Paul: Ná pikin poolo u be poolo! Aini november 1985, u be de aini wan opalani e go a Liberiya a West Afiikan fu go bigin anga a zendeling wooko. Di a opalani saka a Senegal, Anne taki: ‘Kande baka wan yuu langa wo doo Liberiya.’ Baka wan pisiten den kon taigi u taki: ‘Ala sama di e go a Liberiya mu saka komoto aini a opalani. Den yee taki wantu sama á be wani saka denseefi a lanti ondoo a Liberiya, neen meke wa be poi fee go doo.’ A tin dei langa u be o abi fu tan anga den taa zendeling a Senegal. U be yee a nyunsu taki a omen sama den be e kii a Liberiya. Neen meke lanti be taki nawan sama á mu komoto a osu, efuso den be o sutu den kii.

Anne: Wi á na sama di be lobi go a peesi. Senten di mi yonkuu, sama be sabi mi enke tan pii sama. Mi be e feele seefi te mi be mu abaa sitaati. Ma toku u be wani go a Liberiya, winsi fa a be ogii.

Paul: Mi anga Anne kiya na a west se fu Ingiisikondee. Fu di den sama fu mi anga Anne mma be e gi u taanga-sikin, meke u bigin pionili di u kaba hei sikoo. Den be e poolo anga u fu di u be wani du a fuuten diniwooko. Di mi be abi 19 yali, mi be fende a gaandi fu go wooko a Betel. Baka di mi anga Anne toow aini 1982 neen enseefi kon a Betel tu.

Anne: U be lobi Betel, ma toku u be wani go yeepi a pe moo peleikiman de fanowdu. U be e wooko makandaa anga baala anga sisa di be e du a zendeling wooko fosi. Fu di u be e luku fa den e tyai denseefi anga den moin ondoofenitoli di den be abi, meke useefi be wani du a zendeling wooko tu. A dii yali langa u be e begi ala neti fu a toli ya. Neen meke ná pikin poolo u poolo di den kai u fu go na a du fu 79 kalasi fu a Gileyad sikoo. Den be sende u go a Liberiya a west Afiikan.

Paul: U gwe anga a fosi opalani di be e go a Liberiya. Den sama be e feele ete, den á be e go a sitaati te neti. Soso yee fu den be yee wan wagi bali a wowoyo, da den be e lon kaba. U be e leisi son pisi fu a Beibel buku psalm ala neti. A sani ya yeepi u fu wa feele so moo. Winsi fa sani be ogii, toku u be lobi a wooko fu u. Anne be de enke  wan zendeling aini a peleikiwooko. Ma mi be e wooko makandaa anga John Charuk a a Betel. A omen sani mi be leli fu a baala ya, bika a omen yali a be tan a Liberiya. A be sabi den baala anga sisa bun, a be sabi sowtu tesi be e miti den, neen meke a be poi yeepi mi.

Anne: U be lobi a wooko fu wi a Liberiya, bika u be lobi den baala anga sisa. Denseefi be lobi u tu, den be e bali wadaa gi u, den biibi be taanga. A fasi fa wi anga den be e libi be meke u kon toon famii. Den be e soi u faw sa du sani anga koni, den be e gi u taanga sikin tu. Ná pikin switi a peleikiwooko be e switi. Te u be go a den sama, den á be e wani u gwe gawgaw. Tei be go a sitaati, a omen sama i be e yee e taki fu Beibel. A makiliki i be sa go taki anga den. A omen Beibelsutudi u be abi, wa be e abi ten sai fu sutudeli anga ala den. A be e switi gi u fu sutudeli anga den sama ya.

Paul: A fo yali langa sani be e go moo bun aini a kondee. Ma aini 1989, sani kengi wanboowanboo. Den sama aini a kondee be e feti anga denseefi. A 2 yuli 1990, den sama di á be wani saka denseefi a lanti ondoo teke a hii pisi kondee pe Betel be de. A dii mun langa wi anga nawan sama á be poi taki. Wa be poi telefon den famii fu u, wa be poi taki anga den baala fu a edekantoo tu. Nyanyan be e pina. Boiti dati, den be e suwa anga den umansama. A 14 yali langa den be e feti aini a kondee.

Anne: Son lo be e feti anga denseefi, den be e kii denseefi. Tyaipi suudati be e de a sitaati. Den be e abi omen feti sani a den sikin. Den be e wei omen sani tu. Boiti dati, den be e go aini ala den osu fu den sama da den be e teke san den wani. Den be e si a kii di den be e kii sama enke te sama e kii foo. Den á be e si a sani ya fu wan gaan sani. Den sama di be e feti anga denseefi be e tapu den pasi, fu di den be e keli den sama. Te son sama be wani pasa namonamo, da den be e kii den. Bakadati den be e poti den dedesikin fu den sama a denseefi tapu. Son yuu a sani ya be e pasa koosube fu Betel. A omen Kotoigi den kii, den kii tu zendeling.

Efu den sama di be e feti anga denseefi be si wan sama fu a lo di den e buuse, den be e kii en. A omen baala anga sisa be sa lasi den libi, ma toku den be de kabakaba fu kibii den baala anga sisa fu den. Na a sani ya den zendeling anga den baala anga sisa di be e wooko a Betel be e du tu. Son baala anga sisa di be lowe kon a Betel be e siibi a ondoo, da den taawan be e siibi a wi a tapu. U be paati a kambaa fu wi anga wan osufamii di be abi seibin sama.

 Paul: Ala dei den suudati be e puubei fu kon aini Betel fu si efu u be e kibii sama. U be abi fo sama di be e holi wakiti: Wan baala anga wan sisa be e holi wakiti na a fensee, da den taa tu be e go taki anga den suudati. Efu den tu baala be poti den ana a den fesi, da sani be e go bun. Ma efu den be poti den ana a den baka, da den suudati ati be boon. A so den sama di be e holi wakiti na a fensee be e lon go kibii den mati fu u.

Anne: Wan dei den suudati ati be boon te, den baala á be poi tapu den fu den á kon aini. Mi anga wan taa sisa be sooto useefi fika aini wan wasi-osu. Wan pikin peesi be de fu kibii aini wan kasi. A sisa be kibii ape. Den suudati be si mi di mi be e subi gwa tapu, neen meke den be kon a mi baka. Den be de anga omen kofaliki goni. Anga boon ati den be e naki a doo. Paul be wani tapu den fu den á kon aini a wasi-osu, neen meke a taigi den taki: ‘Mi uman e wasi.’ Di mi be de fu tapu a kasi pe a sisa be de aini, ná pikin feele mi be e feele, bika mi be mu poti ala den sani a den peesi baka. Mi be sabi taki den suudati be musu e akisi denseefi san mi be e du langa so, mi be e feele te, neen meke ala mi sikin be e dansi. Mi be abi fu kisi miseefi fosi mi opo a doo, efuso den suudati be o fusutan taki wan sani pasa. San mi be o du? Mi begi Yehofa aini mi ati neen mi opo a doo. Neen mi gi den odi. Mia be e feele moo. Wan fu den toto mi go a wanse, a waka go na a kasi, neen a bigin puu den sani di be de aini. A suudati á be poi biibi taki aa fende nawan sani. Bakadati en anga den taa suudati go luku aini den taa kambaa, den go na a palafon tapu tu, ma den á fende nawan sani.

Paul: A omen mun langa wa be abi nyanyan sai. Ma den sani di u be e leli aini Beibel be de enke nyanyan gi u. U be sabi taki a leisi di u be e leisi Beibel be o yeepi u fu holidoo.

U be sabi taki efu u be go suku nyanyan efuso wataa, wa be o poi kibii den baala anga sisa fu u moo, bika den be sa kii den. Son yuu Yehofa be e gi u san wi abi fanowdu a wan yuu di wa be denki. A be e solugu, a be e yeepi u fu wa buuya.

Sani be e kon moo ogii dei fu dei aini a kondee, ma a waaleiti be e gi u howpu. A omen leisi son baala anga sisa be mu lowe fu kibii den libi. Winsi fa den sani ya be e miti den, toku den biibi be taanga. Den á be e buuya. Son wan fu den be taki a holi di den e holidoo winsi fa tesi e miti den, e ‘seeka den gi a Gaan Banowtu’. Den owluman anga taa yonkuu baala be e du ala san den man fu yeepi den baala anga sisa. Den baala anga sisa di be lowe go a taa peesi be e yeepi denseefi, den be bigin peleiki a den peesi de tu. Den be e koboloiki ala san den be fende aini a busi fu meke pikin Kownukondee zaal. Winsi fa sani be ogii, toku den baala anga sisa be e go a den komakandaa. Den be e go aini a peleikiwooko tu. Ná pikin taanga-sikin den sani ya be e gi den. Te u be e paati nyanyan, koosi anga taa sani gi den, gaanse fu den be e akisi u tasi fu  peleiki pe fu den akisi u koosi. A sani ya be e gi u taanga-sikin te ye. A omen sama di sani be miti na a pisiten fu a oloku be wani kon sabi moo sani fu a bun nyunsu. Den be e foondoo fu a fasi fa den Kotoigi be e piisii. Den baala anga sisa be de enke wan faya aini a dunguu (Mat. 5:14-16). Fu di den baala be abi deki-ati, meke son wan fu den ogiiman kon toon u baala bakaten.

Paul: Son leisi u be mu komoto a Liberiya. Dii leisi u be komoto aini a kondee, ma wa be e tan langa fosi u daai kon baka. Ma tu leisi di u be gwe, u be tan wan hii yali. Wan zendeling sisa be taki pilisisi faw be e fii di u be e gwe, a taki: A Gileyad den leli u taki u mu lobi den baala anga sisa fu u anga u hii ati a pe den sende u go, a dati u du. Neen meke di u be mu gwe fika den baala anga sisa fu u, u be e fii enke wan sama booko wi ati.’ Ma u be e piisii fu di u be man du omen sani ete fu yeepi den baala anga sisa fu wi a Liberiya. U be e tan a wan koosube kondee fu Liberiya, neen meke u be man holibaka gi den anga a peleikiwooko.

Anne: Aini mei 1996, fo fu u be e gwe anga wan fu den wagi fu Betel. U be tyai wantu pampila di e soi fa a wooko be e go aini Liberiya. U be wani lei a wan taa se fu a foto pe ogii á be o miti u, ma a 16 kilometer u be mu lei. Aa langa seefi di u komoto a Betel neen u miti anga den ogiiman a pasi. Den be e sutu go a tapu. Den sitopu a wagi, neen den puu mi anga ete tu taa Kotoigi aini a wagi. Ma Paul be de aini a wagi ete. Wa be poi biibi san pasa. Baka wan pisiten, u si Paul e waka kon na a se pe u be taampu. En fesi ede be e lon buulu. U be denki taki den be sutu en, ma u be kon fusutan taki efu den be sutu en aa be o poi waka moo. A wan fu den man be naki en di a be e toto en puu aini a wagi. Ma koloku aa be koti bigi.

Wan suudati wagi be de koosube ape. Tyaipi sama be de aini. Den be e feele, neen meke den be de kabakaba fu komoto aini a kondee. U be wani go aini a toloki, ma peesi á be de moo fu sidon. Neen meke u be subi a sikinse fu a toloki. Sani a be de ape fu u holi bunbun fasi seefi. A sama di be e lei a toloki be bigin lei taanga, pikinmoo u kai. U be akisi en efu a sa sitopu, ma a be e feele, neen meke a ná aliki u. U meke moiti holi taanga fu wi a kai. Di a doo na a peesi pe a be mu sitopu, ná pikin weli u be weli. Ala u sikin be e dansi, bika u be e feele.

Paul: Ala den koosi fu u be piiti, den be tyobo tu. Wa be poi biibi taki u de a libi ete. Wan helicopter be de a pe u be de. A omen goni lai be de neen sikin, a be gei enke aa be o poi fee moo. Ma toku u siibi ape, bika neen be o tyai u gwa Siyera Leyon a taa dei. Di u doo Siyera Leyon, u be e teke en fu bigi taki u de a libi, ma u be e booko wi ede tuutuu anga den baala anga sisa fu wi a Liberiya.

Anne: U doo mooin na a Betel a Freetown, Siyera Leyon. Den baala solugu u te baa. Ma wanboowanboo mi bigin pakisei ala den ogii di be e pasa a Liberiya. Ala dei mi be e feele enke wan ogii be o pasa. Mia be poi denki taa sani. A gei enke ala den sani di be de a mi lontu á be de tuutuu. Te neti, a omen leisi mi be e dyombo a siibi, mi sikin be e dansi, mi be e si enke wan ogii sa pasa. Mia be e poi boo bun. Paul be e holi mi, da a be e begi anga mi. U be e singi Kownukondee singi tu te enke mi kisi miseefi. Mi be e fii enke mio law, neen meke wa be poi du a zendeling wooko moo.

Noiti mio feegete a sani di pasa bakadati. Aseefi wiki de, u fende tu Wakititolen. Wan fu den a be a Ingiisitongo Ontwaakt! fu 8 yuni 1996. A be abi wan artikel di den e kai ‘Sai sa du te ye feele pasa peesi’? Mi be kon fusutan now saide mi be e fii so. Du fu tu a be a Saanantongo Wakititolen fu 15 mei 1996. Wan artikel be de aini di den e kai ‘Pe den e feni a tranga foe den’? A Wakititolen be abi wan fowtow fu wan babe di en mapaapi booko. A artikel taki u de enke wan babe di e tan fee winsi fa en mapaapi booko. A be e soi taki winsi we fii booko-saka fu son sani di miti wi aini a libi, tokuso Yehofa poi koboloiki u fu yeepi taawan ete. Yehofa be gi mi pilisisi san mi be abi fanowdu (Mat. 24:45). Mi be go suku moo artikel di e taki fu den toli ya, neen mi poti ala den a wan peesi. Ná pikin yeepi den yeepi mi. Baka wan pisiten, mia be e feele so moo.

Paul: Enke fa mi be taigi u kaba, da son yuu u be e komoto a Liberiya. Ma te u be mu daai go a osu  baka, ná pikin piisii u be e piisii. Na a kaba fu 2004, u du a zendeling wooko wan sani fu 20 yali. Den á be e feti aini a kondee moo. Neen meke den baala be e teke seeka fu go seeka a beikantoo. Ma den be akisi u fu u du wan taa wooko.

A sani ya be taanga gi u. U be lobi den baala anga sisa fu wi a Liberiya, den be de enke u famii, neen meke wa be wani gwe fika den. Ma u be si fa Yehofa be yeepi u kaba di u be mu gwe fika den famii fu u, fu go na a Gileyad sikoo. Neen meke u teke a nyun wooko di den baala gi u. Den be sende u go a Ghana, wan kondee di be de koosube fu pe u be de.

Anne: Di u be e komoto a Liberiya, ná pikin kee u kee. U dyombo di wan gaandi baala den e kai Frank taigi u taki: ‘U mu feegete u.’ Bakadati a taki: ‘U sabi taki noiti wo feegete u, ma u mu lobi den baala anga sisa a Ghana anga u hii ati. A Yehofa sende u, neen meke poti pakisei a den baala anga sisa.’ A sani di a baala ya be taigi u be gi u taanga-sikin fu meke nyun mati, aini wan kondee pe a wantu sama namo be sabi u. A omen nyun sani u be mu leli tu.

Paul: Aa langa seefi neen den baala anga sisa a Ghana toon u famii. A omen Kotoigi de ape. A omen sani u leli fu a fasi fa den nyun mati fu u be e dini Yehofa anga den hii ati, den biibi be taanga. Baka di u du a zendeling wooko 13 yali langa a Ghana, wan taa sani pasa. Den baala be akisi u fu go wooko na a beikantoo fu Oost Afiikan a Kenya. U be e angii fu den baala anga sisa fu wi a Liberiya anga Ghana. Ma wi anga den baala anga sisa a Kenya toon mati gawgaw. Leti enke fa Liberiya anga Ghana be abi yeepi fanowdu, a so Kenya be abi yeepi fanowdu tu.

Anne: Aini den yali di pasa a omen sani miti mi, son yuu ná pikin feele mi be e feele. Te ye tan aini wan kondee pe tyaipi ogii e pasa, a sani ya sa meke i siki, a sa meke i fii booko-saka tu. Nownow solanga mi yee wan sama sutu wan goni, ala mi bee e tuubu, ala mi ana e kisi katanga. Ai bigi gi mi taki Yehofa e yeepi mi. Son yuu a den baala anga sisa ai koboloiki fu gi mi taanga-sikin. Mi kon si tu taki te we tan sutudeli, begi, go a den komakandaa anga te we tan du a peleikiwooko, Yehofa o yeepi u fu tan du a wooko fu u.

Paul: Son yuu sama e akisi u taki: ‘I lobi a wooko fii?’ Den kondee sa moin, ma sani sa kon ogii aini wan kondee. A ná den kondee di we go u lobi so, a den baala anga sisa u lobi. A den aw famii. Winsi fa wa kiya na aseefi fasi, toku na aseefi fasi ala u lobi Yehofa. U denki taki den be e sende u go a den baala anga sisa fu gi den taanga-sikin, ma i naw biibi, a den baala anga sisa be e gi u taanga-sikin.

Na ala se fu goontapu wi abi baala anga sisa. Winsi pei go, den de ape enke i famii. Solanga u de aini a olikanisâsi fu Yehofa, u de a osu. Aa de fu u feele nawan sani. U sa biibi taki efu we fitoow Yehofa, aw gi wi a kaakiti di wi abi fanowdu fu holidoo winsi sai pasa.​—Filip. 4:13.