1-2. Saide u sa maiki den sani di be e miti den Dyu di be daai go a Yelusalem baka anga den sani di e miti wi aini a ten ya? (Luku a faki di den e kai ‘ A ten fu Hakai, Sakaliya, anga Esra’)

 YE BOOKO yu ede anga fa sani o waka aini a ten di e kon? Kande i lasi i wooko. A sani ya sa meke ye booko yu ede, bika a yu mu solugu yu osufamii. Kande ye si enke ogii sa miti yu osufamii tu, fu di sani nai go bun aini a kondee. Boiti dati, kande ye booko yu ede anga yu osufamii, bika sama e wani du ogii anga u te we du a peleikiwooko. Den sani ya e miti i? Efu den sani ya e miti i, yo fende taanga-sikin te wo luku fa Yehofa be yeepi den Islayelisama di den seefi sani ya be e miti den.

² Den Dyu di be e tan a Babilon be gudu. Den be abi wan bun libi tu. Neen meke efu den be mu gwe fika ala den gudu fu den fu go a wan kondee di den á kaba sabi, den biibi be mu taanga. Di den doo a Yelusalem, aa langa seefi neen a bigin taanga gi omen fu den fu solugu den osufamii. Sama be e libi ogii anga den. Sani á be e go bun aini a kownukondee fu Persiya tu. Boiti dati, a be e taanga gi omen Dyu fu poti ala den pakisei na a meke di den be e meke a tempel. Neen meke aini a yali 520 Fosi Kelestesi, Yehofa be sende polofeiti Hakai anga Sakaliya fu gi a foluku taanga-sikin fu bigin wooko gi Yehofa anga den hii ati baka (Hak. 1:1; Sak. 1:1). Wo si sowtu wini a foluku fende di den polofeiti gi den taanga-sikin. Baka wan sani fu 50 yali, den Dyu di be daai go a Yelusalem be abi taanga-sikin fanowdu baka. Esra, wan man di be sabi sikiifi a Weiti poti a taa pampila tapu, komoto a Babilon go  te a Yelusalem fu gi a foluku fu Gadu taanga-sikin. A be soi den taki a dini di den e dini Yehofa mu de a moo pelensipali sani gi den.​—Esra 7:1, 6.

3. Sowtu akisi wo luku? (Odo 22:19)

³ Leti enke fa den polofeititoli fu Hakai anga Sakaliya be yeepi a foluku fu Gadu fu fitoow en, a so den sa yeepi wi aini a ten ya tu fu biibi taki Yehofa o yeepi u te a libi e taanga giw. (Leisi Odo 22:19.) Te wo luku a bosikopu di Hakai anga Sakaliya be tyai gi den Islayelisama anga a toli fu Esra, da wo piki den akisi ya: Fa den sani di be e miti den Islayelisama be e meke den fii? Saide u mu si a dini di we dini Yehofa enke a moo pelensipali sani aini u libi te sani e miti u? Faw sa soi taki we moo fitoow Yehofa te sani e miti u?

4-5. Saide den Dyu á be e meke a tempel anga den hii ati moo?

⁴ Di den Dyu di be komoto a Babilon doo Yelusalem, den be abi tyaipi wooko fu du. Di den doo, den á daaidaai. Den be meke a Altari fu Yehofa baka. Den be bigin meke a tempel tu (Esra 3:1-3, 10). Ma baka wan pisiten den á be e wooko gi Yehofa anga den hii ati moo. Saide? Bika a ná a tempel wawan den be mu meke, den be mu meke den eigi osu tu. Den be mu paandi goon. Den be mu solugu den osufamii tu (Esra 2:68, 70). Boiti dati, den feyanti fu den be e seeka sani fu tapu den fu meke a tempel.​—Esra 4:1-5.

⁵ A be e taanga gi den Dyu di be daai go baka a Yelusalem, bika sani á be e go bun aini a kondee. Boiti dati, a Persiya be e taki gi a kondee fu den. Baka di Kownu Sirus fu Persiya dede aini a yali 530 Fosi Kelestesi, neen Cambyses bigin tii Persiya. A kownu ya be wani wini Egepte. Kande den suudati fi en be e dwengi den Islayelisama fu gi den nyanyan, wataa, anga wan peesi fu tan di den be e go feti anga Egepte. A sani ya be sa meke a libi moo taanga gi den Islayelisama. Di kownu Dariyus a fosiwan bigin tii Persiya, a omen sani be e miti den Islayelisama, bika sani a be e go bun aini a kondee. A omen sama á be wani aliki lanti tu. Neen meke den Islayelisama di be daai kon a den kondee baka be e akisi denseefi fa den o solugu den osufamii. Fu di ala den sani ya be e miti den, meke den be si enke a ná be a bun yuu fu meke a tempel.​—Hak. 1:2.

6. Enke fa Sakaliya 4:6, 7 e soi, da sowtu taa sani be miti den Dyu? San Sakaliya be taigi den?

⁶ Leisi Sakaliya 4:6, 7. Boiti taki sani á be e go bun aini a kondee, sama be e libi ogii anga den Dyu tu. Aini a yali 522 Fosi Kelestesi, den feyanti fu den du sani anga den te neen den tapu fu meke a tempel. Ma Sakaliya be soi den taki Yehofa be o gi den a santa yeye fi en fu pasa den tesi di be e miti den. Aini a yali 520 Fosi Kelestesi, Kownu Dariyus be gi den Dyu piimisi fu bigin meke a tempel baka. A be gi den moni tu. Boiti dati, a be meke den gaanman yeepi den.​—Esra 6:1, 6-10.

7. Fa Yehofa belesi den Dyu di be daai go a Yelusalem baka di den be bigin si a dini di den be e dini en enke a moo pelensipali sani?

 ⁷ Yehofa be sende Hakai anga Sakaliya fu taigi a foluku fi en taki solanga den e si a meke di den mu meke a tempel enke a moo pelensipali, aw holibaka gi den (Hak. 1:8, 13, 14; Sak. 1:3, 16). Aini a yali 520 Fosi Kelestesi den Dyu be bigin  meke a tempel baka. Baka wan sani fu 5 yali, neen den kaba meke a tempel. Yehofa be holibaka gi den. A be gi den ala san den be abi fanowdu, bika den be e si a meke di den be e meke a tempel enke a moo pelensipali sani, winsi fa sani be e miti den. A sani ya meke den be poi dini Yehofa anga piisii baka.​—Esra 6:14-16, 22.

8. Fa den wowtu di sikiifi a Hakai 2:4 sa yeepi u fu tan poti pakisei na a du di u mu du a wani fu Yehofa? (Luku a maiki tu.)

⁸ Dei fu dei a gaan banowtu e koosube namo, neen meke a de taanga fanowdu fu du ala saw poi fu du a peleikiwooko (Malik 13:10). Ma kande ai taanga gii fu du a peleikiwooko fu di yu abi moni polobelema efuso fu di sama wani tapu i. Saw yeepi i fu si a Kownukondee fu Gadu enke a moo pelensipali sani? I mu e biibi taki ‘Yehofa di e tii den engel fi en’ b de anga i. Aw holibaka gii efi ye si a Kownukondee fi en enke a moo pelensipali sani. Efi ye du den sani ya, da aa de fii feele nawan sani.​—Leisi Hakai 2:4.

9-10. Fa wan toowpaa kon si taki den sani di Yesesi taki a Mateyesi 6:33 a tuu?

⁹ Luku a toli fu Oleg anga Irina, c wan toowpaa di e du a pioniliwooko. Baka di den foloisi go yeepi a wan taa kemeente, den lasi den wooko. Bika sani á be e go bun aini a kondee. A wan hii yali langa den be e suku wooko. Winsi fa den á be poi fende wan wooko di den be e du ala yuu, toku den be e si fa Yehofa be e yeepi den. Son yuu den baala anga sisa be e yeepi den tu. San yeepi den di den sani  ya be e miti den? Ná pikin kusumi Oleg be e kusumi. A taki: ‘A de di u be e de aini a peleikiwooko ala yuu yeepi u fu tan poti pakisei na a moo pelensipali sani aini u libi.’ Winsi fa Oleg anga en uman e tan suku wooko, toku den e du a peleikiwooko fayafaya.

¹⁰ Wan dei di den komoto a peleiki, den yee taki wan mati fu den di e tan wan sani fu 160 kilomeiti fu pe den be de, tyai tu tasi anga nyanyan sani kon fika gi den. Oleg taki: ‘A dei de u si fa Yehofa solugu u baka. U si tu taki ná pikin lobi a kemeente lobi u. We biibi taki Yehofa nai feegete den sama di e wooko gi en, winsi we si enke sani naw kengi.’​—Mat. 6:33.

11. San u sa biibi efu we si a du di u mu du a wani fu Yehofa enke a moo pelensipali sani?

¹¹ Yehofa wani u poti ala u pakisei na a yeepi di we yeepi sama fu toon en bakaman. Bika a wooko ya e kibii sama libi. Enke faw be si aini  paragraaf 7, Hakai be gi a foluku fu Yehofa taanga-sikin fu meke a tempel go doo. Yehofa be paamisi den taki efu den be du a sani ya, a be o ‘belesi’ den (Hak. 2:18, 19). Leti enke fa Yehofa be belesi a foluku fi en, a so aw belesi u tu efu we si a wooko di a giw enke a moo pelensipali sani aini u libi.

12. Saide Esra anga den sama di be e go a Yelusalem biibi be mu taanga?

¹² Aini a yali 468 Fosi Kelestesi, Esra be komoto a Babilon anga du fu tu kulu fu den Dyu go a Yelusalem. Esra anga den sama di be de anga en biibi be mu taanga fu waka go a Yelusalem, bika a pasi á be bun. A kownu be gi den tyaipi gowtu anga solufu fu meke a tempel tu. Neen meke fufuuman be sa fufuu den a pasi (Esra 7:12-16; 8:31). Boiti dati, den be yee taki ogii be sa miti den a Yelusalem. A wantu sama namo be e tan aini a foto. Den sikotu anga den doo fu a foto be mu seeka tu. San u sa leli fu Esra te we taki fu a fitoow di u mu fitoow Yehofa?

13. San yeepi Esra fu moo fitoow Yehofa? (Luku a maiki tu.)

¹³ Esra be si fa Yehofa be yeepi a foluku fi en di sani be e miti den. Bigin fu a yali 484 Fosi Kelestesi, a gei enke a Babilon Esra be e tan. Na a pisiten de Kownu Ahasferos be meke wan weiti di be e gi sama pasi fu kii ala den Dyu na a pisi kondee di a be e tii (Est. 3:7, 13-15). Esra anga den taa Dyu be sa lasi den libi. Di den Dyu ‘na ala den pisi kondee’ de yee a sani ya, den be fii booko-saka te. Den á be e nyan nawan sani. Neen meke den begi Yehofa fu a yeepi den (Est. 4:3). Pakisei fa Esra anga den taa Dyu be fii di sama kii den sama di be wani kii den (Est. 9:1, 2). Den sani di be miti Esra a pisiten de be seeka en kande gi den tesi di be o miti en bakaten. Kande a sani ya be yeepi en fu biibi tu taki Yehofa poi kibii a foluku fi en. d

14. San wan sisa leli di Yehofa be yeepi en di sani be e miti en?

¹⁴ Te we si fa Yehofa e yeepi u te sani e miti u, we biibi taki aw yeepi wi aini a ten di e kon tu. Luku a toli fu Anastasia, wan sisa di e tan a Oost Europa. A sisa ya fika a wooko fi en, bika sama be wani dwengi en fu teke se aini politiki. A taki: ‘A fositoon aini mi libi mia be abi moni. Mi begi  Yehofa. Mi si fa a solugu mi. Efu wan dei mi naabi wooko baka, mi naw feele. Efu mi dda di de a hemel e solugu mi tide, aw solugu mi tamaa tu.’

15. San yeepi Esra fu tan fitoow Yehofa? (Esra 7:27, 28)

¹⁵ Esra be si Yehofa ana aini en libi. Te Esra be pakisei fa Yehofa be yeepi en aini a ten di pasa, a sani ya be e yeepi en fu a moo fitoow Yehofa. A be taki: ‘Mi Gadu Yehofa de anga mi.’ (Leisi Esra 7:27, 28.) Esra taki den wowtu ya ete sigisi leisi aini a Beibel buku di e tyai en nen.​—Esra 7:6, 9; 8:18, 22, 31.

16. On ten we si taki Yehofa e yeepi u tuutuu? (Luku a fowtow tu.)

¹⁶ Yehofa poi yeepi u te sani e miti u. Wantu fasi fa Yehofa e yeepi u, a te u mu akisi u basi wantu dei fu go a konkelesi efuso taa wooko yuu di o meke a moo makiliki giw fu go na ala den komakandaa. Yo foondoo tei si fa Yehofa meke sani waka. Yo moo fitoow en tu.

17. Fa Esra soi taki a be abi sakafasi di sani be e miti en? (Luku a fowtow a fesise fu A Wakititolen.)

¹⁷ Esra soi taki a abi sakafasi di a begi Yehofa. Ala yuu te Esra be e booko en ede anga den sani di a be mu du, a be e begi Yehofa (Esra 8:21-23; 9:3-5). A be e fitoow Yehofa tu. Neen meke den sama di be de anga en be e holibaka gi en. Den be sa waka neen baka tu (Esra 10:1-4). Te we booko wi ede anga den sani wi osufamii abi fanowdu efuso fa wo kibii den gi ogii, u mu begi Yehofa fu a yeepi u.

18. Saw yeepi u fu moo fitoow Yehofa?

¹⁸ Efu wi abi sakafasi, wo begi Yehofa fu a yeepi u te sani e miti u. Wo meke taa baala anga sisa yeepi u tu. Efu we du den sani ya, wo moo fitoow Yehofa. Erika a wan mma di abi dii pikin. A be e biibi taki Yehofa be o yeepi en ala yuu, winsi fa omen ogii be e miti en. Wan fu den pikin fi en dede fosi a meke en. Aa langa seefi neen en man dede. A baka makandaa den sani ya miti en. Di a pakisei ala den sani di be miti en, neen a taki: ‘Ya poi sabi á fesi fa Yehofa o yeepi i. Son yuu ai yeepi ya wan fasi di ya be denki. Mi si fa Yehofa koboloiki den mati fu mi fu piki omen fu den begi fu mi anga den sani den be e taki, anga den sani di den be e du. Te mi e taigi den mati fu mi san a den sani di miti mi, ai moo makiliki gi den fu yeepi mi.’

19-20. Saw sa leli fu den Dyu di á be poi daai go a Yelusalem?

¹⁹ U sa leli wan sani fu den Dyu di á be poi daai go a Yelusalem baka. Son wan fu den á be poi go, bika den be gaandi. Taawan fu den be siki. Boiti dati, son wan fu den be abi fu du son sani aini den osufamii. Ma toku den be de kabakaba fu holibaka gi den Dyu di be daai go a Yelusalem baka. Bika den be gi den omen sani di den be abi fanowdu fu meke a tempel (Esra 1:5, 6). Baka wan sani fu 19 yali di den fosi kulu Dyu doo a Yelusalem, a gei enke den Dyu di be e tan a Babilon be gwenti sende sani go a Yelusalem ete.​—Sak. 6:10.

²⁰ Winsi wa poi du ala san u be sa wani du gi Yehofa, toku u sa biibi taki ai si ala den sani di we du gi en, winsi den ná ipi. Faw du sabi a sani ya? Aini a ten fu Sakaliya, Yehofa be taigi en taki a mu meke wan kownu-ati anga a solufu di den Dyu fu Babilon be sende gi den (Sak. 6:11). A ‘kownu-ati’ ya be o meke den ‘membee’ fa den be e gi sani anga den hii ati fu holibaka gi a wooko (Sak. 6:14). Noiti Yehofa o feegete a moiti di we meke fu dini en anga u hii ati, winsi fa sani e miti u.​—Heb. 6:10.

21. San o yeepi u fu wa feele te sani o miti wi aini a ten di e kon?

²¹ Fu di we libi aini den lasiti dei fu a goontapu ya, meke omen sani o go e miti u. Sani sa kon moo ogii aini a ten di e kon tu (2 Tim. 3:1, 13). Ma aa de fu u booko wi ede. Pakisei den sani di Yehofa be meke Hakai taigi a foluku fi en. A be taki: ‘Wa mu feele . . . Bika mi de anga u’ (Hak. 2:4, 5). Useefi sa biibi taki noiti Yehofa o gwe fika u te we meke moiti fu du sani enke fa a wani. U mu meke moiti fu wooko anga den sani di u leli fu den polofeititoli fu Hakai anga Sakaliya. U mu meke moiti fu waka a Esra baka tu. Efu we du den sani ya, da wo tan fitoow Yehofa winsi sowtu sani o miti wi aini a ten di en kon.