1, 2. (a) Sowtu freide u sa abi? (b) Saide freide á de a hii goontapu ete? (Luku a fowtow na a bigin.)

ALA SAMA wani libi anga piisii, sondee booko-ede. Ai bigi gi u taki Yehofa gi wi a „freide fu Gadu”. A freide ya, na a buuya di u nai buuya. A sani ya e yeepi u fu wi á lasi useefi (Filipisama 4:6, 7). Boiti dati, te u dopu, da „wi anga Gadu toon mati”.​—Romesama 5:1.

² Ma a yuu á doo ete fu Gadu meke freide de a hii goontapu. Wi e libi aini den lasiti dei, neen meke a omen sani e pasa di e gi u booko-ede. Ogii sama lai a goontapu (2 Timotiyesi 3:1-4). U mu meke moiti fu Saatan á koli u anga den falisi leli fi en (2 Korentesama 10:4, 5). Ma a sani di e gi u moo booko-ede, a te u famii wani tapu u fu dini Yehofa. Son wan fu den e soso u. Kande den e fende taki wi e booko a famii. Kande  den taigi u taki solanga wi e dini Yehofa, wi anga den o poli. Fa u mu si a tapu di famii wani tapu u fu dini Yehofa? San o yeepi u fu dini Yehofa anga piisii te a sani ya miti u?

3, 4. (a) San e pasa te sama e wooko anga den leli fu Yesesi? (b) On ten a taanga fu waka a Yesesi baka?

³ Yesesi be sabi taki a ná ala sama be o lobi den sani di a be e leli den. A be sabi tu taki son sama á be o lobi den bakaman fi en, neen meke den be o abi taanga-sikin fanowdu. A sani ya be sa tyai toobi kon aini a osufamii fu den. Yesesi taki: „Yu á mu denki a freide mi tyai kon a goontapu. A ná freide mi tyai kon, ma a wan feti-how. Mi kon fu paati wan man anga en dda, wan umanpikin anga en mma, wan uman anga en main. Eeye, den feyanti fu wan sama, o de en eigi famii seefi.”​—Mateyesi 10:34-36.

⁴ Yesesi taki „Yu á mu denki a freide mi tyai kon a goontapu”. San a be wani taki anga a sani ya? A be wani soi taki sani be o miti den sama di be o toon en bakaman. A tuu, Yesesi be wani leli sama, sama a Gadu tuutuu. A ná paati a be wani paati famii (Yohanisi 18:37). Ma den bakaman fi en be mu sabi taki a ná ala yuu a be o makiliki fu waka neen baka, moomoo te den famii efuso mati á de a waaleiti.

5. San miti den bakaman fu Yesesi?

⁵ Yesesi be taki wan fu den tesi di den bakaman fi en be o abi fu pasa, a te den famii fu den o wani tapu den fu dini Yehofa (Mateyesi 10:38). Fu di den bakaman fu Yesesi be wani a piisii, meke den holidoo di den famii be e soso den efuso te den famii á be wani paa anga den fu di den e dini Yehofa. Ma toku san den fende, ipi moo san den lasi.​—Leisi Malikisi 10:29, 30.

6. San u mu holi a pakisei te u famii á wani u dini Yehofa?

⁶ Winsi u famii e du sani anga u fu di wi e dini Yehofa, tokuso u lobi den. Ma u mu holi a pakisei taki u mu lobi Gadu anga Kelestesi moo ala taa sama (Mateyesi 10:37). U mu luku bun fu Saatan á meke a lobi di u lobi u famii meke u pasa den weiti fu Yehofa. Wi o luku wantu sani di sa de enke wan tesi gi u anga fa u sa pasa den sowtu tesi ya.

7. Fa i mu tyai iseefi aini a osufamii winsi i toowpaa nai dini Yehofa?

⁷ Beibel wasikoi u taki ala sama di toow ’o miti anga banowtu efuso polobelema aini den libi’ (1 Korentesama 7:28). Efi i toowpaa nai dini Yehofa, a sani ya sa tyai moo polobelema anga booko-ede kon aini a osufamii. Ma u mu si a sani ya enke fa Yehofa e si en. A taki wi á mu paati efuso booko toow anga u toowpaa fu di a nai dini Yehofa (1 Korentesama  7:12-16). Winsi i man nai dini Yehofa efuso gi a osufamii taanga-sikin fu dini Yehofa, i mu lesipeki en. Efu yu uman nai dini Yehofa, toku u mi lobi. I mu solugu en tu.​—Efeisesama 5:22, 23, 28, 29.

8. San i mu du efi i toowpaa á wani i du ala san i man gi Yehofa?

⁸ San i mu du efi i toowpaa á wani i du ala san i man gi Yehofa? Wan sisa man taigi en taki a wantu dei fu a wiki namo a mu go a peleikiwooko. Efu a sani ya miti i, akisi iseefi taki: ’A wani mi toowpaa wani tapu mi fu dini Yehofa? Mi sa du san a taki efu a ná tapu ai tapu mi fu dini Yehofa?’ Efu yu e fiti iseefi a taawan, i ná o lai polobelema aini a osufamii.​—Filipisama 4:5.

9. Fa mma anga dda sa yeepi den pikin fu lesipeki den mma efuso dda di nai dini Yehofa?

⁹ A á makiliki fu yeepi i pikin fu dini Yehofa te i toowpaa nai dini Yehofa. I mu leli i pikin fu ’aliki en mma anga en dda’ enke fa Beibel e taki (Efeisesama 6:1-3). Ma san i mu du efi i toowpaa nai du san Beibel taki? Efu yu e lesipeki i man efuso yu uman, a pikin fi i o waka a yu baka. Pakisei den bun manii fi i toowpaa, da i taigi en taki den bun sani di ai du e bigi gi i. Yu á mu taki sani fi i man efuso yu uman di yu á kaba lobi a den pikin fesi. Ma soi i pikin taki na ala sama mu luku efu den wani dini Yehofa. Efi i leli i pikin fu lesipeki en mma efuso en dda di á de a waaleiti, da kande i toowpaa o wani dini Yehofa te a si fa a pikin e tyai enseefi.

10. Fa mma anga dda di de a waaleiti sa yeepi den pikin fu lobi Yehofa?

¹⁰ Son toowpaa di nai dini Yehofa e leli den pikin taki den mu fii den fesa di goontapu sama e fii. Kande den e leli den sani fu falisi keliki tu. Son man e taigi den uman taki noiti den  mu leli den pikin sani fu Beibel. Ma winsi a sani ya pasa, toku a uman o du san a poi fu leli den pikin a waaleiti (Toli 16:1; 2 Timotiyesi 3:14, 15). Kande a man á wani en uman sutudeli anga den pikin efuso tyai den go a komakandaa. Winsi a uman e lesipeki en man, tokuso a sa taki anga den pikin te a fende a okasi. A so den pikin o sabi san Yehofa lobi anga san a á lobi (Toli 4:19, 20). Di den pikin o bigi, a denseefi o luku efu den wani dini Yehofa. * (Luku a maiki a ondoo.)​—Deitolonomi 30:19, 20.

11. San sa poli wi anga den famii fu u di nai dini Yehofa?

¹¹ Kande di u be bigin sutudeli Beibel wi á be taigi den famii fu u, ma di u kon fusutan den sani di wi e leli, u kon si taki a de fanowdu fu taigi den taki wi o dini Yehofa (Malikisi 8:38). A kan taki yu anga den famii fi i poli fu di yu e dini Yehofa. Wi o luku wantu sani di o yeepi i fu libi na a wan anga i famii sondee fu pasa den weiti fu Yehofa.

12. San sa meke den famii fu u á wani u dini Yehofa? Fa u sa soi den taki wi e fusutan den?

¹² Meke moiti fu fusutan den famii fi i di nai dini Yehofa. Wi e piisii fu di u sabi den sani di sikiifi aini Beibel. Ma kande den sama fu wi e si enke a koli sama koli u. Kande den e si enke wi e go kaba a soso. Den sa denki taki wi á lobi den moo fu di u nai go a den fesa fu den moo. Kande den e feele taki sani o miti u te u dede. Efu u wani sabi fa den e fii, u mu aliki den bun te den e taki anga u, da wi o sabi saide den e booko den ede (Odo 20:5). Apostel Pawlesi be e meke moiti fu fusutan „ala sama” fu di a be wani paati a bun nyunsu gi den. Te wi e meke moiti fu fusutan den famii fu u, wi o sabi fa u mu yeepi den fu sabi Yehofa.​—1 Korentesama 9:19-23.

13. Fa u mu taki anga den famii fu u di nai dini Yehofa?

¹³ Taki switi anga den. Beibel taki u mu „taki switi anga taawan ala yuu” (Kolosesama 4:6). A sani ya á makiliki. U sa akisi Yehofa fi en santa yeye yeepi u fu taki moin anga den famii fu u. Wi á mu e hali taki anga den fu den sani di den e biibi. Efu den du efuso taki wan sani di hati u, u mu  meke moiti fu de enke apostel Pawlesi. A be taki: „Te sama e kosi u, wi e belesi den. Te sama e du ogii anga wi, wi e holidoo anga pasensi. Te den e poli u nen u nai ligei anga den.”​—1 Korentesama 4:12, 13.

14. Sowtu wini a abi te wi e tyai useefi bun?

¹⁴ Tyai iseefi bun. Saide a sani ya pelensipali? A fasi fa wi e taki anga den famii fu u di nai dini Yehofa, o yeepi u fu libi na a wan anga den. Ma a sani di o moo yeepi den, na a fasi fa wi e tyai useefi. (Leisi 1 Peitilisi 3:1, 2, 16.) Meke den famii fi i si taki sani e waka bun anga den sama di e dini Yehofa. Meke den si taki Yehofa Kotoigi e solugu den pikin, den e wooko anga den leli fu Beibel. Den mu si tu taki u de koloku. Winsi den famii fu u á kon dini Yehofa, toku wi o piisii fu di u sabi taki Yehofa e piisii te wi e tyai useefi bun.

15. San u mu pakisei a fesi efu wi á wani hali taki anga den famii fu u di nai dini Yehofa?

¹⁵ Pakisei a fesi. Fosi i du wan sani i mu pakisei luku efu a sani de ná o meke den famii fi i ati boon a yu (Odo 12:16, 23). Na a sani ya wan sisa fu Australiya be du. A pai fu a sisa ya á be lobi a waaleiti seefiseefi. Son leisi en ati be e boon. Neen meke fosi a sisa ya anga en man telefon a pai fi en, den be e begi Yehofa fu a yeepi den fu taki moin anga en. Den be e pakisei sowtu moin toli den sa gi en. Den be e luku on langa den o taki anga en tu. Dati be e yeepi den fu a á fende okasi fu hali taki anga den fu keliki toli.

16. San i mu holi a pakisei te yu anga yu famii di nai dini Yehofa nai fusutan useefi?

¹⁶ Son leisi yu anga den sama fi i di nai dini Yehofa ná o go e fusutan useefi. Kande yu o go e fii enke a yu á du bun, da yu o wani du san den wani, bika i lobi i famii. Ma yu á mu feegete taki i mu lobi Yehofa moo i famii. Te den sama fi i fusutan a sani ya, kande den o si saide a de taanga fanowdu fu dini Yehofa. I ná o poi dwengi den fu kon a waaleiti. Ma i poi yeepi den fu si fa Yehofa yeepi i di i du sani enke fa a wani. Bika te i luku en bun, da Yehofa gi den aseefi okasi di a gi u. A wani den kon dini en fu di denseefi wani.​—Yesaya 48:17, 18.

17, 18. San o yeepi i te wan famii fi i nai dini Yehofa moo?

¹⁷ A wan hati sani te wan famii fu u komoto a waaleiti efuso te a nai mumui anga a kemeente moo. A leti enke te wan sama be o sutu yu anga wan how. Ma san o yeepi i te a sani ya miti i?

 ¹⁸ Poti ala i pakisei na a dini di yu e dini Yehofa. I mu meke moiti fu taanga i biibi te den sani ya miti i. Leisi Beibel ala yuu, seeka gi den komakandaa da i go a den, peleiki ala yuu, begi Yehofa fu a yeepi i fu holidoo (Yudasi 20, 21). Ma san i sa du, efi i du ala den sani ya, neen yu e kusumi ete? Ná gi abaa! Tan poti i pakisei na a dini di yu e dini Yehofa. A sani de o yeepi i fu yu á kusumi tumisi. A o yeepi i fu yu á booko-saka tu. Na a sani ya be yeepi a sama di sikiifi Psalm 73. Wan pisiten a be e fii booko-saka. Ma a dini di a be e dini Yehofa be yeepi en fu kisi enseefi (Psalm 73:16, 17). A sani ya sa yeepi i tu.

19. Fa u sa soi taki wi e lesipeki den weiti fu Yehofa?

¹⁹ Lesipeki den weiti fu Yehofa. Gadu sabi taki den weiti fi en sa yeepi ala sama. Den sa yeepi den sama di gwe fika Yehofa tu. A á switi te den puu wan sama di u lobi na a kemeente, ma a sani de sa yeepi a sama fu kon dini Yehofa baka. (Leisi Hebrewsama 12:11.) Ma efu a sama á daai kon ete, u mu soi Yehofa taki wi e lesipeki a fasi fa ai du sani. Wi ’á mu mosoo’ anga den sama di den puu na a kemeente (1 Korentesama 5:11-13). Winsi a á makiliki, wi á mu taki anga den a telefon, wi á mu sms den, sende biifi gi den, sende e-mail gi den, efuso taki anga den a internet tu.

20. San u mu e howpu ala yuu?

²⁰ Ná lasi howpu! Lobi e „howpu ala sani”, neen meke useefi e howpu taki den sama fu u di gwe fika Yehofa daai kon baka (1 Korentesama 13:7). Efi i si taki a sama fi i di be gwe fika Yehofa e meke moiti fu kengi a fasi fa ai libi, i sa begi Yehofa fu a yeepi en fu opo en ati gi den sani di ai leli aini Beibel. I sa begi Yehofa fu a yeepi en fu daai kon baka tu, bika Yehofa e kai en taki: ’Gaantangi, kon baka.’​—Yesaya 44:22.

21. San yu o du efi i famii e du ogii anga i fu di yu e waka a Yesesi baka?

²¹ Yesesi taki u mu lobi en moo ala taa sama. Yesesi be sabi taki den disipel fi en á be o gwe fika en winsi san famii be o du anga den. Neen meke winsi san i famii e du anga i fu di yu e waka a Yesesi baka, yu á mu gi abaa. Fitoow Yehofa. Begi en fu a yeepi i fu holidoo (Yesaya 41:10, 13). I mu piisii fu di i sabi taki yu e meke Yehofa anga Yesesi piisii. Den o pai i fu di yu e holidoo.