AI TAANGA gii fu sutudeli anga iseefi ala wiki? Ye fuka tei mu sutudeli anga iseefi? Son yuu a so we fii. Ma pakisei den sani di u gwenti du ala yuu, sani enke wasi. Wasi e teke ten, ma tei kaba wasi ye fii bun. A so a de tu te we sutudeli anga useefi, ai meke u fii bun (Efe. 5:26). Meke u luku wantu sani di sa yeepi i:

• Meke wan sikeima. A sutudeli di u mu e sutudeli anga useefi, a wan fu den moo ‘pelensipali sani’ di ala Kelesten mu du (Filip. 1:10). Efi ya wani feegete a yuu dii poti fu sutudeli, i sa sikiifi a dei anga a yuu poti a pampila. Bakadati poti en a wan peesi pei sa si en makiliki, efuso kande i sa poti wan alarm ai telefon.

• Luku san moo bun gii. San moo makiliki gii te ye sutudeli? A moo bun gii te ye sutudeli wan yuu langa, efuso fu sutudeli wan toli wantu leisi? We, iseefi sa luku san moo makiliki gii. Efii nai fii fu sutudeli te a yuu fii doo, da saide i nai puubei fu sutudeli tin miniti? Winsi a tin miniti namo i sutudeli, toku i sa leli omen sani. Kande baka den tin miniti yo wani sutudeli moo langa, bika a be switi gii dii be e sutudeli.​—Filip. 2:13.

• Luku a fesi san yu wani sutudeli. Efu a te a yuu doo fu sutudeli fosi yo denki san yo sutudeli, ‘i naw koboloiki i ten bun’ (Efe. 5:16). Kande i sa sikiifi den sani dii wani sutudeli a pampila. Kande a wan akisi kon aini yu ede dii wani fende a piki fi en, i sa sikiifi en. Ala yuu baka tei kaba sutudeli, i sa sikiifi wan taa toli dii wani sutudeli.

• Fiti iseefi. A moo pelensipali sani a taki i mu e sutudeli ala wiki. Ma fu man du a sani ya ala wiki, dai mu poti a dei, a yuu, anga on langa i wani sutudeli. I mu sabi sai wani sutudeli tu.

A omen wini yo fende efi ye sutudeli anga iseefi ala wiki. Yu anga Yehofa o toon moo bun mati, yo go e fii bun tu.​—Yow. 1:8.