1, 2. (a) Fa wi e fii te u libi kengi wanboowanboo? (Luku a fowtow na a bigin.) (b) San Psalm 131 taki o yeepi u fu wi á booko wi ede tumisi te u libi kengi?

DI LLOYD anga Alexandra wooko 25 yali a Betel, den baala sende den go du a kowownu pioniliwooko. Biginbigin a sani ya á be switi gi den. Lloyd taki: „Mi be e si Betel anga a wooko di mi be e du a Betel enke mi libi. Winsi fa mi be e fusutan saide den baala gi u wan taa faantiwowtu, toku den mun baka di u komoto a Betel mi be e fii enke a di den ná abi u fanowdu moo meke den puu wi a Betel.” Lloyd be e fusutan saide den baala be gi en wan taa faantiwowtu, ma toku a be e fii booko-saka son yuu.

² Son leisi sani e pasa aini u libi di wi á be denki. Den sani ya sa gi u booko-ede. Den sa meke u fii booko-saka  tu (Odo 12:25). San o yeepi u fu wi á booko wi ede tumisi te den sani ya miti u? (Leisi Psalm 131:1-3.) A artikel ya o soi u san yeepi wantu sama di be e dini Yehofa a fositen, anga wantu sama fu a ten ya fu den á booko den ede tumisi di den libi be kengi wanboowanboo.

3. San be miti Yowsefu?

³ Pakisei a toli fu Yowsefu. Yakopu be abi omen manpikin, ma a be moo lobi Yowsefu. Neen meke den baala fi en be e dyalusu anga en. Di Yowsefu be abi 17 yali den seli en enke saafu (Genesesi 37:2-4, 23-28). A 13 yali langa a nyan pina a Egepte. A be wooko enke saafu fosi, bakaten den poti en a sitaafu-osu. Yowsefu be lobi en dda anga en hii ati ma a be de faawe fi en. San be yeepi en fu a á lasi-ati? San yeepi en fu a á holi den baala fi en na ati?

4. (a) San Yowsefu be e du di a be de a sitaafu-osu? (b) Fa Yehofa aliki den begi fu Yowsefu?

⁴ Di Yowsefu be de a sitaafu-osu, a be musu e pakisei fa Yehofa e yeepi en (Genesesi 39:21; Psalm 105:17-19). Kande a be e pakisei den sani di Yehofa be meke a deen di a be moo yonkuu. A sani ya be musu gi en taanga-sikin taki Yehofa de anga en (Genesesi 37:5-11). Kande a be e begi ala yuu tu, da a be e taigi Yehofa san de neen ati (Psalm 145:18). Yehofa be e piki den begi fu Yowsefu fu soi en taki a be o „de anga en” winsi san be o miti en.​—Toli 7:9, 10. * (Luku a maiki a ondoo.)

5. Fa „a freide fu Gadu” e gi u taanga-sikin fu dini Yehofa?

⁵ Winsi san e miti u, u poi abi „a freide fu Gadu” di e kibii u „fusutan”. A freide ya o yeepi u fu wi á buuya (Leisi Filipisama 4:6, 7.) Te wi abi booko-ede efuso te wi e kusumi, „a freide fu Gadu” sa gi wi a kaakiti di wi abi fanowdu fu wi á gi abaa te wi e dini Yehofa. Wi o taki fu wantu baala anga sisa fu a ten ya di „a freide fu Gadu” be yeepi.

6, 7. Fa begi sa yeepi u fu wi á buuya te sani miti u? Gi wan ondoofenitoli.

⁶ Di Ryan anga Juliette yee taki den ná o de spesuutu pionili moo, den be fii booko-saka. Ryan taki: „U begi Yehofa. U be sabi taki u be o abi fu soi taki wi e fitoow en. Gaanse fu den baala anga sisa fu u kemeente á be de langa a waaleiti, neen meke u begi Yehofa fu a yeepi u fu u biibi taanga fu den be sa waka a u baka.”

⁷ Fa Yehofa piki a begi fu den? Ryan taki: „Faisi u kaba begi, neen wi á fii booko-saka moo. Wi á be e booko wi ede moo tu. A freide fu Gadu kibii wi ati anga a fasi fa u be e denki. U be fusutan taki efu u nai booko wi ede  tumisi u be o man wooko go doo gi Yehofa.”

8-10. (a) Fa a yeye fu Gadu sa yeepi u te wi abi booko-ede? (b) Fa Yehofa e yeepi u te wi e poti pakisei na a dini di wi e dini en?

⁸ A yeye fu Gadu poi yeepi u fu wi á buuya. A poi yeepi u tu fu fende wantu tekisi aini Beibel di e soi san na a moo pelensipali sani aini a libi (Leisi Yohanisi 14:26, 27.) Luku san be pasa anga Philip anga Mary, wan toowpaa di wooko 25 yali langa a Betel. Aini fo mun so, neen a mma fu a man dede, a mma fu a uman dede. Boiti dati, wan taa famii fu den dede. Anga ala den be abi fu solugu Mary dda di e lasi enseefi.

⁹ Philip taki: „Mi e be e si enke a be e go bun, ma toku mi be e fii enke mi e mankei wan sani. Mi leisi wan sutudi-artikel neen mi si Kolosesama 1:11. Mi be e holidoo, ma mi be mu meke moiti moo. ’Anga ala pasensi anga piisii mi be mu holidoo.’ A tekisi ya membee mi taki a ná a fasi fa mi libi e waka mu meke mi piisii, ma na a yeye fu Gadu mu meke mi piisii.”

¹⁰ Di Philip anga Mary poti pakisei na a dini di den e dini Yehofa, Yehofa belesi den a omen fasi. Di den komoto a Betel den fende Beibelsutudi di e go a fesi. Den Beibelsutudi ya wani sutudeli moo enke wan leisi aini a wiki. Mary taki: „Den be e meke u piisii. A sani ya a wan fasi fa Yehofa be e soi u taki ala sani o go bun.”

11, 12. San Yowsefu du meke Yehofa belesi en? (b) Fa Yehofa belesi Yowsefu?

¹¹ Son leisi te u libi kengi wanboowanboo, wi e booko wi ede te da a soso a polobelema fu u wi e pakisei. A sani ya be sa pasa anga Yowsefu, ma toku a meke moiti fu piisii winsi san be e miti en. Leti enke fa a be e wooko taanga gi Potifar, a so a wooko taanga di a be de a sitaafu-osu. A be e du ala san a edeman fu den sitaafuman taigi en.​—Genesesi 39:21-23.

¹² Wan dei den be sende Yowsefu fu luku tu sitaafuman di be e wooko a Farao osu. Yowsefu libi bun anga den neen meke den fitoow en. Den taigi en san a den booko-ede. Den taigi en  tu taki den deen wan sani a neti di pasa di den á be e kaba fusutan (Genesesi 40:5-8). Yowsefu á be sabi taki na a taki di a be taki anga den man ya be o meke a fii bakaten. Baka tu yali, den puu en a sitaafu neen a toon wan tiiman a Egepte. A Farao wawan be abi makiti moo Yowsefu.​—Genesesi 41:1, 14-16, 39-41.

13. San u mu du efu u wani Yehofa yeepi u te tesi e miti u?

¹³ Leti enke Yowsefu, a so useefi á poi lon gi tesi. Ma efu wi abi pasensi neen wi e du san u poi, Yehofa o belesi u (Psalm 37:5). Winsi wi e booko wi ede efuso winsi wi e buuya, Yehofa ná o fika u (2 Korentesama 4:8). A o de anga u, moomoo efu wi e poti pakisei na a dini di wi e dini en.

14-16. Saide u sa taki Filipesi be e du ala san a man gi Yehofa winsi san be e pasa aini en libi?

¹⁴ Filipesi be e poti pakisei na a dini di a be e dini Yehofa, winsi san be e pasa. Den baala be gi en wan wooko a Yelusalem. A be lobi a wooko ya (Toli 6:1-6). Neen sani kengi wanten. Baka di den kii Sitefanesi, neen sama bigin du ogii anga den Kelesten. Neen meke omen Kelesten lowe komoto a Yelusalem. Ma Filipesi be wani du ala san a be man gi Yehofa, neen meke a go a Samaliya fu paati a bun nyunsu. A omen sama fu a foto ya á be yee a bun nyunsu ete.​—Mateyesi 10:5; Toli 8:1, 5.

¹⁵ Filipesi be de kabakaba fu go a pe a yeye fu Yehofa be wani a go. Neen meke Yehofa sende en go a wan peesi pe sama á be yee a bun nyunsu ete. A omen Dyu be e si Samaliyasama wan fasi, neen meke den á be e libi bun anga den. Ma Filipesi á be e paati bee. A be de kabakaba fu paati a bun nyunsu gi den. Den Samaliyasama be e ’poti pakisei a den sani di Filipesi be e leli den’.​—Toli 8:6-8.

¹⁶ Baka dati a yeye fu Gadu sende Filipesi fu a go paati a bun nyunsu a Asdod anga Sesareya. Somen fu den sama fu den foto ya a ná be Dyu  (Toli 8:39, 40). Baka wan sani fu 20 yali di Filipesi be e paati a bun nyunsu a Samaliya, neen sani kengi baka. Now a be abi uman anga pikin. Winsi fa Filipesi libi be kengi, a be e du ala san a be man aini a peleikiwooko, neen meke Yehofa belesi en anga en osufamii.​—Toli 21:8, 9.

17, 18. Te u libi kengi, fa a poti di wi o poti pakisei na a peleikiwooko o yeepi u?

¹⁷ A omen baala anga sisa di e du a fuuten diniwooko taki den e poti a dini di den e dini Yehofa a fesi winsi san e miti den. Den taki na a sani ya e yeepi den fu piisii winsi san e pasa. Di wan toowpaa fu Zuid-Afiikan den e kai Osborne anga Polite komoto a Betel, den be denki taki a gawgaw den be o fende wooko anga wan peesi fu tan. Osborne taki: „A tyali taki wi á fende wooko na a yuu di u be denki.” Polite taki: „A dii mun langa wi á be abi wooko. Boiti dati wi á be abi nawan moni. A sani ya be de enke wan tesi gi u.”

¹⁸ San yeepi Osborne anga Polite aini a taanga ten de? Osborne taki: „A peleiki di u be e peleiki anga a kemeente yeepi u fu wi á kusumi tumisi.” Den á be sidon a osu e kusumi, ma den be e du ala san den be man aini a peleikiwooko. A sani ya meke den piisii tuutuu. Osborne taki: „U suku wooko na ala se. Te fu kaba neen u fende wooko.”

19-21. (a) San o yeepi u fu wi á buuya te tesi miti u? (b) San u mu du te u libi kengi wanboowanboo?

¹⁹ A artikel ya leli u taki efu wi e du ala san u man te tesi miti u anga efu wi e fitoow Yehofa, da winsi san e pasa u ná o buuya (Leisi Mika 7:7.) Kande wi o fusutan bakaten taki, a  kengi di u libi kengi yeepi u fu toon wan moo bun mati fu Yehofa. Sisa Polite taki a komoto di a komoto a Betel, yeepi en fu sabi san a wani taki fu fitoow Yehofa winsi a libi e taanga. A taki: „Mi toon wan moo bun mati fu Yehofa.”

²⁰ Mary di u be taki fi en na a bigin e solugu en dda te anga now. Ai du a pioniliwooko tu. Mary taki: „Mi leli taki te mi e booko mi ede anga wan sani mi mu begi, da mi fika ala sani gi Yehofa. Na a sani ya na a moo pelensipali sani di mi leli. Mi o abi a sani ya fanowdu aini a ten di e kon tu.”

²¹ Lloyd anga Alexandra taki a di den libi kengi fosi den si on taanga den biibi de. Den si fa den tesi di miti den yeepi den. Den si taki den biibi taanga sai fu toosutu den te den abi polobelema. Den si tu taki den tesi di miti den yeepi den fu toon wan moo bun sama.

22. Sowtu wini wi o fende efu wi e du ala san u man fu sani go moo bun te tesi e miti u?

²² Aini a ten ya u libi sa kengi wanboowanboo. Kande a olikanisâsi gi u wan taa wooko fu du, kande u siki efuso u mu solugu wan famii fu u fu di sani miti den. Winsi san e miti i, i mu biibi taki Yehofa e booko en ede anga i. A o yeepi i na a moo bun yuu (Hebrewsama 4:16; 1 Peitilisi 5:6, 7). Te tesi e miti i du ala san i man fu sani go moo bun. Begi Yehofa, i Dda di de a hemel da i fitoow en anga i hii ati. Efi i du den sani ya, da winsi i libi kengi Yehofa o yeepi i fu yu á buuya.