1-2. (a) Saide apostel Pawlesi taki a lobi na ‘a moo gaanwan’ fu den manii di u mu abi? (b) Sowtu akisi wo luku?

 DI APOSTEL Pawlesi be e taki fu biibi, howpu anga lobi, a be taki ‘a moo gaanwan fu ala den a lobi’ (1 Kor. 13:13). Saide Pawlesi taki a sani ya? Aini a ten di e kon u naw abi fu soi biibi moo. U naw abi fu soi taki wi abi howpu tu, bika ala den sani di Yehofa paamisi wo kon tuu. Ma na ala yuu wo abi fu soi taki u lobi Yehofa anga taa sama. A lobi di wo lobi Yehofa anga taa sama o kon moo taanga dei fu dei.

² Na ala yuu wo abi fu soi taki u lobi useefi, neen meke wo luku dii akisi di o yeepi u fu moo lobi useefi. A fosi wan, saide u mu lobi useefi? Du fu tu, faw sa soi taki u lobi useefi? Du fu dii, saw yeepi u fu moo lobi useefi?

3. Saide u mu lobi u baala anga sisa?

³ Saide a pelensipali fu lobi useefi? Te u lobi u baala anga sisa, da a so we soi taki wa tuutuu Kelesten. Yesesi be taigi den apostel fi en taki: ‘Ala sama o sabi taki wi a mi bakaman, te u lobi useefi’ (Yoh. 13:35). Te u lobi useefi, a sani ya e yeepi u fu libi na a wan. Pawlesi taki a lobi ‘e meke sama e libi na a wan’ (Kol. 3:14). Ete wan  taa sani de di e soi saide meke a pelensipali fu lobi useefi. Apostel Yohanisi be sikiifi wan biifi gi den baala anga sisa taki: ‘A sama di lobi Gadu mu lobi en baala tu’ (1 Yoh. 4:21). Te u lobi useefi, da a so we soi taki u lobi Gadu tu.

4-5. Gi wan ageisitoli di e soi saide u sa taki te u lobi taa sama, da u lobi Yehofa tu?

⁴ Saide u sa taki a lobi di u lobi u baala anga sisa, e soi taki u lobi Yehofa tu? Pakisei a sani ya. Son pisi fu u sikin e yeepi u fu sabi efu wi ati e wooko bun. Te dataa fii u neki-ana luku, da den e sabi efu wi ati e wooko bun. San a toli ya e leli u?

⁵ Wan dataa e sabi efu yu ati e wooko bun te a fii i neki-ana luku. A letiso wo poi sabi efu u lobi Yehofa tuutuu, te u luku faw lobi den baala anga sisa fu u. Efu u kon si taki a lobi di u lobi u baala anga sisa kon swaki, da a sani ya e soi taki a lobi di u lobi Yehofa kon swaki tu. Ma efu we meke moiti ala yuu fu soi u baala anga sisa taki u lobi den, da a sani ya e soi taki u lobi Yehofa tuutuu.

6. Saide u mu si en enke wan gaan sani te u kon si taki wa lobi u baala anga sisa anga u hii ati moo? (1 Yohanisi 4:7-9, 11)

⁶ Efu wa lobi u baala anga sisa anga u hii ati, a sani ya sa meke ogii miti u. Saide? Bika efu wa lobi u baala anga sisa, da u naw poi lobi Yehofa tu. A sani ya sa meke wi anga Yehofa á de mati moo. Neen meke apostel Pawlesi be taigi u kiin taki: ‘Wan sama di á lobi en baala di ai si, á poi lobi Gadu di a nai si’ (1 Yoh. 4:20). San a sani ya e leli u? Efu u wani Yehofa piisii anga u, da u mu ‘lobi useefi.’​—Leisi 1 Yohanisi 4:7-9, 11.

7-8. San a wantu fasi faw sa soi taki u lobi useefi?

⁷ Na ala yuu a Wowtu fu Gadu e leli u taki u mu ‘lobi useefi’ (Yoh. 15:12, 17; Rom. 13:8; 1 Tes. 4:9; 1 Peit. 1:22; 1 Yoh. 4:11). Lobi a wan fii di de aini wi ati. Nawan sama á poi si san de aini wi ati. Neen meke u mu soi den baala anga sisa fu u taki u lobi den. Faw sa du a sani ya? Na a fasi fa wo taki anga den, anga a fasi fa wo libi anga den, o meke den sabi taki u lobi den.

⁸ A omen sowtu fasi u sa soi taki u lobi u baala anga sisa. Meke u luku wantu fasi faw sa soi taki u lobi den: ‘Te we taki anga taawan u mu e taki a tuu’ (Sak. 8:16). ‘U mu e libi bun anga useefi’ (Malik. 9:50). ‘A yu mu de a fosiwan di e soi lesipeki gi taawan’ (Rom. 12:10).‘U mu bali wadaa gi taawan’ (Rom. 15:7). ‘U mu e gi taawan paadon’ (Kol. 3:13). ‘U mu e yeepi taawan’ (Gal. 6:2). ‘U mu e toosutu makandaa’ (1 Tes. 4:18). ‘U mu e gi useefi taanga-sikin’ (1 Tes. 5:11). ‘U mu e begi gi useefi.’​—Yak. 5:16.

9. Saide a toosutu di we toosutu u baala anga sisa, e soi taki u lobi den? (Luku a fowtow tu.)

⁹ Meke u taki fu wan fu den fasi faw sa soi taki u lobi u baala anga sisa. Pawlesi taki: ‘U mu e toosutu makandaa’. Saide a toosutu di we toosutu u baala anga sisa, a wan fasi fa we soi taki u lobi den? Wan buku taki a wowtu ‘toosutu’ di Pawlesi koboloiki ya wani taki, ‘i taampu a wan sama se fu gi en taanga-sikin fu di wan gaan sani miti en’. Te we yeepi wan baala efuso sisa fu holidoo winsi sai miti en, da a sani ya o yeepi en  fu tan dini Yehofa. Ala yuu te we giw baala anga sisa taanga-sikin we soi taki u lobi den.​—2 Kor. 7:6, 7, 13.

10. Saide u mu e fii gi taawan fu man toosutu den?

¹⁰ A te ye fii gi wan sama fosi yo man gi en taanga-sikin. Saide u sa taki a sani ya? Efu we fii gi wan sama, wo wani gi en taanga-sikin te wan sani miti en. Wo wani du wan sani fu yeepi en tu. Pawlesi be taki a fu di Yehofa e fii giw meke ai toosutu u. Pawlesi kai Yehofa ‘a Dda di abi tyali-ati, a Gadu di e toosutu sama’ (2 Kor. 1:3). Pawlesi koboloiki ‘tyali-ati’ aini a tekisi ya fu soi u san a wani taki fu fii gi wan sama. A kai Gadu ‘a Dda di abi tyali-ati bika ai fii gi sama. A fu di ai fii giw meke ai toosutu u te u de aini omen sowtu banowtu’ (2 Kor. 1:4). Te wataa e kii wan sama neen a fende kiin wataa diingi, ai fii bun. Te Yehofa toosutu wan sama di e fii booko-saka, a letiso a sama e fii bun baka. Faw sa du sani enke Yehofa te u luku a fasi fa ai fii gi taawan anga a fasi fa ai toosutu den? Wan sani di o yeepi u, a te we meke moiti fu fii gi taawan. U mu meke moiti fu gi den taanga-sikin tu. Sowtu manii o yeepi u fu man du a sani ya?

11. Enke fa Kolosesama 3:12 anga 1 Peitilisi 3:8 e soi, da san a wan taa manii di o yeepi u fu lobi taawan anga fu toosutu den?

¹¹ Saw yeepi u fu tan lobi u baala anga sisa? Saw yeepi u fu toosutu den ala dei? U mu lobi den baala anga a sisa fu u anga u hii ati. Tyali fu den mu e kisi u te den de a nowtu. U mu e soi switifasi gi den tu. (Leisi Kolosesama 3:12; 1 Peitilisi 3:8.) Fa den manii ya o yeepi u? Te we fii giw baala anga sisa, te we soi taki u lobi den, da a sani ya o yeepi u fu toosutu den te tesi e miti den. Yesesi taki ‘a san de aini wan sama ati, a dati ai taki. Wan bun-ati sama e taki bun sani, bika a soso bun de aini en ati’ (Mat. 12:34, 35). Te we toosutu u baala anga sisa, a wan fu den moo pelensipali sani di we du fu soi taki u lobi den.

12. (a) Saide u mu luku bun taki a lobi di u lobi u baala anga sisa á koo? (b) Sowtu akisi wo luku now?

¹² Ala u wani meke moiti ‘fu tan lobi useefi’ (1 Yoh. 4:7). Yesesi be wasikoi u taki ‘a omen sama naw lobi taawan moo.’ Neen meke a pelensipali fu membee a sani ya ala yuu (Mat. 24:12). Holi a pakisei taki Yesesi á be taki omen bakaman fi en naw lobi denseefi moo. Ma a be wani soi u taki u mu luku bun fu wa kon de enke den sama fu a goontapu ya di nai soi lobi gi taawan. U mu luku bun fu u nai libi ogii anga taawan tu. Neen meke wo luku saw yeepi u fu sabi efu u lobi u baala anga sisa tuutuu?

13. Saw yeepi u fu sabi efu u lobi u baala anga sisa tuutuu?

¹³ Efu u wani sabi efu u lobi u baala anga sisa tuutuu, da u mu luku san we du te wan baala efuso sisa du wan hati sani anga u (2 Kor. 8:8). Peitilisi be taki fu a sani ya di a taki: ‘A sani di de moo taanga fanowdu, na a lobi di u mu lobi useefi anga u hii ati, bika lobi e meke u wai ede gi omen sondu di taawan e du’ (1 Peit. 4:8). San we du te wan baala  efuso sisa meke wan fowtu efuso du wan sani di hati u? Na a fasi fa wo du sani o soi efu lobi den tuutuu.

14. Enke fa 1 Peitilisi 4:8 e soi, da faw mu lobi u baala anga sisa?

¹⁴ Meke u luku a sani di Peitilisi taki ya moo fini. A fosi pisi fu vers 8 e soi faw mu lobi useefi. A taki ‘u mu lobi useefi anga u hii ati’. A du fu tu pisi e soi san wo du te u lobi useefi na a fasi ya. A lobi ya e yeepi u fu wai ede gi den fowtu fu taawan. U sa si a toli ya so: Meke u taki yu abi wan tafaa di abi omen falaka anga omen kaabu. Sai be du anga en? I be o bai wan pisi koosi fu baala tapu den pisi fu a tafaa di nai soi moin. Leti enke fa wan pisi koosi e tapu den pisi fu wan tafaa di á kaba moin, a letiso lobi o yeepi u fu tapu den fowtu di den baala anga sisa e meke. Lobi o yeepi u tu fu gi den paadon anga u hii ati.

15. Efu u lobi u baala anga sisa tuutuu, da san wo de kabakaba fu du? (Kolosesama 3:13)

¹⁵ Efu u wani giw baala anga sisa paadon ala yuu, u mu lobi den tuutuu. A ná ala yuu aw makiliki fu gi den paadon,  ma tuutuu lobi o yeepi u fu du a sani ya. (Leisi Kolosesama 3:13.) Efu we giw baala anga sisa paadon ala yuu, da we soi taki u lobi useefi tuutuu. A sani ya o meke Yehofa piisii. San a wan taa sani di o yeepi u fu gi taawan paadon? Saw yeepi u tu fu wi ati á boon a taawan te den abi manii di wa kaba lobi?

16-17. San a wan taa sani di o yeepi u wai ede gi den pikinpikin fowtu di taawan e meke? (Luku a fowtow tu.)

¹⁶ Wa mu e poti pakisei a den fowtu di u baala efuso sisa e meke, ma u mu meke moiti fu poti pakisei a den bun sani di den e du. Pakisei a toli ya. Kow taki i go a wan fesa anga wantu baala anga sisa. Ala we poolo. Baka a fesa neen i meke fowtow anga den. Kande i meke dii fowtow anga den, bika efu wan fu den á bun, da a taawan sa bun. Dii luku den fowtow, neen i si wan fu den baala masi en fesi neen. Sai be o du anga a fowtow de? I be o puu en aini i telefon, bika i sabi taki yu abi ete tu fowtow pe ala sama e lafu.

¹⁷ U sa maiki den fowtow di we meke anga a membee di u man membee sani. A omen sani we man membee baka te u de makandaa anga den baala anga sisa fu u. Son yuu we membee den bun manii fu den, ma we membee sani tu di wa kaba lobi. San yo du te a sani ya pasa?  Yo tan pakisei den sani ya? Leti enke fai be o puu wan fowtow aini i telefon di ya kaba lobi, a so i mu puu son denki di ya lobi (Odo 19:11; Efe. 4:32). A omen bun sani fu u baala anga sisa u poi membee. Neen meke aa taanga tumisi fu feegete den pikinpikin fowtu di den e meke. A den bun sani fu den u mu meke moiti fu wa feegete.

18. Sowtu pelensipali sani fu lobi u taki aini a artikel ya?

¹⁸ Saide u mu tan meke moiti fu moo lobi u baala anga sisa? U si aini a artikel ya taki te we soi taki u lobi u baala anga sisa, we soi taki u lobi Yehofa tu. Faw sa soi taki u lobi u baala anga sisa tuutuu? Wan fu den fasi faw sa du a sani ya a te we toosutu den. Efu we booko wi ede anga u baala anga sisa, na ala yuu wo de kabakaba fu ‘toosutu useefi’. Saw yeepi u fu moo lobi den baala anga sisa fu u? U mu meke moiti fu gi den paadon ala yuu winsi aa makiliki.

19. Saide a nownow kaba a pelensipali fu soi taki u lobi u baala anga sisa?

¹⁹ Saide a pelensipali fu soi u baala anga sisa taki u lobi den? Peitilisi taigi u taki: ‘A kaba fu ala sani de koosube. Neen meke u mu lobi useefi anga u hii ati’ (1 Peit. 4:7, 8). A kaba fu a goontapu ya de koosube. Saw sabi taki o pasa a pisiten de? Yesesi be taigi den bakaman fi en taki: ‘Na ala se fu goontapu den o buuse u fu mi nen ede’ (Mat. 24:9). Efu u wani pasa a kaba fu a goontapu ya, da u mu e libi na a wan. Fu di u lobi useefi tuutuu meke Saatan naw poi poli wi anga u baala anga sisa. Bika Beibel taki ‘a lobi e meke sama e libi na a wan’.​—Kol. 3:14; Filip. 2:1, 2.