1, 2. (a) San e miti taa kondee sama aini a ten ya? (Luku a fowtow na a bigin.) (b) San Pawlesi be membee den baala anga sisa? Sowtu akisi wi o luku?

MOO enke 30 yali kaba, Osei foloisi komoto a Gaana go tan a Europa. A ten de a á be toon Yehofa Kotoigi ete. ^[1] (Luku a pisi: Ete wan pelensipali sani.) A baala ya taki: „Mi be si taki gaanse sama á be e booko den ede anga mi. A peesi be koo. Di mi komoto na a peesi pe den e teke opalani, koo kii mi te mi kee. Fositoon aini mi libi a sowtu koo de naki mi.” Fu di a be taanga gi Osei fu taki a tongo fu a kondee de, meke a baka wan yali fosi a fende wan bun wooko. A be e angii fi en famii. A be e fii enke a ná abi mati.

² Efu a sani ya be miti i, fa i be o wani sama libi anga i? I be o wani den bali wadaa gi i, di i be o go a wan Kownukondee zaal. I be o wani den soi taki den lobi i, winsi sowtu kondee i komoto efuso winsi  sowtu kololu i sikin abi. Beibel taki tuutuu Kelesten á mu ’feegete fu kai sama kon a den osu’ (Hebrewsama 13:2). Neen meke wi o taki fu den akisi ya: Fa Yehofa e si taa kondee sama? A de fanowdu fu u kengi a fasi fa wi e si sama di wi á sabi? Fa u sa meke wan sama fu wan taa kondee fii bun, te den kon aini u kemeente?

3, 4. Enke fa Ekisodesi 23:9 e soi, fa Gadu be wani den Islayelisama libi anga taa kondee sama? Saide a be wani den libi so anga den taa kondee sama?

³ Baka di Yehofa puu en foluku a Egepte, a gi den weiti di be e leli den taki den mu libi bun anga den taa kondee sama (Ekisodesi 12:38, 49; 22:21). A libi be taanga gi den taa kondee sama, neen meke Yehofa be e solugu den. Den be sa go teke den nyanyan di be fika a den goon fu den Islayelisama. Dati a wan fu den sani di Yehofa be sete fu solugu den.​—Lefitikesi 19:9, 10.

⁴ Yehofa á gi den Islayelisama weiti namo di e soi fa den mu libi anga taa kondee sama, ma a membee den tu taki denseefi be de taa kondee sama (Leisi Ekisodesi 23:9.) Fosi den Islayelisama be toon saafu, den Egeptesama á be lobi den fu di den be de taa fasi (Genesesi 43:32; 46:34; Ekisodesi 1:11-14). A libi be taanga gi den Islayelisama di den be de taa kondee sama a Egepte. Yehofa be membee den a sani de. A soi den tu taki den mu libi bun anga den taa kondee sama di be e tan a den mindii.​—Lefitikesi 19:33, 34.

5. San o yeepi u fu si den taa kondee sama enke fa Yehofa e si den?

⁵ Yehofa á kengi. Neen meke te taa kondee sama kon a wi kemeente, u mu holi a pakisei taki Yehofa e soi switifasi gi den (Deitolonomi 10:17-19; Maleyaki 3:5, 6). Pakisei den booko ede di den taa kondee sama abi. Kande den nai fusutan a tongo fu a kondee. Kande sama nai libi bun anga den, neen meke u mu meke moiti fu yeepi den. U mu libi switi anga den tu.​—1 Peitilisi 3:8.

6, 7. San e soi taki den Dyu di be de Kelesten, be mu meke moiti fu den á paati bee?

⁶ Den fosi Kelesten be leli taki den be mu libi bun anga ala sama. Den á be mu de enke den Dyu fu a ten de. Na a Pinksterfesa fu a yali 33, den Dyu di be de Kelesten a Yelusalem, be libi bun anga den taa kondee sama di be kon a Yelusalem (Toli 2:5, 44-47). A sani ya e  soi taki den Dyu di be de Kelesten, be fusutan san a wani taki fu libi bun anga sama di yu á sabi.

⁷ Wan sani be pasa, di den sama be kon a Yelusalem na a Pinksterfesa fu a yali 33. Den Dyu di be e taki Giikitongo be e kuutu taki, den taawan á be e libi bun anga den uman di á be abi man moo (Toli 6:1). Den apostel be wani losi a polobelema, neen meke den sende seibin man fu go seeka a toli. Den sende man di be abi Giiki nen. Kande den du a sani ya fu meke den uman ya fii bun.​—Toli 6:2-6.

8, 9. (a) Sowtu akisi o yeepi u fu sabi efu wi e si enke u bun moo taawan? (b) San u mu meke moiti fu koti pasi gi? (1 Peitilisi 1:22)

⁸ Kande u nai poti pakisei, ma ala u gwenti du sani enke u famii efuso den sama di wi anga den kiya na a wan peesi (Romesama 12:2). Kande wi e yee fa den sama di e tan a u se, den sama di wi anga den e wooko na a wan peesi, efuso sikoo pikin e taki sani fu taawan di á fiti. Kande den e soso a lo fu a sama efuso a kololu fi en sikin. Fa yu e si den sowtu sani ya? San yu e du te wan sama e soso i kondee, i lo efuso a fasi fa i gwenti du sani?

⁹ Wan pisiten, Peitilisi á be kaba lobi den sama di á be de Dyu. Ma bakaten a meke moiti fu kengi a fasi fa a be e si den (Toli 10:28, 34, 35; Galasiyasama 2:11-14). Efu wi e fii enke u bun moo taawan wi á mu daaidaai fu kengi. Te u si taki wi e paati bee, u mu meke moiti fu kengi tu. (Leisi 1 Peitilisi 1:22.) San o yeepi u fu du a sani ya? Holi a pakisei taki ala u a sondu sama, winsi sowtu kondee wi e tan. Fu di u sondu, meke ala u be mu dede (Romesama 3:9, 10, 21-24). Neen meke wi á bun moo taawan (1 Korentesama 4:7). U mu si a sani ya enke fa apostel Pawlesi be e si en. A be taigi den baala anga sisa taki „wi a ná taa kondee sama moo” ma wi a ’Gadu osufamii’ (Efeisesama 2:19). Ala u mu meke moiti fu lobi ala sama. U mu meke moiti fu kengi a fasi fa wi e denki.​—Kolosesama 3:10, 11.

10, 11. Fa Bowas soi taki a be e si sama di a á sabi enke fa Yehofa e si den?

¹⁰ Bowas be e si taa kondee sama enke fa Yehofa e si den. Saide u sa taki so? Di Bowas go luku en goon na a koti alisi yuu, neen a si fa Rut, wan Moab uman, be e wooko taanga. A be e dyunta den alisi di be kai a doti. A Weiti fu Mosesi be e gi en pasi fu du a sani ya. Ma toku, a akisi fosi a bigin dyunta den alisi di kai a doti. Di Bowas yee a sani ya, a foondoo. A gi Rut a okasi fu piki alisi a den peesi pe den wookoman fi en be koti den alisi dyunta.​—Leisi Rut 2:5-7, 15, 16.

¹¹ A sani di Bowas du bakaten, e soi taki a be e booko en ede anga  Rut. Bika a libi be taanga gi en. A taigi Rut fu a piki alisi koosube fu den uman di be e wooko gi en, fu den man di e wooko na a goon á fuufeli en. A gi Rut nyanyan anga wataa enke fa a be e gi den wookoman fi en. Bowas be e lesipeki a pooti taa kondee uman ya. A be e gi en taanga-sikin tu.​—Rut 2:8-10, 13, 14.

12. Sowtu wini a abi te wi e libi bun anga sama di wi á sabi?

¹² A ná di Rut holibaka gi en main Naomi namo, meke Bowas libi bun anga en, ma a fu di Rut be e dini Yehofa. Rut be e si Yehofa enke a Gadu di be o kibii en. A fasi fa Bowas libi anga en, e soi fa Yehofa lobi libisama (Rut 2:12, 20; Odo 19:17). Efu wi e libi bun anga taawan aini a ten ya, wi o yeepi „ala sowtu sama” fu sabi a waaleiti. Den o si tu taki Yehofa lobi den.​—1 Timotiyesi 2:3, 4.

13, 14. (a) Saide u mu meke moiti fu taki anga den nyun sama di kon a komakandaa? (b) San sa yeepi i fu taki anga wan taa kondee sama?

¹³ U sa soi switifasi gi den sama di e kon a komakandaa, te wi e gi den odi. Son leisi te wan sama foloisi kon tan a wan kondee sen e kisi en, neen meke den nai wani fuufeli sama. Kande fu di den pooti efuso fu di den komoto a wan taa kondee, meke den e si enke den sama fu a kondee di den go, bun moo den. Neen meke a wi mu go taki anga den. A wi mu soi switifasi gi  den. Efu a JW Language app de aini i tongo, i sa leli fa i sa gi den odi aini den tongo.​—Leisi Filipisama 2:3, 4.

¹⁴ Ai taanga gi i fu taki anga wan taa kondee sama? Kande i sa taigi en sama a yu. Da a o moo makiliki gi i fu taki anga en. A sani ya o yeepi i fu si taki yu anga a sama á kengi tumisi. Holi a pakisei taki ala nasi abi en bun se anga en swaki pisi.

15. San o yeepi u fu fusutan den sama di e meke moiti fu gwenti wan taa kondee?

¹⁵ I mu akisi iseefi taki, efu a mi be go a wan taa kondee so, fa mi be o wani sama libi anga mi? A sani ya o yeepi i fu sabi fa i sa soi switifasi gi taa kondee sama (Mateyesi 7:12). Pasensi anga den sama di e meke moiti fu gwenti wan taa kondee. Biginbigin, kande u ná o fusutan fa den e denki, anga a fasi fa den e du sani. Ma toku u mu meke moiti fu lesipeki a fasi fa den e denki anga a fasi fa den e du sani. Wi á mu dwengi den fu denki efuso du sani enke wi.​—Leisi Romesama 15:7.

16, 17. (a) San u sa du efu u wani gwenti anga wan taa kondee sama? (b) Fa u sa yeepi den sama di kon tan a u kondee?

 ¹⁶ Efu u meke moiti fu sabi den gwenti fu den taa kondee sama, a o moo makiliki gi u fu gwenti anga den. Te wi e holi a Osufamii Anbegi, u sa meke moiti fu sabi wantu sani fu den taa kondee sama di kon a u kemeente, efuso di e tan na a pisi pe wi e peleiki. Wan taa fasi fa i sa meke mati anga sama di kon tan a yu kondee, a fu kai den kon nyan a yu osu. Yehofa be „opo pasi gi den taa kondee sama fu den be sa teke a biibi”. Neen meke u mu waka neen baka, da u opo doo gi taa kondee sama „moomoo den sama di wi anga den de na aseefi biibi”.​—Toli 14:27; Galasiyasama 6:10; Yopu 31:32.

¹⁷ Te wi e meke ten gi den sama di kon tan a u kondee, da a o bigi gi u fu si a moiti di den e meke fu du sani enke den sama fu a kondee. Kande wi o si taki den abi sama fanowdu fu leli den a tongo fu a kondee. Kande u sa soi den tu sowtu kantoo den mu go fu fende wan osu efuso wan bun wooko. Den baala anga sisa o fende wini te u du den sani ya gi den.​—Odo 3:27.

18. Sama baka den baala anga sisa di foloisi go a wan taa kondee sa waka?

¹⁸ Den sama di foloisi go tan a wan taa kondee, mu meke moiti fu du sani enke den sama fu a kondee pe den go. Na a sani ya Rut be du. A fosi sani di a du, a be e lesipeki den gwenti fu den sama, bika a begi den sama fosi a bigin piki nyanyan a den goon (Rut 2:7). A be e bigi gi en taki den sama meke a piki nyanyan a den goon. Du fu tu sani, a á be e daaidaai fu taigi sama taki a sani di den be e du gi en, e bigi gi en (Rut 2:13). Efu baala anga sisa di foloisi go tan a wan taa kondee e tyai denseefi so, a o moo makiliki gi den taa baala anga sisa anga den sama fu a kondee fu lesipeki den.

19. Saide u mu libi bun anga taa kondee sama?

¹⁹ Ai bigi gi u taki Yehofa soi bun ati gi u, fu di a gi ala sama a okasi fu yee a bun nyunsu. Son sama á be fende a okasi fu sutudeli Beibel, efuso kon makandaa anga a foluku fu Yehofa a den kondee. Neen meke now di den abi a okasi fu kon makandaa anga wi, u mu yeepi den fu den fii enke a osu den de. Kande u ná abi moni efuso taa sani fu gi den, ma te wi e libi bun anga den, da wi e soi taki u lobi den enke fa Yehofa lobi den. Enke sama di e waka a Yehofa baka, meke u du san u poi fu libi bun anga den taa kondee sama di de a u mindii!​—Efeisesama 5:1, 2.