1. San polofeiti Yesaya be taigi den Islayelisama?

 POLOFEITI Yesaya be taki a Yehofa ‘na a tuu Gadu’. A wowtu di wani taki ‘tuu’ wani taki ‘amen’ tu (Yes. 65:16). ‘Amen’ wani taki ‘a so a de’ efuso a ‘letiso’. Te den be e koboloiki a wowtu amen gi Yehofa efuso Yesesi, da dati wani taki a sani de a tuu. Yesaya be taigi den Islayelisama taki te Yehofa taki wan sani, ai pasa leti enke fa a taki. Yehofa seefi soi taki na ala yuu ai du san a paamisi.

2. Saide u sa biibi taki Yehofa o du den sani di a paamisi u? Sowtu akisi wo luku?

² U sa biibi den sani di Yehofa paamisi wi aini a ten di e kon. Baka wan sani fu 800 yali di Yesaya be taki Yehofa na a Gadu fu a tuu, apostel Pawlesi be taki saide Yehofa e du san a paamisi ala yuu. A be taki: ‘Gadu á poi lei’ (Heb. 6:18). I sa si a toli ya so. Wan manyabon a manyan ai meke, aa poi meke apeesina. A so a de anga Yehofa tu. Aa poi lei. Neen meke u sa biibi ala den sani di Yehofa paamisi u taki aw du giw aini a ten di e kon. Aini a artikel ya, wo poti pakisei a den akisi ya: San a den sani di Yehofa paamisi wi aini a ten di e kon? San Yehofa du fu u sa biibi taki den sani di a paamisi wo kon tuu?

3. (a) Sowtu paamisi pelensipali gi ala sama di e dini Yehofa? (Openbaring 21:3, 4) (b) San son sama e taki te den yee a paamisi ya?

³ Wo poti pakisei a wan fu den paamisi di pelensipali gi ala sama di e dini Yehofa. (Leisi Openbaring 21:3, 4.)  Yehofa paamisi u taki wan ten e kon pe ‘dede naw de moo, sama naw kee moo, pen seefi naw de moo’ tu. U lobi soi sama a tekisi ya aini a peleikiwooko fu soi den fa a libi o de aini a nyun goontapu. Fa son sama e fii te u leisi a tekisi ya gi den? Den e taki: ‘Den sani ya na anainsitoli, noiti den sani ya o pasa.’

4. (a) Di Yehofa paamisi taki aw meke a goontapu toon wan paladeisi, san a be sabi taki o pasa aini a ten ya? (b) San Yehofa du boiti den sani di a paamisi u?

⁴ Di Yehofa meke apostel Yohanisi sikiifi fa a libi o de aini a nyun goontapu, a be sabi taki wo paati a howpu di wi abi anga taawan te we paati a Kownukondee bosikopu. Yehofa be sabi tu taki a be o taanga gi omen sama fu biibi taki den sani ya o pasa aini a ten di e kon (Yes. 42:9; 60:2; 2 Kor. 4:3, 4). Faw sa yeepi taawan fu biibi taki den sani di sikiifi a Openbaring 21:3, 4 o kon tuu? A omen sani Yehofa du di e yeepi u fu biibi taki aw du san a paamisi. San a den sani di Yehofa du?

5. Sowtu tekisi e yeepi u fu biibi taki den sani di Yehofa paamisi wo kon tuu?

⁵ Den vers di wo luku now, e soi saide u sa biibi taki Yehofa o meke a goontapu toon wan paladeisi. Openbaring e taki: ‘Neen a Sama di be sidon na a Kownusutuu taki: “U luku! Mi e meke ala sani kon nyun.” A taki tu: “Sikiifi den sani ya, bika den sani ya, a ná lei. I sa fitoow den.” Neen a taigi mi taki: “Den sani ya pasa kaba! A mi na a Alfa anga a Omega. A mi na a bigin anga a kaba.”’​—Openb. 21:5, 6a.

6. Fa den sani di sikiifi a Openbaring 21:5, 6 e yeepi u fu moo biibi den sani di Yehofa paamisi u?

⁶ Saide a tekisi ya e yeepi u fu biibi den sani di Yehofa paamisi u? Bika aini den vers ya, i sa maiki den sani di Yehofa e du anga te wan sama e teken wan pampila. A sani ya e soi taki Yehofa o du san a paamisi. b Openbaring 21:3, 4 e soi san Gadu paamisi u. Ma vers 5 anga 6 e soi saide u sa biibi taki den sani di Yehofa taki o kon tuu. Meke u luku fa Yehofa soi taki u sa fitoow en.

7. Sama e bigin taki a vers 5? Saide a sani ya pelensipali?

⁷ Vers 5 e bigin so: ‘A Sama di be sidon na a Kownusutuu taki’ (Openb. 21:5a). Den wowtu ya e soi taki a Yehofa seefi e taki ya. Den wowtu ya pelensipali, bika a dii peesi aini Openbaring we leisi san Yehofa seefi taki. Yehofa á meke wan engel taigi u den sani ya. Aa meke Yesesi taigi u tu, ma neenseefi mofu taki den. Den sani ya e soi taki u sa biibi taki den sani di a taki o pasa tuu, bika Yehofa ‘á poi lei’ (Tit. 1:2). Den wowtu ya e soi taki den sani di sikiifi a Openbaring 21:5, 6 o kon tuu, a naabi misi.

8. San Yehofa taki fu soi taki den sani di a paamisi wo kon tuu? (Yesaya 46:10)

⁸ Now meke u luku san a wowtu ‘luku!’ wani taki (Openb. 21:5). Den koboloiki a Giiki wowtu ‘luku!’ omen leisi aini a buku Openbaring. Wan buku taki a wowtu ya wani taki ‘ala sama di e leisi a pisi ya mu poti pakisei a den taa sani di o taki  a baka’. San Gadu taki baka di a taki a wowtu ‘luku’? A taki: ‘Mi e meke ala sani kon nyun.’ A Yehofa e taki fa sani o waka aini a ten di e kon. A sabi taki aw meke ala den paamisi ya kon tuu enke fa a taki, bika ala yuu ai du san a taki. Neen meke a taki enke den sani ya pasa kaba.​—Leisi Yesaya 46:10.

9. (a) San den wowtu ‘mi e meke ala sani kon nyun’ wani taki? (b) Saw pasa anga a hemel anga a goontapu fu nownow?

⁹ Meke u luku Openbaring 21:5. A taki: ‘Mi e meke ala sani kon nyun.’ San a sani ya wani taki? Aini a kapitel ya ai taki fu tu sani di Yehofa o du. Aw puu son sani, da aw poti taawan a den peesi. San a den sani di Yehofa o puu? A sikiifi aini Openbaring 21:1 taki: ‘A hemel anga a goontapu di be de fosi á de moo.’ ‘A hemel’ e soi go a den politiki tiiman di Saatan anga den ogii yeye fi en e tii (Mat. 4:8, 9; 1 Yoh. 5:19). Son yuu te Beibel e taki fu ‘goontapu’, ai soi go a den sama fu goontapu (Gen. 11:1; Ps. 96:1). Ma a wowtu ‘goontapu’ aini a tekisi ya e soi go a den ogii sama. Yehofa á taki aw puu wantu sani a ‘hemel’ anga ‘goontapu’. A taki aw puu ‘a goontapu’ anga ‘a hemel’ di de nownow, da aw poti wan nyun wan a den peesi. A sani ya wani taki aw seeka wan nyun tiimakiti. A ten de a soso sama di e libi enke fa a wani o de a goontapu.

10. San Yehofa o meke kon nyun?

¹⁰ Aini Openbaring 21:5, we leisi fu den sani di Yehofa taki aw seeka kon nyun baka. Yehofa á taki: ‘Mi e meke ala nyun sani.’ Ma a taki: ‘Mi e meke ala sani kon nyun.’ Yehofa o meke a goontapu ya kon nyun baka. Aw yeepi ala libisama fu den naabi sondu moo. Polofeiti Yesaya taki a hii goontapu o moin enke a dyali fu Eden. Wo toon nyun sama. Malengii sama naw de moo, sama di beendi naw de moo, dofu sama naw de moo tu. Den sama fu u di dede o kon a libi baka.​—Yes. 25:8; 35:1-7.

11. San Yehofa taigi Yohanisi fu a du? Saide a taigi en a sani ya?

¹¹ San a wan taa sani di Yehofa taki di e soi taki u sa biibi den sani di a paamisi u? Yehofa be taigi Yohanisi taki: ‘Sikiifi den sani ya, bika den sani ya, a ná lei. I sa fitoow den’ (Openb. 21:5). Yehofa á be taigi Yohanisi namo taki a mu sikiifi den sani ya. Ma a be taigi en tu saide a be mu sikiifi den. A taki: ‘Bika den sani ya, a ná lei. I sa fitoow den.’ A sani ya e soi taki u sa biibi den sani di Yehofa paamisi. Ai bigi giw taki Yohanisi ‘sikiifi’ den sani di Yehofa taigi en. Na a sani ya meke u poi leisi den moin sani di Yehofa paamisi fu a paladeisi. Ai meke u pakisei den moin belesi di de aw fesi tu.

12. Saide Yehofa taki: ‘Den sani ya pasa kaba!’

¹² San Gadu taki baka di a taigi Yohanisi fu a ‘sikiifi’ den sani ya? A taki: ‘Den sani ya pasa kaba!’ (Openb. 21:6) Saide Yehofa taki ‘den sani ya pasa kaba’? Bika Yehofa sabi taki nawan sani á poi tapu en fu du san a abi a pakisei. Now meke u luku wan taa sani di Yehofa taki di e soi saide u sa biibi taki den sani di a paamisi wo kon tuu. San Yehofa taki?

13. Saide Yehofa taki: ‘A mi na a Alfa anga a Omega’?

¹³ Enke faw be luku kaba, da a dii leisi Yehofa seefi taki anga Yohanisi aini den fisyun di a be si (Openb. 1:8; 21:5, 6;  22:13). Baka di Yehofa taki den sani ya neen a taki: ‘A mi na a Alfa anga a Omega.’ A wowtu Alfa na a fosi letter fu a Giiki alfabet. A wowtu Omega na a lasiti letter. Di Yehofa taki a mi na a Alfa anga a Omega, a soi taki te a taki wan sani aw kon tuu namo.

14. (a) Gi wan toli di e soi on ten u sa taki Yehofa be taki a wowtu ‘Alfa’? On ten u sa taki aw taki a wowtu ‘Omega’? (b) Te u luku san sikiifi a Genesesi 2:1-3, da saide u sa biibi taki den sani di Yehofa paamisi wo kon tuu?

¹⁴ Baka di Yehofa meke Adan anga Efa, neen a taigi den san a den sani di a abi a pakisei gi libisama anga a goontapu. Beibel taki: ‘Neen Gadu belesi den, neen a taigi den taki: “U meke pikin fuu a goontapu da u de basi fi en”’ (Gen. 1:28). Baka di Yehofa taigi Adan anga Efa san a be abi a pakisei, a leti enke Yehofa taki a wowtu ‘Alfa’. Wan ten o kon di den sani di a taki ya o kon tuu. A ten de a soso sama di e aliki Yehofa o de a goontapu. A goontapu o fuu anga den bakapikin fu Adan anga Efa di naabi sondu moo. A den o meke a goontapu toon wan paladeisi. Te ala den sani ya o pasa, da a leti enke Yehofa o taki a wowtu ‘Omega’. Baka di Yehofa kaba meke ‘hemel, goontapu anga ala den taa sani di de a hemel anga goontapu’, a du wan taa sani di e soi taki u sa biibi taki aw du san a abi a pakisei. A sani ya sikiifi a Genesesi 2:1-3. (Leisi en.) Yehofa be teke du fu seibin dei di a kaba meke a goontapu enke wan santa dei. San a sani ya wani taki? A sani ya e soi taki den sani di Yehofa be abi a pakisei gi libisama anga a goontapu be o kon tuu na a kaba fu den seibin dei. Nawan sama be o poi tapu en fu du san a abi a pakisei.

15. Saide Saatan be sa denki taki a be tapu Yehofa fu du san a be abi a pakisei?

 ¹⁵ Fu di Adan anga Efa ná aliki Yehofa, meke ala den bakapikin fu den abi sondu. Na a sondu di Adan anga Efa sondu meke we dede, bika useefi abi sondu (Rom. 5:12). Di a sani ya pasa, a be gei enke Saatan be tapu Yehofa fu du den sani di a abi a pakisei. A be gei enke Yehofa á be o poi meke sama di naabi sondu meke pikin fuu a goontapu. Kande Saatan be musu e denki taki noiti Yehofa o poi du san a be abi a pakisei moo. Kande a be e denki taki Yehofa be o kii Adan anga Efa, da a meke taa libisama fu du den sani di a be abi a pakisei. Ma efu Yehofa be du a sani ya, da Saatan be o abi leti di a kai en wan leiman. Saide Saatan be o abi leti? Bika Yehofa be taigi Adan anga Efa aini Genesesi 1:28 taki a den bakapikin fu den be o meke pikin fuu a hii goontapu.

16. Saide Saatan be sa denki taki Yehofa naw poi du san a paamisi?

¹⁶ San a wan taa sani di Saatan be sa denki Yehofa be o du? Kande Saatan be e denki taki Yehofa be o fika Adan anga Efa fu meke pikin fuu a goontapu. Ma den pikin ya be o abi sondu (Ek. 7:20; Rom. 3:23). Efu a sani ya be pasa da Saatan be abi leti fu taki Yehofa á poi du san a be abi a pakisei. Saide a be sa taki a sani ya? Bika efu Yehofa be du sani so, da a ná san a be taki be o pasa. Bika a be taki a goontapu be o fuu anga den bakapikin fu Adan anga Efa di naabi sondu.

17. San Yehofa du baka di Saatan, Adan anga Efa ná aliki en? Saw de a bakapisi fu a sani di Yehofa du ya? (Luku a fowtow tu.)

¹⁷ Noiti Saatan poi sabi san Yehofa be abi a pakisei fu du. Yehofa be sabi san a mu du winsi fa Saatan, Adan anga Efa ná aliki en (Ps. 92:5). Yehofa fika Adan anga Efa fu meke pikin. A so a soi taki te a taki wan sani, ala yuu ai du san a taki. A du wan sani fu meke san a be abi a pakisei kon tuu. A paamisi taki wan ‘pikin’ be o kon di be o fii den bakapikin fu Adan anga Efa (Gen. 3:15; 22:18). A pikin ya be o gi en libi enke wan ofaandi fu fii libisama. Saatan be dyombo di a si san Yehofa du fu fii libisama. Saide? Bika a dede di Yesesi kon dede giw e soi taki ná pikin lobi Yehofa lobi u (Mat. 20:28; Yoh. 3:16). Saatan naabi a manii ya. Bika a soso  enseefi namo ai denki. Saw pasa dyonson fu di Yesesi kon dede giw? Na a kaba fu a Dunsu Yali Tii, wo toon sama di naabi sondu moo. Den bakapikin fu Adan anga Efa o meke a goontapu toon wan paladeisi leti enke fa Yehofa be abi a pakisei. Baka te ala den sani ya pasa, da a leti enke Yehofa o taki a wowtu, ‘Omega’.

18. San a den dii sani di Yehofa taki di e yeepi u fu biibi taki aw du san a paamisi u? (Luku a faki di den e kai ‘ Dii sani di e yeepi u fu biibi taki den sani di Yehofa paamisi wo kon tuu.’)

¹⁸ Aini a artikel ya, u luku wantu sani di e soi saide u sa biibi taki a goontapu o toon wan paladeisi. Saw sa taigi taa sama fu soi den kiin taki ala den paamisi ya o kon tuu? A fosi sani, a Yehofa seefi paamisi u den sani ya. A buku Openbaring e soi u taki: ‘Neen a Sama di be sidon na a Kownusutuu taki: ‘U luku! Mi e meke ala sani kon nyun.’ Yehofa abi a koni anga a kaakiti fu du den sani di a paamisi u. A wani du den sani ya tu. Du fu tu, Yehofa sabi taki den sani di a paamisi wo kon tuu. Gi en a leti enke den sani ya pasa kaba. Neen meke a taki: ‘Sikiifi den sani ya, bika den sani ya, a ná lei. Den sani ya pasa kaba!’ Du fu dii, nawan sani á poi tapu Yehofa fu du san a taki. Neen meke a taki: ‘A mi na a Alfa anga a Omega.’ Yehofa soi Saatan taki en a wan leiman di á poi tapu en fu du sani enke fa a wani.

19. Sai sa du te ai taanga gi son sama fu biibi den sani di Yehofa paamisi u?

¹⁹ Ala yuu te we soi sama san Yehofa paamisi u, a sani ya e meke u biibi moo taanga. Baka di u luku a artikel ya, neen i go aini a peleikiwooko neen i leisi den moin paamisi aini Openbaring 21:4 gi wan sama, neen a taigi i taki: Mia denki den sani ya o pasa ye, den sani ya na anainsitoli. San yo du? I sa leisi vers 5 anga 6 gi en. Bakadati i sa taki anga en fu den tu vers ya. Soi a sama den sani di Yehofa taki fu soi u taki aw du san a paamisi u. A leti enke Yehofa naki sitampu kaba taki aw du san a paamisi u, a naabi misi.​—Yes. 65:16.