1-2. San a wantu fasi fa sama sa libi ogii anga u?

 YESESI be gi wan ageisitoli fu wan uman di be e begi wan kuutubakaa fu yeepi en, bika sama be libi ogii anga en. Den bakaman fu Yesesi be fusutan fa a uman aini a ageisitoli be e fii, bika sama be gwenti libi ogii anga taawan a ten de (Luk. 18:1-5). Useefi e fusutan fa a uman ya be e fii tu, bika a omen sani sama e du anga wi aini a ten ya.

² Aini a ten ya sama nai kuutu sani a wan letifasi. Son sama e paatibee, den e libi ogii anga taawan. Neen meke u nai foondoo te den sani ya e miti u (Peleik. 5:8). Ma a sani di sa meke u fii moo booko-saka, a te wan baala efuso sisa libi ogii anga u. Bika we si enke a sani ya naw pasa. U sabi taki den baala anga sisa fu wa de enke den sama di e buuse u. Ma fu di den abi sondu, meke den sa du wan sani di wa lobi. Neen meke a omen sani u sa leli te we luku a fasi fa Yesesi be e tyai enseefi te sama be e libi ogii anga en. Efu we pasensi anga den sama di e libi ogii anga u, daw mu moo pasensi anga den baala anga sisa fu u. Ma fa Yehofa e fii te taa sama, efuso baala anga sisa aini a kemeente e libi ogii anga u? Ai booko en ede anga u?

3. Yehofa e booko en ede anga a fasi fa sama e libi anga den sama di e dini en?

³ Yehofa wani sani go bun anga u. Neen meke ai si te sama e libi ogii anga u. ‘A lobi te sani e waka a wan letifasi’ (Ps. 37:28). Yesesi be taki Yehofa ‘o meke sani waka  a wan letifasi . . . ‘a naw daaidaai’ di a yuu fi en o doo (Luk. 18:7, 8). Dyonson aw puu ala den sani di e gi u booko-ede. Noiti moo sama o libi ogii anga u.​—Ps. 72:1, 2.

4. Fa Yehofa e yeepi wi aini a ten ya?

⁴ Winsi fa we wakiti a ten pe Yehofa o puu ala den booko-ede fu u, tokuso a nownow kaba ai yeepi u te sama e libi ogii anga u (2 Peit. 3:13). Yehofa e soi u saw mu du te taawan du wan sani anga u fu wa meke sani kon moo ogii. We si a sani ya aini Beibel te we luku a fasi fa en Manpikin be e tyai enseefi te sama be e libi ogii anga en. Ai gi u leli aini Beibel tu di e soi u saw mu du te a sani ya pasa.

LUKU BUN SAN YO DU TE DEN E LIBI OGII ANGA I

5. Saide u mu luku bun san wo du te den e libi ogii anga u?

⁵ Te sama e libi ogii anga u, a sani ya sa meke u fii booko-saka (Peleik. 7:7). Yopu anga Habakuk a sama di be e dini Yehofa anga den hii ati, ma tokuso denseefi be e fii booko-saka tu (Yopu 6:2, 3:2, 3; Hab. 1:1-3). Winsi fa aa fowtu fu fii so, toku u mu luku bun, bika u sa du sani di á bun.

6. San a toli fu Absalom e leli u? (Luku a fowtow tu.)

⁶ Te wan sama libi ogii anga u, son yuu efu wa luku bun we wani du wan sani anga en baka. Ma a sani ya sa meke a polobelema kon moo bigi. Luku a toli fu Absalom, a boi fu Kownu David. Di Amnon a baala fu den be suwa anga en sisa Tamar, ná pikin boon en ati be boon. Boiti dati, a Weiti fu Mosesi be e soi taki a be mu dede fu a sani di a du (Lef. 20:17). Aa fowtu taki Absalom ati be boon, ma aa be abi a leti fu kii Amnon.​—2 Sam. 13:20-23, 28, 29.

7. San a psalm sikiifiman be taki di a be si fa sama be e du ogii?

⁷ Te sani e go bun anga den sama di e du ogii, a sani ya sa meke we si enke a sosokaali we meke moiti fu du san bun. Wan psalm sikiifiman be taki a be e si fa den ogii sama be e libi ogii anga sama di á du nawan ogii. A be e si tu taki den ogii sama libi e waka bun. A taki: ‘A so den ogii sama tan. Den naabi nawan booko-ede’ (Ps. 73:12). Ná pikin boon en ati be  e boon di a be e si a sani ya e pasa. A be e si enke a sosokaali ai dini Yehofa. A taki: ‘Mi be e meke moiti fu fusutan a sani ya, ma a be e hati mi’ (Ps. 73:14, 16). Bakaten a taki: ‘Beina mi komoto na a pasi. Pikin moo mi gaata kai’ (Ps. 73:2). Na aseefi sani ya be miti wan baala den e kai Alberto. a

8. Sowtu ogii be miti wan baala?

⁸ Den be lei gi Alberto taki a be fufuu a moni fu a kemeente. A sani ya meke aa be poi du a owluman wooko moo. Boiti dati, den baala anga sisa di be e biibi taki a fufuu a moni á be e lesipeki en moo. A taki: ‘Mi ati be boon, mi be e fii booko-saka tu.’ Aa be e go a den komakandaa moo. A feifi yali langa aa be e du den sani di wan Kotoigi mu du moo. A toli ya e soi u san sa miti u efu u nai meke moiti fu basi den fii fu u te sama e libi ogii anga u.

MEKE MOITI FU WAKA A YESESI BAKA TE SAMA E LIBI OGII ANGA I

9. San a wantu sani di be miti Yesesi? (Luku a fowtow tu.)

⁹ Yesesi soi u saw mu du te sama e libi ogii anga u. A omen sama be e libi ogii  anga en. Den famii fi en be e libi ogii anga en tu, den be taki en ede nai wooko bun. Den kelikifesiman be taki a Didibii e gi en kaakiti. Bakaten den suudati fu Rome be e soso en, den pina en te enke den kii en (Malik. 3:21, 22; 14:55; 15:16-20, 35-37). Winsi fa sama be e du ala den ogii ya anga Yesesi, toku noiti aa du ogii anga den baka. San a toli ya e leli u?

10. San Yesesi be e du te sama be e libi ogii anga en? (1 Peitilisi 2:21-23)

¹⁰ Leisi 1 Peitilisi 2:21-23. b U sa waka a Yesesi baka te sama e libi ogii anga u. A be sabi on ten a mu de pii anga on ten a be mu taki (Mat. 26:62-64). Son yuu te den be e lei gi en aa be e piki den (Mat. 11:19). Te a be e taki, aa be e taki sani fu hati den sama di be e libi ogii anga en. A be e dwengi enseefi, a be e ‘fika ala sani aini Gadu ana, bika a sabi taki neen e kuutu sani a wan letifasi’. Yesesi be sabi taki a fasi fa Yehofa e si sani moo pelensipali. A be sabi taki di a yuu fu Yehofa o doo, aw kuutu den sama di e libi ogii anga taawan.

11. Faw sa soi taki we luku bun san we taki? (Luku den fowtow tu.)

¹¹ U sa waka a Yesesi baka te we luku san we taki te sama e libi ogii anga u. Son sani di sama e du anga u nai bigi so, neen meke we fika a taki. Son yuu a moo bun fu wa taki nawan sani, da sani naw kon moo ogii (Peleik. 3:7; Yak. 1:19, 20). Ma son leisi wi abi fu taki, kande efu u si taki wan sama du wan sani di á bun  efuso te u mu opo taki gi a biibi fu u (Toli 6:1, 2). Ma te wo taki tu, u mu taki a wan lesipeki fasi.​—1 Peit. 3:15. c

12. Faw sa soi taki we fitoow ‘a Sama di e kuutu sani a wan letifasi’?

¹² U sa waka a Yesesi baka te we fitoow ‘a Sama di e kuutu sani a wan letifasi’. Te sama lei gi u efuso libi ogii anga u, u sa fitoow Yehofa, bika a sabi ala sani. A sani ya o yeepi u fu holidoo te sama e libi ogii anga u, fu di u sabi taki Yehofa e kuutu sani a wan letifasi. Te we fika sani gi Yehofa, u naw holi taawan na ati. Bika a sani ya sa meke u nai piisii moo, a sa poli wi anga Yehofa tu.​—Ps. 37:8.

13. Saw yeepi u fu holidoo te sama e libi ogii anga u?

¹³ Wa poi du sani pilisisi enke Yesesi, bika son yuu we du efuso taki sani di e hati u bakaten (Yak. 3:2). Boiti dati, u nai poi feegete son sani di sama du anga u. Efu a sani ya e miti i, i sa biibi taki Yehofa e si ala sani. Yesesi seefi e fusutan fa ye fii tu, bika sama be libi ogii anga en (Heb. 4:15, 16). Boiti taki u sa waka a Yesesi baka, Yehofa e soi u saw mu du te sama e libi ogii anga u. Meke u luku tu vers aini a Beibelbuku Romesama di sa yeepi u.

‘FIKA EN GI EN’

14. San a wani taki fu ‘fika en gi en’? (Romesama 12:19)

¹⁴ Leisi Romesama 12:19. Di Pawlesi be e taigi den Kelesten taki den mu ‘fika en gi en’, sama a be e taki? Enke fa den taa pisi fu a tekisi e soi da a Yehofa ai taki. Fika sani gi Yehofa fu a kuutu sani gi u na a yuu di a poti. Baka di sama be libi ogii anga wan baala den e kai John, a taki: ‘Mi be mu meke moiti fu mia du sani enke fa miseefi wani. Romesama 12:19 yeepi mi fu wakiti Yehofa.’

15. Saide a bun fu wakiti Yehofa fu a seeka sani gi u?

¹⁵ We fende wini te we wakiti Yehofa fu a seeka sani gi u. Efu u du a sani ya, daw naw abi den booko-ede di u be o fende efu u be o suku fu losi a polobelema useefi. Yehofa wani yeepi u. A leti enke ai taki: ‘Fika a sani gi mi, mio seeka en.’ A taki aw ‘pai den’. A sani ya e soi taki Yehofa o losi a polobelema na a moo bun fasi. Na a sani ya be yeepi John di u be taki fi en kaba. A taki: ‘Efu mi wakiti Yehofa, aw losi a polobelema na a moo bun fasi.’

‘I MU E DU BUN NAAMO, DA YO WINI A OGII’

16-17. Fa begi o yeepi u ‘fu wini a ogii’? (Romesama 12:21)

¹⁶ Leisi Romesama 12:21. Pawlesi be gi den Kelesten taanga-sikin fu ‘tan du bun’ naamo, da a so den be o poi wini a ogii. Di Yesesi be holi a lezing na a mongo a be taki: ‘U mu lobi den feyanti fu u, u mu begi gi den sama di e libi ogii anga u’ (Mat. 5:44). Na a sani ya enseefi be du tu. Pakisei fa Yesesi be e fii di den be sipikii en na a ponsu. A omen ogii den be du anga en, ná pikin pen a be e fii. Winsi fa ala den sani ya be miti en, tokuso wa poi fusutan pilisisi fa a be e fii.

¹⁷ Yesesi be soi taki en biibi be taanga.  A be soi tu taki a lobi Yehofa winsi fa omen sani be e miti en. Aa be kosi den suudati efuso ligei anga den. Ma a be begi Yehofa taki: ‘Nda, gi den paadon baa, bika den á sabi san den e du’ (Luk. 23:34). Te we begi Yehofa fu koo a ati fu den sama di e libi ogii anga u, a sani ya o yeepi u fu wa buuya. Aw yeepi u tu fu kengi a fasi fa we denki fu den.

18. Fa begi be yeepi Alberto anga John di sama be libi ogii anga den?

¹⁸ A begi be yeepi den tu baala di u be taki fu den na a bigin di sama be e libi ogii anga den. Alberto taki: ‘Mi be begi gi den baala di be lei gi mi. A omen leisi mi begi Yehofa fu mi ati á boon moo. Nownow Alberto e dini Yehofa anga piisii baka.’ John taki: ‘A omen leisi mi be e begi Yehofa fu yeepi a baala di be libi ogii anga mi. Mi be e begi en tu fu a yeepi mi fu gi en paadon. Yehofa be yeepi mi fu mi ati á boon a mi baala moo. A yeepi mi fu mia kuutu en moo tu. Den begi ya be e yeepi mi fu fii moo bun.’

19. Saw mu du te enke a kaba doo? (1 Peitilisi 3:8, 9)

¹⁹ Solanga a kaba fu a goontapu ya á doo ete, libisama o libi ogii anga u. Neen meke a naabi toobi sai miti u, ala yuu u mu e begi Yehofa fu a yeepi u. U mu meke moiti fu waka a Yesesi baka te sama e libi ogii anga u. Wa mu pai ogii fu ogii, ma u mu wooko anga den leli fu Beibel. Efu we meke moiti ala yuu fu du den sani ya, Yehofa o belesi u.​—Leisi 1 Peitilisi 3:8, 9.