1-2. Saide u sa si enke Yehofa nai piki den begi fu u?

 ‘PIISII pasa maiki fu Yehofa ede, da aw gii san yu ati wani’ (Ps. 37:4). A wan moin sani Gadu paamisi u ya. Ma a sani ya wani taki a wantenwanten Yehofa o giw den sani di we akisi en? Saide a bun fu akisi useefi a sani ya? Poti pakisei a den toli ya. Wan sisa di á toow ete be e begi Yehofa fu a fende a kai fu go na a Sikoo gi Kownukondee peleikiman. Ma a omen yali pasa kaba di den á kai en fu go na a sikoo ya ete. Wan yonkuu baala di be e siki bunbun fasi be begi Yehofa fu a betee, bika a be wani du moo aini a kemeente. Ma a baala ya á betee. Wan mma anga dda e begi Yehofa fu a pikin fu den tan a waaleiti. Ma a pikin á wani dini Yehofa moo.

² Kande iseefi begi Yehofa fu wan sani, ma ya fende a sani dii akisi en. A sani ya sa meke ye si enke Yehofa e piki den begi fu taa sama, ma a nai piki den wan fii. Boiti dati, kande yo si enke i du wan sani di Yehofa á lobi. A so wan sisa den e kai Janice b be e fii tu. En anga en man be begi Yehofa, bika den be wani go wooko a Betel. A taki: ‘Mi be e biibi taki den baala o kai u fu go a Betel gawgaw.’ A omen yali pasa kaba di a toowpaa ya á fende a kai fu go wooko a Betel. Janice taki: ‘Mi be e fii booko-saka. Mi be e booko mi ede tu. Bika mi be e si enke mi du wan sani di Yehofa á lobi. Di mi be e begi mi taigi Yehofa kiin taki mi wani go wooko a Betel, ma saide aa piki a begi fu mi?’

3. San wo luku aini a artikel ya?

 ³ Son yuu we akisi useefi efu Yehofa e piki den begi fu u. A omen man di be e dini Yehofa anga den hii ati aini a ten di pasa be e akisi denseefi a sani ya tu (Yopu 30:20; Ps. 22:2; Hab. 1:2). Saw yeepi i fu biibi taki Yehofa e piki den begi fii? (Ps. 65:2) Fu fende a piki fu a akisi ya, wo piki den dii akisi ya fosi: (1) San Yehofa o du? (2) San Yehofa wani u du? (3) Saide son yuu u mu begi fu taa sani?

4. Enke fa Yelemiya 29:12 e soi, da san Yehofa paamisi u?

⁴ Yehofa paamisi u taki aw aliki den begi fu u. (Leisi Yelemiya 29:12.) A lobi den sama di e dini en anga den hii ati. Neen meke na ala yuu ai piki den begi fu den (Ps. 10:17; 37:28). Ma a sani ya á wani taki aw giw ala den sani di we akisi en. U mu wakiti fu a nyun goontapu doo fosi wo fende son wan fu den sani di we begi en.

5. San Yehofa e luku te ai aliki den begi fu u?

⁵ Yehofa e luku efu den sani di we akisi en e kai anga den sani di a abi a pakisei (Yes. 55:8, 9). Wan fu den sani di Yehofa abi a pakisei, a fu meke a goontapu fuu anga sama di e aliki en. A Yehofa o de a Tiiman fu den sama ya. Ma Saatan taki sani o waka moo bun gi libisama te den e tii denseefi (Gen. 3:1-5). Di Saatan taki a sani ya, Yehofa fika libisama fu tii denseefi fu soi taki a sani di Saatan taki a ná tuu. Fu di libisama e tii goontapu nownow, meke a omen ogii e pasa (Peleik. 8:9). U kon fusutan taki Yehofa naw puu ala den ogii di e pasa aini a goontapu ya nownow. Bika efu a be o du a sani ya, den sama di nai biibi Gadu be o si enke a di libisama e tii meke sani e waka bun. Boiti dati, den be o si enke libisama poi tii denseefi tuutuu.

6. Saide u sa biibi taki Yehofa o piki den begi fu u?

⁶ A omen fasi Yehofa e piki den begi fu u, winsi taa sama e begi en fu a du aseefi sani gi den. Di Kownu Heskiya be siki bunbun fasi, a be begi Yehofa fu a yeepi en fu a betee. Yehofa aliki a begi fu Heskiya, bika a be meke a betee (2 Kow. 20:1-6). Apostel Pawlesi be begi Yehofa fu a puu ‘a maka di be de aini en sikin’. Kande a maka ya a be wan siki di be e meke a gusontu fi en go anga baka. Ma Yehofa á puu a polobelema fu Pawlesi (2 Kor. 12:7-9). Luku a toli fu apostel Yakowbesi anga Peitilisi. Kownu Herodes be wani kii den. Den baala anga sisa be e begi gi den. Ma toku Herodes be meke sama kii Yakowbesi, winsi fa wan engel kibii Peitilisi fu den á fende en kii (Toli 12:1-11). Kande we akisi useefi taki: Saide Yehofa kibii Peitilisi ma aa kibii Yakowbesi? Beibel nai taki fu a sani de. c Ma u sabi taki na ala yuu ‘Yehofa e du sani a wan letifasi’ (Deit. 32:4). U sabi tu taki Yehofa be lobi Yakowbesi anga Peitilisi (Openb. 21:14). Son yuu Yehofa nai piki den begi fu u enke faw wani, ma u sabi taki na ala yuu ai piki den begi fu u. Neen meke winsi aa piki a begi fu u enke faw be wani, tokuso u nai kuutu.​—Yopu 33:13.

7. San wa mu du? Saide wa mu du a sani ya?

 ⁷ A omen sowtu sani e miti u, ma toku we meke moiti fu u nai maiki den sani di e miti u anga den sani di e miti taawan. Son leisi te we begi Yehofa, we taigi en pilisisi faw wani a yeepi u. Ma toku u nai fende a sani di wi akisi en. Bakaten we kon yee taki wan sama be begi Yehofa fu aseefi sani di u be akisi en, ma a gei enke Yehofa piki a begi fu a sama ya. Na a sani ya be pasa anga wan sisa den e kai Anna. A man fi en di den e kai Matthew be abi kanker. A sisa ya be e begi Yehofa fu meke a man fi en betee. Ma tu gaandi sisa di be bigi moo a man fi en be abi kanker tu. Ná pikin begi Anna be e begi gi Matthew anga den tu sisa ya. Den tu gaandi sisa betee, ma a man fu Anna dede. Anna be e akisi enseefi efu a Yehofa meke den tu gaandi sisa betee. Efu a Yehofa yeepi den tu sisa ya, da saide di Anna be e begi gi a man fi en Yehofa aa meke a betee? We, wa sabi fa den tu sisa ya du betee. Ma saw sabi a taki Yehofa o puu ala den sani di e meke we pina. Ai angii fu weki den mati fi en di dede tu.​—Yopu 14:15.

8. (a) Enke fa Yesaya 43:2 e soi, da fa Yehofa e yeepi u? (b) Fa begi sa yeepi u fu pasa den tesi di e miti u? (Luku a felon di den e kai Begi e yeepi u fu wi á gi abaa.)

⁸ Yehofa o yeepi wi ala yuu. Yehofa a wan dda di lobi u, neen meke aa wani we pina (Yes. 63:9). Toku Yehofa nai kibii u gi ala den tesi di e miti u. Den tesi ya de enke wan liba efuso wan faya. (Leisi Yesaya 43:2.) Ma Yehofa paamisi u taki aw yeepi u fu ‘pasa den’ tesi ya. Neen meke winsi sowtu tesi e miti u, aw yeepi u fu u tan dini en. Boiti dati, ai giw a santa yeye fi en di e yeepi u fu holidoo (Luk. 11:13; Filip. 4:13). U sa biibi taki Yehofa o giw ala san wi abi fanowdu fu holidoo anga fu tan dini en anga u hii ati. d

9. Enke fa Yakowbesi 1:6, 7 e soi, da saide u sa biibi taki Yehofa o yeepi u?

⁹ Yehofa wani u fitoow en (Heb. 11:6). Son yuu we fii enke den tesi di e miti u taanga tumisi. Kande wo si enke Yehofa naw yeepi u tu. Ma Beibel e soi u taki a kaakiti fu Gadu poi yeepi u fu ‘subi sikotu’ (Ps. 18:29). Neen meke efu we si enke Yehofa nai piki den begi fu u, u mu begi en anga u hii ati. U mu e biibi taki aw piki den begi fu u.​—Leisi Yakowbesi 1:6, 7.

10. Gi wan toli di e soi saw mu du baka te u begi Yehofa.

¹⁰ Yehofa wani u meke moiti tu te we begi en fu a yeepi u. Kande wan baala e begi Yehofa fu a yeepi en fu a basi fi en gi en wantu dei fu a sa go na a konkelesi. Fa Yehofa sa piki a begi fu a baala ya? A sa gi a baala deki-ati fu go taki anga a basi fi en. Ma a baala mu go akisi a basi fi en fosi. Kande a omen leisi a mu go akisi en. Kande a mu kengi a wooko dei fi en anga wan taa wookoman tu. Boiti dati, kande aw abi fu taigi a basi fi en taki aa de fu a pai en fu den dei di aw teke.

11. Saide u mu e begi Yehofa ala yuu fu den sani di e giw booko-ede?

¹¹ Yehofa wani u begi en ala yuu fu den sani di pelensipali giw (1 Tes. 5:17). Yesesi  be taki Yehofa naw piki den begi fu u wantenwanten (Luk 11:9). Neen meke wa mu gi abaa. U mu e begi ala yuu (Luk 18:1-7). Te we tan begi Yehofa fu wan sani, a so we soi en taki a sani di we begi en pelensipali giw. We soi tu taki we biibi taki a poi yeepi u.

12. (a) Te we begi, da san u mu akisi useefi? Saide u mu akisi useefi a sani ya?(b) Saw mu du fu den begi fu u soi taki we lesipeki Yehofa? (Luku a faki di den e kai ‘ Den begi fu mi e soi taki mi e lesipeki Yehofa?’)

¹² Efu Yehofa nai piki den begi fu u, da u mu akisi useefi dii sani. A fosi akisi: ‘A fu a moo bun sani mi e begi?’ Son yuu we si enke u sabi san moo bun gi useefi. Ma Kande a sani di we begi Yehofa naw tyai wini giw tuutuu. Efu we begi Yehofa fu wan polobelema di wi abi, a bun fu u holi a pakisei taki wan moo bun fasi de fu losi a polobelema moo enke san useefi e denki. Boiti dati, son sani di we akisi Yehofa nai kai anga a wani fi en (1 Yoh. 5:14). Luku a toli fu a dda anga a mma di u be taki fi en kaba. Den be e begi Yehofa fu a yeepi a pikin fu den fu tan a waaleiti. Aa fowtu efu wan e sama begi Yehofa a sani ya. Ma u mu holi a pakisei taki Yehofa nai dwengi u fu dini en. A wani useefi luku efu wo dini en. A wani den pikin fu useefi luku efu den o dini en tu (Deit. 10:12, 13; 30:19, 20). Neen meke a mma anga dda ya sa begi Yehofa fu a yeepi den fu doo a pikin fu den ati te den o taki anga en. Bika a sani ya sa yeepi a pikin fu kon lobi Yehofa anga fu toon en mati.​—Odo. 22:6; Efe. 6:4.

13. Enke fa Hebrewsama 4:16 e soi, da on ten Yehofa o yeepi u?

 ¹³ Du fu tu akisi: ‘A yuu fu Yehofa doo fu a piki a begi fu mi?’ Son yuu we fende taki a wantenwanten Yehofa mu piki den begi fu u. Ma fu taki en kiin, Yehofa sabi san moo bun giw. (Leisi Hebrewsama 4:16.) Son leisi te wa fende a sani di u akisi Yehofa na a yuu di u wani, kande wo si enke aa wani yeepi u. Ma son yuu na a yuu fu Yehofa á doo ete fu piki a begi fu u. Pakisei a toli fu a yonkuu baala di be e akisi Yehofa fu a yeepi en anga a siki fi en. Efu Yehofa be du wan wonduu fu yeepi en, Saatan be sa taki a baala ya e dini Yehofa go doo bika a Yehofa seefi deesi en (Yopu 1:9-11; 2:4). Yehofa poti wan yuu kaba di aw puu den siki di e pina libisama (Yes. 33:24; Openb. 21:3, 4). Solanga a ten de á doo, Yehofa naw du wonduu fu deesi siki sama. Neen meke a baala sa begi Yehofa fu a gi en kaakiti fu holidoo anga fu a tan dini en anga en hii ati.​—Ps. 29:11.

14. San a toli fu Janice e leli i?

¹⁴ Pakisei a toli fu Janice di be e begi Yehofa fu go wooko a Betel. A baka feifi yali fosi a be kon fusutan taki Yehofa piki a begi fi en. A taki: ‘Yehofa koboloiki a ten di mi be e wakiti fu leli mi tyaipi sani. A yeepi mi fu toon wan moo bun Kelesten. Mi be mu moo fitoow en. Mi be mu sutudeli moo fini anga miseefi tu. Boiti dati, mi leli taki mi mu e piisii fu dini Yehofa winsi sowtu wooko mi e du gi en.’ Bakaten Janice anga en man fende a gaandi fu du a kelen-wooko. Janice taki: ‘Yehofa piki den begi fu mi tuutuu, winsi fa aa du sani enke fa mi be e denki.  A teke pikinso ten fosi mi kon fusutan taki a fasi fa Yehofa piki a begi fu mi a wan kado. Ná pikin bigi ai bigi gi mi fu si fa Yehofa lobi mi.’

15. Saide te we begi Yehofa wa mu taigi en finifini saw wani ala yuu? (Luku a fowtow tu.)

¹⁵ Du fu dii akisi: ‘Mi mu begi fu taa sani?’ A bun fu taigi Yehofa kiin faw wani a yeepi u. Ma son yuu aa de fu u taigi Yehofa finifini faw wani a yeepi u, bika a sani ya o yeepi u fu sabi san Yehofa abi a pakisei giw. Luku a toli fu a sisa di á toow ete di wani go na a Sikoo gi Kownukondee peleikiman. A sisa ya wani go yeepi a pe moo peleikiman de fanowdu, neen meke a wani go na a sikoo ya. Winsi fa ai begi fu fende a kai fu go na a sikoo ya, toku a sa begi Yehofa tu fu a yeepi en fu si fa a sa du moo gi en (Toli 16:9, 10). Baka te a begi fu den sani ya, a sa akisi a kelen-owluman efu wan kemeente de koosube di abi moo pionili fanowdu. A sa sende wan biifi go na a beikantoo tu fu akisi pe moo peleikiman de fanowdu. e

16. Saw sa biibi?

¹⁶ U si aini a artikel ya taki Yehofa e piki den begi fu u (Ps. 4:3; Yes. 30:18). Son yuu a nai piki den begi fu u enke faw be denki, ma u sa biibi taki aw piki den begi fu u ala yuu. Ná pikin lobi Yehofa lobi u. Noiti aw gwe fika u (Ps. 9:10). Neen meke, ‘u mu e fitoow en ala yuu’. U mu taigi en ala san de a wi ati tu.​—Ps. 62:8.