1, 2. Sowtu gaan faantiwowtu Yehofa be gi Yowsuwa baka di Mosesi dede?

YEHOFA be taigi Yowsuwa taki: „Mi futuboi Mosesi dede. Neen meke i mu seeka fu yu anga a hii foluku abaa a Yordaan liba, da u go aini a kondee di mi o gi den Islayelisama” (Yowsuwa 1:1, 2). A be wan gaan sani gi Yowsuwa, bika a 40 yali a wooko enke Mosesi futuboi.

² A omen yali langa Mosesi be de fesiman fu den Islayelisama, ma now a Yowsuwa be o du a wooko ya. Kande a be e akisi enseefi efu a foluku be o wani aliki en (Deitolonomi 34:8, 10-12). Di wan buku be e taki fu san sikiifi a Yowsuwa 1:1, 2, a taki a moo taanga sani gi wan foluku aini a ten ya anga a ten di pasa, a te den mu aliki wan nyun fesiman.

3, 4. Fa Gadu belesi Yowsuwa di Yowsuwa be e fitoow en? San u mu akisi useefi?

 ³ Yowsuwa be musu e booko en ede anga a gaan wooko di Yehofa gi en. Ma tokuso a fitoow Yehofa. A be de kabakaba fu du san a taki (Yowsuwa 1:9-11). Yowsuwa be e fitoow Gadu, neen meke Gadu belesi en. Gadu meke wan engel tii Yowsuwa anga den Islayelisama. Kande a engel ya na a Wowtu, a fosi Manpikin fu Gadu.​—Ekisodesi 23:20-23; Yohanisi 1:1.

⁴ Yehofa yeepi den Islayelisama fu holibaka gi Yowsuwa a nyun fesiman fu den. A omen sani e kengi aini a olikanisâsi fu Gadu aini a ten ya tu. Kande wi e akisi useefi taki: „San o yeepi u fu fitoow Yesesi a sama di Yehofa poti enke fesiman, o moo a olikanisâsi fu Yehofa e go a fesi?” (Leisi Mateyesi 23:10.) Fu man piki a akisi, wi o luku fa Yehofa be e tii en foluku aini den ten di pasa te sani be kengi.

5. San pasa di Yowsuwa doo koosube fu Yerikow? (Luku a fowtow na a bigin.)

⁵ Baka di den abaa a Yordaan liba, wan sani pasa di Yowsuwa á be denki. A miti wan man koosube fu a foto Yerikow di be de anga wan fetihow. Yowsuwa akisi a man taki: „I de a u se efuso i de a den feyanti fu u se?” Yowsuwa foondoo di a man taigi en taki en na „a edeman fu den engel di de enke suudati fu Yehofa”, wan engel di be de kabakaba fu feti gi a foluku fu Gadu. (Leisi Yowsuwa 5:13-15.) Winsi fa a tekisi taki a Yehofa be e taki anga Yowsuwa, a gei enke a wan engel Gadu be koboloiki fu taki anga Yowsuwa enke fa a be du a taa okasi.​—Ekisodesi 3:2-4; Yowsuwa 4:1, 15; 5:2, 9; Toli 7:38; Galasiyasama 3:19.

6-8. (a) Saide den Islayelisama be sa denki taki á na wan koni sani fu wooko anga san a engel be taigi den? (b) Fa u du sabi taki den be sa fitoow san a engel be taigi den? Fa u du sabi taki na a moo bun yuu a be taigi den den sani ya? (Luku a maiki a ondoo.)

⁶ A engel taigi Yowsuwa finifini san a mu du fu wini Yerikow. Kande Yowsuwa á be e si son sani di a engel be taigi en enke wan koni sani. Wan fu den sani di a taigi en, a fu besnei ala den suudati. Di a be o besnei den suudati a wantu dei den á be o poi feti. A be wan bun ten fu besnei den suudati?​—Genesesi 34:24, 25; Yowsuwa 5:2, 8.

⁷ Kande den suudati be e akisi denseefi taki: ’Fa wi o yeepi u famii efu den feyanti kon feti anga u?’ Ma wan sani di den á be denki pasa! Pe fu den man fu Yerikow go feti anga den Islayelisama, a feele den be e feele den. Beibel taki: „Den sama fu Yerikow tapu ala den gaan doo fu a foto, bika den be e feele den Islayelisama. Nawan sama be man go aini a foto. Nawan sama be man komoto aini tu” (Yowsuwa 6:1). Di den Islayelisama yee a sani ya, a be musu taanga den biibi!

⁸ A engel taigi Yowsuwa taki den á mu go feti anga Yerikow. Ma den be mu waka lontu a foto wan leisi wan dei. Den be mu du a sani ya seibin dei langa, ma du fu seibin dei den be mu waka seibin leisi lontu a foto. Kande den suudati be e denki taki: ’A sosokaali wi e lasi u ten anga u kaakiti!’ Ma a Fesiman fu Islayeli di sama á be man si, be sabi san ai du! Den Islayelisama biibi be kon moo taanga di den du san a taigi  den. A á be de fu den feti anga den suudati fu Yerikow tu.​—Yowsuwa 6:2-5; Hebrewsama 11:30. * (Luku a maiki a ondoo.)

9. Kai wantu sani di e soi saide u mu du ala sani enke fa a olikanisâsi fu Yehofa taigi u?

⁹ San a toli ya e leli u? Ai leli u taki a ná ala yuu wi o fusutan saide a olikanisâsi fu Yehofa e du son sani. Kande fosi u be e si enke a á bun fu koboloiki telefon efuso tablet te wi e sutudeli, te wi e peleiki anga te u de a komakandaa. Ma nownow wi e si a wini fu den sani ya. Te wi e fende wini fu den sani di a olikanisâsi e du taa fasi, u biibi e moo taanga. Wi anga den taa baala anga sisa a hii goontapu e moo libi na a wan tu.

10. Sama a be fesiman fu den baala di be e tii a wooko, di den be kon a makandaa a Yelusalem fu taki efu wan Kelesten mu besnei?

¹⁰ Wan sani fu 13 yali baka di wan man den e kai Koneiliyesi toon Kelesten, neen son wan fu den Dyu Kelesten be fende taki a de fanowdu ete fu sama besnei (Toli 15:1, 2). Den baala anga sisa fu Antiyokiya be e sitee anga denseefi fu a toli ya. Neen meke den sende Pawlesi go a Yelusalem fu akisi den baala di be e tii a wooko san den mu du. Ma sama be wani sani waka na a fasi ya? Pawlesi taki: „A di Masaa  soi mi taki mi mu go, meke mi go.” A sani ya e soi taki a Kelestesi be meke Pawlesi go a den baala di be e tii a wooko fu den be sa seeka a toli ya.​—Galasiyasama 2:1-3.

11. (a) San son wan fu den Kelesten di be de Dyu be e biibi? (b) Fa Pawlesi be soi taki ai holibaka gi den baala di be e teke fesi a Yelusalem? (Luku a maiki a ondoo.)

¹¹ Kelestesi be yeepi den baala di be e tii a wooko fu fusutan taki Kelesten á be abi fu besnei (Toli 15:19, 20). Ma toku baka omen yali den Dyu Kelesten be e besnei den manpikin fu den ete. Bakaten den owluman fu Yelusalem yee wan lolo taki. Son Kelesten be fende taki Pawlesi nai lesipeki a Weiti fu Mosesi. Neen den owluman sende Pawlesi fu du wan sani di e soi taki ai lesipeki a Weiti * (Luku a maiki a ondoo.) (Toli 21:20-26). Den taigi en taki en anga fo man mu go na a tempel da den kiin denseefi enke fa a Weiti be taki, da den sama be o si taki ai lesipeki a Weiti. Pawlesi be sa taki: „San na a soso sani di den wani mi du ya? Mi nai booko mi ede anga a toli ya. A den Dyu Kelesten di á fusutan a toli ya e booko den ede anga a sani ya.” Ma Pawlesi be fusutan taki den baala be du a sani ya fu di den be wani den baala anga sisa libi na a wan, neen meke a du san den taigi en. Ma kande wi e akisi useefi saide Yesesi á losi a polobelema ya gawgaw, bika a Weiti fu Mosesi á be e teli moo baka di Yesesi dede.​—Kolosesama 2:13, 14.

12. Saide Yesesi á be seeka a toli fu a besnei di sama be mu besnei wanten?

¹² Ai teke ten fu gwenti wan nyun fasi fu du sani. A be teke ten fosi son wan fu den Dyu Kelesten fusutan taki a á be de fu den holi a Weiti fu Mosesi moo (Yohanisi 16:12). Den be e denki taki efu wan sama wani toon Gadu mati a mu besnei namonamo (Genesesi 17:9-12). Son wan be e denki taki den taa Dyu be o du ogii anga den efu den be du sani taa fasi (Galasiyasama 6:12). Ma di a yuu doo, Yesesi meke Pawlesi sikiifi biifi fu soi den baala anga sisa san den be mu du.​—Romesama 2:28, 29; Galasiyasama 3:23-25.

13. San o yeepi u fu du sani enke fa Kelestesi soi wi aini a ten ya?

¹³ A Kelestesi e tii a Kelesten kemeente aini a ten ya tu. Neen meke efu yu á sabi saide a olikanisâsi e du son sani, i mu pakisei fa Kelestesi be e tii a foluku fu Gadu aini a ten di pasa. Aini a ten fu Yowsuwa anga a ten fu den apostel, Kelestesi be e soi a foluku fu Gadu fa den be mu du sani. A sani ya be yeepi den fu ogii á miti den. A be e meke den biibi moo  taanga. A be yeepi den fu libi na a wan tu.​—Hebrewsama 13:8.

14-16. Fa den leli di „a koni saafu di u sa fitoow” e gi wi e yeepi u fu si taki Kelestesi wani u biibi kon moo taanga?

¹⁴ Na „a koni saafu di u sa fitoow” e soi u fa u mu du sani aini a ten ya. Den e yeepi u na a yuu di wi abi yeepi fanowdu (Mateyesi 24:45). A sani ya e soi taki Yesesi e booko en ede anga u. Marc abi fo pikin. A taki: „Saatan e meke moiti fu booko osufamii fu di a wani buuya den kemeente. A osufamii anbegi di u mu holi ala wiki e soi den dda di e teke fesi aini den osufamii taki den mu meke moiti fu yeepi den osufamii!”

¹⁵ Efu wi e poti pakisei na a fasi fa Kelestesi e tii wi, wi o si taki a wani yeepi u fu u biibi kon moo taanga. Patrick a wan owluman. A taki: „Son baala anga sisa be fii booko-saka di den be yee taki wi o holi den peleikiwooko komakandaa a sataa anga sonde aini kulu.” Ma a baala taki a fasi fa a peleikiwooko komakandaa sete e soi taki Yesesi e booko en ede anga ala sama aini a kemeente. Son baala efuso sisa di á be e go a peleikiwooko ala yuu fu di sen e kisi den, be kon si taki denseefi mu holibaka gi a peleikiwooko. A sani ya taanga den biibi.

¹⁶ Kelestesi e yeepi u tu fu poti pakisei na a peleikiwooko, a moo pelensipali wooko di e du a goontapu. (Leisi Malikisi 13:10.) André á toon owluman langa ete, ma ai meke moiti fu holibaka gi a olikanisâsi fu Yehofa ala yuu, winsi den kengi a fasi fa den be e du sani. A taki: „A sende di den sende wantu baala anga sisa fu Betel fu go du a pioniliwooko e membee u taki a dei fu Yehofa koosube. U mu du ala san u poi aini a peleikiwooko.”

17, 18. Saide u mu poti pakisei a den wini di wi e fende te a olikanisâsi kengi a fasi fa den be e du son sani?

¹⁷ Den sani di u Kownu Yesesi Kelestesi e leli wi e yeepi wi aini a ten ya. Den o yeepi wi aini a ten di e kon tu. Poti pakisei a den wini di i fende di i du sani enke fa olikanisâsi soi u den ten di pasa. Te wi e holi a osufamii anbegi u sa luku sowtu wini wi osufamii fende fu a nyun fasi fa sani sete a den komakandaa anga a peleikiwooko.

¹⁸ Efu wi e holi a pakisei taki Yehofa e belesi u te u holibaka gi a olikanisâsi fi en, a ná o taanga gi u fu du sani enke fa a soi u. Boiti dati wi o go e piisii. Wi e fende wini fu di u man poti den sani fu a olikanisâsi a u telefon efuso tablet. Neen meke a olikanisâsi nai doloki buku ipi so moo. A sani ya e yeepi a olikanisâsi fu a á lasi moni tumisi. A sani ya e meke moo sama yee a bun nyunsu tu. Neen meke u mu meke moiti fu wooko anga den sani ya. Te wi e du a sani ya wi e soi taki wi e holibaka gi Kelestesi, bika a wani u koboloiki den sani fu a olikanisâsi bun.

19. Saide u mu du sani enke fa Kelestesi soi wi ala yuu?

¹⁹ Te wi e du sani enke fa Kelestesi soi u, wi e yeepi den baala anga sisa fu den biibi kon moo taanga. Wi e yeepi den fu libi na a wan tu. Di sani kengi a Betel a hii goontapu André taki: „Den baala anga sisa di be e wooko a Betel á mandii di den baala gi den wan taa wooko. Ai bigi gi mi fu si fa den tyai denseefi. A sani ya yeepi mi fu moo fitoow Yehofa anga fu lesipeki den baala di e tii a wooko. Anga ala piisii den du iniiwan wooko di den baala gi den.”

20, 21. (a) Saide u sa fitoow Kelestesi, u Fesiman? (b) San wi o luku aini a taa artikel?

²⁰ Dyonson u Fesiman, Yesesi Kelestesi „o wini ala den” feyanti fi en. A o ’du sani di o meke sama lesipeki en’ (Openbaring 6:2; Psalm 45:4). Nownow Yesesi e seeka u gi a nyun goontapu anga den wooko di wi o du a ten de. Wi o abi fu leli den sama di o weki baka. Boiti dati wi o seeka a goontapu fu a toon wan paladeisi.

²¹ Winsi san e pasa, so langa wi e fitoow u Fesiman anga u Kownu Yesesi, a o tyai u doo a nyun goontapu. (Leisi Psalm 46:1-3.) A á makiliki ala yuu fu holibaka gi den baala te den kengi a fasi fa a olikanisâsi e du sani, moomoo te useefi abi fu kengi a fasi fa u be gwenti du son sani. San u mu du fu u biibi á swaki te den sani ya pasa? San o yeepi u fu dini Yehofa anga piisii go doo? Wi o luku a toli ya aini a taa artikel.