1. Saide u sa leli wan sani fu den gaansama?

 ALA wi abi yeepi fanowdu fu teke bun bosoloiti. Omen fu den sama di sa yeepi u fu du a sani ya, a den owluman fa kemeente anga den baala anga sisa di abi ondoofeni. Winsi den gaandi moo u, tokuso u mu aliki den. Wa mu si enke den sani di den e taigi wi a ná fu a ten ya. Yehofa wani u leli wan sani fu den. Fu di den abi moo ondoofeni, meke a omen sani den sa leli u fu u sa teke bun bosoloiti.​—Yopu 12:12.

2. San wo luku aini a artikel ya?

² Aini a ten fu Beibel, Yehofa be e koboloiki gaansama di be e dini en anga den hii ati fu gi a foluku fi en deki-ati anga fu poti den a pasi. Meke u luku a toli fu Mosesi, David anga apostel Yohanisi. Den á be e libi na aseefi ten, a ná aseefi sani be miti den tu. Winsi fa den be kon gaandi kaba, toku den be e leli den moo yonkuuwan fu du sani anga koni. Ala den man ya be soi taki a pelensipali fu aliki Gadu. Yehofa meke den sikiifi den toli ya aini Beibel fu leli u wan sani. Winsi u yonkuu efuso gaandi, tokuso ibiiwan fu u sa leli wan sani fu den (Rom. 15:4; 2 Tim. 3:16). Aini a artikel ya, wo luku san a den lasiti sani di den man ya be taki anga saw sa leli fu den.

‘NEEN O MEKE U LIBI LANGA’

3. Fa Mosesi be e dini Yehofa? Fa a be e yeepi a foluku?

³ Mosesi wooko taanga gi Yehofa en hii libi langa. A be e dini Yehofa enke polofeiti, kuutubakaa, anga fesiman. Boiti dati, a sikiifi omen buku fu Beibel. A omen sani be  miti en. A be fii a foluku Islayeli puu a katibo a Egepte. A be si omen fu den wonduu di Yehofa be du tu. Yehofa koboloiki en fu sikiifi den fosi feifi buku fu Beibel anga Psalm 90. A gei enke neen sikiifi Psalm 91. Neen sikiifi a buku fu Yopu tu.

4. Sama Mosesi be e gi taanga-sikin?

⁴ Fosi Mosesi dede, a pisiten di a be abi 120 yali, a be kai ala den Islayelisama kon a wan fu membee den taki den á mu feegete den sani di Yehofa du gi den. Wantu yali a fesi a omen fu den Islayelisama be si den wonduu di Yehofa be du. Den be si fa a be e sitaafu den Egeptesama (Ek. 7:3, 4). Den be si fa Yehofa be paati a wataa fu a Lebi Ze. A doti be dee kasaa di den be e abaa go na a taase. Bakadati den si fa Yehofa kii Farao anga den suudati fi en (Ek. 14:29-31). Di den be de aini a sabana, den be si fa Yehofa be e solugu den (Deit. 8:3, 4). Di a yuu doo fu den Islayelisama go aini a Paamisi Kondee, Mosesi gi den taanga-sikin fosi a dede. a

5. San den Islayelisama be mu du fu be man fende den sani di Mosesi taki a Deitolonomi 30:19, 20?

⁵ San Mosesi be taki? (Leisi Deitolonomi 30:19, 20.) A be membee a foluku fu Islayeli taki den be o abi wan bun libi aini a ten di e kon. Fu di Yehofa be o belesi den Islayelisama, meke den be o man libi langa aini a Paamisi Kondee. A kondee be moin, a be e goo nyannyan tu. Mosesi be taigi den taki: ‘A kondee o abi gaan moin foto di useefi á meke anga ana. A omen moin sani o de aini den osu, ma a naw poti den sani ya aini. A omen wataa peti o de di useefi á diki, a omen doloifigoon anga oleifibon o de di useefi á paandi.’​—Deit. 6:10, 11.

6. Saide Yehofa be meke taa foluku wini den Islayelisama?

⁶ Mosesi be wasikoi den Islayelisama taki efu den be wani tan aini a kondee di Yehofa be paamisi den, da den be mu holi den weiti fi en. A be taigi den taki den mu ‘teke a libi’, den be mu aliki Yehofa. Den á be mu ‘gwe fika en’. Tokuso den Islayelisama ná aliki en. Neen meke Yehofa be meke den Asiriyasama wini den. Bakadati den Babilonsama teke a kondee fu den abaa, neen den tyai den gwa katibo.​—2 Kow. 17:6-8, 13, 14; 2 Kolon. 36:15-17, 20.

7. Saw sa leli fu den sani di Mosesi taki? (Luku a fowtow tu.)

⁷ San a toli ya e leli u? Efu we aliki Yehofa, wo libi fu teego. Leti enke den Islayelisama di be de koosube fu go aini a Paamisi Kondee, a so useefi de koosube fu go aini a nyun goontapu di Yehofa paamisi u (Yes. 35:1; Luk. 23:43). Saatan anga den ogii yeye fi en naw de ape (Openb. 20:2, 3). Nawan falisi keliki naw de moo di o leli sama lei fu Yehofa (Openb. 17:16). Nawan tiimakiti naw de moo di e fooseli libisama (Openb. 19:19, 20). Nawan ogii sama naw de aini a paladeisi (Ps. 37:10, 11). Ala den sama di o de aini a paladeisi o aliki Yehofa, neen meke freide o de. Den o lobi denseefi, den o fitoow denseefi tu (Yes. 11:9). Wa poi wakiti fu a ten de doo. Efu we aliki Yehofa, a ná fu wantu ondoo yali namo wo tan aini a paladeisi, ma a fu teego.​—Ps. 37:29; Yoh. 3:16.

8. Fa a libi di wo libi fu teego be yeepi wan zendeling? (Yudasi 20, 21)

 ⁸ Te we teke ten pakisei den sani di Yehofa paamsi u, a sani ya o yeepi u fu aliki Yehofa, winsi sowtu polobelema e miti u. (Leisi Yudasi 20, 21.) Den sani di Yehofa paamisi we yeepi u fu feti anga den swakifasi fu u tu. Wan zendeling baala di be e dini Yehofa omen yali na Afiikan be e fii fu du sani di Yehofa á lobi. A taki: ‘Mi be fusutan taki mia be o poi libi fu teego aini a paladeisi efu mia be e aliki Yehofa. A sani ya yeepi mi fu feti anga a swakifasi di mi be abi, mi be e begi Yehofa fu a yeepi mi. Neen meke mi be man wini a swakifasi fu mi bakaten.’

‘SANI O WAKA BUN ANGA I’

9. Sowtu tesi be miti David?

⁹ David a be wan bun Kownu. En a be wan pokuman, a be e sikiifi nongo, a be de wan bun fetiman tu. Boiti dati, en a be wan polofeiti. A omen sowtu tesi be miti en. A omen yali langa a be de a lon tapu, bika Kownu Saul be wani kii en. A be e dyalusu anga David. Di David toon Kownu, a be abi fu kibii gi en boi Absalom, bika a be wani teke en peesi enke kownu. Enke faw si da a omen sani be miti David, a be meke wantu gaan fowtu tu, toku a tan dini Gadu fu te enke en boo koti. Yehofa be taki David a wan man di ‘e meke a piisii’. A omen wini wo fende efu we wooko anga den sani di David taki.​—Toli 13:22; 1 Kow. 15:5.

10. Saide David be poti en boi Salomo a pasi fosi a be toon Kownu?

¹⁰ Luku san David be taigi Salomo. A Yehofa seefi be teke Salomo fu meke a tempel pe sama be o go dini en (1 Kolon. 22:5). A wan gaan wooko Salomo be mu du, neen meke a be abi Yehofa fanowdu fu yeepi en fu tii a foluku. San David be taigi en? Meke u go luku.

11. Enke fa 1 Kownu 2:2, 3 e soi, da san David be taigi Salomo taki a mu du? San pasa di Salomo du san David taigi en? (Luku a fowtow tu.)

¹¹ San David be taki? (Leisi 1 Kownu 2:2, 3.) David be taigi en boi taki efu a aliki Yehofa, aw de wan bun tiiman, a be o belesi en tu. A omen yali langa Yehofa du bun gi Salomo. A omen sowtu fasi a be e yeepi en (1 Kolon. 29:23-25). A be meke wan gendee tempel, a sikiifi wantu Beibelbuku tu. Boiti dati, wantu fu den sani di a be taki de aini den taa pisi fu Beibel. Fu di a be koni, meke a be toon wan balinen kownu, a be gudu tu (1 Kow. 4:34). Ma enke fa David be taki, da sani be o waka bun gi Salomo te a be e aliki Yehofa. A tyali taki di Salomo be kon moo gaandi a bigin dini taa Gadu. Yehofa á be  lobi a sani de. Neen meke aa be e gi Salomo koni moo fu tii a foluku a wan letifasi.​—1 Kow. 11:9, 10; 12:4.

12. Saw sa leli fu den sani di David be taki?

¹² San a toli ya e leli u? Efu we aliki Yehofa, aw belesi u, aw yeepi u tu (Ps. 1:1-3). A tuu taki Yehofa naw meke u gudu efuso abi balinen enke Salomo. Ma efu we aliki Gadu, aw kibii u, aw yeepi u fu du sani anga koni (Odo 2:6, 7; Yak. 1:5). Den leli di Yehofa e gi we yeepi u fu teke bun bosoloiti te u mu suku wan wooko, te u de a sikoo, te a abi fu du anga moni, efuso den sani di we du fu meke piisii. Te we du sani enke fa Yehofa wani, wi anga en naw poli, wo fende teego libi (Odo 2:10, 11). Wo abi bun mati. Wi osulibi o waka bun tu.

13. San yeepi Carmen fu du sani taafasi?

¹³ Carmen a wan sisa di e tan a Mosambik. A be e denki taki efu a wani meke en aini a libi, da a be mu go a hei sikoo. Neen meke a go a universiteit fu leli teken osu di sama o meke bakaten. A taki: ‘Mi lobi den sani di mi be e leli. Ma a be e teke gaanse fu mi ten anga mi kaakiti. Mi be e go a sikoo halufu aitin mmanten te anga sigisi yuu bakadina. Boiti dati, a be e taanga gi mi fu go a den komakandaa. Neen meke mi anga Yehofa á be de enke faw be de fosi moo. Mi be kon fusutan taki mi be e puubei fu dini tu masaa’ (Mat. 6:24). A begi Yehofa fu a yeepi en, neen a ondoosuku moo sani aini den buku fu u di be o yeepi en. A taki: ‘Baka di den owluman anga mma yeepi mi, mi fika a sikoo, neen mi go du a fuuten diniwooko. Na a moo bun sani di mi be sa du, mi e piisii taki mi du a sani ya.’

14. San na a bosikopu fu Mosesi anga David?

¹⁴ Mosesi anga David be lobi Yehofa. Den be sabi taki a pelensipali fu aliki en tu. Neen meke den be e gi taawan taanga-sikin fu waka a den baka, anga fu dini Yehofa anga den hii ati. Den be e wasikoi den tu taki efu den nai dini Yehofa anga den hii ati, den anga en naw de mati moo. Aa be o kibii den moo tu. Den leli fu den e yeepi wi aini a ten ya ete. Baka  wantu ondoo yali, wan taa sama di be e dini Yehofa anga en hii ati be soi on pelensipali a de fu tan du sani enke fa Yehofa wani.

‘SANI Á DE DI E GI MI PIISII SO’

15. San a wantu sani di apostel Yohanisi be si?

¹⁵ Yohanisi a be wan koosube mati fu Yesesi Kelestesi (Mat. 10:2; Yoh. 19:26). A be lobi peleiki makandaa anga Yesesi. A be e si fa a be e du omen wonduu, neen meke a be e holibaka gi en ala yuu. Yohanisi be si fa den be kii Yesesi, a be si en baka di a weki baka tu. A be si fa a Kelesten kemeente be e goo. Boiti dati, a be libi langa, neen meke a be si fa a bun nyunsu be ‘peleiki gi ala sama na ala se’.​—Kol. 1:23.

16. Sama e fende wini fu den buku di Yohanisi sikiifi?

¹⁶ Di Yohanisi be kon gaandi a be fende a gaandi fu sikiifi a Beibelbuku Openbaring (Openb. 1:1). A Yohanisi sikiifi wan fu den buku di e taki fu a libi fu Yesesi. Neen nen de na a buku ya. Boiti dati, a be sikiifi dii biifi. Den buku ya a 1 Yohanisi, 2 Yohanisi anga 3 Yohanisi. Yohanisi be sikiifi a du fu dii biifi gi wan mati fi en di a be lobi. Den be e kai a man ya Gayus. A man ya be e dini Yehofa anga en hii ati (3 Yoh. 1). A omen taa sama be de di Yohanisi be e si enke en pikin di a lobi, den be e dini Gadu anga den hii ati tu. Den sani di a sikiifi e gi ala den bakaman fu Yesesi aini a ten ya taanga-sikin.

17. Enke fa 3 Yohanisi 4 e soi, da sai meke we piisii?

¹⁷ San Yohanisi be taki? (Leisi 3 Yohanisi 4.) Aini du fu dii biifi di Yohanisi be sikiifi, a be taki sani á de di e gi en piisii enke te a yee taki den pikin fi en e du san den leli. A pisiten di a be e sikiifi a buku ya, son sama be e paati falisi leli aini a kemeente. A sani ya meke den á be e libi na a wan moo. Ma i be abi sama ‘di be e libi enke fa a tuu leli fu Gadu e taki’. Den be e aliki Yehofa, den be e ‘du sani enke fa a wowtu fu Gadu e taki’ (2 Yoh. 4, 6). A ná Yohanisi wawan den Kelesten ya be e meke piisii, ma den be e meke Yehofa piisii tu.​—Odo 27:11.

18. Saw sa leli fu den sani di Yohanisi taki?

¹⁸ San a sani ya e leli u? Te we tan dini Yehofa anga u hii ati, wo piisii, ma taawan  o piisii tu (1 Yoh. 5:3). We piisii fu di u sabi taki we du sani di e meke Yehofa piisii. Ai piisii te we aliki en (Odo 23:15). Den engel a hemel seefi e poolo (Luk. 15:10). Useefi e piisii tu te we si fa den baala anga sisa fu we holidoo, winsi sama e libi ogii anga den. We piisii te den e holidoo winsi fa sama e wani dwengi den fu du sani di Yehofa á lobi (2 Tes. 1:4). Te Yehofa o poli a goontapu fu Saatan ya, wo piisii fu di u sabi taki wa gwe fika en.

19. San wan sisa den e kai Rachel taki te ye peleiki gi taa sama? (Luku a fowtow tu.)

¹⁹ Ná pikin piisii we piisii te we leli taawan sani fu Yehofa. Rachel a wan sisa di e tan a Dominika Republiek. A taki a wan gaandi wi abi fu leli taawan sani fu a Gadu fu u Yehofa. Te ai pakisei den sama di a yeepi fu kon dini Yehofa, ai taki: ‘Mia poi taki fa mi e fii te mi e luku fa den sama di mi yeepi fu kon dini Yehofa lobi en. Den e fitoow en tu. Den e du ala san den poi fu meke Yehofa piisii. A sani ya e meke mi e feegete ala den moiti di mi be mu meke fu yeepi den.’

DEN WINI DI WE FENDE FU DEN LASITI WOWTU DI DEN MAN DI BE E DINI YEHOFA ANGA DEN HII ATI BE TAKI

20. Saide u sa taki wi anga Mosesi, David anga Yohanisi na aseefi?

²⁰ A senten Mosesi, Yohanisi anga David be de a libi. Neen meke a ten di den be de a libi anga a ten fu u ya a ná aseefi. Den be e dini a tuu Gadu leti enke u. Leti enke den we begi Yehofa, we fitoow en tu. Boiti dati, we suku yeepi neen. Leti enke den man ya, we biibi taki Yehofa e belesi den sama di e aliki en.

21. Efu we aliki Yehofa, neen we wooko anga den sani di Mosesi, David anga Yohanisi be taki, da sowtu belesi wo fende?

²¹ U mu tan wooko anga den sani di den man ya be taki. U mu aliki Yehofa. Te we aliki Yehofa sani o waka bun anga u, aw gi u teego libi tu (Deit. 30:20). We piisii te we du sani enke faw Dda di de a hemel wani. Aw belesi wi a wan fasi di useefi á be denki.​—Efe. 3:20.