1-2. Sowtu wooko den owluman e du?

 EFII de wan dinali wan pisiten kaba, da kande ye meke moiti fu doo den maiki fu man toon wan owluman. I de kabakaba fu du a wooko di den owluman e du?​—1 Tim. 3:1.

² Sowtu wooko den owluman e du? Den e teke fesi aini a peleikiwooko, den e go luku den baala anga sisa fu sabi fa ai go anga den, den e wooko taanga fu gi a kemeente leli. Den e gi den baala anga sisa taanga-sikin anga den sani di den e taki anga den sani di den e du tu. Neen meke a nai foondoo u te Beibel e kai den owluman ‘mannengee di sabi du son sani’.​—Efe 4:8.

3. San wan baala mu du fu toon wan owluman? (1 Timotiyesi 3:1-7;Titesi 1:5-9)

³ Sai sa du fu toon wan owluman? A ná den sani di wan sama sabi du e meke a toon wan owluman. Tei mu du wan goontapu wooko, efii sabi du den sani di a basi wani i du, yo fende a wooko. Ma sani de taa fasi tei mu toon wan owluman. A ná sabi i mu sabi peleiki efuso sabi gi leli namo daa kaba, ma i mu doo den maiki di kai a 1 Timotiyesi 3:1-7 anga Titesi 1:5-9. (Leisi en.) Aini a artikel ya, wo luku dii sani di o yeepi wan baala fu toon wan owluman: A mu abi a wan bun nen aini a kemeente. A mu abi wan bun nen a taa sama tu. A mu e tyai en faantiwowtu enke osufamii edeman bun. Boiti dati, a mu de kabakaba fu yeepi a kemeente.

 I MU ABI WAN BUN NEN

4. San a wani taki fu ‘taawan á poi soi finga’ a yu?

⁴ Fu man toon wan owluman, da ‘taawan á mu poi soi finga’ a yu. Dati wani taki den sama aini a kemeente mu sabi yu enke wan sama di e tyai enseefi bun. Ma i ‘mu abi wan bun nen a sama di á de aini a kemeente’.  Sama di nai dini Yehofa o go e taki omen sani fu a biibi fii, ma efi ye tyai iseefi bun, den naw poi taki nawan sani ai tapu (Dan. 6:4, 5). Akisi iseefi taki: ‘Den baala anga sisa anga den sama di nai dini Yehofa sabi mi enke wan sama di e tyai enseefi bun?’

5. Fai sa soi taki i ‘lobi san bun’?

⁵ Efii ‘lobi san bun’, yo poti pakisei a den bun sani di taawan e du, yo gafa den fu a moiti di den e meke tu. Yo de kabakaba fu yeepi taawan a sani, winsi a sani di sama á be denki i be o du (1 Tes. 2:8). Saide owluman ‘mu lobi san bun’? Bika a sani ya o meke den e koboloiki den ten fu yeepi den baala anga sisa, den o meke moiti fu du den wooko fu den tu (1 Peit. 5:1-3). Winsi fa a wan taanga wooko de ya, toku a yeepi di den e yeepi taawan e meke den piisii.​—Toli 20:35.

6. San a wani taki fu ‘kai sama kon a yu osu’? (Hebrewsama 13:2, 16; luku a fowtow tu.)

⁶ Wan fasi fai sa soi taki ya wan sama di lobi ‘kai sama kon a yu osu’, a tei nai kai den mati fii wawan, ma ye kai taa sama tu (1 Peit. 4:9). Wan man di ondoosuku Beibel taki: ‘Wan sama di lobi kai sama kon neen osu, e soi switifasi gi sama di aa sabi, ai piisii fu kai den kon neen osu tu.’ Akisi iseefi taki: ‘Sama sabi mi enke wan sama di lobi kai taawan kon neen osu?’ (Leisi Hebrewsama 13:2, 16.) Wan baala di lobi kai sama kon neen osu e soi switifasi gi den sama di ai kai, sama enke den kelen-owluman, den baala di e kon holi lezing na a kemeente, anga gi pootiman.​—Gen. 18:2-8; Odo 3:27; Luk. 14:13, 14; Toli 16:15; Rom. 12:13.

7. Te Beibel e taki owluman ‘á mu lobi moni’, da san a sani ya wani taki?

⁷ ‘Den á mu lobi moni’. A sani ya wani taki owluman nai si gudu anga a fende di den mu fende hei posisi enke a moo pelensipali sani. Winsi den gudu efuso  pooti, toku den e si a Kownukondee fu Gadu enke a moo pelensipali sani aini den libi (Mat. 6:33). Den e koboloiki den ten, den kaakiti, anga ala den sani di den abi fu dini Yehofa anga fu yeepi a kemeente (Mat. 6:24; 1 Yoh. 2:15-17). Akisi iseefi taki: ‘Fa mi e si moni? A den sani di mi abi taanga fanowdu wawan mi e booko mi ede anga den? Na ala yuu mi e wani abi moo moni efuso moo sani?’​—1 Tim. 6:6, 17-19.

8. San a wani taki ‘fu ná du sani pasa peesi’? San a wani taki fu ‘dwengi iseefi’?

⁸ Efii nai ‘du sani pasa peesi’ neen i man ‘dwengi iseefi’, i naw go e suku fini tumisi, i naw go e du sani pasa peesi tu. Dati wani taki i naw nyan efuso diingi pasa maiki. A fasi fa ye wei koosi anga a fasi fa ye seeka yu uwii, o soi taki yu abi sakafasi. Yo du sani anga koni tu te ye meke piisii. Boiti dati, i naw du sani enke den sama di nai dini Yehofa (Luk. 21:34; Yak. 4:4). Ye dwengi iseefi winsi taawan nai libi bun anga i. Ya nawan ‘sopiman’. Sama mu sabi yu enke wan sama di nai diingi pasa maiki. Akisi iseefi taki: ‘A fasi fa mi e libi e soi taki mi e du sani pasa peesi? A fasi fa mi e libi e soi taki mi man dwengi miseefi?’

9. Te Beibel e taki fu de anga ‘kiin fusutan’ da san a sani ya wani taki? Te Beibel e taki owluman á mu du sani ‘fanyafanya’ da san a sani ya wani taki?

⁹ Wan sama di de anga ‘kiin fusutan’, e luku san Beibel e taki fosi a du wan sani. Ye teke ten pakisei san Beibel e taki fu a sani dii wani du, bakadati ye teke wan bun bosoloiti. I nai feti du sani, ma ye teke ten ondoosuku fa a sani de tuutuu fosi i teke wan bosoloiti (Odo 18:13). A so yo du sani enke fa Yehofa wani. Wan sama di nai du sani ‘fanyafanya’, e du den sani di a mu du bun. Sama o sabi yu enke wan sama di den sa fitoow. Ye wooko anga san den baala taki tu. Efi ye meke moiti fu abi den manii di u taki aini den paragraaf ya, yo abi wan bun nen. Meke u taki now fu den sani di Beibel e taki wan owluman mu du fu de wan bun osufamii edeman.

MEKE MOITI FU DE WAN BUN OSUFAMII EDEMAN

10. Fa wan ‘man sa tii en osufamii bun’?

¹⁰ Efi ya wan baala di abi osufamii, neen i wani doo den maiki fu toon wan owluman, da den sama fii mu e tyai denseefi bun. ‘I mu man tii yu osufamii bun’ tu. Dati wani taki i mu e solugu yu osufamii, i mu e du sani di e tyai wini gi a osufamii fii. I mu e holi a Osufamii Anbegi, den sama fii mu e go a den komakandaa, den mu e du ala san den poi aini a peleikiwooko tu. Saide a sani ya pelensipali? Apostel Pawlesi be taki: ‘Efu wan man á sabi fa a mu tii en osufamii, da fa aw solugu a kemeente?’​—1 Tim. 3:5.

11-12. Saide den pikin fu wan baala di wani toon owluman mu e tyai denseefi bun? (Luku a fowtow tu.)

¹¹ Efi ya wan dda, den pikin fii mu e aliki yu ala yuu, moomoo efi yu anga den e tan aini a wan osu neen den á doo 18 yali ete. I mu leli den, i mu abi pasensi anga den tu te ye soi den fa den mu du sani. U sabi taki i wani den pikin fii de koloku. I wani den e piisii leti enke fa ala taa pikin e piisii. I wani den e pee tu. I mu leli den fu den abi a gwenti fu aliki i, den mu e lesipeki taa sama. Den mu e tyai denseefi bun tu. Boiti dati, i mu yeepi den pikin fii fu den anga Yehofa toon mati. Den mu e wooko anga san Beibel taki. Den mu meke moiti fu doo a maiki fu dopu efu den á dopu ete.

 ¹² ‘Den pikin fi en mu de a biibi. Den á mu e libi wan yayolibi. Den mu e teke taki.’ Efu wan pikin fu wan baala di de enke dinali efuso owluman du wan gaan sondu, neen aa be e puu kaasi gi en efuso kande aa be e si a sani di a pikin e du fu wan gaan sani, da a naw poi tyai a faantiwowtu fi en moo.​—Luku a Saanantongo Wakititolen fu 15 oktober 1996 blz. 21, par. 6-7.

SOLUGU A KEMEENTE

13. Fa owluman sa soi taki den e ‘fiti denseefi makiliki a taawan’? Fa den o soi taki den nai du sani ‘namonamo enke fa den wani?

¹³ Baala di abi den manii di wan Kelesten mu abi, de wan gaan yeepi gi a kemeente. Wan sama di ‘poi fiti enseefi makiliki’, e libi bun anga taawan, ai yeepi den fu libi na a wan. Sowan sama e aliki taawan tu te den e taki, ai meke moiti fu fusutan fa den e fii. Efu den taa owluman teke wan bosoloiti di e kai anga den leli fu Beibel, yo holibaka gi den winsi i be o du sani taa fasi? Ya mu de ‘namonamo fu du sani enke fai wani’. A sani ya wani taki ye gi taawan a okasi fu du sani enke fa den wani (Gen. 13:8, 9; Odo 15:22). Ya mu de wan sama di e ‘suku toobi’, ‘yu ati a mu e boon gaw tu’. A sani ya wani taki ye lesipeki taawan. I mu e soi switifasi gi den. Sowan sama e meke moiti fu libi bun anga taawan tu, winsi aa makiliki (Yak. 3:17, 18). U mu e taki switi anga taawan ala yuu, winsi a wan sama di nai wani aliki u, bika a sani ya sa koo en ati.​—Kuut. 8:1-3; Odo 20:3; 25:15; Mat. 5:23, 24.

14. Te Beibel e taki a baala á mu ‘de wan sama di daai en libi taadeya’, da san a sani ya wani taki? San wani taki a baala ‘mu e dini Gadu anga en hii ati’?

¹⁴ Wan baala di wani toon owluman ‘á mu de wan sama di daai en libi taadeya’. Winsi ya dopu langa ete, toku i mu meke moiti fi yu anga Yehofa toon bun mati. I mu e wooko anga a Beibel fu sabi fai mu du sani. Fosi i toon wan owluman, i mu soi kaba taki i poi tyai a faantiwowtu. Leti enke Yesesi, i mu abi sakafasi.  I mu wakiti Yehofa te enke enseefi gi yu a faantiwowtu (Mat. 20:23; Filip. 2:5-8). Ye soi taki ye ‘dini Gadu anga i hii ati’  te ye du sani enke fa a wani anga te ye wooko anga den sani di a olikanisâsi fi en e leli u.​—1 Tim. 4:15

15. A namonamo wan owluman mu de wan bun takiman?

¹⁵ Enke fa a tekisi e soi, da wan owluman mu ‘sabi gi leli’. A sani ya wani taki, a soso moin lezing a baala mu e holi? Nono. A ná ala owluman e holi lezing na aseefi fasi, ma tokuso te den e peleiki anga te den e go luku den baala anga sisa a osu, den e koboloiki Beibel fu leli den anga fu gi den taanga-sikin (1 Kor. 12:28, 29; Efe. 4:11). Winsi ya ná wan bun takiman, tokuso i sa meke moiti fu toon wan moo bun leliman. Fai sa du a sani ya?

16. Fai sa toon wan moo bun leliman? (Luku a fowtow tu.)

¹⁶ ‘Te ai gi leli, a mu du sani finifini enke fa a bosikopu di u sa fitoow e soi.’ Efii wani de wan bun leliman, da den sani di ye taki te ye gi leli mu e kai anga san Beibel e taki. I mu e du a sani ya tu te ye poti den baala anga sisa a pasi. Fu man du a sani ya, i mu e sutudeli Beibel anga den buku fu a olikanisâsi (Odo 15:28; 16:23; Tit. 1:9). Te ye sutudeli anga iseefi, meke moiti fu si fa den buku fu we tyai den Beibel tekisi kon a kiin, da yo man koboloiki den a wan bun fasi. Te ye gi leli, meke moiti fu doo den baala anga sisa ati. Yeepi den fu du san den leli tu. Boiti dati, i sa toon wan moo bun leliman te ye akisi den taa owluman di abi ondoofeni fai sa du son sani moo bun. I mu wooko anga den sani di den e taigi i (1 Tim. 5:17). Owluman mu ‘man gi taawan taanga-sikin’, den mu ‘poi poti taawan a pasi’ te a de fanowdu. Den mu e soi switifasi ala yuu. Den mu abi sakafasi. Efu den e meke moiti fu waka a Yesesi baka, a moo Gaan Leliman fu u, den o de wan bun leliman.​—Mat. 11:28-30; 2 Tim. 2:24.

 TAN MEKE MOITI FU GO A FESI

17. (a) Saw yeepi wan dinali fu tan go a fesi? (b) San den owluman mu holi a pakisei te den o poti wan baala enke owluman? (Luku a faki di den e kai ‘ Ná suku fini tumisi te ye luku efu wan baala doo den maiki fu toon wan owluman’.)

¹⁷ Te son dinali luku den sani di wan baala mu du fu toon wan owluman, den e si enke noiti den o man doo a maiki ya. Ma i mu holi a pakisei taki Yehofa anga a olikanisâsi fi en nai luku taki i mu du ala den sani ya finifini (1 Peit. 2:21). A santa yeye fu Yehofa o yeepi i fu doo den maiki dii mu doo (Filip. 2:13). Yu abi wan manii dii mu wooko neen? Begi Yehofa fu a yeepi i. Ondoosuku moo sani aini den buku fu u di e taki fu a maiki dii wani doo. I sa akisi wan owluman fu yeepi i fu du sani moo bun tu.

18. San ala dinali mu meke moiti fu du?

¹⁸ Dinali anga owluman mu meke moiti fu du den sani di u taki aini a artikel ya (Filip. 3:16). Yu a wan dinali? Tan meke moiti fu go a fesi. Akisi Yehofa fu a yeepi i fu tan dini en anga fu du moo aini a kemeente (Yes. 64:8). Meke Yehofa belesi a moiti di ye meke fu toon wan owluman.