ENKE fa Mateyesi 13:24-26 e soi, da Yesesi be taki: „A Kownukondee fu hemel de enke wan man di paandi bun sii neen goon. Ma di sama be e siibi, neen en feyanti kon tyatya wan takuu uwii a den alisi ini, neen a gwe. Di a alisi bigin goo, di a meke nyanyan, a takuu uwii goo tu.” Son sikiifiman e si enke a sani di Yesesi taki ya, á be e pasa tuutuu. Ma den fositen weiti fu Rome e soi taki a kan taki a sani ya be e pasa fosi.

Wan Beibel wowtu buku taki, a weiti fu Rome e soi taki efu wan sama be paandi takuu uwii aini wan sama goon fu di a be wani pai en fu wan ogii di a du anga en, da den be o sitaafu a sama di paandi a takuu uwii aini a taawan goon. Efu a sani ya á be e pasa, den á be o meke weiti gi en. Wan man di den e kai Alastair Kerr e ondoosuku fositen weiti. A taki aini a yali 533 baka Kelestesi, a tiiman fu Rome di den e kai Justinian be meke sama sabi den weiti fu a kondee. A be sikiifi wan buku di e taki fu den weiti fu Rome anga son wan fu den afukati fu den, di be de fanafu a yali 100 te anga a yali 250 baka Kelestesi. A buku ya (Digest, 9.2.27.14) e taki fu wan afukati di den e kai Ulpianus di be kuutu wan toli aini a pisiten fu den yali 100 te anga 250. Wan sama be paandi takuu uwii aini wan taawan goon, neen a takuu uwii poli den sani fu a goon. A buku e soi sowtu leti a sama di abi a goon abi. Ai soi tu omen moni a sama di du a ogii mu pai.

Den sani ya be e pasa a Rome, neen meke u sa taki den sani di Yesesi taki aini a ageisitoli be sa pasa tuutuu.