1, 2. Fa sani be e go a Yelusalem di Sakaliya si du fu seibin fisyun?

DI Sakaliya si du fu seibin fisyun, a be musu e pakisei omen sani. Kande a be e fii bun di Yehofa paamisi taki a be o sitaafu den sama di nai tyai denseefi bun. Ma baka di a si den fisyun ya, sani á be kengi aini a kondee. A omen sama be e lei efuso du taa ogii. A tempel a Yelusalem seefi á be kaba meke. Saide den Dyu be fika a wooko di Yehofa be gi den? A den eigi libi den be go sete a Yelusalem?

² Sakaliya be sabi taki den Dyu di be go a Yelusalem be e dini Yehofa. A den „Gadu be gi a fii” fu fika den osu anga den bisnis a Babilon fu go a Yelusalem (Esra 1:2, 3, 5). Den foloisi komoto a Babilon, a kondee di den be sabi bun, neen den go a wan kondee di gaanse fu den á be sabi. A meke fu a tempel be pelensipali gi den Dyu  te den waka 1600 kilomeiti go a Yelusalem, winsi fa ogii be sa miti den a pasi.

3, 4. Sowtu tesi be e miti den Dyu di be daai go a Yelusalem baka?

³ Pakisei on langa a be teke fu waka komoto a Babilon doo Yelusalem. A omen ten a foluku be abi fu pakisei fa a libi be o de a Yelusalem. Kande den be e gi toli tu. Den gaandiwan be taigi den fa Yelusalem anga a tempel be moin (Esra 3:12). Efi i be de aini a kulu e waka go a Yelusalem, fa i be o fii di i be o si Yelusalem fu fosi leisi? Tyali be o kisi i fu si fa a kondee kon tan? Tyali be o kisi i fu si taki a sikotu á be abi tolen anga doo? Tyali be o kisi i fu si fa a kondee busi? Kande i be o maiki a booko sikotu fu Yelusalem anga a taanga sikotu fu Babilon. Ma toku den Dyu á be lasi-ati. Saide? We di den be de a pasi e go a Yelusalem, Yehofa be yeepi den fu ogii á miti den. Di den doo Yelusalem a so den seeka a altari, neen den bigin tyai ofaandi gi Yehofa ala dei (Esra 3:1, 2). Den be de fayafaya fu du a wooko. A gei enke nawan sani be o meke den fii booko-saka.

⁴ Boiti a tempel di den Dyu be mu meke, den be mu meke den osu. Boiti dati den be mu seeka den foto fu den tu. Den be mu paandi goon fu den famii be sa fende sani fu nyan (Esra 2:70). A omen wooko den be mu du. A á teke langa neen feyanti kon fu tapu den. A 15 yali langa feyanti fooseli den. Saafisaafi den Dyu bigin lasi-ati (Esra 4:1-4). Wan taa sani di be de enke wan tesi gi den, a san be pasa aini a yali 522. A kownu fu Persiya be taigi den Dyu taki den á mu bow Yelusalem moo. A be gei enke a foto á be o seeka moo.​—Esra 4:21-24.

5. Fa Yehofa yeepi en foluku?

⁵ Yehofa be sabi taki a foluku be abi taanga-sikin fanowdu. A gi Sakaliya ete wan fisyun fu soi a foluku fi en taki a lobi den. A be wani soi den anga a fisyun ya tu taki a lobi san den e du gi en. A paamisi den taki a o yeepi den efu den du a wooko di a be gi den fu du. Yehofa be taigi den taki: „Efu wi e du san Yehofa u Gadu taki, ala den sani ya o pasa.”​—Sakaliya 6:15.

6. (a) Fa du fu aitin fisyun fu Sakaliya bigin? (Luku a fowtow na a bigin.) (b) Saide den asi á be abi aseefi kololu?

⁶ Du fu aitin fisyun di Sakaliya be si, a be a lasiti wan. Kande a fisyun ya be moo gi a foluku taanga-sikin. (Leisi Sakaliya 6:1-3.) Puubei fu si san Sakaliya be si. Fo asiwagi „komoto a tu mongo mindii”. Den asi di be e hali den wagi ya be abi den eigi kololu, neen meke a be makiliki fu sabi sama e lei den. Sakaliya akisi a engel taki: „San a den asiwagi ya?” (Sakaliya 6:4) Useefi wani sabi a sani ya, bika a fisyun ya abi fu du anga wi tu.

7, 8. (a) San den tu mongo wani taki? (b) Saide den mongo a kopoo?

⁷ Son leisi te Beibel taki fu mongo, da a wani taki kownukondee efuso  tiimakiti. Den mongo di Sakaliya be si, a denseefi mongo di Daniyeli be taki fu den. Wan fu den mongo ya e soi taki a Yehofa abi a leti fu tii hemel anga goontapu. Ai soi tu taki Yehofa a Kownu fu teego. A taa mongo e soi go na a tii di Yesesi o tii enke Kownu fu a Mesiyas Kownukondee (Daniyeli 2:35, 45). Fanafu di Yesesi toon Kownu aini 1914, neen den tu mongo ya bigin du den wooko fu meke san Gadu abi a pakisei gi a goontapu pasa.

⁸ Saide den tu mongo a kopoo? Kopoo taanga. Boiti dati ai beenki. Di den Islayelisama be e meke a tabernakel anga a tempel a Yelusalem, Yehofa be taigi den taki den mu meke son sani anga kopoo (Ekisodesi 27:1-3; 1 Kownu 7:13-16). A ná fu soso a fisyun e soi taki den tu mongo ya a kopoo. A sani ya wani taki a tii fu Yehofa anga a tii fu a Mesiyas Kownukondee, a den moo bun tii di de. Te den o tii, u ná o feele taki ogii o miti u moo. A omen wini wi o fende.

9. Sama be e lei den asiwagi? Sowtu wooko Yehofa be gi den?

⁹ San den asiwagi anga den sama di e lei den wani taki? Den wani taki engel. Kande a wantu kulu engel. (Leisi Sakaliya 6:5-8.) Den de „na a Masaa fu hii goontapu fesi”. Den abi wan pelensipali wooko fu du. Gadu sende den engel go na a kondee di de a „noord”, efuso Babilon fu kibii a foluku fi en. Yehofa be wani soi en foluku anga a fisyun ya taki noiti moo den o toon saafu a Babilon. Pakisei fa a sani ya be gi den sama di be e meke a tempel aini a ten fu Sakaliya taanga-sikin. Den be sabi taki den feyanti fu den á be o poi tapu den.

10. Fa a polofeititoli fu den asiwagi e yeepi u aini a ten ya?

¹⁰ Aini a ten ya, Yehofa e meke den engel fi en kibii en foluku tu (Maleyaki 3:6; Hebrewsama 1:7, 14). Fanafu 1919 di a foluku fu Yehofa komoto a katibo na a Gaan Babilon, den feyanti fu den puubei fu tapu den, fu a tuu biibi á be sa kon moo bigi (Openbaring 18:4). Ma den á be poi du a sani de. Den engel e kibii a olikanisâsi fu Yehofa, neen meke u ná abi fu feele taki wi o toon saafu fu falisi biibi baka (Psalm 34:7). Ma anga piisii wi o dini Yehofa. Wi o du omen sani gi en tu. A polofeititoli fu Sakaliya e leli u taki den tu mongo e kibii wi.

11. Saide u ná abi fu feele te den tiiman o kon feti anga a foluku fu Yehofa?

¹¹ Dyonson den tiiman fu a goontapu fu Saatan o kon fu puu a foluku fu Gadu a pasi (Eseikiyeli 38:2, 10-12;  Daniyeli 11:40, 44, 45; Openbaring 19:19). A polofeititoli fu Eseikiyeli e soi taki omen sama kon feti anga a foluku fu Yehofa. Den ipi enke woluku. Den be e kon anga asiwagi (Eseikiyeli 38:15, 16) *. (Luku a maiki a ondoo.) U mu feele den? Nono! Den engel fu Yehofa de a u se. Den o kibii a foluku fu Yehofa na a ten fu a gaan banowtu. Den o kii ala den sama di á wani Yehofa enke den tiiman (2 Tesalonikasama 1:7, 8). A dei de o simpan tuutuu! Ma sama o de a fesiman fu den engel fu Yehofa?

12, 13. (a) San na a taa sani di Yehofa sende Sakaliya fu du? (b) Fa u du sabi taki a Pikin Taka a Yesesi Kelestesi?

¹² A Sakaliya wawan be si den aitin fisyun ya. Ma a du wan sani fu meke taa sama si. Wan sani di be o gi den sama di be e meke a tempel taanga-sikin. (Leisi Sakaliya 6:9-12.) Dii man di komoto a Babilon, be doo Yelusalem. Den be e kai den man ya Heldai, Tobiya anga Yedaya. Yehofa sende Sakaliya fu a teke solufu anga gowtu a den man ya, da a meke wan „kownu-ati” (Sakaliya 6:11). A wan bakapikin  fu David di den be e kai Serubabel fu a lo fu Yuda, a be gaanman a pisiten de. Na a man ya Sakaliya be meke a kownu-ati gi? Nono. Yehofa sende Sakaliya fu a wei a kownu-ati gi Yowsuwa, a Edeman fu den Pilisite. Ala den sama di si a sani ya be musu foondoo.

¹³ Yowsuwa a Edeman fu den Pilisite be o toon kownu fu di den be wei a kownu-ati gi en? Nono. Yowsuwa a ná be wan bakapikin fu David, neen meke a á be o poi toon kownu. A kownu-ati di Sakaliya be wei gi en, e soi go na a sama di Yehofa o poti fu tii enke kownu anga pilisite fu teego. Beibel e kai en a Pikin Taka. A Pikin Taka ya a Yesesi Kelestesi enke fa Beibel e soi.​—Yesaya 11:1; Mateyesi 2:23.

14. San Yesesi enke Kownu anga Edeman fu den Pilisite e du?

¹⁴ Yesesi a Kownu, anga Edeman fu den Pilisite. Neen na a fesiman fu den engel fu Yehofa. A Yesesi e kibii a foluku fu Gadu aini a ogii goontapu ya (Yelemiya 23:5, 6). Dyonson, Yesesi o wini den feyanti fu Gadu. Yesesi e holibaka gi a leti di Yehofa abi fu tii hemel anga goontapu. A o kibii a foluku fu Yehofa tu (Openbaring 17:12-14; 19:11, 14, 15). Ma fosi a ten de, a omen sani Yesesi efuso a Pikin Taka mu du.

15, 16. (a) Fa a foluku fu Gadu kiin aini a ten ya? Sama yeepi den fu kiin? (b) Fa goontapu o de baka di Kelestesi o tii wan dunsu yali?

¹⁵ Enke Kownu anga Edeman fu den Pilisite, Yesesi abi a wooko fu „meke a tempel fu Yehofa”. (Leisi Sakaliya 6:13.) Aini 1919, Yesesi meke a tempel di a puu a foluku fu Gadu na a Gaan Babilon, den falisi biibi fu a goontapu ya. Yesesi seeka a kemeente, neen a poti „a koni saafu di u sa fitoow”. A kulu salufu baala ya e teke fesi na a pelensipali wooko di e du a goontapu ya (Mateyesi 24:45). Yesesi yeepi a foluku fu Yehofa fu den á biibi falisi sani. Neen meke den man dini Yehofa enke fa a wani.​—Maleyaki 3:1-3.

¹⁶ Yesesi anga den 144.000 kownu anga pilisite o tii wan dunsu yali. A ten de, den o yeepi den sama di e dini Yehofa fu den ná abi nawan sondu moo. Di den kownu anga den pilisite  ya o kaba a wooko fu den, a den sama di e dini Yehofa wawan o de a goontapu. Da nawan falisi biibi o de moo.

17. Fa Yehofa gi den Dyu taanga-sikin? San den du di Yehofa gi den taanga-sikin?

¹⁷ San den Dyu du di den yee a bosikopu fu Sakaliya? Yehofa be paamisi den taki a o yeepi den. A be taigi den taki a o kibii den tu fu den be sa kaba meke a tempel. A sani ya be e gi den howpu. Ma kande den be e pakisei fa den be o man du a gaan wooko ya, bika den á be ipi. Neen meke Sakaliya taigi den wan sani di gi den taanga-sikin. Boiti Heldai, Tobiya anga Yedaya di be kon yeepi den anga a wooko, Yehofa be taigi den taki sama be „o kon yeepi meke a osu fu Yehofa”. (Leisi Sakaliya 6:15.) Den Dyu be sabi taki Yehofa be e holibaka gi den. Den be kon abi deki-ati, neen meke winsi fa a kownu fu Persiya be tapu a wooko, toku den Dyu be e wooko fayafaya. A tapu di a wooko be tapu be de enke wan mongo, ma Yehofa puu a mongo ya. Te fu kaba, aini a yali 515 fosi Kelestesi, neen a tempel kaba meke (Esra 6:22; Sakaliya 4:6, 7). Ma a toli ya wani taki wan moo gaan sani. A sani ya e pasa nownow.

18. Fa a polofeititoli fu Sakaliya 6:15 e pasa aini a ten ya?

¹⁸ Aini a ten ya a omen miliyun sama e dini Yehofa. Anga piisii den e gi Yehofa den „gudu” di den abi. Sani enke den ten, kaakiti anga taa sani. A so den e holibaka gi a gaan tempel fu Yehofa (Odo 3:9). U sa biibi taki Yehofa e teke en fu bigi taki wi e holibaka gi a tuu biibi. Yu e membee ete taki Heldai, Tobiya anga Yedaya be tyai gowtu gi Sakaliya fu a meke wan kownu-ati? A kownu-ati be e „membee” den san den be mu gi fu holibaka gi a tuu biibi (Sakaliya 6:14). Noiti Yehofa o feegete san wi e du gi en anga fa u lobi en.​—Hebrewsama 6:10.

19. Sowtu wini wi e fende fu a polofeititoli fu Sakaliya?

¹⁹ A omen gaan wooko a foluku fu Yehofa e du aini a ten ya. A di Yehofa e belesi u anga di Kelestesi e tii wi, meke u poi du den sani ya. Ai bigi gi u taki u de aini a olikanisâsi fu Yehofa di o tan fu teego. U sabi taki dyonson ala sama o dini Yehofa enke fa a wani. Neen meke i mu teke en fu bigi taki i de aini a olikanisâsi fu Yehofa. Boiti dati i mu ’aliki Yehofa, a Gadu fi i’. Da u Kownu, a Edeman fu den pilisite anga den engel fi en o kibii yu. Du san i poi fu holibaka gi a tuu biibi. Yehofa o kibii yu aini den lasiti dei fu a goontapu ya. A o kibii yu fu teego!