namo be de aini a kondee. Ma di mi gwe a 69 Kotoigi be de a Niger.

Na a kaba fu a yali 1977, mi daai go a Nigeliya baka fu go a wan sikoo gi den baala di e teke fesi a den beikantoo. A dii wiki mi go na a sikoo ya. Na a kaba fu a sikoo, Malcom Vigo, a baala di be e teke fesi na a beikantoo meke mi leisi wan biifi fu a beikantoo fu Siyera Leyon. Den be e suku wan gusontu pionili baala di e taki Ingiisitongo anga Faansitongo fu du a kelen-owluman wooko aini Gineya. Baala Vigo taigi mi taki na a wooko ya mi be leli fu du na a sikoo. A taigi mi kiin taki a wooko ya á makiliki. Bakadati a taigi mi taki: ‘I mu denki bun fosi i teke a faantiwowtu ya ye.’ Neen mi taigi en taki: ‘A Yehofa sende mi, mi de kabakaba fu go.’

Mi teke opalani go a Siyera Leyon. Di mi doo ape neen mi miti anga den baala fu a beikantoo. Wan fu den baala fu a Beikantoo Komte taigi mi taki: ‘Wa sabi fa a wooko e go aini Gineya.’ Winsi fa a den baala fu Siyera Leyon be e luku fa a peleikiwooko e go aini Gineya, toku a fasi fa a politiki sani be e go aini a kondee be meke a taanga gi den baala fu miti anga den peleikiman. A omen sowtu fasi den be e suku fu sende baala go aini a kondee. Ma sani á be e waka bun. Neen meke den akisi mi fu go a Conakry, a mamafoto fu Gineya, fu suku pampila fu tan aini a kondee.

Di mi doo a Conakry, neen mi go na a ambasade fu Nigeliya. Mi taigi en taki mi be wani peleiki aini Gineya. Neen a taigi mi taki efu mia wani sikowtu kisi mi efuso wan taa ogii miti mi, da mi mu komoto aini a kondee. A taigi mi tu taki: ‘Daai go a Nigeliya, dai go peleiki anda.’ Mi piki en taki: ‘A ya mi wani peleiki.’ Neen a sikiifi wan biifi sende gi a Minesite fu Gineya di e luku den toli di e pasa a busikondee. A akisi en efu a be sa yeepi mi. Neen meke a minesite yeepi mi.

Di mi daai go na a beikantoo fu Siyera Leyon, mi taigi den baala a bosoloiti di den lanti fu a kondee teke. Ná pikin poolo den poolo di den yee fa Yehofa be holibaka gi mi a Gineya. Lanti taki mi be sa tan aini a kondee.

Mi du a kelen-wooko fanafu 1978 te anga 1989 aini Gineya anga Siyera Leyon. Mi be e go yeepi a Liberiya tu. Di mi be bigin du a wooko ya, a omen leisi mi be e siki. Mi be lobi siki te mi be e go a faawe peesi. Ma den baala be e meke moiti ala yuu fu tyai mi go a dataa.

Ma wan leisi ná pikin siki mi be siki. Mi be kisi malaaliya. Mi be abi woon tu. Di mi kisi miseefi, neen mi yee taki den baala be e seeka sani kaba fu beli mi. Winsi fa den sani ya be miti mi, toku noiti mia fika a wooko di mi be abi fu du. Mi e biibi taki a Gadu wawan sa meke sani waka bun anga mi. Bika winsi u dede seefi, neen na a sama di e gi sama libi.

Mi miti anga Dorcas aini 1988. Dorcas a wan pionili sisa di lobi Yehofa. A abi sakafasi. Baka di u toow neen a bigin du a kelen-wooko  anga mi. Dorcas be e wooko taanga. A be de kabakaba fu du ala sani fu meke Yehofa piisii. U be e waka wan sani fu 25 kilomeiti fu a wan kemeente go na a taawan anga den lai fu u. Te wa be poi waka anga futu go a den kemeente di be de faawe, da u be e suku taa fasi fu doo a den. Den santi pasi be lai olo, neen meke a be e teke langa fosi u doo.

Ná pikin deki-ati Dorcas abi. Wan leisi u be mu abaa wan liba di be lai anga kaiman. A feifi dei langa u be de a pasi. Den udu booki be booko, neen meke anga pali boto u be mu abaa a liba. Di Dorcas opo taampu fu komoto aini a pali boto, neen a kai a liba. Koloku wantu yonkuman si san pasa neen den puu en a wataa. A omen ten mi anga en deen takuu deen fu a sani ya. Winsi fa den sani ya be e miti u, toku u be e tan du a kelen-wooko.

Na a bigin fu 1992, u be dyombo taki Dorcas de anga bee. Ma a sani ya be o tapu u fu du a fuuten diniwooko? U be e pakisei taki: ‘A wan kado Yehofa giw.’ Neen meke u kai a meisyo fu u Jahgift (Kado fu Yehofa.) Fo yali baka di u meke Jahgift, neen u meke en baala Eric. We si ala den tu pikin fu u enke tuutuu kado di Yehofa giw. Jahgift be e yeepi wan pisiten a wan vertaal kantoo a Conakry. Eric toon wan dinali.

Fu di Dorcas be mu solugu den pikin fu u meke a be mu tapu anga a spesuutu-pionili wooko. Ma a be e du a kowownu-pionili wooko ete. Fu di Yehofa be e holibaka gi mi meke mi be man go doo anga a spesuutu-pionili wooko. Baka di den pikin fu u kon bigi, neen Dorcas bigin du a spesuutu-pionili wooko baka. Nownow we du a zendeling wooko a Conakry.

Ala yuu mi be e go a pe Yehofa be e sende mi go. A omen leisi mi anga mi uman si fa a yeepi u. We si fa ai belesi u tu. Na a fitoow di we fitoow Yehofa yeepi u fu wa booko wi ede anga gudu anga den booko-ede fu a goontapu ya. Mi anga Dorcas seefi kon si taki a Yehofa na a Sama di poi yeepi u fu sani waka bun anga u. Neen na a Gadu di e kibii sama (1 Kol. 16:35). Mi e biibi taki Yehofa ‘o kibii a libi fu ala den sama di e fitoow en leti enke fa sama e kibii gudu aini wan saka’.​—1 Sam. 25:29.