WAN sani fu 60 yali pasa John dda toon Yehofa Kotoigi. A be e tan a wan pikin foto fu Indiya di den e kai Gujarat. Ma John anga den feifi baala anga sisa fi en anga en mma be de a Lomusu keliki. Den á be lobi Kotoigi. Neen meke di a dda toon Kotoigi den ati boon.

Wan dei John dda akisi en fu a tyai wan biifi gi wan baala fu a kemeente. Ma a mamanten de, a koti en finga di a be e koti wan bidon. Ma fu di a be wani du san en dda akisi en meke a lolo wan pisi koosi neen finga, bika a be koti dipi. Baka dati neen a tyai a biifi gi a baala.

Di John doo na a osu, na a uman fu a baala be de a osu. A uman seefi a be wan Kotoigi. A sisa be si taki wan sani du John neen finga. Neen a sisa akisi en efu a wani a yeepi en. A teke a dosu pe ai poti den deesi fi en, neen a kiin a soo fu John. Baka dati a tei en gi en. Di a kaba neen a meke te gi en. Ma di a be e yeepi John a be e taki switi anga en fu a bosikopu fu Beibel.

Di a sisa soi switifasi gi John, a kon si taki Yehofa Kotoigi á de enke fa a be denki. Neen meke a akisi a sisa tu sani di Lomusu keliki be e biibi. A akisi en efu Yesesi a Gadu anga efu Kelesten mu begi Maliya. A sisa be leli taki Gujaratitongo, a mamabee tongo fu John. Neen meke a piki John aini a tongo ya. A soi en san Beibel e taki fu den toli ya. Baka dati a gi en a buku di den e kai „This Good News of the Kingdom” (A bun nyunsu fu a Kownukondee fu Gadu).

Di John leisi a buku, a be kon si taki den sani di a be e leisi a tuu. A go na a pilisite fu a keliki fi en, neen a akisi denseefi sani. A pilisite ati boon neen te neen a fiingi a Beibel naki en. A taigi en taki: „I toon Saatan! Soi mi pe fu a Beibel e taki Yesesi a ná Gadu. Soi mi pe a sikiifi taki wi á mu dini Maliya. Soi mi!” John dyombo. A á be sabi taki a pilisite be sa ligei so. A taigi a pilisite taki noiti moo a o poti en futu aini wan Lomusu keliki. Noiti moo a go a wan Lomusu keliki tu.

John bigin sutudeli Beibel anga den Yehofa Kotoigi. A be e biibi taki den sani di a be e leli a tuu. A so a bigin dini Yehofa. Bakaten a omen famii fi en toon Yehofa Kotoigi. Baka 60 yali, te John luku a maiki pe a bidon be koti en, ai membee taki a di wan Kotoigi soi switifasi gi en meke ai dini Yehofa.​—2 Korentesama 6:4, 6.