1. Fa apostel Pawlesi be e si den dinali?

 A OMEN wooko den dinali e du aini a kemeente. Apostel Pawlesi be e teke den sani di den baala ya be e du fu bigi. Di a be sikiifi a biifi gi den Kelesten a Filipi, a ná den owluman wawan a be sende odi gi, ma a be sende odi gi den dinali tu.​—Filip. 1:1.

2. Fa Luis be e fii di a toon wan dinali?

² Ná pikin poolo den baala e poolo te den toon wan dinali, winsi den yonkuu efuso gaandi, toku den e piisii. Devan be abi 18 yali di a toon dinali. Ma wan baala den e kai Luis be toon dinali di a be abi wan sani fu 50 yali. Fa a be e fii di a fende a gaandi ya? A taki: ‘Ai bigi gi mi taki mi sa yeepi den baala anga sisa fu mi aini a kemeente. Den soi mi taki den lobi mi, neen meke mi wani soi den taki mi lobi den tu.’ A so omen baala di fende a gaandi ya e fii.

3. San wo luku aini a artikel ya?

³ Efi ya wan dopu baala di á toon wan dinali ete, sai sa du fu doo a maiki ya? Saw gii taanga-sikin fu doo a maiki ya? San Beibel e taki wan baala mu du fu man toon wan dinali? Wo piki den akisi ya aini a artikel ya. Ma meke u luku fosi san na a wooko fu wan dinali.

 A WOOKO FU WAN DINALI

4. San na a wooko fu wan dinali? (Luku a fowtow tu.)

⁴ Wan dinali a wan baala di e yeepi den owluman du omen pelensipali wooko aini a kemeente. Son wan fu den mu solugu taki den baala anga sisa sabi pe den mu peleiki. Den mu solugu taki den abi den buku di den abi fanowdu tu. Taawan e yeepi anga a kiin fu a Kownukondee zaal. Efu wan sani mu seeka na a zaal, den e meke moiti fu seeka en tu. Son wan fu den e yeepi daai den felon anga den singi a den komakandaa. Den baala ya e wooko taanga tuutuu. Den lobi Yehofa, neen meke den e meke moiti fu du sani di e meke a piisii. Den lobi den baala anga sisa tu (Mat. 22:37-39). San wan baala mu du fu toon wan dinali?

5. San wan baala mu du fu man toon wan dinali?

⁵ Beibel e soi u san baala mu du fu man toon wan dinali (1 Tim. 3:8-10, 12, 13). Efii wani toon wan dinali fu dii wani yeepi taawan, da meke moiti fu du den sani dii mu du fu man doo a maiki ya. Ma i mu akisi iseefi fosi saide i wani toon wan dinali.

SAIDE I WANI TOON WAN DINALI?

6. Saide i wani yeepi den baala anga sisa fii? (Mateyesi 20:28; luku a fowtow a fesise fu A Wakititolen tu.)

⁶ U sa leli wan sani fu Yesesi. Ala den sani di a be e du, a be e du den fu di a be lobi Yehofa anga taa sama. Na a lobi ya meke a be e du sani fu yeepi taawan. A be de kabakaba fu du son wooko di sama be e si enke lagi wooko. (Leisi Mateyesi 20:28; Yoh. 13:5, 14, 15) Efii lobi sama, Yehofa o belesi i. Aw yeepi i tu fu doo a maiki fu toon wan dinali.​—1 Kor. 16:14; 1 Peit. 5:5.

7. Saide a fowtu te wan baala wani toon dinali fu di a wani sama gafa en?

⁷ Aini a goontapu ya, sama e suku fu abi hei posisi fu di den wani taawan gafa den. Ma a foluku fu Gadu á de so. Wan baala di lobi sama enke Yesesi naw wani taawan si enke a pelensipali. Efu wan baala di e si enke  a pelensipali toon wan dinali, a naw wani du son wooko aini a kemeente di sama e si enke lagi wooko. A naw du den taa sani di a mu du fu solugu den sikapu fu Yehofa tu. Kande aw go e si enke a pelensipali tumisi fu du son wooko (Yoh. 10:12). Yehofa nai belesi den sama di e du son sani fu di den e si enke den pelensipali moo taawan.​—1 Kor. 10:24, 33; 13:4, 5.

8. San Yesesi be leli den bakaman fi en?

⁸ Den bakaman fu Yesesi seefi be wani son gaandi, ma a nawan bun denki den be abi. Pakisei a sani di Yakowbesi anga Yohanisi be du. Den be akisi Yesesi fu a gi den wan hei posisi aini a Kownukondee fi en. Yesesi á gafa den di den akisi en a sani ya. A taigi ala den 12 apostel fi en taki: ‘A sama di wani de a moo gaanwan, mu e dini taawan. A sama di wani de a fosiwan aw mindii, mu e dini ala den taawan’ (Malik. 10:35-37, 43, 44). Den baala di de kabakaba fu yeepi taawan a sani, a wan gaan yeepi gi a kemeente.​—1 Tes. 2:8.

SAW YEEPI I FU DOO A MAIKI YA?

9. Saw yeepi i fu tan meke moiti fu toon wan dinali?

⁹ U sabi taki i lobi Yehofa. U sabi taki i wani yeepi taawan a sani tu. Ma kande i nai angii fu du den wooko di wan dinali mu du. Saw yeepi i fu doo a maiki fu toon wan dinali? Holi a pakisei taki ná pikin piisii yo piisii tei poi yeepi i baala anga sisa a sani. Yesesi taki: ‘Te wan sama e gi taawan sani, ai piisii moo enke te taawan e gi en sani’ (Toli 20:35). A ná taki namo Yesesi be e taki den sani ya, ma a be e du den tu. A be e piisii te a be e yeepi taawan, iseefi o piisii tu.

10. Fa Yesesi soi taki a be e piisii te a be e yeepi taawan a sani? (Malikisi 6:31-34)

¹⁰ Luku fa Yesesi be e piisii te a be e yeepi taawan a sani. (Leisi Malikisi 6:31-34.) Wan leisi Yesesi anga den apostel fi en be weli. Neen meke a kai den fu den go a wan peesi fu den boo pikinso. Ma wan gaan kulu sama be go wakiti den ape, bika den be wani Yesesi leli den. A be sa puu nono gi den, bika en anga den apostel fi en ‘á be abi ten seefi fu nyan’. Boiti dati, a be sa leli den wantu sani namo, da a sende den gwe. Ma a be lobi den sama, neen meke ‘a bigin leli den omen sani fu Gadu’. A leli den te enke a be lati (Malik. 6:35). Aa be abi fu du a sani ya, ma a du en fu di ‘tyali fu den kisi en’. A be wani leli den, bika a be lobi den. Yesesi be e piisii tuutuu te a be e yeepi taawan.

11. Fa Yesesi be e yeepi taawan anga den sani di den be abi fanowdu? (Luku a fowtow tu.)

¹¹ A ná leli namo Yesesi be e leli sama, ma a be e yeepi den anga den sani di den be abi fanowdu. A be seeka sani gi den fu den nyan. Bakadati a be e meke den bakaman fi en paati a nyanyan gi den sama (Malik. 6:41). Te a be e du den sani ya, a be e soi den bakaman fi en fa den mu yeepi taawan. A be soi den tu taki den sani di den e du fu yeepi taawan pelensipali. Den sani di den dinali e du pelensipali tu. Pakisei fa den apostel be musu e poolo di den be e wooko makandaa anga Yesesi fu gi den sama nyanyan. ‘Ala den sama nyan te den bee fuu’ (Malik. 6:42). A omen  taa toli de ete di e soi fa Yesesi be e booko en ede anga taawan. Neen hii libi langa a du a sani ya di a be de a goontapu (Mat. 4:23; 8:16). Yesesi be e piisii te a be e leli taawan, a be e piisii te a be e yeepi den. Iseefi o piisii tu te ye meke moiti fu yeepi taawan.

12. Saide wa mu si enke u naw poi du son wooko aini a kemeente?

¹² Efi ye fii enke ya poi du son wooko, ya mu lasi-ati. Bika i sabi du son sani dii sa du fu yeepi a kemeente. Pakisei a sani di Pawlesi be taki a 1 Korentesama 12:12-30, dai begi Yehofa fu a yeepi i fii wooko anga den sani dii leli. Den sani di Pawlesi taki ya, e soi kiin taki leti enke fa a kemeente abi den taa baala fanowdu, a so den abi i fanowdu tu. I pelensipali gi a kemeente. Efi ya poi toon wan dinali nownow, fu dii mu wooko a wantu sani ete, ya mu gi abaa. Ma i mu du ala sai poi fu dini Yehofa anga fu yeepi den baala anga sisa. Holi a pakisei taki den owluman naw feegete i, den o go e gii son wooko di den si taki i sa du.​—Rom. 12:4-8.

13. San a wantu sani di den baala mu du efu den wani toon wan dinali?

¹³ Pakisei a sani ya tu: Den sani di wan sama mu du fu toon wan dinali a sani di ala Kelesten mu du. Ala u mu meke moiti fu wi anga Yehofa toon bun mati, taawan mu poi waka aw baka. U mu e du sani di Yehofa lobi tu. Neen meke kande gaanse fu den sani ya ye du den kaba.

SAN WAN BAALA MU DU FU TOON WAN DINALI?

14. San a wani taki fu ‘taawan fitoow’ i? (1 Timotiyesi 3:8-10, 12)

¹⁴ Luku san sikiifi a 1 Timotiyesi 3:8-10, 12 (Leisi en.) Wan dinali mu de wan sama di ‘taawan man fitoow’. A wowtu ya wani taki ‘tyai faantiwowtu’ efuso ‘tyai iseefi a wan fasi di o meke taawan lesipeki i’. A sani ya á wani taki ya mu e lafu efuso du sani fu piisii (Peleik. 3:1, 4). Ma i mu e du den wooko fii bun. Efu ala yuu ye du den wooko fii bun, neen ye du den te enke i kaba, den baala anga sisa o fitoow i. Den o lesipeki i tu.

15. San wani taki ná ‘bidiigi taawan’ efuso fi yu ‘á suku fu fende wini a wan fasi di á fiti’?

 ¹⁵ ‘Ya mu e bidiigi taawan.’ A sani ya wani taki, ye du sani a wan letifasi, ye taki a tuu, sama sa fitoow i. Ye du sai paamisi tu (Odo 3:32). ‘Ya mu e suku fu fende wini a wan fasi di á fiti.’ A sani ya wani taki i nai bidiigi taawan te yu anga den e du bisnis. I nai si den baala anga sisa enke sama dii sa meke moni a den tapu tu.

16. (a) San a wani taki fi ‘ya diingi win pasa maiki’? (b) San a wani taki fu ‘abi wan kiin kosensi’?

¹⁶ ‘Ya mu e diingi win pasa maiki.’ A sani ya wani taki ya mu e diingi pasa peesi. Sama á mu sabi yu enke wan sama di e diingi pasa maiki. Te yu abi ‘wan kiin kosensi’, da dati wani taki ye libi enke fa den weiti fu Gadu e taki. Winsi fa yu abi sondu, tokuso yo piisii, bika yu anga Yehofa a mati.

17. San a wani taki fu ‘de wan bun wookoman’? (1 Timotiyesi 3:10; luku a fowtow tu.)

¹⁷ Te wan sama a wan ‘bun wookoman’, da dati wani taki den owluman sabi taki sowan sama e du en wooko bun, den sa fitoow en. Te den owluman gii wan wooko, meke moiti fu wooko anga den sani di den soi i. Wooko anga den sani di a olikanisâsi e taki tu. Meke moiti fu fusutan a wooko dii mu du anga on ten i mu kaba en. Te ye du den wooko fii anga i hii ati, den baala anga sisa aini a kemeente o si taki ye gwa fesi. (Leisi 1 Timotiyesi 3:10.) Yonkuu baala de aini i kemeente di dopu kaba? Den abi a gwenti fu sutudeli anga denseefi efuso fu seeka denseefi gi den komakandaa? Den e gi piki a den komakandaa? Den e go aini a peleikiwooko? Efu den e du den sani ya, da den e soi taki den poi tyai faantiwowtu. Te den o kon moo bigi, den o poi toon wan dinali tu.

18. San wani taki ‘ya fende nawan fowtu a den’?

¹⁸ ‘Ya fende nawan fowtu a den.’ A sani ya wani taki sama á poi fende fowtu a yu. Den sa lei gi wan Kelesten. Den be lei gi Yesesi tu. A be taki a so sama be o libi anga den bakaman fi en (Yoh. 15:20). Efi ye meke moiti fu tyai iseefi bun leti enke Yesesi, yo abi wan bun nen aini a kemeente.​—Mat. 11:19

19. Te Beibel e taki baala di toow mu ‘abi wan uman’, da san a sani ya wani taki?

 ¹⁹ ‘Den mu abi wan uman.’ Di Yehofa sete a toowlibi, a taki a wan man anga wan uman mu toow. Na a sani ya ala Kelesten di wani toow mu du (Mat. 19:3-9). Wan baala di toow á mu libi wan hululibi (Heb. 13:4). A sani ya wani taki aa mu waka gi en toowpaa, aa mu du sani di o meke wan taa sisa si enke a lobi en.​—Yopu 31:1.

20. Fa wan baala e soi taki ai solugu en osufamii?

²⁰ ‘A mu e tii en osufamii anga den pikin fi en a wan bun fasi.’ Efi ya wan osufamii edeman, i mu e tyai i faantiwowtu bun. I mu e holi a Osufamii Anbegi ala yuu. I mu e peleiki makandii anga yu uman anga den pikin fii. Yeepi den pikin tu fu den anga Yehofa toon mati (Efe. 6:4). Wan man di e solugu en osufamii bun e soi taki a poi solugu a kemeente.​—Luku 1 Timotiyesi 3:5 tu.

21. Efi ya toon wan dinali ete, da sai sa du?

²¹ Efi ya toon dinali ete, begi Yehofa dai meke moiti fu wooko anga den sani dii leli aini a artikel ya. Sutudeli a pisi di e taki san wan sama mu du fu toon wan dinali, dai meke moiti fu wooko anga den sani dii leli. Pakisei a lobi dii lobi Yehofa anga den baala anga sisa. Meke moiti fu kon moo lobi den, dai pakisei saide i wani yeepi den (1 Peit. 4:8, 10). Meke moiti fu toon wan dinali, da yo si taki ná pikin switi a switi te ye yeepi den baala anga sisa fii. Meke Yehofa belesi a moiti di ye meke fu toon wan dinali.​—Filip. 2:13.