1, 2. (a) Saide u sa taki den sani di wi e angii fu fende, a ná aseefi enke den sani di taa sama e angii fu fende? (b) San wi o luku aini a artikel ya?

YEHOFA paamisi u omen sani di wi e angii fu si. A paamisi u taki a o santa en nen. A taki a o meke sani waka enke fa a wani a hemel anga goontapu (Mateyesi 6:9, 10). A den sani ya, a den moo pelensipali sani di wi e angii fu si. Yehofa paamisi u tu taki a o meke u libi fu teego a hemel efuso goontapu. Ná pikin switi a ten de o switi! (Yohanisi 10:16; 2 Peitilisi 3:13) Wi e angii fu si fa a o tii en foluku anga fa a o holibaka gi den aini den lasiti dei ya.

² Beibel taki biibi a te „wan sama abi a fitoow taki den sani di ai howpu, o kon tuu”. A sani ya wani taki den sama di e biibi, e fitoow taki Yehofa o du san a paamisi (Hebrewsama 11:1). Aini a ten ya, a omen sama e winsi  fu son sani pasa, ma den á sabi efu den o pasa tuutuu. Meke u taki wan sama wani wini lowte. A sa bai en, ma a á sabi efu a o wini tuutuu. A artikel ya o soi u san u mu du fu biibi anga u hii ati taki Gadu o du den sani di a paamisi u. Wi o si tu sowtu wini wi o fende nownow, te u biibi taanga.

3. Saide wi e biibi taki Gadu o du san a paamisi?

³ Nawan sama e meke anga biibi. Efu u wani biibi Gadu, u mu meke a yeye fi en tii wi ati (Galasiyasama 5:22). Santa yeye e yeepi u fu sabi Yehofa moo bun. Te u fusutan taki Yehofa na A Moo Taanga Gadu anga te u fusutan taki a abi ala koni, da wi o biibi taki a poi du ala den sani di a paamisi. Yehofa seefi e taki enke den sani di a paamisi u pasa kaba. A taki: „Den sani ya pasa kaba!” (Leisi Openbaring 21:3-6.) U sabi taki ala yuu Yehofa e du san a paamisi. En na ’a Gadu di u sa fitoow’. Neen meke wi e biibi ala den sani di a taki o pasa aini a ten di e kon.​—Deitolonomi 7:9.

4. San den sama di be e dini Gadu fositen be e biibi?

⁴ Hebrewsama kapitel 11 e kai 16 man anga uman di be e biibi Yehofa anga den hii ati. Ai kai omen sama tu, di be e meke Yehofa piisii fu di den biibi be taanga (Hebrewsama 11:39). Ala den be e wakiti a „pikin” di Yehofa be paamisi. Den be sabi taki a „pikin” ya be o puu ala den feyanti fu Gadu a pasi, da a be o meke a goontapu toon wan paladeisi baka (Genesesi 3:15). Den sama ya, be e biibi anga den hii ati taki Yehofa be o weki den baka. Den á be e angii fu weki baka fu go tan a hemel, bika Yesesi á be dede gi wi ete (Galasiyasama 3:16). Ma den be e angii fu libi fu teego a goontapu aini wan moin paladeisi.​—Psalm 37:11; Yesaya 26:19; Hoseya 13:14.

5, 6. San Abalaham anga en famii be e angii fu si? San yeepi den fu den biibi á swaki? (Luku a fowtow na a bigin.)

⁵ Luku san Hebrewsama 11:13 taki fu den sama di be e dini Yehofa fositen. A taki: „Ala den sama ya dede, ma den biibi be taanga. Winsi fa denseefi á si fa den paamisi ya kon tuu, tokuso a gei enke den be e si den a faawe kaba, neen den be e piisii anga den.” Den be e angii fu tan aini a nyun goontapu. Den be e pakisei fa a be o de fu libi aini tu. Wan fu den sama ya a Abalaham. Yesesi taki ’Abalaham be e piisii fu di a be e angii fu si a dei ya’ (Yohanisi 8:56). Sala, Isaki, Yakopu anga omen taawan, be e angii tu fu si a ten di a Kownukondee di ’Gadu sete’ o tii a hii goontapu.​—Hebrewsama 11:8-11.

⁶ San yeepi Abalaham anga en osufamii fu den biibi á swaki? Den be e leli moo sani fu Yehofa. Son leisi Yehofa be e taki anga den anga yeepi fu engel efuso deen. Kande den gaansama fu a ten fu den di biibi be taanga be leli den sani fu Yehofa. Kande den be leisi sani di sama be sikiifi fu Yehofa  tu. Neen meke den be e biibi taki Yehofa be o du san a paamisi. Den sani ya yeepi den fu holidoo, winsi sowtu tesi be e miti den.

7. San Yehofa gi u fu taanga u biibi? San u mu e du?

⁷ San o yeepi u fu u biibi á swaki? Yehofa gi wi a Beibel fu yeepi u fu sabi san a o du gi wi aini a ten di e kon. Ai soi wi aini a Beibel san u mu du fu de koloku tu. Neen meke u mu e leisi Beibel ala dei, da u du san a taki (Psalm 1:1-3; leisi Toli 17:11.) Na a „koni saafu di u sa fitoow” Yehofa poti fu ’gi u nyanyan na a ten di wi abi en fanowdu’ (Mateyesi 24:45). Leti enke a foluku fu Gadu fu fositen, a so useefi mu e leisi den sani di Gadu paamisi u, da wi e teke ten pakisei san u leisi. A sani ya o yeepi u fu wakiti te enke a ten doo, di a Kownukondee fu Gadu o tii goontapu.

8. Fa begi sa taanga u biibi?

⁸ San a wan taa sani di be yeepi a foluku fu Yehofa fu taanga den biibi? Den be e begi Yehofa fu a yeepi den, da te den be si fa Yehofa piki a begi fu den, da den biibi be e moo taanga (Nehemiya 1:4, 11; Psalm 34:4, 15, 17; Daniyeli 9:19-21). A so a de aini a ten ya tu, te u si taki Yehofa gi u san u begi en na a yuu di wi abi en fanowdu, da wi e moo biibi en (Leisi 1 Yohanisi 5:14, 15.) U mu e begi Yehofa fu a gi wi en santa yeye tu, fu u biibi sa kon moo taanga.​—Lukasi 11:9, 13.

9. San u sa begi Yehofa?

⁹ Te wi e begi Yehofa, wi á mu begi en san wi abi fanowdu namo. U mu e gi en daa ala dei tu. U mu e gafa en, bika a omen gaan sani a du! (Psalm 40:5). A foluku fu Yehofa e begi gi den baala anga sisa a hii goontapu tu. Te wi e begi wi e „pakisei den sama di de a sitaafu-osu”. Wi e begi gi „den sama di e teke fesi” tu. Te wi e si fa Yehofa e piki den begi fu u, da a sani de e taanga u biibi.​—Hebrewsama 13:3, 7.

10. San yeepi omen sama fu soi deki-ati di tesi miti den?

¹⁰ Pawlesi taki a Hebrewsama kapitel 11 taki: „Uman be de di famii dede, ma den famii fu den weki baka. Den pina son manengee, fu di den á be wani sama pai fu den fii. Den be wani weki baka a wan moo bun fasi” (Hebrewsama 11:35). A omen sama holidoo fu di den be e biibi taki Gadu o weki den baka, winsi den be dede. Den be sabi taki aini a ten di e kon, Yehofa o weki den baka fu libi fu teego a goontapu. Pakisei Naabot anga Sakaliya. Sama naki den anga siton te enke den dede, fu di den be e aliki  Gadu (1 Kownu 21:3, 15; 2 Koloniki 24:20, 21). Den be iti Daniyeli go aini wan lew olo. Den be iti den mati fi en go aini wan gaan faya tu. Den be de kabakaba fu dede, bika den á be wani gwe fika Yehofa. Den man ya be e biibi taki Yehofa be o yeepi den anga en santa yeye fu pasa den tesi ya.​—Daniyeli 3:16-18, 20, 28; 6:13, 16, 21-23; Hebrewsama 11:33, 34.

11. Fa wantu fu den polofeiti holidoo fu di den biibi be taanga?

¹¹ A omen polofeiti den soso efuso sooto enke fa den be du anga Mika anga Yelemiya. Son wan „waka aini sabana, subi mongo. Den tan aini beligi-olo anga ondoo doti” enke Eliya. Ala den holidoo di tesi miti den. Den á gwe fika Gadu bika den be e ’biibi taki den sani di den e howpu, o kon tuu.’​—Hebrewsama 11:1, 36-38; 1 Kownu 18:13; 22:24-27; Yelemiya 20:1, 2; 28:10, 11; 32:2.

12. Sama na a moo bun sama di u mu waka neen baka? San yeepi en fu pasa tesi?

¹² Na a moo gaan tesi miti Yesesi, ma tokuso a holidoo. A á gwe fika Yehofa. San yeepi en fu holidoo? Pawlesi taki: „A di a be e pakisei a piisii di a be o piisii aini a ten di e kon, meke a be de kabakaba fu dede na a pina ponsu, winsi a be sabi taki a wan sen sani. A go sidon na a leti-ana fu Gadu kownusutuu” (Hebrewsama 12:2). Pawlesi gi Kelesten taanga-sikin fu „poti pakisei finifini” na a fasi fa Yesesi holidoo (Leisi Hebrewsama 12:3.) Leti enke Yesesi, a omen fositen Kelesten dede fu di den á be wani gwe fika Yehofa. Wan fu den a Antipas (Openbaring 2:13). Den Kelesten ya de a hemel kaba. Ma den sama di be e dini Gadu fosi den Kelesten ya, o kon a libi baka fu tan a goontapu (Hebrewsama 11:35). Wan pisiten baka di Yesesi toon Kownu aini a yali 1914, den salufu Kelesten di dede, weki baka fu go tan a hemel. Beibel taki den salufu Kelesten ná o dede moo. A den anga Yesesi o tii libisama.​—Openbaring 20:4.

13, 14. Sowtu tesi miti Rudolf Graichen? San yeepi en fu holidoo?

¹³ A omen miliyun sama di e dini Gadu aini a ten ya, e waka a Yesesi baka. Den e teke ten pakisei den sani di Gadu paamisi den. Den e holidoo tu te tesi e miti den. Wan fu den sama ya a Rudolf Graichen di meke a Doisilikondee aini a yali 1925. Di a be yonkuu, en mma anga en dda be lobi poti  wantu fowtow di e soi Beibel toli aini den osu. A taki: „Wan fu den fowtow ya be e soi fa wan pikin boi be e tii wan busidagu anga wan pikin sikapu, wan pikin kaabita anga wan bubu, wan pikin kaw anga wan yonkuu lew” (Yesaya 11:6-9). A fowtow ya yeepi Rudolf fu poti pakisei na a paladeisi. A taanga en biibi tu. A omen yali den Gestapo-skowtu anga den Communist tiiman fu Doisilikondee du omen sani anga en. Ma toku a á gwe fika Yehofa.

¹⁴ A omen taa tesi miti Rudolf. En mma be abi a siki di den e kai tifus. A dede aini sitaafuman kampu a Ravensbrück. En dda poti en nen a wan pampila taki, en a ná Yehofa Kotoigi moo. Ma Rudolf holidoo. Di a komoto a sitaafu, neen a toon wan kelen owluman. Bakaten a go na a Gilead-Sikoo, neen den sende en go a  Chili, fu du kelen owluman wooko baka. A toow anga wan zendeling sisa di den be e kai Patsy. Baka wan yali, den meke wan umanpikin neen a dede. A á teke langa, neen Patsy seefi dede di a be abi 43 yali. Winsi fa ala den sani ya miti Rudolf, a á gwe fika Yehofa. Di a kon moo gaandi, a be e siki ma tokuso a be e pionili ete. A be e wooko enke wan owluman tu. I sa leisi a toli fi en aini A Waktitoren fu 1 augustus 1997, bladzijde 20-25. ^[1] (Luku a pisi: Ete wan pelensipali sani.)

15. Taki fu wantu baala anga sisa di e dini Yehofa winsi fa tesi e miti den.

¹⁵ Aini a ten ya, a omen baala anga sisa e dini Yehofa anga piisii winsi fa tesi e miti den. A omen ondoo baala anga sisa de aini sitaafu-osu a Eritreya, Singapore, anga Zuid-Koreya fu di den á wani toon suudati (Mateyesi 26:52). A moo enke 20 yali kaba Isaac, Negede, anga Paulos de a sitaafu-osu a Eritreya. A omen sani e miti den aini a sitaafu-osu. Ala den yali ya, den á poi toow efuso solugu den mma anga den dda, ma tokuso den e holidoo. Den biibi taanga. Nownow den sama di e holi wakiti gi den e lesipeki den. Wan fowtow fu den baala ya de a jw.org. Den e lafu, winsi san e miti den.

16. San wi o du te u biibi taanga?

¹⁶ Gaanse sama di e dini Yehofa aini a ten ya, á go a sitaafu-osu. Ma omen fu den e nyan pina fu di den pooti. Son leisi gaan winta e wai, doti e seke a den peesi pe den baala anga sisa fu wi e tan. Son wan fu den e tan a wan kondee pe feti e feti. Taawan waka a Abalaham, Isaki, Yakopu anga Mosesi baka. Den gwe fika gudu efuso balinen fu di den wani dini Yehofa. San e yeepi den fu dini Yehofa anga piisii? Na a lobi di den lobi Yehofa anga a biibi di den e biibi en. Den sabi taki Yehofa o pai den sama di nai gwe fika en. A o meke den tan aini a nyun goontapu pe ogii ná o de moo.​—Leisi Psalm 37:5, 7, 9, 29.

17. Fa i sa taanga i biibi? San wi o luku aini a taa artikel?

¹⁷ Aini a artikel ya, u si taki biibi a „te wan sama abi a fitoow taki den sani di ai howpu, o kon tuu”. Efu u wani u biibi taanga, u mu begi Yehofa, da u teke ten pakisei den sani di a paamisi u. A sani ya o yeepi u fu holidoo, winsi sowtu tesi e miti u. A taa artikel o soi san a wani taki te wan sama biibi taanga.