1, 2. (a) San Yesesi be e si enke a moo pelensipali wooko? Saide a be e si a wooko ya enke a moo pelensipali wooko? (b) San u mu du efu u wani de bun wookoman te wi e „wooko makandii anga Gadu”?

YESESI KELESTESI a be wan tembeeman, bakaten a toon wan sama di e peleiki (Malikisi 6:3; Romesama 15:8). A be sabi ala den tu wooko ya. Di a be e du a tembeewooko a be sabi wooko anga den wookosani fi en. A be e meke udu sani di sama be abi fanowdu. A be sabi a Wowtu fu Gadu bun, neen meke a be man yeepi omen sama fu fusutan a Wowtu fu Gadu (Mateyesi 7:28; Lukasi 24:32, 45). Di Yesesi be abi 30 yali, a fika a tembeewooko neen a go du a peleikiwooko, bika a be sabi taki a dati a be a moo pelensipali wooko. A be taki wan fu den sani di Gadu be sende en fu a kon du a goontapu, a fu peleiki a bun nyunsu fu Gadu Kownukondee (Mateyesi 20:28; Lukasi 3:23; 4:43). Yesesi be e si a paati di a be mu paati a bun nyunsu enke a moo pelensipali sani. A wani u si a wooko ya enke a moo pelensipali sani tu.​—Mateyesi 9:35-38.

² Gaanse fu wi a ná tembeeman, ma ala wi a peleikiman di e leli sama a bun nyunsu. A wooko ya pelensipali te neen Gadu seefi e holibaka gi u. Beibel taki „wi a sama di e wooko  makandii anga Gadu” (1 Korentesama 3:9; 2 Korentesama 6:4). Wi e si taki a sani di a psalm sikiifiman taki a tuu. A taki: „Ala san yu e taki a tuu” (Psalm 119:159, 160). Ala san Yehofa taki a tuu, neen meke u wani ’sabi fa u mu wooko anga a tuu leli di de aini a Wowtu fi en’ te wi e peleiki. (Leisi 2 Timotiyesi 2:15.) Neen meke wi e meke moiti fu koboloiki a Beibel moo bun, a moo pelensipali wookosani di wi abi fu yeepi sama fu sabi Yehofa, Yesesi anga a Kownukondee fu Gadu. A olikanisâsi fu Yehofa seeka omen taa sani gi u di e yeepi u fu du a peleikiwooko moo bun. Ma u mu sabi fa fu wooko anga den sani ya, bika anga den wi e leli sama.

3. San u mu meke moiti fu du te wi e peleiki? Fa Toli 13:48 e yeepi u fu du a sani ya?

³ Den sani di wi abi a fu leli sama, a ná fu peleiki gi sama namo da a kaba. Saide u taki so? „Peleiki” a te wan sama e paati wan bosikopu, ma „leli” wani taki wan sama e taigi wan taawan a bosikopu finifini. Ai yeepi a sama fu fusutan san a taigi en. A sani ya e yeepi a sama fu du den sani di a leli. Aini den lasiti dei fu a goontapu ya, u mu meke moiti fu sutudeli Beibel anga sama. U mu leli den fu den kon sabi a tuu, fu den sa waka a Yesesi Kelestesi baka. Dati wani taki u mu suku „ala den sama di ati bun fu fende a teego libi”, da u yeepi den fu kon dini Yehofa.​—Leisi Toli 13:44-48.

4. Fa wi o du fende „den sama di ati bun fu fende a teego libi”?

⁴ Fa wi o du fende „den sama di ati bun fu fende a teego libi”? A wan kodo fasi fa den fosi Kelesten be man fende den sama ya, a te den be e peleiki. Yesesi be taigi den bakaman fi en taki: „Winsi sowtu foto efu kampu u go, suku sama di fiti fu yee a bosikopu” (Mateyesi 10:11). Na aseefi sani u mu du aini a ten ya. Ma efu den sama e si a bun nyunsu enke lawlaw sani, efu den e fii denseefi, efuso den nai booko den ede anga Gadu, u ná o dwengi den fu aliki u. Wi e suku sama di e si a bun nyunsu enke wan pelensipali sani, sama di abi sakafasi anga sama di wani sabi a tuu. Wi e si a bun nyunsu di wi e paati enke a tembeewooko di Yesesi be e du. Fosi Yesesi be meke wan bangi, wan doo efuso wan taa sani, a be e luku sowtu udu bun fu meke den sani ya. Baka dati a be e teke a wookosani kedee fi en, da a meke a sani enke fa a be leli. Na aseefi sani u mu du aini a ten ya. U mu suku sama di wani aliki, da u luku sowtu wan fu den sani di wi abi fu leli sama u sa koboloiki fu yeepi den toon wan bakaman fu Yesesi.​—Mateyesi 28:19, 20.

5. Gi wan ageisitoli di e soi saide te wi e leli sama u mu sabi wooko anga den sani di wi e koboloiki fu leli sama. (Luku a fowtow na a bigin.)

⁵ Ala wookosani abi den sani di den e du. Pakisei den wookosani di Yesesi be e koboloiki te a be e tembee. A be abi wookosani fanowdu fu maiki sani, fu koti, fu boo, fu meke a udu kon lontu efuso fokanti, anga fu miti den pisi kon a wan. Ala den sani di wi e koboloiki fu leli sama, abi den sani di den e du tu. Neen meke wi o luku fa u mu wooko anga den sani ya.

6, 7. (a) Fa yu e wooko anga a jw.org kaita? (b) Saide wi e wooko anga den pampila di wi e kai sama fu kon a den komakandaa fu u?

⁶ A jw.org kaita. Den kaita ya nyoni, ma  den abi wini. Den e yeepi sama fu kon sabi sama a Yehofa Kotoigi. Den e yeepi sama fu sabi fa den mu go na a website fu u, jw.org. Te den go na a website ya den sa akisi fu wan sama go sutudeli Beibel anga den. A moo enke 400.000 sama akisi a jw.org fu sama sa go sutudeli Beibel anga den. Ala dei a omen taa sama di e go a jw.org e akisi efu wan sama sa go sutudeli Beibel anga den. A be o bun fu e tyai den kaita ya ala yuu te wi e go a peesi, da u sa gi den sama di wi e miti.

⁷ A pampila di wi e kai sama fu kon a den komakandaa fu u. A sikiifi na a pampila ya taki: „Wi e kai yu fu kon sutudeli Beibel makandaa anga Yehofa Kotoigi.” A sikiifi tu taki den sa sutudeli Beibel „a den komakandaa fu wi”. Boiti dati „wan sama sa kon sutudeli anga” den. A pampila ya e meke sama sabi wi, ma ai gi ’den sama di sabi taki den abi Gadu fanowdu’ taanga-sikin fu sutudeli Beibel anga u tu (Mateyesi 5:3). Winsi wan sama nai sutudeli Beibel a sa kon a den komakandaa fu u. Te den kon a komakandaa denseefi o si taki a omen sani den sa leli aini a Beibel.

8. Gi wan ondoofenitoli di e soi saide sama mu kon a den komakandaa fu u, winsi a wan leisi namo.

⁸ U mu e kai sama fu kon winsi wan leisi a den komakandaa fu u. Saide a sani ya de taanga fanowdu? Te den o kon a komakandaa den o si taki a san de aini a Beibel den Yehofa Kotoigi e leli sama. Den o si tu taki wi e yeepi sama fu kon sabi Gadu, winsi fa den falisi keliki nai du a sani ya (Yesaya 65:13). Wan toowpaa fu Ameekankondee den e kai Ray anga Linda be fusutan a sani ya wantu yali pasa. Den be e biibi Gadu. Den be wani sabi en moo bun tu. Neen meke den taki den o go na ala den keliki di de na a foto pe den e tan, da den o luku tu sani. A fosi wan, den be o luku efu den o leli sani na a keliki. Du fu tu, den be o luku efu den sama fu a keliki be wei koosi di fiti. A omen yali den du a sani ya, bika keliki be lai na a foto pe den e tan. Toku den á fende san den be e suku. Nawan sani den á leli a den keliki. Den sama di be e go a den keliki seefi á be e wei koosi di fiti. Di den waka komoto aini a lasiti keliki di den be taki den o go, Linda go a wooko, neen Ray go a osu. Di Ray e lei go a osu, a si wan Kownukondee zaal, neen a pakisei taki: ’Meke mi go luku san den e du ape.’ Fu ala den keliki di a go, disi be de taa fasi. Ala den sama di be de na a Kownukondee zaal be abi bun manii. Den be wei koosi di fiti tu. Ray go sidon te fesi aini a zaal. A be lobi den sani di a leli. A toli ya e meke u membee san apostel Pawlesi be taki. A be taki wan sama di kon fosi leisi a komakandaa o si taki „Gadu de anga u tuu” (1 Korentesama 14:23-25). Fanafu a dei de Ray bigin go a komakandaa ala sonde. Baka dati a bigin go a den komakandaa di wi e holi a mindiiwiki. Linda seefi bigin go a komakandaa. Winsi fa den be abi wan sani fu 70 yali kaba, den sutudeli Beibel neen den dopu.

9, 10. (a) Saide a makiliki fu wooko anga den talakitaati? (b) Fa u mu wooko anga a talakitaati di den e kai San na a kownukondee fu Gadu?

⁹ Talakitaati. A aitin talakitaati wi abi. A makiliki fu bigin taki anga wan sama  anga den. Fanafu di den talakitaati ya bigin kon aini 2013, a wan sani fu feifi dunsu miliyun fu den u doloki kaba. Na aseefi fasi ala den talakitaati ya meke. Neen meke efi i sabi fa fu wooko anga wan fu den, i sa wooko anga ala den. Fa i sa bigin taki anga wan sama te yu e wooko anga wan fu den talakitaati?

¹⁰ Kon u taki i wani wooko anga a talakitaati di den e kai San na a Kownukondee fu Gadu? Soi a sama a akisi di de a fesise fu a talakitaati, da i akisi en taki: „Yu akisi iseefi wan leisi kaba san na a Kownukondee fu Gadu? I si enke a Kownukondee fu Gadu a . . . ?” Akisi en sowtu wan fu den dii sani a be o piki. A á de fi i taigi en taki a piki bun efuso a á piki bun. A moo bun fi i soi en a pisi pe e taki „San Beibel e taki fu a toli ya?”, da i leisi den tekisi di sikiifi ape, Daniyeli 2:44 anga Yesaya 9:6. Fosi i tapu a taki, go na a pisi di den kai „Go pakisei a sani ya luku osi”, da i akisi a sama a sani di sikiifi ape. „Fa a libi o de te Gadu Kownukondee o tii?” I sa piki a akisi ya te i go taa leisi. I sa taki fu pisi 7 fu a bolosilo Gadu abi bun nyunsu gi u! A bolosilo ya a wan fu den wookosani di wi e koboloiki te wi e bigin sutudeli Beibel anga sama.

11. Sama den meke A Wakititolen anga Ontwaakt! gi? San u mu sabi fosi u wooko anga den buku ya?

¹¹ A Wakititolen anga a Ontwaakt! Den buku ya paati moo iniiwan taa buku a goontapu. Den de aini omen tongo moo iniiwan taa buku tu. Na ala se fu goontapu sama e leisi den, neen meke den toli a fesise fu den buku ya, a toli di ala sama wani sabi. U mu koboloiki den fu yeepi sama fu poti pakisei a den moo pelensipali sani fu a libi. Ma u mu sabi fosi sama den meke den buku ya gi.

12. (a) Sama den meke a Ontwaakt! gi? Saide den meke en? (b) Sowtu moin ondoofenitoli yu abi di i wooko anga en taade ya?

¹² Ontwaakt! * (luku a maiki a ondoo) meke gi sama di á sabi Beibel bunbun anga sama di á sabi Beibel seefiseefi. Kande den sama ya á sabi san Kelesten e biibi, kande den nai biibi Gadu efuso kande den nai biibi taki Beibel poi yeepi den. Wan fu den moo pelensipali sani saide den meke a Ontwaakt!, a fu yeepi sama fu biibi taki wan Gadu de (Romesama 1:20; Hebrewsama 11:6). Ai yeepi sama fu biibi taki Beibel na „a wowtu fu Masaa Gadu” (1 Tesalonikasama 2:13). Den dii Ontwaakt! fu 2018 e soi san u mu du fu de koloku („De weg naar geluk”), san u sa du fu wi osufamii waka bun („Tips voor een gelukkig gezin”), anga fa u sa yeepi sama di e kusumi („Omgaan met verlies”).

13. (a) Sama den meke A Wakititolen fu a peleikiwooko gi? (b) Sowtu moin ondoofenitoli yu abi di i wooko anga en taade ya?

¹³ A moo pelensipali sani saide den meke A Wakititolen di wi e paati aini a peleikiwooko, a fu yeepi sama di e lesipeki Gadu fu fusutan a Beibel moo bun. Kande den sabi wantu sani fu Beibel, ma den á sabi san ai leli u tuutuu (Romesama 10:2; 1 Timotiyesi 2:3, 4). Den dii Wakititolen di wi o paati aini a peleikiwooko 2018 e piki den dii akisi ya: „Beibel poi yeepi wi aini  a ten ya?”, „Fa sani o waka aini a ten di e kon?”, „Gadu e booko en ede anga yu?”

14. (a) Saide den meke den fo felon di wi e koboloiki fu leli sama? (b) Fa sani waka di i soi sama den felon ya?

¹⁴ Felon. Aini a ten fu Yesesi den tembeeman á be abi wookosani di be e wooko anga sitolomu, ma den tembeeman fu a ten ya abi den sani de. Den abi masini fu boo sani, masini fu koti sani, masini di den e sikafu sani anga taa sowtu masini. Boiti den buku fu u, a so useefi abi felon di u sa daai gi sama. Fo fu den felon di wi e koboloiki fu leli sama na: Saide a bun fu sutudeli Beibel?, Fa wi e sutudeli Beibel anga sama?, San e pasa aini wan Kownukondee zaal?, anga Yehofa Kotoigi​—Sama a wi? Son wan fu den felon ya nai doo tu miniti. U sa daai den gi sama te u miti den a fosi leisi. Te u miti wan sama di abi ten efuso te u go a wan sama di u be miti kaba, da u sa daai den moo langa felon gi den. Den felon ya a bun wookosani, bika den e gi sama taanga-sikin fu sutudeli Beibel efuso fu kon a den komakandaa fu u.

15. Gi wantu ondoofenitoli di soi fa den sama e fii te den si den felon fu wi aini den mamabee tongo.

¹⁵ Wan sisa be miti wan uman di be komoto a Mikronesiya. A uman ya mamabee tongo a be Yaptongo. A sisa soi en a felon di den e kai Saide a bun fu sutudeli Beibel? aini en tongo. Di a felon bigin, neen a uman taki: „A mi mamabee tongo de ya. Mi nai biibi! Te mi aliki a fasi fa ai taki da mi e yee taki mi anga en a fu a wan pisi kondee. Ai taki mi tongo!” Baka dati a taki a o luku ala den felon di de a jw.org aini en tongo. A taki a o leisi ala den buku di de aini en tongo a jw.org tu. (Luku Toli 2:8, 11 tu). Wi abi ete wan ondoofenitoli fu wan sisa fu Ameekankondee. A sisa ya be sende aseefi felon ya gi wan baala pikin fi en di be e tan a wan taa kondee. A felon be de aini a mamabee tongo fu a boi. Baka di a boi luku a felon neen a sende wan e-mail gi a sisa. A sikiifi taki: „A pisi di e taki a wan ogii-ati sama e tii goontapu doo mi ati. Mi poti mi nen fu wan sama kon sutudeli Beibel anga mi.” A wan piisii sani bika den tapu a wooko fu u na a kondee pe a boi ya e tan!

16. Saide den meke a bolosilo di den e kai: (a) Aliki Gadu da yu o libi fu tego. (b) Gadu abi bun nyunsu gi u! (c) Sama e du a wani fu Yehofa aini a ten ya?

¹⁶ Bolosilo. Fa u sa yeepi wan sama di nai leisi bunbun efuso wan sama di ná abi den buku fu u aini en mamabee tongo? U sa wooko anga a bolosilo di den e kai Aliki Gadu da yu o libi fu tego. * (Luku a maiki a ondoo.) Wan moin bolosilo di u sa koboloiki te wi e bigin sutudeli Beibel anga wan sama, na a bolosilo di den e kai Gadu abi bun nyunsu gi u! I sa soi a sama den 14 toli di de na a lasiti bladzijde fu a bolosilo, da yu akisi en sowtu wan fu den toli a wani sabi. I sa bigin sutudeli a toli di a wani sabi  anga en. I puubei a sani ya wan leisi kaba di i be go du fu tu leisi a wan sama? Du fu dii bolosilo di wi e koboloiki fu leli sama, na a bolosilo di den e kai Sama e du a wani fu Yehofa aini a ten ya? A bolosilo ya meke fu yeepi den sama di e sutudeli Beibel kaba fu kon sabi a olikanisâsi fu u moo bun. Efi i wani sabi fa i sa yeepi den Beibelsutudi fu yu anga a bolosilo ya, da i sa luku A libi fu wi enke Kelesten anga a peleikiwooko​—komakandaa buku fu maart 2017.

17. (a) Saide den meke a San Bijbel kan leri wi? anga a Meki Gado tan lobi yu buku? (b) San ala sama di wani dopu mu du? Saide den mu du a sani ya?

¹⁷ Buku. Baka te i bigin sutudeli anga a sama aini wan fu den bolosilo, i sa abaa go aini a buku di den e kai San Bijbel kan leri wi? winsi yu á kaba anga a bolosilo. A buku ya e yeepi sama fu kon sabi den pelensipali toli fu Beibel. Efu a sama kaba a buku ya, neen ai go a fesi, i sa go doo anga a buku di den e kai Meki Gado tan lobi yu. A buku ya o yeepi a sama fu fusutan fa a mu wooko anga den sani di a leli aini Beibel. Ná feegete, winsi a sama dopu a mu kaba sutudeli den tu buku ya. A sani ya o yeepi en fi en biibi taanga. A o yeepi en fu dini Yehofa anga en hii ati tu.​—Leisi Kolosesama 2:6, 7.

18. (a) San 1 Timotiyesi 4:16 e gi u taanga-sikin fu du te wi e leli sama? Sowtu wini wi o fende te wi e du den sani ya? (b) San na a maiki di u wani doo te wi e koboloiki den wookosani di wi abi fu leli sama?

¹⁸ Wi a Yehofa Kotoigi, neen meke wi abi a faantiwowtu fu paati „a bun nyunsu” di o meke sama fende teego libi (Kolosesama 1:5; leisi 1 Timotiyesi 4:16.) Wi abi wantu wookosani di e yeepi u fu du a sani ya. (Luku a faki „ Den sani di wi abi fu leli sama.”) Meke u meke moiti fu wooko anga den. Ala u sa luku anga sowtu wan u wani wooko anga on ten wi o wooko anga den. Ma ná feegete, a wooko fu wi a ná fu paati buku da a kaba. Efu wan sama á wani aliki a nyunsu di wi e paati, wi á mu fika buku gi en. A wooko fu wi a fu leli sama di ati bun, sama di abi sakafasi anga sama di wani sabi Gadu fu den sa waka a Yesesi baka. Wi e suku „den sama di ati bun fu fende a teego libi”.​—Toli 13:48; Mateyesi 28:19, 20.